Read Sehwi Hagae 1 Bible Online

Hagae 1 - Sehwi bible

Hagae 1

¹Nana Dario ahennie afoɛ bɔ ɔtɔ so nyɔ ne anu, bosome nzia ne anu, kyẽa bɔ oli moa ne, AWURADE fale ngɔmhyɛlɛniɛ Hagae so hã hyirele Yuda amrado Serubabɛl bɔ ye baba ole Sɛtiɛl ne, ɔne ɔsɔfo panyi Yosua bɔ ye baba ole Yehosadake ne kyɛ,

²“Asafo AWURADE nwa nyoo: Maen he nwa: Mmerɛ bɔ odi kyɛ yɛsa yɛsi AWURADE awuro ne, onnya oddwuli.”

³Yeɛ AWURADE nate ngɔmhyɛlɛniɛ Hagae so hane kyɛ,

⁴“Ɛmɔ de, aso mmerɛ adwu kyɛ ɛmɔtenatena ɛmɔ awuro mɔ bɔ bafa nikyee badwura ye kunu ɔ nu, wɔ aberɛ bɔ awuro he de wabubu wagua ɔ?

⁵Yiti Asafo AWURADE nwa nyoo: Bɔ ɔ́toto ɛmɔ ye, ɛmɔ bɔbɔ deinn ɛ́mɔfa bɛhɔ adwenedwene nu!

⁶Ɛmɔalua pee, nakoso kaaba bie yeɛ ɛmɔanya bafi nu ɔ; ɛmɔdidi, nakoso ɛmɔ ko nyi; ɛmɔno nzaa, nakoso ɔmmo ɛmɔ;[1] ɛmɔkera ɛtena, nakoso ebiala nwo nyɛ ye hye; yeɛ bɔ ode akatuaa ne, ode gua bɔtɔ bɔ ye bo atofitofi ɔ nu.

⁷“Asafo AWURADE nwa nyoo: Bɔ ɔ́toto ɛmɔ ye, ɛmɔ bɔbɔ deinn ɛ́mɔfa bɛhɔ adwenedwene nu!

⁸Yiti ɛmɔhɔ bokaa ne aso bɛɛfa mmakaa bɛbra beesi awuro ne. Me nye kɔgye ye nwo, na ngɔla m’animnyam ali, AWURADE noa dwirɛ ɛne.

⁹Né ɛmɔ nye la ate kyɛ ɛmɔkonya fieso nningyein pee, nakoso, ɛ́mɔnea, ɔyɛle aleɛ kaaba bie. Na ɛmɔfa bɛwale awuro nen, nhu nguale. Nzu ɔ? Bɔ Asafo AWURADE bisa hɔ ɛne. M’awuro ne bɔ wabubu wagua ne ati ɔ, wɔ aberɛ bɔ ɛmɔ de, ebiala nye aboro osi ye bɔbɔ ye awuro ɔ.

¹⁰Ɔnate sɔ ati, nyameɛso mma bosue ngua mma ɛmɔ ko, yeɛ aseɛ koso ngye aleɛ ko.

¹¹Na mato me sa mafrɛ wawa kandinga paa maa wape aseɛ so, mmokaa so, aburoo so, nzaa monɛ so, ngoo so, nikyee biala bɔ benya befi aseɛ so ɔ so, mmenia so, nyɛmmoa so, ɔne ɛmɔ sa noa adwuma mukoraa so.”

¹²Yeɛ Sɛtiɛl awa Serubabɛl ne Yehosadake awa ɔsɔfo panyi Yosua ne maen mmaa ngaa ne amukoraa belili AWURADE bɛ Nyameɛ dwirɛ so, ɔne ngɔmhyɛlɛniɛ Hagae dwirɛ so, kyɛbɔ AWURADE bɛ Nyameɛ somane ye maa ɔhane ne; na maen ne surole wɔ AWURADE nyunu.

¹³Yeɛ Hagae bɔ ɔte AWURADE bɔfoɛ ne, ɔhane AWURADE ngraa ne hyirele maen ne kyɛ, “Ngyi ɛmɔ si, AWURADE noa dwirɛ ɛne.”

¹⁴Na AWURADE kanyane Sɛtiɛl awa Serubabɛl bɔ ɔte Yuda amrado ne ye sunzum, ɔne Yehosadake awa ɔsɔfo panyi Yosua sunzum, yeɛ maen mmaa ngaa ne amukoraa bɛ sunzum. Yiti bɛwale bɛɛyɔle Asafo AWURADE, bɛ Nyameɛ n’awuro ne nwo adwuma,

¹⁵wɔ bosome nzia ne anu, ye kyẽa bɔ ɔtɔ so aburanyɔ ne nna ne, wɔ Nana Dario ahennie afoɛ bɔ ɔtɔ so nyɔ ne anu.