Read Sehwi Hagae 2 Bible Online

Hagae 2 - Sehwi bible

Hagae 2

¹Bosome bɔ ɔtɔ so nzoo ne anu, ye eleburanyɔ ne ko ne aso, AWURADE fale ngɔmhyɛlɛniɛ Hagae so lale ye dwirɛ ali kyɛ,

²“Kã kyire Yuda amrado Serubabɛl bɔ ye baba ole Sɛtiɛl ne, ɔne ɔsɔfo panyi Yosua bɔ ye baba ole Yehosadake ne, ɔne maen mmaa ngaa ne amukoraa kyɛ,

³ ‘Ɛmɔ bɔ ɛmɔaha ne, sua he ye daa nu animnyam ne, ɛmɔ nu nwa yeɛ onwuni ye ɔ? Na kekesaala ye koso, ɛmɔnwu ye sɛ? Sɛ ɛmɔfa bɛtoto ye nwo a, aso ɔtte ɛmɔ nye so nikyee mbaen bie?

⁴Nakoso afei de, Serubabɛl, si wɔ hue, AWURADE noa dwirɛ ɛne; Yehosadake awa ɔsɔfo panyi Yosua, si wɔ hue; yeɛ aseɛ ne aso ama mukoraa, ɛ́mɔsi ɛmɔ hue, AWURADE noa dwirɛ ɛne. Ɛ́mɔyɔ adwuma ne, ofikyɛ ngyi ɛmɔ si, Asafo AWURADE noa dwirɛ ɛne.

⁵ Na kyɛbɔ me ne ɛmɔ yɛyɛle apam wɔ mmerɛ bɔ ɛmɔfili Misraim bɛwale ne, sɔ ala yeɛ me Sunzum te ɛmɔ nu ɔ, yiti nnɛma ɛmɔsuro.

⁶ Na Asafo AWURADE nwa nyoo: Ɔngɔhyɛ biala, ngosa ngɔwoso anwuro ne aseɛ, ɛpo ne aseɛ wosee;

⁷ngɔwoso maen maen mukoraa; na maen maen mukoraa b’anwonya kɔwa wa, na ngɔfa animnyam ngoyi awuro he tɛkyɛ, Asafo AWURADE noa dwirɛ ɛne.

⁸Ɛdwetɛ te me deɛ, yeɛ sikaa kɔkorɛ koso te me deɛ, Asafo AWURADE noa dwirɛ ɛne.

⁹Na awuro he, ye nziɛ ye animnyam ne, ɔkɔyɛ piri kɔtra ye daa deɛ ne, Asafo AWURADE noa dwirɛ ɛne; na ɛwa yeɛ ngɔma asomdwee ɔ, Asafo AWURADE noa dwirɛ ɛne.’ ”

¹⁰Dario ahennie afoɛ bɔ ɔtɔ so nyɔ ne anu, bosome ngona ne anu, ye eleburanyɔ ne nna ne aso, AWURADE fale ngɔmhyɛlɛniɛ Hagae so lale ye dwirɛ ali kyɛ,

¹¹“Asafo AWURADE nwa nyoo: Adwobisa bɔ ɔfa mmeraa he anwo ne, bisa asɔfo nemɔ ma bɛye ye noa:

¹²‘Sɛ ebie fa naen bɔ ɔte krongron ɔ owura ye tena nu, ná ɔfa ye tena ne kã paanoo, anaa aleɛ bɔ bato, anaa nzaa, anaa ngoo, anaa aleɛ biala a, aso sɔ nikyee ne kɔyɛ krongron anaa?’ ” Yeɛ asɔfo nemɔ buale kyɛ, “Daabi.”

¹³ Yeɛ Hagae bisale kyɛ, “Sɛ ebie fa ye nwo kã efuin maa ɔnate so ye nwo gua fiɛ, ná ɔfa ye nwo kã sɔ nningyein nemɔ anu bie a, aso sɔ nikyee ne nwo agua efiɛ anaa?” Yeɛ asɔfo nemɔ buale kyɛ, “Yoo, ye nwo agua fiɛ.”

¹⁴Yeɛ Hagae toale so sele kyɛ, “Sɔ ala yeɛ mmenia hemɔ bɛte ɔ, sɔ ala yeɛ maen he te wɔ me nyunu ɔ, AWURADE noa dwirɛ ɛne. Sɔ ala yeɛ bɛ sa noa adwuma biala te ɔ; yeɛ bɔ bɛfa bɛbɔ afɔleɛ bɛma me wɔ dɔ ne koso, ye nwo nde.

¹⁵Na ofi ɛnɛ bɔ ɔkɔ ɔ, mesrɛ ɛmɔ, odi kyɛ ɛmɔdwenedwene bɔ okosi ɔ nwo. Na mmerɛ bɔ ɛmɔnnya bɛttole nyɔboɛ ko bessiele nyɔboɛ ko aso wɔ AWURADE asɔneyɛɛ sua ne anu ne,

¹⁶ɛmɔ asetena nu te ɛmɔ sɛ? Sɛ ebie ba kyɛ ɔbaabu aburoo kɛndɛen aburanyɔ a, onya buru; sɛ ebie ba nekaa bɔ bekyi mmakaammaa nu bɛyɔ nzaa kyɛ ɔbaafa nzaa bua aburannu a, aburanyɔ yeɛ onya ɔ.

¹⁷Mvale fieso nningyein kesenɛ, asukuo ne asukɔtwea nzɛkyele ɛmɔ sa noa adwuma mukoraa; nakoso ɛmɔanza bamma me berɛ, AWURADE noa dwirɛ ɛne.

¹⁸Yiti odi kyɛ ɛmɔdwene ye nwo bɛnea, ofi ɛnɛ bɔ ɔkɔ ɔ, ofi bosome ngona ne anu ye eleburanyɔ ne nna ne aso, bɔ ɔte kyẽa bɔ bɛtole AWURADE asɔneyɛɛ sua ne fapem ne. Ɛ́mɔdwene ye nwo!

¹⁹Aso aburoo ne bie waha wɔ pata so? Bobe ne borɔdoma ne akengaa ne olive mmakaa nemɔ, benzu mmaa. Ofi ɛnɛ bɔ ɔkɔ ɔ, ngoyira ɛmɔ.”

²⁰AWURADE lale ye dwirɛ ali ye pɛen nyɔ so hyirele Hagae wɔ bosome ne anu, ye eleburanyɔ ne nna ne aso kyɛ,

²¹“Kã kyire Yuda amrado Serubabɛl kyɛ: Mebaawoso anwuro ne aseɛ.

²²Ngogu ahennie mɔ bɛ bia mɔ bɔkɔɔ; ngɔsɛkye maen maen mɔ b’ahennie anwoserɛ; ngɔhã teaseɛnam mɔ ne teaseɛnamhanɛfoɛ mɔ ngogua; mbɔngɔ ne pɔngɔhanɛfoɛ nemɔ kofifi ase, na ebiala kɔtɔ wɔ obiɛngo ngrandɛ noa.

²³Sɔ kyẽa ne, Asafo AWURADE noa dwirɛ ɛne, ngɔfa wɔ ngɔyɛ me deɛ, me somvoɛ Serubabɛl bɔ ɛte Sɛtiɛl awa ne, AWURADE noa dwirɛ ɛne; na ngɔfa wɔ ngɔyɛ kyɛ nzɔanoɛ pɛteaa; ofikyɛ maneanea nu maye wɔ, Asafo AWURADE noa dwirɛ ɛne.”