Read Sehwi Sakaria 11 Bible Online

Sakaria 11 - Sehwi bible

Sakaria 11

¹Wɔ, Lebanon, bukyebukye w’anoa nemɔ ma see ne ɔyera wɔ sida nemɔ.

²Wɔ, ɛframmire, bɔ awuye, ofikyɛ sida atutu atɔ ase, ofikyɛ animnyam mmakaa nemɔ basɛkye. Basan eluii mɔ, ɛ́mɔbɔ awuye, ofikyɛ babu ɛhɔayeɛ too ne bagua.

³Ɛ́mɔtie mmoaenneafoɛ nemɔ b’awuyebɔlɛ ne, ofikyɛ b’animnyam ne atɔ ase. Ɛ́mɔtie gyata akrɔngrɔma nemɔ bɛ bobɔlɛ bɔ bɛbobɔ nu ne, ofikyɛ asue Yɔɔdan nwo ɛhɔayeɛ ne wayɛ pralaa.

⁴AWURADE me Nyameɛ nwa nyoo, “Mmoaen kure bɔ bɛ́fa bɛ bɛ́kɔ akumyɛɛ ne, yɛ bɛ so neafoɛ.

⁵Bɛ bɔ bɛtɔ bɛ ne, bekuku bɛ bɛfa bɛ nwo bedi. Yeɛ bɛ bɔ bɛyɛ bɛ atɔen ne koso, bɛkã kyɛ, ‘Animnyam hã AWURADE, ofikyɛ manya me nwo’; yeɛ bɛ bɔbɔ bɛ neafoɛ nemɔ koso bennwu bɛ anwumvoin.

⁶Ofikyɛ mengonwu aseɛ ne aso ama anwumvoin ko, AWURADE noa dwirɛ ɛne. Tie, ngɔma mmenia kɔtotɔ, bɔ ebiala kɔtɔ wɔ obiɛngo sa nu, ɔne ye hene sa nu ɔ. Bɛkɔyɛ aseɛ ne pasaa, na mengɔpepɛ mengole bɛ nngofi bɛ sa nu.”

⁷Na ngɔyɛ akumyɛɛ mmoaen kure ne aso neafoɛ, nganga, bɛ bɔ bɛyɛ anwumvo wɔ mmoaen kure ne anu ne. Mvale pɔmaa nyɔ. Ndole ko dumaa: Ɛlolɛ, yeɛ ko ne wora ndole ye dumaa: Koyɛlɛ, na nneane mmoaen kure ne aso.

⁸Na bosome ko anu, nnuane mmoaenneafoɛ nza nemɔ bɛ boso mvili berɛ. Bɛ nwo yɛle me kra ahi, na me koso me nwo yɛle bɛ kra tɛ.

⁹Yeɛ nzele kyɛ, “Mengɔyɛ ɛmɔ neafoɛ ko. Bɔ odi kyɛ owu ne, ówu; bɔ odi kyɛ ye boso nua ne, ye boso ónua; na bɛ bɔ baha ne, ebiala óli obiɛngo naen.”

¹⁰Afei mvale me pɔmaa bɔ oli Ɛlolɛ ne, na mmuli nu, kyɛ mefa mepɛ m’apam bɔ me ne maen amukoraa yayɛ ne anu.

¹¹Yiti nu pɛle sɔ kyẽa ne, na mmoaen kure ne anu biemɔ bɔ né bɛyɛ anwumvo, bɔ né bɛ nye tua me ne, benwuni kyɛ AWURADE noa dwirɛ ɛne.

¹² Yeɛ nzele bɛ kyɛ, “Sɛ ɔte paa ma ɛmɔ a, ye de ɛ́mɔtua me kerɛ; nakoso sɛ ɔtte mayee mma ɛmɔ a, ye de ɛ́mɔyakyi.” Yiti bɛkarili ɛdwetɛ sekel aburasa bɛfa bɛyɛle m’akatuaa.

¹³Yeɛ AWURADE sele me kyɛ, “Gyi gua ngukuenwonɛniɛ ne berɛ.” Nyɔboɛ bɔ odi mu bɔ bɛbɔle kyɛ bɛfa bɛtɔ me hɔ ɛne. Yiti mvale ɛdwetɛ aburasa ne, na ngyi nguale ngukuenwonɛniɛ ne berɛ wɔ AWURADE awuro berɛ.

¹⁴Yeɛ mmuli me pɔmaa bɔ oli Koyɛlɛ ne anu, kyɛ mefa mepɛ aliɛmaayɛlɛ bɔ ɔla Yuda ne Yisrael b’afia ne anu.

¹⁵Afei AWURADE sele me kyɛ, “Sa fa mmoaenneafoɛ kwaseaa ye nningyein bɔ ɔfa nea mmoaen so ɔ tira.

¹⁶Tie, mebaama mmoaenneafoɛ bie odwɔso wɔ aseɛ ne aso, bɔ ɔngɔdwene bɛ bɔ bamini ne anwo, bɔ ɔngɔpena akrɔngrɔma nemɔ si atee, bɔ ɔngɔyɛ bɛ bɔ bapura nemɔ ayire, bɔ ɔngɔma bɛ bɔ bɛte apɔ ne aleɛ ɔ; na mmom okohu bɛ bɔ balɔ ne koli, ná watete bɛ gya boen nu pasapasa.

¹⁷Mmoaenneafoɛ tɛɛ bɔ ɔto mmoaen nemɔ asaworam ne, ye yaakɔ! Ngrandɛ kɔpɛ ye sa, yeɛ okotu ye nye famaa. Ye sa kowu bɔkɔɔ, na ye nye famaa kosi bɔkɔɔ.”