Read Sehwi Sakaria 2 Bible Online

Sakaria 2 - Sehwi bible

Sakaria 2

¹Ndole me nye anwuro bieku nneane, na yieee, nwuni biaa bie bɔ otira nyamaa bɔ bɛfa besusu nikye ɔ.

²Yeɛ mmisale kyɛ, “Nisua yeɛ ɛkɔ ɔ?” Na obuale me kyɛ, “Mekwaasusu Yerusalem menea kyɛbɔ ye tɛtrɛtɛɛ ne ye tendenn nu osi te ɔ.”

³Yieee, abɔfo bɔ ɔne me dwudwole ne hɔle ye nyunu, na abɔfo foforɛ hɔle ooyiale ye,

⁴na osele ye kyɛ, “Tu amirika kɔhã kyire aberandeɛ he kyɛ, ‘Yerusalem kɔyɛ kyɛ nguraa nguraa bɔ fasue nne bɛ nwo ɔ, ɔnate nu mmenia somaa ne nu nyɛmmoa somaa ti.

⁵Ofikyɛ me bɔbɔ, ngɔyɛ ye see fasue ngɔpɛ ye nwo ngɔbra ngoyia, AWURADE noa dwirɛ ɛne, na ngɔyɛ ye nu animnyam.’ ”

⁶Huuu, huuu! Ɛ́mɔnwati béfi sorɔ dɔ aseɛ ne aso oo, AWURADE noa dwirɛ ɛne; ofikyɛ mabɔ ɛmɔ masande kyɛ anwuro mvrama nna ne, AWURADE noa dwirɛ ɛne.

⁷Huuu, Sion ee, pepɛ de wɔ nwo oo, wɔ bɔ ɛne Babilɔn awa brasua bɛte ɔ.

⁸Ofikyɛ bɔ Asafo AWURADE kã hɔ ɛhe: Ye animnyam ne ati yeɛ ɔsomane me wɔ maen maen bɔ bɛfene ɛmɔ bɛfale nemɔ berɛ ɔ, ofikyɛ ebiala bɔ ɔkɔfa ye sa kɔhã ɛmɔ ne, né wafa ye sa wahã AWURADE nye kyiremvua.

⁹“Tie, ngɔtengyɛ me sa ngɔhɔ bɛ so, na bɛ koso bɛkɔyɛ koɛ nu nzesadeɛ bɛkɔma bɛ ngoaa mɔ, na afei ɛmɔkonwu kyɛ Asafo AWURADE yeɛ wasoma me ɔ.

¹⁰O Sion awa brasua, to dwein ná di ahurusi; ofikyɛ tie, méba, na ngɔɔtena wɔ nu, AWURADE noa dwirɛ ɛne.

¹¹Na sɔ kyẽa ne, maen maen pee bɛkɔfa bɛ nwo kɔɔbɔ AWURADE, na bɛkɔyɛ me maen. Ngɔtena wɔ nu,[1] amaa ɔnate so anwu ye kyɛ Asafo AWURADE yeɛ wasoma me wɔ berɛ ɔ.

¹²AWURADE kɔfa Yuda kɔyɛ ye agyapadeɛ kyɛ ye kyɛfa deɛ wɔ aseɛ krongron ne aso, na okosa kɔfa Yerusalem kɔyɛ ye deɛ.”

¹³ Adasa mukoraa, ɛ́mɔyɛ konn wɔ AWURADE nyunu; ofikyɛ wawoso ye nwo wɔ ye atenaleɛ krongron berɛ.