Read Sehwi Sakaria 3 Bible Online

Sakaria 3 - Sehwi bible

Sakaria 3

¹Afei ohyirele me ɔsɔfo panyi Yosua bɔ né ogyi AWURADE abɔfo ne nyunu berɛ ɔ, na né Satan gyi ye sa famaa so berɛ kyɛ ɔbɔ ye kwaadu.

² Yeɛ AWURADE sele Satan kyɛ, “Wɔ, Satan, AWURADE ohwi wɔ nyunu! AWURADE bɔ waneanea nu waye Yerusalem ne, ohwi wɔ nyunu! Ɛhe, aso nna gyetia bɔ baye bafi see nu ɔ?”

³Sɔ mmerɛ ne, né Yosua wura ndaadeɛ fiɛ ogyi abɔfo ne nyunu berɛ.

⁴Na abɔfo ne sele bɛ bɔ begyigyi ye nyunu berɛ ne kyɛ, “Ɛ́mɔpuropuro ye nwo ndaadeɛ fiɛ ne!” Na afei osele Yosua kyɛ, “Tie, maprapra w’amumuyɛɛ ne mafi wɔ so, na ngɔfa ndaadeɛ nyemenenyemene ngowura wɔ.”

⁵Yeɛ ngane kyɛ, “Maa bɛfa abotire bɔ ye nwo te ɔ bɛbɔ ye.” Yiti bɛfale abotire bɔ ye nwo te ɔ bɛbɔle ye, na bɛfale ndaadeɛ bewurale ye. Né AWURADE abɔfo ne ogyi berɛ.

⁶Na AWURADE abɔfo ne fa tole Yosua nyunu kyɛ,

⁷“Asafo AWURADE nwa nyoo: Sɛ ɛfa m’atee so ná edi m’ahyɛdeɛ so a, ye de ngɔfa m’awuro ne ngowura wɔ sa, na ɛkɔnea m’aluo berɛ so, na ngɔmaa ekonya atee ɛkɔboka bɛ bɔ begyigyi ɛwa nemɔ aso.

⁸ Afei tie, ɔsɔfo panyi Yosua, ɛne wɔ mmango bɔ bɛtete wɔ nyunu berɛ ne, ofikyɛ bɛte anwanwafoɛ. Na tie, mebaafa MMAEN bɔ ɔte me somvoɛ ne meba.

⁹Tie, nyɔboɛ bɔ mafa mato Yosua nyunu, nyɔboɛ komapɛ bɔ ye nye nzoo ne. Tie, so yeɛ ngokolikoli ye ahyerɛlɛ ne ngogua ɔ, Asafo AWURADE noa dwirɛ ɛne, na ngokyikyi aseɛ he amumuyɛɛ ne ngofi berɛ ɛlɛhomapɛ.

¹⁰ Na sɔ kyẽa ne, ɛmɔ nu biala kɔfrɛfrɛ ye mmango kɔwa ye bobe ne ye borɔdoma bakaa bo, Asafo AWURADE noa dwirɛ ɛne.”