Read Sehwi Sakaria 6 Bible Online

Sakaria 6 - Sehwi bible

Sakaria 6

¹Nza ndole me nye anwuro, na yieee, nwuni teaseɛnam nna kyɛ befi mmokaa nyɔ b’afia bɛba ɔ. Né mmokaa nemɔ te kɔɔbere mmokaa.

² Teaseɛnam bɔ oli moa ne, mbɔngɔ bɔ bɛsosɔ ye ne bɛte kɔkorɛ; teaseɛnam bɔ ɔtɔ so nyɔ ne, mbɔngɔ bɔ bɛsosɔ ye ne bɛte bire;

³ teaseɛnam bɔ ɔtɔ so nza ne, mbɔngɔ bɔ bɛsosɔ ye ne bɛte fufue; yeɛ teaseɛnam bɔ ɔtɔ so nna ne koso, mbɔngɔ anwoserɛfoɛ bɔ bɛ nwo te kyerekyerɛɛ yeɛ bɛsosɔ ye ɔ.

⁴Yeɛ mmisale abɔfo bɔ ɔne me dwudwole ne kyɛ, “Me mene, na ɛhemɔ, nzikyɛ ɛne?”

⁵ Na abɔfo ne buale me kyɛ, “Ɛhemɔ ole nyameɛso sunzum nna ne, bɔ begyinagyina aseɛ amukoraa Mene ye nyunu berɛ beyie a befi berɛ bɛkɔ ne.

⁶Teaseɛnam bɔ mbɔngɔ bire bɛsosɔ ye ne, befi berɛ bɛkɔ sorɔ dɔ maen ne anu; yeɛ fufue nemɔ koso befi berɛ bedi bɛ si, yeɛ bɛ bɔ bɛ nwo te kyerekyerɛɛ ne koso bɛkɔ ngwaen dɔ maen ne anu.”

⁷Na anwoserɛfoɛ nemɔ wale nen, né bɛpe ndɛen bekyinikyini aseɛ so. Na ɔhane kyɛ, “Ɛmɔhɔ beehyinihyini aseɛ so.” Na beehyinihyinini aseɛ so.

⁸Na ɔteane nu sele me kyɛ, “Nea, bɛ bɔ bɛ́kɔ sorɔ dɔ maen ne anu ne, bama me Sunzum kunu adwo ye fɔnwoo wɔ sorɔ dɔ maen ne anu.”

⁹Yeɛ AWURADE lale ye dwirɛ ali hyirele me kyɛ,

¹⁰“Heldae, Tobiya ne Yedaya bɔ bɛhyele bɛ nnure bɛhɔle bɔ bafi Babilɔn bawa ne, de (ɛdwetɛ ne sikaa kɔkorɛ ne) fi bɛ berɛ; ná kɔ Sefania awa Yosia awuro sɔ kyẽa ne ala.

¹¹Fa ɛdwetɛ ne sikaa kɔkorɛ yɛ abotire mɔ, ná fa bɔ Yohosadake awa ɔsɔfo panyi Yosua,

¹² ná se ye kyɛ, Asafo AWURADE nwa nyoo: Tie, biaa bɔ ye dumaa li ‘MMAEN’ ne, ye ɛhe. Ɔkɔfefɛ kofi ye boso, na okosi AWURADE asɔneyɛɛ sua ne.

¹³Amba, ye yeɛ okosi AWURADE asɔneyɛɛ sua ne ɔ, okonya ahennie animnyam ne, ɔkɔtena ye ahennie bia so koli hene, okoli sɔfo wɔ ye ahennie bia ne aso, na asomdwee bɔ odi mu ɔ kɔwa bɛ munyɔ b’afia.”

¹⁴Na abotire nemɔ kɔyɛ ngayeɛ nikyee kɔma Helem, Tobiya, Yedaya ne Sefania awa Hen wɔ AWURADE asɔneyɛɛ sua ne anu.

¹⁵“Na bɛ bɔ bɛwɔ nziɛ nziɛ ne, bɛkɔwa bɛkɔɔboka wɔ AWURADE asɔneyɛɛ sua ne silɛ nu, na afei ɛmɔkonwu kyɛ Asafo AWURADE yeɛ wasoma me ɛmɔ berɛ ɔ. Na sɛ ɛmɔyɛ AWURADE ɛmɔ Nyameɛ dwirɛ nwo sotie bɔkɔɔ a, sɔ dwirɛ ne kɔwa nu.”