Read Sehwi Sakaria 7 Bible Online

Sakaria 7 - Sehwi bible

Sakaria 7

¹Nana Dario ahennie afoɛ bɔ ɔtɔ so nna ne anu, AWURADE lale ye dwirɛ ali hyirele Sakaria wɔ bosome ngona bɔ bɛfrɛ ye Kislewi ne anu, ye ɛlɛnna ne aso.

²Né Betelfoɛ bali moa basoma Saresa ne Regyem Meleke ne bɛ mmenia maa bawa kyɛ bɛɛsrɛ AWURADE ma onwu bɛ anwumvoin,

³ná bebisa Asafo AWURADE awuro berɛ asɔfo mɔ ne ngɔmhyɛlɛfoɛ nemɔ kyɛ, “Aso nni aworabɔlɛ ná ngye hɔen wɔ bosome bɔ ɔtɔ so nnu ne anu, kyɛbɔ mayɔ ye afoɛ worawora ye anu ye anaa?”

⁴Yeɛ Asafo AWURADE lale ye dwirɛ ali hyirele me kyɛ,

⁵“Bisa aseɛ ne aso ama mukoraa ne asɔfo nemɔ kyɛ: Mmerɛ bɔ ɛmɔhyele hɔen ná ɛmɔlili aworabɔlɛ wɔ bosome bɔ ɔtɔ so nnu, ɔne nzoo ne anu, bɔ afoɛ aburasoo ɛhe ne, aso me ti yeɛ ɛmɔhyele hɔen ne ɔ?

⁶Na sɛ ɛmɔdidi ná ɛmɔno koso a, aso nna ɛmɔ bɔbɔ yeɛ ɛmɔdidi bɛno bɛma bɛ nwo ɔ?

⁷Mmerɛ bɔ né mmenia tete Yerusalem bɔ né wanya ngɔsoɛ, bɔ né ye nguro mɔ bapɛ ye nwo bayia, bɔ né mmenia tete ye ngwaen dɔ ne aseɛ pralaa ne aso ne, aso nna sɔ dwirɛ hemɔ yeɛ AWURADE fale daa ngɔmhyɛlɛfoɛ nemɔ aso bɔle ye dawure ɔ?”

⁸Yeɛ AWURADE lale ye dwirɛ ali hyirele Sakaria kyɛ,

⁹“Asafo AWURADE nwa nyoo: Ɛ́mɔbua ndɛen turoloo, ná ebiala ɔla anwumvoinnwunɛ ne adɔeɛ ali ohyire obiɛngo;

¹⁰nnɛma ɛmɔsisi kunafoɛ, ayisiaa, ɛwɔfoɛ ne ehianiɛ; yeɛ nnɛma ɛmɔ nu biala dwene obiɛngo nwo adwene tɛɛ.”

¹¹Nakoso bɛpole kyɛ bekotie ɔ, bɛpemone b’awaen, yeɛ betuatuale bɛ so, kyɛbɔ bɛngɔte ɔ.

¹²Bɛyɛle bɛ so serɛ kyɛ twerɛboɛ, kyɛbɔ ɔkɔyɛ bɔ bɛngɔte mmeraa ne ne edwirɛ bɔ Asafo AWURADE nate ye Sunzum so mane daa ngɔmhyɛlɛfoɛ nemɔ bɛbɔle ye dawure ne ɔ. Yiti Asafo AWURADE ahone huli piri paa.

¹³Na kyɛbɔ ɔfrɛle[2] ná bandie ne, sɔ ala yeɛ bɛfrɛle bɔ me koso mandie ɔ, Asafo AWURADE noa dwirɛ ɛne.

¹⁴Na mvale mvrama bɔ ɔpɛ ye nwo ɔ mmɔle bɛ nzandele maen maen amukoraa bɔ bɛnze bɛ ɔ so. Na aseɛ bɔ bɛyakyili ye bɛ si ne ɔlale berɛ mbaen, bɔ sona biala wambɛ nu berɛ, kyɛ ɔkɔ oo, anaa ɔba oo, na aseɛ nyemenenyemene ne lale berɛ mbaen.”