Read Sehwi Sakaria 8 Bible Online

Sakaria 8 - Sehwi bible

Sakaria 8

¹Na Asafo AWURADE lale ye dwirɛ ali hyirele me bieku kyɛ,

²“Asafo AWURADE nwa nyoo: Metwe Sion nwo nungunɛ piri paa, ɛyaa piri paa yeɛ mefa metwe ye nwo nungunɛ ɔ.

³AWURADE nwa nyoo: Ngosa ngɔwa Sion, na ngɔɔtena Yerusalem, na bɛkɔfrɛ Yerusalem kyɛ: Nahorɛ Kuro; yeɛ Asafo AWURADE bokaa ne koso kyɛ, Bokaa Krongron.

⁴Asafo AWURADE nwa nyoo: Mmienzua nworowaa ne mmrasua nworowaa kɔhɔ so kɔtenatena Yerusalem dwaaso, na bekotiratira pɔmaa, ɔnate kyɛ bɛkɔyɛ nworowaa posoposo.

⁵Kuro ne, mmɛɛmaa ne mmaayaa koyi ye dwaa nemɔ aso to, bɔ bekoli angorɛ wɔ ye dwaa nemɔ aso ɔ.

⁶Asafo AWURADE nwa nyoo: Maen he anu mmenia bɔ baha ne, sɛ ɔyɛ bɛ nye so nwanwa wɔ mmerɛ he anu a, aso me koso ɔkɔyɛ me nye so nwanwa anaa? Asafo AWURADE noa dwirɛ ɛne.

⁷Asafo AWURADE nwa nyoo: Tie, ngɔpepɛ ngole me maen ngofi eyia afiteleɛ maen ne sa nu, ɔne eyia atɔleɛ maen ne sa nu;

⁸na ngɔfa bɛ ngɔwa maa bɛkɔɔtena Yerusalem; bɛkɔyɛ me maen, na me koso mayɛ bɛ Nyameɛ, wɔ nahorɛ ne tenenee nu.”

⁹Asafo AWURADE nwa nyoo, “Ɛ́mɔmia ɛmɔ nye, amaa ɔnate so ɛmɔasi asɔneyɛɛ sua ne, ɛmɔ bɔ sɔ mmerɛ ye anu ɛmɔate edwirɛ hemɔ bafi ngɔmhyɛlɛfoɛ nemɔ bɛ noa ne, ngɔmhyɛlɛfoɛ bɔ né bɛwɔ berɛ ofi kyẽa bɔ bɛtole Asafo AWURADE awuro ne fapem nen.

¹⁰Ofikyɛ, anzana sɔ mmerɛ ne baawa ne, né akatuaa biala nne berɛ mma sona, yeɛ né ebie koso nne berɛ mma kaka. Na sɛ né ebie ɔkɔ oo, anaa ɔba oo, pɔfoɛ ne ati, né olle asomdwee biala, ofikyɛ nganyane sona biala maa odwɔso tiale obiɛngo.

¹¹Nakoso kekesaala ye de, maen he mmenia bɔ baha ne, me ne bɛ ngoli ye kyɛbɔ nyɔle ye daa ne, Asafo AWURADE noa dwirɛ ɛne.

¹²Ofikyɛ nningyein lualɛ kɔyɛ asomdwee nu, bobe kosu ye mma, aseɛ kɔhye aleɛ, anwuro kɔtɔ ye bosue, na maen he mmenia bɔ baha ne, ngɔmaa bekonya ɛhemɔ amukoraa.

¹³O Yuda awuro ama ne Yisrael awuro ama, kyɛbɔ ɛmɔakakyi amoenwaa dwirɛ wɔ maen maen mɔ nu ne, sɔ ala yeɛ ngole ɛmɔ ngoa ɔ, na ɛmɔkɔyɛ saleɛ. Nnɛma ɛmɔsuro, na mmom ɛ́mɔmia ɛmɔ nye.”

¹⁴Ofikyɛ Asafo AWURADE nwa nyoo, “Kyɛbɔ nyɛle m’adwene kyɛ me ne ɛmɔ yɛkoli ye weewee, mmerɛ bɔ ɛmɔ nana mɔ huli m’ahone, bɔ manzesã m’adwene ne, Asafo AWURADE noa dwirɛ ɛne,

¹⁵sɔ ala koso yeɛ mayɛ m’adwene sɔ mmerɛ ye anu kyɛ ngɔyɛ Yerusalem ne Yuda awuro ama paa ɔ. Nnɛma ɛmɔsuro!

¹⁶ Ɛhemɔ yeɛ odi kyɛ ɛmɔyɔ ɔ: Odi kyɛ ebiala kã nahorɛ kyire obiɛngo; nekaa bɔ ɛmɔdi dwirɛ ne, odi kyɛ ɛmɔbua ndɛen turoloo bɔ ɔfa asomdwee ba ɔ;

¹⁷nnɛma ɛmɔ nu biala nya obiɛngo nwo adwene tɛɛ, nnɛma ɛmɔ nye gye ngondombo ndaentalɛ nwo, ofikyɛ mekyi sɔ nningyein ne amukoraa, AWURADE noa dwirɛ ɛne.”

¹⁸Yeɛ Asafo AWURADE lale ye dwirɛ ali hyirele me kyɛ,

¹⁹“Asafo AWURADE nwa: Bosome bɔ ɔtɔ so nna ne anu akɔngyere ne, nnu ne anu akɔngyere ne, nzoo ne anu akɔngyere ne, ɔne buru ne anu akɔngyere ne, bɛkɔyɛ ahurusililɛ, anwosɛpɛlɛ ne anigye aluolue kɔma Yuda awuro ama. Yiti ɛmɔhuro nahorɛ ne asomdwee.

²⁰“Asafo AWURADE nwa nyoo: Okosa kosi bieku kyɛ, maen maen nemɔ bɛ nguro pee nufoɛ kɔwa;

²¹kuro ko anu ama kɔhɔ kuro ko aso koose kyɛ, ‘Ɛ́mɔma yɛhã yɛ nwo yɛɛkoto yɛsrɛ wɔ AWURADE nyunu, ná yɛpena Asafo AWURADE si atee; me koso ngɔhɔ bie.’

²²Amba, maen maen pee ne maen maen bɔ bɛ nwo yɛ se ɔ bɛkɔwa bɛkɔɔpena Asafo AWURADE si atee wɔ Yerusalem, na bɛkɔkoto bɛkɔsrɛ wɔ AWURADE nyunu.

²³Asafo AWURADE nwa nyoo: sɔ mmerɛ ne, edwudwolɛ biala nu mmenia buru bɔ befi maen maen mɔ nu ɔ bɛkɔsosɔ Yudaniɛ ko ataadeɛ noa, na bekose kyɛ, ‘Yɛne ɛmɔ kɔhɔ, ofikyɛ yate kyɛ Nyameɛ gyi ɛmɔ si.’ ”