Read Sehwi Mateo 1 Bible Online

Mateo 1 - Sehwi bible

Mateo 1

¹ Yesu Kristo, Dawide bosoniɛ[1], Abraham bosoniɛ ne, ye afilie nu aworɛ ndoatoasoɛ ɛhe:

²Abraham wole Yisake, Yisake wole Yakob, na Yakob wole Yuda ne oliɛma mɔ.

³ Yuda wole Pɛrɛse ne Sera (bɛ ni ole Tamar), Pɛrɛse wole Hesron, na Hesron wole Ram.

⁴Ram wole Aminadabo. Aminadabo wole Nason bɔ ɔwole Salmon ne.

⁵Salmon ne Rahabo wole Boase. Boase ne Rutu wole Obɛde bɔ ɔwole

⁶Yese bɔ ɔwa ole Nana Dawide ne. Dawide ne Yuria aye ne wole Solomon.

⁷Solomon wole Rehoboam, na Rehoboam wole Abiya. Abiya wole Asa.

⁸Asa wole Yehosafate. Yehosafate wole Yoram. Yoram wole Yusia.

⁹Yusia wole Yotam. Yotam wole Ahase. Ahase wole Hesekia.

¹⁰Hesekia wole Manase. Manase wole Amose. Amose wole Yosia.

¹¹ Yosia wole Yekonia ne oliɛma mɔ wɔ mmerɛ bɔ bɛhyele Yudafoɛ nnure bɛhɔle Babilɔn nen.

¹²Bɛhyele bɛ nnure bɛhɔle Babilɔn ne asi ne, Yekonia wole Sɛtiɛl. Sɛtiɛl wole Serubabɛl.

¹³Serubabɛl wole Abihude. Abihude wole Eliakim, na Eliakim wole Asore.

¹⁴Asɔre wole Sadoke; Sadoke wole Akim, na Akim wole Elihude.

¹⁵Elihude wole Eleasa. Eleasa wole Matan, na Matan wole Yakob.

¹⁶Yakob wole Yosef bɔ ɔye ole Maria bɔ ɔwole Yesu bɔ bɛfrɛ ye Kristo ne.

¹⁷Yiti aworɛ ndoatoasoɛ bɔ ofi Abraham so bɔ ɔkwaadwu Dawide so ne amukoraa, ɔte buru ne nna; ofi Dawide so bɔ ɔkwaadwu kyɛ bɛhyele bɛ nnure bɛhɔle Babilɔn nen, ɔte aworɛ ndoatoasoɛ buru ne nna; yeɛ ofi mmerɛ bɔ bɛhyele bɛ nnure bɛhɔle Babilɔn ne bɔ ɔbaadwu Kristo so ne, ɔte aworɛ ndoatoasoɛ buru ne nna.

¹⁸Kyɛbɔ besi bɛwole Yesu Kristo nwo dwirɛ ɛhe: Bɛfale oni Maria bɛbɔle Yosef asiwa. Wangɔ agyaa bo, na benwuni kyɛ ɔnate Sunzum Krongron so ɔnwonzɛ.

¹⁹Né ohu Yosef te sona bɔ ɔtengyɛ ɔ, na né onguro kyɛ okogua Maria nyunu ase ne ati, ɔyɛle ye adwene kyɛ okoyira ye kudɛɛ.

²⁰Na ogu so ɔfa ɛhe nwo adwene ne, Awurade abɔfo yele ye nwo ali hyirele ye wɔ laleɛ nu, na osele ye kyɛ, “Yosef, Dawide bosoniɛ, nnɛsuro kyɛ ɛkɔfa ɛye Maria ɛkɔwa w’awuro ɔ; ɔnate kyɛ bɔ ɔnwonzɛ ye ne ofi Sunzum Krongron nu.

²¹ Ɔkɔwo baa bienzua, né ato ye dumaa Yesu, ɔnate kyɛ ye yeɛ okole ye mmenia kofi bɛ bɔne nu ɔ.”

²²Na ɛhe amukoraa sili maa bɔ Awurade nate ngɔmhyɛlɛniɛ ne aso hane ne wale nu. Ɔhane kyɛ,

²³ “Tie, ababunu[2] ne kɔnwonzɛ kɔwo baa bienzua, na bɛkɔto ye dumaa Yimanuel, (bɔ ye bo kyire kyɛ, Nyameɛ ne yɛ wɔ berɛ).”

²⁴Na Yosef tingyele fili nnaa nu ne, ɔyɔle bɔ Awurade abɔfo ne hyɛle ye kyɛ ɔyɔ ne, na ɔɔfale ɔye ne wale awuro.

²⁵Nakoso Yosef ne ye banna maa odwuli kyɛ ɔwole bamuɛbaa bienzua ɔ, na Yosef tole ye dumaa Yesu.