Read Sehwi Mateo 10 Bible Online

Mateo 10 - Sehwi bible

Mateo 10

¹Ɔfrɛle ye asuafoɛ buru ne nyɔ ne maa beyiale, na ɔmane bɛ sunzummɔne mɔ so tumi bɔ bɛkɔfa bekotutu bɛ ɔ, ɔne tumi bɔ bɛkɔfa bɛkɔsa anwonyerɛ ne anwommerɛlɛ amukoraa ɔ.

²Asuafoɛ buru ne nyɔ nemɔ bɛ dumaa ɛhe: Bɔ oli moa, Simɔn bɔ bɛfrɛ ye Petro, yeɛ oliɛma Andrea; Yakobo bɔ ye baba ole Sebedeo ne, yeɛ oliɛma Yohane.

³Filipo ne Batolomeo; Tɔmase ne Mateo bɔ ɔte ɛtoɔdidelɛniɛ ne; Yakobo bɔ ye baba ole Alfeo ne, yeɛ Tadeo;

⁴Kanaanniɛ Simɔn, yeɛ Yudase Yiskariote bɔ ɔyele Yesu mane ne.

⁵ Sɔ mmenia buru ne nyɔ nemɔ yeɛ Yesu somane bɛ ɔ, na ɔfale ahyɛdeɛ mane bɛ kyɛ, “Nnɛma ɛmɔkɔ Amaenmaensofoɛ nemɔ berɛ, yeɛ nnɛma ɛmɔkɔ Samariafoɛ kuro biala so;

⁶ na mmom ɛmɔhɔ mmoaen bɔ bamini bɔ bɛ ole Yisrael awuro ama ne berɛ.

⁷ Na ɛmɔkɔ a, ɛmɔhã kyɛ, ‘Nyameɛso ahennie ne apingye.’

⁸Ɛ́mɔsa ayarefoɛ anwonyerɛ, ɛ́mɔtingye awufoɛ, ɛ́mɔma kwatafoɛ nwo fi, ná ɛ́mɔtu sunzummɔne mɔ. Ɛmɔnyane ye mbaen, yiti ɛ́mɔfa bɛ́ma mbaen.

⁹Nnɛma ɛmɔfa sikaa kɔkorɛ, anaa ɛdwetɛ, anaa kɔɔbere bɛbɔ ɛmɔ abɔsoɛ nu,

¹⁰ nnɛma ɛmɔfa ateetulɛ bɔtɔ, anaa ndaadeɛ nyɔ, anaa mbaboa, anaa pɔmaa, ofikyɛ adwumayɔlɛniɛ fata kyɛ ye sa kã ye aleɛ ɔ.

¹¹“Kuro anaa akuraa biala bɔ ɛmɔkɔhɔ nu ne, ɛ́mɔpena sona bɔ okole ɛmɔ ɔ, na ɛmɔ ne ye bɛ́tena berɛ kɔpem mmerɛ bɔ ɛmɔkofi berɛ bɛkɔhɔ ɔ.

¹² Sɛ ɛmɔwura awuro bie anu a, ɛ́mɔbisa berɛ ama ahye.

¹³Sɛ awuro berɛ ama bede ɛmɔ nyemene so a, ɛ́mɔma ɛmɔ asomdwee ne ɔbra awuro ne aso; nakoso sɛ banne ɛmɔ nyemene so de a, ye de ɛ́mɔma ɛmɔ asomdwee ne osa bra ɛmɔ berɛ.

¹⁴ Na sɛ ebiala ngole ɛmɔ anaa ongotie ɛmɔ dwirɛ a, ye de sɛ ɛmɔfi awuro anaa kuro ne aso bɛ́kɔ a, ɛ́mɔporoporo ɛmɔ gya bo mvuture bégua berɛ.

¹⁵ Nahorɛ nu, mekã mekyire ɛmɔ kyɛ, ndɛenbualɛ kyẽa ne, amaneɛ bɔ ɔkɔto Sodom ne Gomora aseɛ ne nen, ongodwu bɔ ɔkɔto sɔ kuro ne.

¹⁶ “Ɛ́mɔtie! mésoma ɛmɔ kyɛ mmoaen maa ɛmɔkɔ mbataku nu. Yiti ɛ́mɔma ɛmɔ nye la berɛ kyɛ ewoo, ná ɛ́mɔbrɛ ɛmɔ nwo ase kyɛ mmubure.

¹⁷ Ɛ́mɔnea ɛmɔ nwo yé wɔ kuro sona nwo, ɔnate kyɛ bɛkɔfa ɛmɔ bɛkɔhɔ mbanyi badwa nu, ná bafi ɛmɔ mbire wɔ bɛ nyianu sua mɔ nu.

¹⁸Ɔnate me ti bɛkɔfa ɛmɔ bekogyina amrado mɔ ne ahemvo nyunu, na ɔkɔyɛ adanzeɛ kohyire bɛ ne Amaenmaensofoɛ.

¹⁹Na sɛ bɛfa ɛmɔ bɛkɔ a, nnɛma ɛmɔdwenedwene kyɛbɔ ɛmɔkodwudwo anaa bɔ ɛmɔkɔhã ɔ nwo; ofikyɛ nyameɛ kɔfa bɔ odi kyɛ ɛmɔkã ɔ kɔma ɛmɔ wɔ sɔ mmerɛ ne ala nu.

²⁰Ɔnate kyɛ, nna ɛmɔ yeɛ ɛmɔdwudwo ɔ, na mmom ɛmɔ Baba Sunzum ne yeɛ ɔfa ɛmɔ so dwudwo ɔ.

²¹ “Aliɛmaa kɔye aliɛmaa kɔma maa bekohu ye, seɛ kɔye baa kɔma, na mmaa kodwɔso kotia awofoɛ maa bekohu bɛ.

²² Ɔnate me dumaa ti, mmenia mukoraa kɔpɔ ɛmɔ; nakoso bɔ okotindim koodwu ayieleɛ nen, ye yeɛ bekole ye ngoa ɔ.

²³ Na sɛ bɛtane ɛmɔ nye wɔ kuro ko aso a, ɛ́mɔnwati bɛhɔ foforɛ so. Nahorɛ nu, mekã mekyire ɛmɔ kyɛ, ɛmɔngoyie Yisrael nguro amukoraa so kyini koraka né Sona Awa ne awa.

²⁴ “Suaniɛ ndra ye kyerɛkyerɛniɛ, yeɛ akoaa ndra ye mene.

²⁵ Yiti sɛ suaniɛ yɛ kyɛ ye kyerɛkyerɛniɛ a, odi kyɛ ɔma ye nye sɔ; yeɛ akoaa koso sɛ ɔyɛ kyɛ ye mene a, odi kyɛ ɔma ye nye sɔ. Na sɛ bafrɛ awuro mene ne Beɛsebul de a, nzaade ɔkɔyɛ sɛɛ bɔ bɛngɔfa dumaa tɛɛ pee bɛngɔfrɛ ye awuro ama ɔ?

²⁶ “Yiti nnɛma ɛmɔsuro bɛ, ofikyɛ nikyee biala nne berɛ bɔ so akata bɔ ye nwo ngɔla berɛ ɔ, anaa bɔ ɔwɔ mvealeɛ nu bɔ bengonwu ye ɔ.

²⁷Na bɔ mekã mekyire ɛmɔ awosii nu ne, ɛmɔhã ye eyia ketee; yeɛ bɔ batu ye nwo asure maa ɛmɔate ne, ɛ́mɔbɔ ye dawure wɔ sua ti afia.

²⁸ Nnɛma ɛmɔsuro bɛ bɔ beku anwoɔnaen ne, ná koso bɛngora bengu ɛkra ne; na mmom ɛ́mɔsuro bɔ ɔkora sɛkye anwoɔnaen ne ɛkra ne amunyɔ wɔ abɔnzam see nu ne.

²⁹Aso bɛndɔne akatipire nyɔ pɛsaa? Nakoso bɛ nu ko po nde ndɔ ase bɔ ɛmɔ Baba ne ɔnze ye nwo bie ɔ.

³⁰Nakoso ɛmɔ de, ɛmɔ ti nwiaa po baha ye mukoraa.

³¹ Yiti nnɛma ɛmɔsuro! Ɛmɔ nwo hia tra ngatipire pee.

³² “Yiti ebiala bɔ ɔkɔbɔ me dumaa wɔ mmenia nyunu ne, me koso ngɔbɔ ye dumaa me Baba bɔ ɔwɔ nyameɛso ne nyunu.

³³ Nakoso ebiala bɔ ɔkɔpo me wɔ mmenia nyunu ne, me koso ngɔpo ye me Baba bɔ ɔwɔ nyameɛso ne nyunu.

³⁴ “Nnɛma ɛmɔdwene kyɛ mvale asomdwee mmale aseɛ so. Nna asomdwee yeɛ mva mmale ɔ, na mmom ngrandɛ.

³⁵Ofikyɛ mmale kyɛ mebaatete nu ma baa bienzua dwɔso tia ɔse; ná baa brasua adwɔso atia oni, ná sia brasua adwɔso atia ohyireni.

³⁶Na sona awuro ama kɔyɛ ye pɔfoɛ.

³⁷ “Na ebiala bɔ okuro ɔse anaa oni dwirɛ tra me ne, ɔmvata me; yeɛ bɔ okuro ɔwa bienzua anaa ɔwa brasua dwirɛ tra me ne, ɔmvata me.

³⁸Na ebiala bɔ ɔmva ye mmeamudua ná onni me si nen, ɔmvata me.

³⁹Ebiala bɔ okonya ye ngoa ne, ɔkɔhwere ye; na ebiala bɔ me ti ye ngoa kofi ye sa ne, okonya ye.

⁴⁰ “Bɔ ode ɛmɔ to nu nen, ode me koso to nu; yeɛ bɔ ode me to nu nen, ode bɔ ɔsomane me ne koso to nu.

⁴¹Na bɔ ode ngɔmhyɛlɛniɛ to nu ɔnate kyɛ onwu ye kyɛ ɔte ngɔmhyɛlɛniɛ ne ati nen, ye sa kɔha ngɔmhyɛlɛniɛ akatuaa. Yeɛ bɔ ode teneneeniɛ to nu ɔnate kyɛ onwu ye kyɛ ɔte teneneeniɛ ne ati nen, ye sa kɔha teneneeniɛ akatuaa.

⁴² Na ebiala bɔ ɔkɔma mmaa mmaa hemɔ anu ko nzue frɔlɔɔ kwangoa ko, ɔnate kyɛ onwu ye kyɛ ɔte suaniɛ ne ati nen, nahorɛ nu mekã mekyire ɛmɔ kyɛ, ye akatuaa ngɔbɔ ye.”