Read Sehwi Mateo 12 Bible Online

Mateo 12 - Sehwi bible

Mateo 12

¹ Sɔ mmerɛ ne anu, Yesu hɔle ɔɔfale aburoo boo bie anu. Né ɔte afofikyẽa. Né ɛhɔen ku ye asuafoɛ nemɔ, na bɛhyɛle ye bo bɛpombale aburoo ne bie belili.

²Na mmerɛ bɔ Farasiifoɛ nemɔ nwuni sɔ ne, besele ye kyɛ, “Nea, w’asuafoɛ nemɔ bɛ́yɔ bɔ otia mmeraa kyɛ bɛyɔ ye afofikyẽa ɔ!”

³ Na obuale bɛ kyɛ, “Aso ɛmɔkkenngale bɔ Dawide yɔle, mmerɛ bɔ ɛhɔen huni ye ne bɛ bɔ bɛboka ye so ne?

⁴Kyɛbɔ ɔhɔle Nyameɛ awuro, ná oolili paanoo krongron ne, bɔ né otia mmeraa kyɛ ye anaa bɛ bɔ bɛboka ye so ne bekoli ɔ; sana asɔfo ngome yeɛ bedi ɔ?

⁵ Anaakyɛ ɛmɔkkenngale ye wɔ mmeraa ne anu, kyɛbɔ afofingyẽa nemɔ, asɔfo mɔ bɔ bɛwɔ asɔneyɛɛ sua ne anu bɛtõ afofikyẽa mmeraa ne, ná koso benni ye nwo fɔ ɔ?

⁶ Na mekã mekyire ɛmɔ kyɛ, bɔ odi mu tra asɔneyɛɛ sua ne wɔ wa.

⁷ Na sɛ ɛmɔte edwirɛ he abo, kyɛ, ‘Anwumvoinnwunɛ yeɛ mekuro ɔ, na nna afɔleɛbɔlɛ ɔ’ a, ahaa ɛmɔammua bɛ bɔ benni fɔ ne fɔ.

⁸ Ofikyɛ Sona Awa ne te afofikyẽa ne Mene.”

⁹Yesu fili berɛ hɔle bɛ nyianu sua nu.

¹⁰Na yieee, né biaa bie wɔ berɛ bɔ ye sa ko awu ɔ. Na bebisale Yesu kyɛ, “Aso mmeraa ma ate kyɛ bɛsa anwonyerɛ afofikyẽa anaa?” Né bɛpena edwirɛ bɛfa bɛbɔ ye kwaadu.

¹¹ Na Yesu buale bɛ kyɛ, “Ɛmɔ nu nwa yeɛ sɛ ole boaen komapɛ ná ɔtɔ kumaa nu afofikyẽa a, ɔngɔsɔ ye nu ngɔye ye ɔ?

¹² Aso sona ye nwo nhia ndra boaen anaa? Yiti mmeraa ma ate kyɛ yɛyɔ paa afofikyẽa.”

¹³Na osele biaa ne kyɛ, “Tengyɛ wɔ sa ne anu.” Ɔtengyɛle nu, na ɔyɛle paa kyɛ ko ne ala.

¹⁴ Yeɛ Farasiifoɛ nemɔ fili berɛ bɛhɔle aluo dɔ, na bɛbɔle ye ti so porɛ bɛpenane atee bɔ bɛkɔfa so bekohu ye ɔ.

¹⁵Nakoso Yesu nwuni ye sɔ nen, ofili berɛ hɔle. Mmenia pee lili ye si, na ɔsale bɛ mukoraa anwonyerɛ;

¹⁶na ɔberale bɛ kyɛ nnɛmaa bɛbɔ ye nwo dawure.

¹⁷Na ɛhe mane ngɔmhyɛlɛniɛ Yesaya dwirɛ bɔ ɔhane ne wale nu kyɛ,

¹⁸ “Tie, Ɛhe ole me somvoɛ bɔ maneanea nu maye ye ne, bɔ mekuro ye dwirɛ, bɔ me kra nye gye ye nwo paa ne. Ngɔfa me Sunzum ngogua ye so, na ɔkɔbɔ ndɛen turoloo nwo dawure kohyire Amaenmaensofoɛ.

¹⁹Ɔngɔho, yeɛ ɔngɔteatea nu, yeɛ ebiala ngɔte ye komvi wɔ dwaaso.

²⁰Elemmire bɔ ɔte fɛngyɛfɛngyɛ ne, ongobu nu, yeɛ kanea nyamaa bɔ ogye monɛɛmonɛɛ ne, ongonua ye, maa okoodwu kyɛ okobua ndɛen turoloo ngonim nu ɔ;

²¹na ye dumaa nu yeɛ maen maen mɔ bekonya anyelasoɛ ɔ.”

²² Yeɛ mmenia biemɔ fale biaa bie bɔ sunzummɔne wɔ ye so ná osa te anyesiniwaaniɛ ne emumu ɔ bɛbrɛle Yesu. Na ɔsale biaa ne anwonyerɛ maa ɔhora dwudwole, na osa nwuni nikye.

²³Ɔyɛle mmenia ne amukoraa nwanwa, na besele kyɛ, “Aso nna Dawide Awa ne ɛhe?”

²⁴ Nakoso Farasiifoɛ nemɔ tele sɔ dwirɛ nen, bɛhane kyɛ, “Sɔ biaa he, sunzummɔne mɔ panyi Beɛsebul tumi yeɛ ɔfa tutu sunzummɔne mɔ ɔ.”

²⁵Yesu nwuni b’adwene, yiti obuale bɛ kyɛ, “Ahennie biala bɔ ɔne ye nwo ko ne, ogu; yeɛ kuro anaa awuro biala bɔ ɔne ye nwo ko ne, ɔbɔ.

²⁶Na sɛ Abɔnzam tu Abɔnzam de a, né nzaade ɔne ye nwo bɛko; na ɔkɔyɛ sɛɛ né ye ahennie ne agyina?

²⁷Na sɛ Beɛsebul tumi yeɛ mefa metu sunzummɔne mɔ de a, né nzaade nwa tumi yeɛ ɛmɔ mma mɔ bɛfa betutu bɛ ɔ? Bɛ bɔbɔ ala yeɛ bɛkɔyɛ ɛmɔ ndɛenbualɛfoɛ ɔ.

²⁸Nakoso sɛ Nyameɛ Sunzum yeɛ mefa metu sunzummɔne mɔ de a, né nzaade Nyameɛ ahennie ne anya awa ɛmɔ so.

²⁹ “Anaakyɛ, ɔkɔyɛ sɛɛ né ebie ahora ahɔ katakyie bie awuro waafẽ ye nningyein wahɔ, sana odi moa ɔfa nyamaa kyekye katakyie ne koraka, ná afei wahora wafẽ ye awuro nningyein ne.

³⁰ “Ebiala bɔ ɔbboka me so nen, né otia me; yeɛ ebiala bɔ ɔne me mmoaboa ye noa nen, né ɔsande nu.

³¹Ɛhe ati yeɛ mekã mekyire ɛmɔ kyɛ, bɛkɔfa bɔne ne musue dwirɛ amukoraa bɛkɔhyɛ mmenia, nakoso musue dwirɛ bɔ otia Sunzum ne de, bɛngɔfa ngɔhyɛ mmenia.

³² Ebiala bɔ okodwudwo kotia Sona Awa ne nen, bɛkɔfa bɛkɔhyɛ ye; nakoso bɔ okodwudwo kotia Sunzum Krongron ne de, bɛngɔfa ngɔhyɛ ye, wɔ ewiase wa ne ewiase bɔ ɔ́ba ne anu.

³³ “Ɛ́mɔma bakaa ne ɔ́yɛ bakaa paa, ná ye mma ne ayɛ mmaa paa. Anaakyɛ, ɛ́mɔma bakaa ne ɔ́yɛ bakaa tɛɛ, ná ye mma ne ayɛ mmaa tɛɛ; ofikyɛ bakaa ye mma yeɛ bɛfa benwu ye baka sue ɔ.

³⁴ Ɛmɔ, ewoo mmaa! Ɔkɔyɛ sɛɛ né ɛmɔahora bahã edwirɛ paa, wɔ aberɛ bɔ ɛmɔte bɔnefoɛ ɔ? Ofikyɛ bɔ wayi ahone nu maa wabu wafa so ne yeɛ noa ɔkã ɔ.

³⁵Sona paa fi nningyein paa bɔ waboaboa ye noa wɔ ye ahone nu ɔ nu yeɛ ɔda nningyein paa ali ɔ; yeɛ sona bɔnefoɛ fi bɔne nningyein bɔ waboaboa ye noa wɔ ye ahone nu ɔ nu yeɛ ɔda bɔne nningyein ali ɔ.

³⁶“Na mekã mekyire ɛmɔ kyɛ, edwirɛ mbaen biala bɔ mmenia kɔhã ne, bekobu ye nwo ngondaa ndɛenbualɛ kyẽa ne.

³⁷Ofikyɛ wɔ noa dwirɛ so yeɛ bekogyina bekobua wɔ be ɔ; yeɛ wɔ noa dwirɛ so yeɛ bekogyina bekobua wɔ fɔ ɔ.”

³⁸ Yeɛ ahyerɛlɛfoɛ ne Farasiifoɛ ne, bɛ nu biemɔ sele Yesu kyɛ, “Kyerɛkyerɛniɛ, yɛpena kyɛ yɛnwu sɛngyerɛnneɛ bie yɛfi wɔ berɛ.”

³⁹ Na obuale bɛ kyɛ, “Ɛnɛmmafoɛ bɔnefoɛ ne agyaasɛkyelɛfoɛ bɛpena sɛngyerɛnneɛ, nakoso bɛngɔma bɛ sɛngyerɛnneɛ biala, sana ngɔmhyɛlɛniɛ Yona deɛ ne ala.

⁴⁰ Na kyɛbɔ Yona lili bonzu kunu ɛlɛsa eyia ne kɔngɔen ne, sɔ ala yeɛ Sona Awa ne koli aseɛ bo ɛlɛsa eyia ne kɔngɔen ɔ.

⁴¹ Ninewefoɛ ne ɛnɛmmafoɛ bekodwɔso wɔ ndɛenbualɛ ne anu, na bɛkɔbɔ bɛ kwaadu, ofikyɛ Ninewefoɛ tele Yona nzɛmba nen, bɛsakyerale b’adwene; na tie, bɔ odi mu tra Yona wɔ wa!

⁴² Ngwaen dɔ hemmaa ne, ɔne ɛnɛmmafoɛ bekodwɔso wɔ ndɛenbualɛ ne anu, na ɔkɔbɔ bɛ kwaadu, ofikyɛ ofili aseɛ noa dɔ paa wale ootiele Solomon nworɛ dwirɛ; na tie, bɔ odi mu tra Solomon wɔ wa!

⁴³ “Sɛ sunzummɔne tu fi sona nu a, okokyinikyini aseɛ katerepee mɔ so pena nekaa bɔ okole ye nwome ɔ, na onnya bie.

⁴⁴Na afei ɔkã kyɛ, ‘Ngosa ngɔhɔ me sua bɔ mvili nu mmale ne anu.’ Na ɔba a, ɔbato ye kyɛ ɔla berɛ too, bɔ bapoapoa nu, ná basiesie nu ɔ.

⁴⁵Na ɔkɔ kɔfa sunzum nzoo foforɛ bɔ bedi bɔne bɛtra ye ɔ ɔboka ye nwo so ɔne bɛ ba, na bɛbawura nu bɛtena berɛ. Na sɔ sona ne, ye asetena bɔ oli nziɛ ne te bɔne asetena tra daa ne. Na sɔ ala yeɛ ɔkɔto ɛnɛmmafoɛ bɔnefoɛ he ɔ.”

⁴⁶ Yesu gu so bɔ odwudwo kyire ɛlɔen ne nen, yieee, ye maame ne oliɛma mɔ beegyinane bondua, na né bɛpena kyɛ bɛ ne ye dwudwo. [

⁴⁷Na ebie hã hyirele ye kyɛ, “Nea, wɔ maame ne eliɛma mɔ begyigyi bondua dɔ, na bɛpena kyɛ bɛ ne wɔ dwudwo.”]

⁴⁸Yeɛ Yesu buale sona bɔ ɔhane sɔ dwirɛ ne hyirele ye ne kyɛ, “Nwa ole me maame? Nwa ole nniɛma mɔ?”

⁴⁹Yeɛ ɔtengyɛle ye sa hyirele ye asuafoɛ nemɔ so hane kyɛ, “Nea, me maame ne nniɛma mɔ ɛhe!

⁵⁰Ofikyɛ ebiala bɔ ɔkɔyɔ me Baba bɔ ɔwɔ nyameɛso n’apɛdeɛ nen, ye yeɛ ɔte nniɛma bienzua ne nniɛma brasua ne me maame ɔ.”