Read Sehwi Mateo 16 Bible Online

Mateo 16 - Sehwi bible

Mateo 16

¹Farasiifoɛ ne Sadusiifoɛ wale kyɛ bɛbaaso Yesu bɛnea, yiti besele ye kyɛ ɔyɔ sɛngyerɛnneɛ bɔ ofi nyameɛso ɔ ma bɛnea.

²[Na obuale bɛ kyɛ, “Sɛ odwu nɔsoa a, ɛmɔnwa: ‘Ewienu kɔte, ofikyɛ ewienu ayɛ kɔɔ.’

³Na ngyerɛmɔ de, ɛmɔnwa: ‘Mvrama kotu ɛnɛ, ofikyɛ ewienu ayɛ kɔɔ ne kusuu.’ Ɛmɔse kyɛbɔ besi bekyire ewienu dwirɛ bo ɔ, nakoso mmerɛ ne nwo nzɛngyerɛnneɛ de, ɛmɔngora nu kyire.]

⁴Ɛnɛmmafoɛ bɔnefoɛ ne agyaasɛkyelɛfoɛ bɛpena sɛngyerɛnneɛ, nakoso bɛngɔma bɛ sɛngyerɛnneɛ biala, sana Yona sɛngyerɛnneɛ ne ala.” Na Yesu yakyili bɛ berɛ hɔle.

⁵Na asuafoɛ nemɔ dwuli asue ne asi dɔ nen, né bɛ wora afi kyɛ bɛkɔfa paanoo ɔ.

⁶Yeɛ Yesu sele bɛ kyɛ, “Ɛ́mɔnea yé; ɛ́mɔnea ɛmɔ nwo yé wɔ Farasiifoɛ ne Sadusiifoɛ mɔle harewaa nwo!”

⁷Na bɛdwenedwenene ye nwo bɛhane kyɛ, “Yamva paanoo yamma ne ati ɔ.”

⁸Yesu nwuni b’adwene, na ɔhane kyɛ, “O, ɛmɔ bɔ ɛmɔ gyidie te kãa ɔ, nzu ati yeɛ ɛmɔdwenedwene ye nwo kyɛ ɛmɔamva paanoo ɔ?

⁹Ɛmɔnnya bɛttele ye bo? Ɛmɔngaye paanoo nnu bɔ mmenia apee nnu belili ne, ɔne ye bo mboporoka ngɛndɛen somaa bɔ ɛmɔsesale ne?

¹⁰Anaa paanoo nzoo bɔ mmenia apee nna belili ne, ɔne ye bo mboporoka ngɛndɛen somaa bɔ ɛmɔsesale ne?

¹¹Nzu ati yeɛ ɛmɔnnwu ye kyɛ nna paanoo yeɛ mekã ye nwo dwirɛ ɔ? Ɛ́mɔnea ɛmɔ nwo yé wɔ Farasiifoɛ ne Sadusiifoɛ mɔle harewaa nwo!”

¹²Afei bɛtele ye bo kyɛ nna paanoo harewaa yeɛ osele bɛ kyɛ bɛ́nea bɛ nwo yé wɔ ye nwo ɔ, na mmom Farasiifoɛ ne Sadusiifoɛ bɛ ngyerɛkyerɛ nwo.

¹³Na mmerɛ bɔ Yesu dwuli Kaesarea Filipi mbɔtam nen, obisale ye asuafoɛ nemɔ kyɛ, “Mmenia nwa Sona Awa ne ole nwa?”

¹⁴Na bebuale kyɛ, “Ebiemɔ nwa: Asubɔlɛniɛ Yohane; ebiemɔ koso nwa: Elia; yeɛ ebiemɔ nwa Yeremia anaa ngɔmhyɛlɛfoɛ nemɔ nu ko.”

¹⁵Na obisale bɛ kyɛ, “Na ɛmɔ koso, ɛmɔnwa nwa ole me?”

¹⁶ Na Simɔn Petro buale kyɛ, “Wɔ ole Kristo ne, Nyameɛ teasefoɛ n’Awa ne.”

¹⁷ Na Yesu buale kyɛ, “Anya saleɛ, Yona awa, Simɔn! Ofikyɛ nna anwoɔnaen ne mogya yeɛ baye he bahyire wɔ ɔ, na mmom me Baba bɔ ɔwɔ nyameɛso ne ɔ.

¹⁸ Na me, mekã mekyire wɔ kyɛ: Wɔ ole Petro, na nyɔbotaen he aso yeɛ ngosi m’asɔre ngosie ɔ, na ewue tumi ngɔhora ngoli so ngonim.

¹⁹ Ngɔfa nyameɛso ahennie nzafoaa ngowura wɔ sa, na nikyee biala bɔ ɛkɔkyekye ye wɔ aseɛ so nen, bɛkɔkyekye ye wɔ nyameɛso; yeɛ nikyee biala bɔ ɛkɔsangye nu wɔ aseɛ so nen, bɛkɔsangye nu wɔ nyameɛso.”

²⁰Na ɔhyɛle asuafoɛ nemɔ kitii kyɛ nnɛmaa bɛbɔ so bekyire ebiala kyɛ ye ole Kristo ne.

²¹ Ofi sɔ mmerɛ ne, Yesu hyɛle ye bo hyirele ye asuafoɛ nemɔ kyɛ, odi kyɛ ɔkɔ Yerusalem ná okonwu amaneɛ pee wɔ maen mbanyi ne asɔfo mbanyi ne ahyerɛlɛfoɛ mɔ bɛ sa nu, ná beku ye, ná ye ɛlɛsa so otingye.

²²Yeɛ Petro fale ye hɔle ahameɛ, na ɔhyɛle ye bo ohwili ye nyunu kyɛ, “Nyameɛ pa gua, Awurade! Ɛhe ngɔto wɔ le!”

²³Na ɔkakyili ye nwo sele Petro kyɛ, “Dwɔso berɛ kɔ dɔ, Abɔnzam! Ɛte sundidua ma me; ofikyɛ nna Nyameɛ adwene yeɛ ɛdwene ɔ, na mmom ɛdwene kuro sona adwene.”

²⁴Na Yesu sele ye asuafoɛ nemɔ kyɛ, “Sɛ ebie kuro kyɛ odi me si a, maa ɔpa ye nwo si, ná ɔfa ye mmeamudua, ná oli me si.

²⁵ Ofikyɛ ebiala bɔ okuro kyɛ ode ye kra ngoa nen, ɔkɔhwere ye; nakoso ebiala bɔ ɔnate me ti ɔkɔhwere ye ngoa nen, ye sa kɔhã ye.

²⁶Na sɛ sona nya ewiase amukoraa ná ɔhwere ye kra a, nzikyɛ mvasoɛ yeɛ okonya ɔ? Anaakyɛ, nzikyɛ yeɛ sona kɔhora kɔfa kɔsesã ye kra ngoa ɔ?

²⁷ Ɔnate kyɛ, Sona Awa ne ɔne ye abɔfo mɔ bɛkɔwa ye Baba animnyam nu, na okotua ebiala kerɛ kyɛbɔ ye yɔleɛ si te ɔ.

²⁸Nahorɛ nu, mekã mekyire ɛmɔ kyɛ, mmenia biemɔ gyigyi wa bɔ bengonwu ewue kɔpem kyɛ bekonwu Sona Awa ne kyɛ ɔ́ba ye ahennie nu ɔ.”