Read Sehwi Mateo 17 Bible Online

Mateo 17 - Sehwi bible

Mateo 17

¹Na ye elesia asi ne, Yesu fale Petro ne Yakobo ne oliɛma Yohane bokale ye nwo so, na ɔfale bɛ hɔle bokaa tendenn bie aso.

²Na ɔsesane wɔ bɛ nyunu berɛ, ye nyunu tale kyɛ eyia, na ye ndaadeɛ yɛle hyɛnn kyɛ kanea.

³Na yieee, Mose ne Elia bɛyele bɛ nwo ali behyirele bɛ, na bɛ ne Yesu dwudwole.

⁴Na Petro sele Yesu kyɛ, “Awurade, ɔte paa kyɛ yɛtena wa ɔ; na sɛ ekuro a, ngɔbɔ asese nza wɔ wa, wɔ deɛ ko, Mose deɛ ko, yeɛ Elia deɛ ko.”

⁵Ogu so odwudwo ne ala, yieee, munungum hyɛnhyɛnn bie ɔɔkatale bɛ so, na edwudwolɛ bie fili munungum ne anu hane kyɛ, “Mma bɔ ɔla m’ahone nwo ná me nye gye ye nwo paa ne ɛhe; ɛ́mɔtie ye!”

⁶Na asuafoɛ nemɔ tele sɔ dwirɛ nen, bɛfale bɛ nyunu bebutubutuli berɛ, na ɛserɛ hane bɛ paa.

⁷Na Yesu wale ɔɔsosɔle bɛ nu hane kyɛ, “Ɛ́mɔdwɔso, na nnɛma ɛmɔsuro!”

⁸Na bɛpagyale bɛ ti so nen, bannwu ebiala, sana Yesu ngome.

⁹Na befi bokaa ne aso bɛtorotoro bɛba nen, Yesu hyɛle bɛ kyɛ, “Nnɛma ɛmɔbɔ bɔ ɛmɔanwu ye ne aso bekyire ebiala kɔpem kyɛ Sona Awa ne kotingye kofi awufoɛ nu ɔ.”

¹⁰Na asuafoɛ nemɔ bisale ye kyɛ, “Nzu ati yeɛ ahyerɛlɛfoɛ nemɔ bɛnwa odi kyɛ Elia di moa ba koraka ɔ?”

¹¹Na obuale kyɛ, “Odi kyɛ Elia di moa ba amba, ná ɔbatoto nningyein mukoraa yé;

¹²nakoso mekã mekyire ɛmɔ kyɛ, Elia awa dada, na bannwu ye, na bɛfale bɔ bekuro biala belili ye. Na sɔ ala yeɛ Sona Awa ne koso konwu amaneɛ wɔ bɛ sa nu ɔ.”

¹³Afei asuafoɛ nemɔ nyane ndeaseɛ kyɛ Asubɔlɛniɛ Yohane nwo dwirɛ yeɛ né ɔkã kyire bɛ ɔ.

¹⁴Bedwuli ɛlɔen ne anwo berɛ nen, biaa bie wale Yesu berɛ, oguale ndwerɛ wɔ ye nyunu, na ɔsrɛle ye kyɛ,

¹⁵“Awurade, nwu mma bienzua ye anwumvoin, ofikyɛ ɔpɛ, na onwu amaneɛ paa; na ɔtaa pɛ tɔ see nu, yeɛ ɔtaa pɛ tɔ nzue nu.

¹⁶Mvale ye mmrɛle w’asuafoɛ nemɔ, nakoso bangora banza ye anwonyerɛ.”

¹⁷Na Yesu buale kyɛ, “O ɛnɛmmafoɛ asoserɛfoɛ bɔ ɛmɔlle gyidie ɔ! Me ne ɛmɔ yɛtena maa odwu kyinzu? Nya ɛmɔ nwo aboterɛ maa odwu kyinzu? Ɛ́mɔfa ye bɛbrɛ me wa!”

¹⁸Yeɛ Yesu teateane sunzummɔne ne, na ofili ye nu fitele, na akwadaa ne tele apɔ berɛ ne ala.

¹⁹Na asuafoɛ nemɔ wale Yesu berɛ bɛ ne ye beetuli asure bebisale ye kyɛ, “Nzu ati yeɛ yɛ de yangora yandu ye ɔ?”

²⁰ Na obuale bɛ kyɛ, “Ɛmɔ gyidie te kãa ti ɔ. Nahorɛ nu, mekã mekyire ɛmɔ kyɛ, sɛ ɛmɔle gyidie bɔ ye piri te kyɛ sinapi baa ko a, ahaa ɛmɔkɔhã bekohyire bokaa he kyɛ, ‘Tutu fi wa kɔ dɔ,’ na ye bo kotutu; na ahaa nikyee biala ngɔyɛ se ngɔma ɛmɔ.” [

²¹Na sɔ nikyee he de, kyɛbɔ osi te ne, ye bo ngora tu, sana mbaeɛ ne ɛhɔenhyelɛ yeɛ otu ye ɔ.]

²²Na bɛboale bɛ noa wɔ Galilea nen, Yesu sele bɛ kyɛ, “Bɛkɔye Sona Awa ne bekowura mmenia sa;

²³na bekohu ye, na ye ɛlɛsa so okotingye.” Na ɔyɛle bɛ aworabɔ paa.

²⁴ Mmerɛ bɔ beedwuli Kapanɔm nen, asɔneyɛɛ sua nwo ɛtoɔdidelɛfoɛ wale Petro berɛ beebisale ye kyɛ, “Ɛmɔ kyerɛkyerɛniɛ ne, aso ondua ɛtoɔ ne anaa?”

²⁵ Na obuale kyɛ, “Otua.” Na Petro wale awuro nen, Yesu lili moa bisale ye kyɛ; “Simɔn, ɛdwene ye nwo sɛ? Nwa mɔ dɔ yeɛ aseɛ so ahemvo mɔ bedide ndɔ anaa ɛtoɔ ɔ? Bɛ mma mɔ dɔ, anaa amanvrafoɛ mɔ dɔ?”

²⁶Na Petro buale kyɛ, “Amanvorafoɛ mɔ dɔ.” Yeɛ Yesu sele ye kyɛ, “Nzaade né mmaa nemɔ bɛ nwo atɔ bɛ.

²⁷Nakoso, kyɛbɔ ɔkɔyɛ bɔ yɛngɔyɛ sundidua yɛngɔma bɛ ne ati, kɔ ɛpo nu kɔto koaa; na tiré bɔ ekoli moa kɔhye ye ne, sɛ ebukye ye noa nu a, ekonwu sikaa prɛnprɛn wɔ nu, na fa kotua me ne wɔ yɛ deɛ.”