Read Sehwi Mateo 20 Bible Online

Mateo 20 - Sehwi bible

Mateo 20

¹“Nyameɛso ahennie ne, ɔte kyɛ eboo mene bie bɔ ngyerɛmɔ tutuutu ɔhɔle kyɛ ɔkwaabɔ adwumayɔlɛfoɛ paa maa bɛyɔ adwuma wɔ ye bobe boo nu ɔ.

²Na ɔne adwumayɔlɛfoɛ nemɔ belili ye noa kyɛ ɛlɛho te denare[6] ko, na ɔmaa bɛhɔle ye bobe boo ne anu.

³Na osa hɔle kɔyɛ ngyerɛmɔ nnɔngono nen, onwuni mmenia biemɔ bɔ begyigyi dwaaso bɔ bɛnyɔ hwee ɔ.

⁴Yeɛ osele bɛ kyɛ, ‘Ɛmɔ koso ɛmɔɔyɔ adwuma wɔ me bobe boo ne anu, na ngotua ɛmɔ kerɛ bɔ ɔfata ɔ.’ Yiti bɛhɔle.

⁵Osa hɔle dwaaso dɔ kɔyɛ eyia duabien ne nnɔnmmiɛnza ɔɔyɔle sɔ ala.

⁶Na kɔyɛ nɔsoa nnɔnnum, ɔhɔle dwaaso dɔ oonwuni mmenia biemɔ kyɛ begyigyi berɛ mbaen ɔ; na obisale bɛ kyɛ, ‘Nzu ati yeɛ ɛmɔgyigyi wa ɛnɛ amukoraa bɔ ɛmɔnyɔ hwee ɔ?’

⁷Bebuale ye kyɛ, ‘Ofikyɛ ebiala ɔbbɔle yɛ paa’. Yeɛ osele bɛ kyɛ, ‘Ɛmɔ koso, ɛmɔhɔ me bobe boo ne anu bɛɛyɔ adwuma’.

⁸ “Na aleɛ dwole nen, bobe boo mene ne sele ye hwɛsoniɛ ne kyɛ, ‘Frɛ adwumayɔlɛfoɛ nemɔ ná tua bɛ kerɛ; hyɛ ye bo fi bɛ bɔ bɛwale nziɛ nemɔ aso kɔpem bɛ bɔ belili moa bɛwale ne aso.’

⁹Na bɛ bɔ ɔbɔle bɛ paa kɔyɛ nɔsoa nnɔnnum ne, bɛwale ne, ɔmane ebiala denare ko.

¹⁰Na bɛ bɔ olili moa bɔle bɛ paa ne, bɛwale ne, besusuli kyɛ bekonya bɔ ɔtra sɔ ɔ; nakoso ebiala nyane denare ko sɔ ala.

¹¹Na bɛ sa hane b’akatuaa nen, bɛyɛle eboo mene ne so nwuhunwuhu

¹²kyɛ ‘Ɛhemɔ bɔ bɛwale nziɛ ye, bɛyɔle adwuma dɔnhwere komapɛ, nakoso yɛ bɔ yafite ngyerɛmɔ yayɔ adwuma maa eyia ayera yɛ ne, atua yɛ ne bɛ kerɛ pɛ.’

¹³“Na obuale bɛ nu ko kyɛ, ‘Damvo, nnzisili wɔ; aso ɛne me yanni ye noa kyɛ ekole denare ko anaa?

¹⁴Wɔ de, de wɔ deɛ ná kɔ. Mekuro kyɛ bɔ ɔwale nziɛ ye ne, mema ye ne wɔ akatuaa pɛ.

¹⁵ Nikyee bɔ me bɔbɔ me deɛ ahɔ ne, asoɛ nnne ye nwo ate kyɛ mefa meyɔ bɔ mekuro anaa? Anaakyɛ, nde paa ti yeɛ wɔ nye aboro ye?’

¹⁶(Na Yesu hã toale so kyɛ,) “Yiti bɛ bɔ beli nziɛ ne, bekoli moa, yeɛ bɛ bɔ beli moa ne, bekoli nziɛ.” [Ofikyɛ bafrɛ pee, nakoso kãa bie yeɛ baneanea nu baye bɛ ɔ.]

¹⁷Mmerɛ bɔ né Yesu ɔfo kɔ Yerusalem nen, ɔfale asuafoɛ buru ne nyɔ ne ngome hɔle ahameɛ wɔ atunu, na osele bɛ kyɛ,

¹⁸“Ɛ́mɔtie, yɛ́fo yɛ́kɔ Yerusalem, na bɛkɔye Sona Awa ne bekowura asɔfo mbanyi ne ahyerɛlɛfoɛ sa, na bekobua ye ewue foɛ,

¹⁹na bɛkɔfa ye bekowura Amaenmaensofoɛ sa kyɛ bɛgoro ye nwo, ná befi ye mbire, ná bɛbɔ ye mmeamudua nu; na ye ɛlɛsa ne aso okotingye.”

²⁰Yeɛ Sebedeo mma mmienzua nemɔ bɛ maame, ɔne ye mma nemɔ bɛwale Yesu berɛ, na oguale ndwerɛ srɛle ye kyɛ ɔlo ye.

²¹Na Yesu bisale ye kyɛ, “Nzikyɛ yeɛ ɛpena ɔ?” Obuale ye kyɛ, “Hyɛ me bɔ kyɛ me mma nyɔ hemɔ, ko kɔtena wɔ sa famaa so, ná ko wora watena wɔ sa bɛen so wɔ w’ahennie ne anu.”

²² Nakoso Yesu buale kyɛ, “Ɛmɔnze bɔ ɛmɔbisa ɔ. Kulie bɔ mebaano (ye noa) ne, aso ɛmɔkɔhora bɛkɔno anaa? [Yeɛ, asubɔlɛ bɔ bɛbaafa bɛbɔ me ne, ɛmɔkɔhora maa bɛkɔfa ebie bɛkɔbɔ ɛmɔ anaa?”] Na bebuale ye kyɛ, “Yɛkɔhora.”

²³ Yeɛ Yesu sele bɛ kyɛ, “Amba, ɛmɔkɔno me kulie ne (noa) de, [yeɛ asubɔlɛ bɔ bɛfa bɛbɔ me ne, ɛmɔkɔmaa bɛkɔfa bɛkɔbɔ ɛmɔ de,] nakoso bɔ ɔtena me sa famaa so ne me sa bɛen so de, nna me deɛ ɔ bɔ mefa mema ɔ; na mmom bɛkɔfa bɛkɔma bɛ bɔ me Baba asiesie ama bɛ ɔ.”

²⁴Na asuafoɛ buru ne tele edwirɛ he nen, bɛfɛle aliɛmaa nyɔ nemɔ so yaa.

²⁵Yiti Yesu frɛle bɛ wale ye nwo berɛ, na osele bɛ kyɛ, “Ɛmɔse kyɛ Amaenmaensofoɛ ahemvo mɔ bɛhyɛ bɛ so, yeɛ bɛ mbanyi mɔ koso bedi bɛ so tumi.

²⁶Nakoso ɛmɔ nu de, ɔnzɛ kyɛ ɔba ye sɔ ɔ. Na mmom ebiala bɔ ɔpena kyɛ ɔyɛ ɛmɔ so panyi nen, ɔsɛ kyɛ ɔyɛ ɛmɔ somvoɛ;

²⁷yeɛ ebiala bɔ ɔpena kyɛ odi moa wɔ ɛmɔ nu ne, ɔsɛ kyɛ ɔyɛ ɛmɔ akoaa,

²⁸ kyɛbɔ Sona Awa ne wamma kyɛ bɛso ye, na mmom kyɛ ɔbaaso, ná ɔfa ye ngoa ɔto berɛ ode mmenia pee ngoa ne.”

²⁹Na befili Yeriko bɔ bɛkɔ nen, mmenia pee lili ye si.

³⁰Na yieee, né anyesiniwaafoɛ nyɔ bɛtete atee ne noa berɛ. Na bɛtele kyɛ Yesu ɔpɛ nu ne, bɛteateane nu kyɛ, “O Awurade, Dawide Awa, nwu yɛ anwumvoin!”

³¹Na ɛlɔen ne dwudwole bɛ kyɛ bemua bɛ noa. Nakoso bekye po yeɛ bɛteateane nu serɛserɛ bieku kyɛ, “O Awurade, Dawide Awa, nwu yɛ anwumvoin oo!”

³²Yeɛ Yesu gyinane, na ɔfrɛle bɛ bisale bɛ kyɛ, “Nzu yeɛ ɛmɔpena kyɛ meyɔ mema ɛmɔ ɔ?”

³³Bebuale ye kyɛ, “Awurade, maa yɛnwu nikye.”

³⁴Yiti Yesu nwuni bɛ anwumvoin, ɔfale ye sa hane bɛ nye, na berɛ ne ala benwuni nikye, na belili ye si.