Read Sehwi Mateo 21 Bible Online

Mateo 21 - Sehwi bible

Mateo 21

¹Na mmerɛ bɔ bepingyele Yerusalem, ná bedwuli Betefage bɔ ɔwɔ Olive Bokaa ne anwo nen, Yesu somane asuafoɛ nemɔ nyɔ

²sele bɛ kyɛ, “Ɛmɔhɔ akuraa bɔ ɔwɔ ɛmɔ nyunu dɔ ne anu, na ɛmɔdwu berɛ pɛ a, ɛmɔkonwu afunum bɔ bamenda ye ɔ, ɔne ɔwa; ɛ́mɔsangye bɛ ná ɛ́mɔfa bɛ bɛbrɛ me.

³Na sɛ ebie bisa ɛmɔ dwirɛ biala a, ɛmɔhã kyɛ, ‘Awurade hia bɛ,’ na berɛ ne ala, ɔkɔmaa ɛmɔkɔfa bɛ bɛkɔwa.”

⁴Na ɛhe sili maa bɔ ngɔmhyɛlɛniɛ ne hane ne wale nu kyɛ,

⁵ “Ɛmɔhã behyire Sion awa brasua ne kyɛ: Nea, wɔ hene ɔ́ba wɔ berɛ, odwo, na ɔte afunum so, ɔne afunum akrɔngrɔma so, bɔ ɔte afunum beleɛ ɔ.”

⁶Yiti asuafoɛ nemɔ hɔle bɛɛyɔle kyɛbɔ Yesu hyɛle bɛ ne ala.

⁷Bɛfale afunum ne ne ɔwa ne bɛwale, na bɛfale bɛ ndaadeɛ beguale bɛ so, na Yesu tenane so.

⁸ Na ɛlɔen ne, bɛ nu pee fale bɛ ndaadeɛ bɛsesɛle atee ne anu, yeɛ ebiemɔ koso bebubuli nyaa bɛsesɛle atee ne anu.

⁹ Na ɛlɔen bɔ beli ye nyunu ne, bɛ ne bɛ bɔ beli ye si ne, bɛbɔle ese kyɛ, “Hosana hã Dawide Awa ne! Saleɛ ole bɔ ɔnate Awurade dumaa nu ɔ́ba ye! Hosana wɔ anwuro anwuro!”

¹⁰Na odwuli Yerusalem nen, kurotue ne amukoraa bɛbɔle twi bebisale kyɛ, “Na nwa ɛhe?”

¹¹ Na ɛlɔen ne buale kyɛ, “Ɛhe ole Yesu, ngɔmhyɛlɛniɛ ne bɔ ofi Nasarɛte bɔ ɔwɔ Galilea ne.”

¹² Yesu wurale [Nyameɛ] asɔneyɛɛ sua ne anu, na ɔfoane bɛ bɔ bɛtɔne nningyein ne bɛ bɔ bɛtɔ amukoraa fili asɔneyɛɛ sua nu berɛ. Na obutubutuli sikaasesãlɛfoɛ bɛ poen nemɔ, yeɛ bɛ bɔ bɛtɔne mmorɔnoma ɔ bɛ bia mɔ.

¹³Na osele bɛ kyɛ, “Bahyerɛ kyɛ, ‘Bɛkɔfrɛ m’awuro mbaeɛbɔlɛ awuro’; nakoso ɛmɔ de, ɛmɔafa bakakyi awuefoɛ afealeɛ!”

¹⁴Na anyesiniwaafoɛ ne mbakye wale ye berɛ wɔ asɔneyɛɛ sua ne anu, na ɔsale bɛ anwonyerɛ.

¹⁵Nakoso asɔfo mbanyi ne ahyerɛlɛfoɛ nemɔ nwuni anwanwadeɛ mɔ bɔ ɔyɔle ne, ɔne ngwadaa bɔ bɛteatea nu wɔ asɔneyɛɛ sua nu berɛ kyɛ, “Hosana hã Dawide Awa ne” nen, wanyɛ bɛ fɛ koraa.

¹⁶Yiti bebisale ye kyɛ, “Aso ɛte bɔ ɛhemɔ bɛ́kã ne?” Na Yesu buale bɛ kyɛ, “Yoo, aso ɛmɔkkenngale ye le kyɛ, ‘Ngwadaa ne nnɔma bɔ bɛno nyɔfone bɛ noa nu yeɛ asiesie ayɛyelɛ ɔ’ anaa.”

¹⁷Na ɔyakyili bɛ berɛ fili kuro ne anu hɔle Betania ɔɔlale berɛ.

¹⁸Na ngyerɛmɔ ne, bɔ né Yesu osa ba kuro ne anu nen, né ɛhɔen ku ye.

¹⁹ Na onwuni borɔdoma bakaa bie wɔ atee ne noa, ɔhɔle ye nwo berɛ, na wannwu hwee wɔ so, sana nyaa ngome. Na osele bakaa ne kyɛ, “Engosu mmaa ko le!” Na berɛ ne ala, borɔdoma bakaa ne wuli.

²⁰Na asuafoɛ nemɔ nwuni ye sɔ nen, ɔyɛle bɛ nwanwa, na bɛhane kyɛ, “Ɔyɛle sɛɛ yeɛ kekesaala ye borɔdoma bakaa ye wawu ye?”

²¹ Yeɛ Yesu buale bɛ kyɛ, “Nahorɛ nu, mekã mekyire ɛmɔ kyɛ, sɛ ɛmɔle gyidie ná ɛmɔanzu aporowaa a, nna bɔ wato borɔdoma bakaa he angome yeɛ ɛmɔkɔyɔ ɔ, na mmom, sɛ ye po ɛmɔkã bekyire bokaa he kyɛ, ‘Tutu kɔtɔ ɛpo nu’ a, ɔkɔyɛ berɛ.

²²Na nikyee biala bɔ ɛmɔkobisa ye wɔ mbaeɛbɔlɛ nu, ná ɛmɔde bedi nen, ɛmɔ sa kɔhã ye.”

²³Yesu wurale asɔneyɛɛ sua ne anu, na ogu so ɔyɛ ngyerɛkyerɛ nen, asɔfo mbanyi ne maen mbanyi bɛwale ye berɛ beebisale ye kyɛ, “Tumi beni yeɛ egyi so bɔ ɛyɔ sɔ nningyein hemɔ ye? Na nwa yeɛ ɔmane wɔ sɔ tumi ne ɔ?”

²⁴Na Yesu buale bɛ kyɛ, “Me koso ngobisa ɛmɔ dwirɛ ko, na sɛ ɛmɔma me mmuayɛɛ a, ye de, me koso ngɔhã tumi horɛ bɔ ngyi so meyɔ nningyein hemɔ ɔ ngohyire ɛmɔ.

²⁵Yohane asubɔlɛ ne, ofi nisua? Ofi nyameɛso anaa ofi mmenia berɛ?” Na bɛdwenedwenene ye nwo besisele bɛ nwo kyɛ, “Sɛ yɛkã kyɛ, ‘Ofi nyameɛso’ a, okobisa yɛ kyɛ, ‘Nzaade, nzu ati yeɛ ɛmɔanne ye banni ɔ?’

²⁶Yeɛ sɛ yɛkã kyɛ, ‘Ofi mmenia berɛ’ a, yɛsuro mmenia worawora ne, ofikyɛ bɛ mukoraa bebu Yohane kyɛ ɔte ngɔmhyɛlɛniɛ.”

²⁷Yiti bebuale Yesu kyɛ, “Yɛnze.” Yeɛ Yesu sele bɛ kyɛ, “Nzaade me koso mengɔhã tumi horɛ bɔ ngyi so meyɔ sɔ nningyein hemɔ ɔ mengohyire ɛmɔ.”

²⁸“Ɛmɔdwene ye nwo sɛ? Né biaa bie le mmaa mmienzua nyɔ; na ɔhɔle bɔ oli moa ne berɛ oosele ye kyɛ, ‘Mma, ɛnɛ kɔyɔ adwuma wɔ me bobe boo ne anu.’

²⁹Na obuale kyɛ, ‘Mengɔhɔ.’ Nakoso nziɛ ye ɔsesane ye adwene, na ɔhɔle.

³⁰Na ɔhɔle bɔ ɔtɔ so nyɔ ne koso berɛ ɔɔhane sɔ ala hyirele ye. Na obuale kyɛ, ‘Me mene, ngɔhɔ.’ Nakoso wangɔ.

³¹Bɛ munyɔ ne, bɛ nu beni yeɛ ɔyɔle ye baba apɛdeɛ ɔ?” Na bebuale kyɛ, “Bɔ oli moa ne ɔ.” Yeɛ Yesu sele bɛ kyɛ, “Nahorɛ nu, mekã mekyire ɛmɔ kyɛ, ɛtoɔdidelɛfoɛ ne adwamanbɔlɛfoɛ bédi ɛmɔ nyunu moa bɛkɔ Nyameɛ ahennie ne anu.

³²Ofikyɛ Yohane fale tenenee atee so yeɛ ɔwale ɛmɔ berɛ ɔ, na ɛmɔanne ye banni. Nakoso ɛtoɔdidelɛfoɛ ne adwamanbɔlɛfoɛ de, belele ye belili; na ɛmɔnwuni ye sɔ ne po, ye si ye ɛmɔanzesã ɛmɔ adwene banne ye banni.”

³³ “Ɛ́mɔtie anyandera bieku! Eboo mene bie yɔle bobe boo. Olele ye nwo bra yiale, ɔpɛle nu kumaa bɔ betwi nzaa wɔ nu ɔ, osili abandenden wɔ nu, na ɔfa wurale hwɛsofoɛ biemɔ sa, na otuli atee hɔle maen bie aso.

³⁴Na mmerɛ bɔ bobe telɛ dwuli nen, ɔsomane ye somvoɛ mɔ maa bɛhɔle hwɛsofoɛ nemɔ berɛ kyɛ beele ye mmakaammaa deɛ bɛbrɛ ye.

³⁵ Nakoso hwɛsofoɛ nemɔ hyele ye somvoɛ nemɔ, bɛbole ko, behuni ko, yeɛ bɛborole ko wora nyɔboɛ.

³⁶Osa somane somvoɛ mɔ bɔ bɛsone bɛtra bɛ bɔ beli moa ne ɔ; na sɔ ala yeɛ bɛyɛle bɛ ɔ.

³⁷Ye si ye, ɔsomane ɔwa bienzua maa ɔhɔle bɛ berɛ, na ɔhane kyɛ, ‘Mma ne de, bɛkɔfa anidie bɛkɔma ye.’

³⁸ Nakoso mmerɛ bɔ hwɛsofoɛ nemɔ nwuni ɔwa ne nen, besisele bɛ nwo kyɛ, ‘Bɔ odi ye bia ne ɛhe; ɛmɔbra ma yɛhu ye, ná yɛfa ye agyapadeɛ ne!’

³⁹Yiti bɛhyele ye, bɛhwene ye befili bobe boo ne anu, na behuni ye.

⁴⁰Yiti kyẽa bɔ bobe boo mene ne kɔwa ne, nzikyɛ yeɛ ɔkɔfa kɔyɔ sɔ hwɛsofoɛ nemɔ ɔ?”

⁴¹ Na bebuale ye kyɛ, “Okohu sɔ awudifoɛ nemɔ ewue yealɛ, ná wafa bobe boo ne wawura hwɛsofoɛ foforɛ mɔ sa, bɔ bobe telɛ dwu so a bɛkɔfa ye mmakaammaa deɛ bɛkɔma ye ɔ.”

⁴² Yeɛ Yesu bisale bɛ kyɛ, “Aso ɛmɔkkenngale Ahyerɛlɛ ne le, kyɛ, ‘Nyɔboɛ bɔ suasilɛfoɛ bɛpole ye ne, ye ala yeɛ waayɛ sua ne ndweasoɛ nyɔboɛ titire ɔ. Awurade yeɛ wayɔ ɛhe ɔ, na ɔyɛ nwanwa wɔ yɛ nye so?’

⁴³“Ɛhe ati, mekã mekyire ɛmɔ kyɛ, bekole Nyameɛ ahennie ne bekofi ɛmɔ sa nu bɛkɔfa bɛkɔma maen bɔ bekosu ahennie ne anu mmaa ɔ. [

⁴⁴Na ebiala bɔ okofi ase kɔtɔ nyɔboɛ he aso ne, okobubu ye nu ahuronzi ahuronzi; yeɛ sɛ ɔte tɔ ebie so a, okonuku ye nyokonyoko.”]

⁴⁵Na mmerɛ bɔ asɔfo mbanyi ne Farasiifoɛ nemɔ bɛtele ye anyandera ne nen, benwuni kyɛ ɔne bɛ.

⁴⁶Yiti bɛyɛle kyɛ bɛkɔhye ye, nakoso né besuro ɛlɔen ne; ofikyɛ né ɛlɔen ne bu ye kyɛ ɔte ngɔmhyɛlɛniɛ.