Read Sehwi Mateo 25 Bible Online

Mateo 25 - Sehwi bible

Mateo 25

¹ “Afei nyameɛso ahennie ne, yɛkɔfa yɛkɔto mmabunu buru biemɔ bɔ bɛfale bɛ nganea besili nu bɛhɔle kyɛ bɛkwaayia atɔmvorɛ biaa ne nwo.

² Bɛ nu nnu te nworɛfoɛ, yeɛ nnu wora bɛte ngwaseafoɛ.

³Ngwaseafoɛ nemɔ fale bɛ nganea ne, na bamva ngoo bandira.

⁴Nakoso nworɛfoɛ nemɔ de, bɛfale ngoo beguale ndowaa nu bɛbokale bɛ nganea nemɔ aso.

⁵Na ɔhyɛle bɔ né atɔmvorɛ biaa ne ɔmma ɔ, yiti bɛ mukoraa bɛ nye hone, na bɛlafelafele.

⁶“Na abunnamu yeɛ ebie teane nu kyɛ, ‘Ɛ́mɔtie, atɔmvorɛ biaa ne awa oo! Ɛmɔbra beeyia ye oo!’

⁷Na sɔ mmabunu nemɔ amukoraa bedwɔsole, na bɛyɔle bɛ nganea nyamaa nemɔ yé.

⁸Na ngwaseafoɛ nemɔ sele nworɛfoɛ nemɔ kyɛ, ‘Ɛ́mɔma yɛ ɛmɔ ngoo ne bie, ofikyɛ yɛ nganea nemɔ bénua.’

⁹Nakoso nworɛfoɛ nemɔ buale kyɛ, ‘Daabi oo, ɔngɔso yɛ ne ɛmɔ; yiti ɛmɔhɔ bɛ bɔ bɛtɔne bie nemɔ dɔ bɛɛtɔ ɛmɔ deɛ.’

¹⁰Na bɛhɔle kyɛ bɛkwaatɔ bie nen, atɔmvorɛ biaa ne wale; na bɛ bɔ né baboaboa bɛ nwo basie ne, bɛ ne ye hɔle atɔmvorɛ ne abo, na bɛtole anoa ne anu.

¹¹ “Na nziɛ ye, mmabunu ngaa nemɔ koso bɛwale, na bɛhane kyɛ, ‘Yɛ mene, Yɛ mene, bukye ma yɛbra nu oo!’

¹²Nakoso obuale kyɛ, ‘Nahorɛ nu, mekã mekyire ɛmɔ kyɛ, menze ɛmɔ!’

¹³ “Yiti ɛ́mɔwɛne, ɔnate kyɛ ɛmɔnze kyẽa ne anaa dɔnhwere ne [bɔ Sona Awa ne kɔwa ɔ.]”

¹⁴“Afei koso, [nyameɛso ahennie ne,] ɔte kyɛ biaa bie bɔ né ɔbaatu atee kɔ nekaa bie, bɔ ɔfrɛle ye bɔbɔ ye ngoaa mɔ, ná ɔfale ye nningyein wurale bɛ sa ɔ.

¹⁵Na ɔmane ko talɛnde nnu, ɔmane ko wora talɛnde nyɔ, yeɛ ko wora ɔmane ye talɛnde ko; kyɛbɔ bɛ nu biala ye mmɔdenbɔlɛ osi te ɔ, na afei otuli atee ne.

¹⁶Na berɛ ne ala, ko bɔ onyane talɛnde nnu ne, ɔfale ye sikaa ne ɔɔyɔle adwuma, na onyane mvasoɛ talɛnde nnu.

¹⁷Sɔ ala yeɛ bɔ onyane talɛnde nyɔ ne koso onyane nyɔ bokale so ɔ.

¹⁸Nakoso bɔ onyane ko ne de, ootuli kumaa, na ofuni ye mene sikaa ne wurale.

¹⁹ “Na ɔhyɛle dee ne, ngoaa nemɔ bɛ mene ne osa wale, na ɔne bɛ beebuli ngondaa.

²⁰Na ko bɔ onyane talɛnde nnu ne wale, ɔfale talɛnde nnu yeɛ ɔbokale so wale ɔ, na osele kyɛ, ‘Me mene, ɛmane me talɛnde nnu. Na nea, manya ye nwo talɛnde nnu.’

²¹ Yeɛ ye mene ne sele ye kyɛ, ‘Mmo, akoaa paa ne nahorɛniɛ! Ali kaaba bie nwo nahorɛ, ngɔfa bɔ ɔsone ɔ ngowura wɔ sa; bra baanya wɔ mene anigye ne anu kyɛfa!’

²²“Na ko bɔ onyane talɛnde nyɔ ne koso wale, na ɔhane kyɛ, ‘Me mene, ɛmane me talɛnde nyɔ. Na nea, manya ye nwo talɛnde nyɔ.’

²³Yeɛ ye mene ne sele ye kyɛ, ‘‘Mmo, akoaa paa ne nahorɛniɛ! Ali kaaba bie nwo nahorɛ, ngɔfa bɔ ɔsone ɔ ngowura wɔ sa; bra baanya wɔ mene anigye ne anu kyɛfa!’

²⁴“Afei, ko bɔ onyane talɛnde ko ne koso wale, na ɔhane kyɛ, ‘Me mene, mese kyɛ ɛte sona bɔ wɔ dwirɛ yɛ se ɔ, ebu nnɔbaeɛ wɔ nekaa bɔ elluale hwee ɔ, yeɛ ɛboaboa aleɛ noa wɔ nekaa bɔ elluale hwee ɔ;

²⁵yiti né mesuro, na mvale wɔ talɛnde ne ngɔmveale aseɛnwo. Wɔ nikyee ɛhe, de!’

²⁶“Yeɛ ye mene ne buale ye kyɛ, ‘Akoaa atianuserɛniɛ ne ɛfoen sona! Yiti né ɛse kyɛ mebu nnɔbaeɛ wɔ nekaa bɔ nnnuale hwee ɔ, yeɛ meboaboa aleɛ noa wɔ nekaa bɔ nnnuale hwee ɔ?

²⁷Nzaade, ahaa né ɔsɛ kyɛ ɛfa me sikaa ne kɔma sikakorabeafoɛ. Na mmale ye, ahaa me sa kɔhã me sikaa ne ne ye nwo nzihoɛ!

²⁸Yiti ɛ́mɔle talɛnde ne befi ye sa nu, ná ɛ́mɔfa bɛ́ma bɔ ole talɛnde buru ne.

²⁹ Ɔnate kyɛ, ebiala bɔ ole bie ne, bɛkɔfa bie bɛkɔboka ye so maa ɔkɔbo so; nakoso bɔ olle bie ne, bɔ ole ye ne po, bekole bekofi ye sa nu.

³⁰Akoaa bɔ mvasoɛ nne ye so ye, ɛ́mɔgyi ye bɛ́to bondua dɔ awosii ne anu, na berɛ yeɛ mmenia kosũ ná banwose bɛ gye ɔ.’

³¹ “Sona Awa ne kɔwa ye animnyam nu bɔ ye abɔfo amukoraa bɛboka ye so ɔ, na ɔkɔtena ye animnyam ahennie bia so.

³² Na ɔkɔboaboa maen maen amukoraa noa wɔ ye nyunu. Na ɔkɔhyɛ bɛ nu kyɛbɔ mmoaenneafoɛ yeye mmoaen fi mbɔngye nu ɔ.

³³Ɔkɔfa mmoaen ne kogyina ye sa famaa so, ná wafa mbɔngye ne wagyina ye bɛen so.

³⁴ Na afei Ɛhene ne kose bɛ bɔ bɛwɔ ye famaa so ne kyɛ, ‘Ɛmɔ bɔ me Baba ayira ɛmɔ ɔ, ɛmɔbra bɛɛfa ahennie bɔ basiesie bama ɛmɔ fi ewiase ahyɛaseɛ ne bɛyɛ ɛmɔ deɛ.

³⁵ Ofikyɛ ɛhɔen huni me, na ɛmɔmane me nikyee maa nnili; nzuhɔen huni me, na ɛmɔmane me nzue maa nnone; nyɛle wɔfoɛ, na ɛmɔsikyele me ɛmɔ awuro;

³⁶me nwo lale so, na ɛmɔherale me tena; me nwo yɛle me yea, na ɛmɔɔneane me; ngɔnale kuku nu, na ɛmɔɔsrale me.’

³⁷“Na teneneefoɛ nemɔ kobua ye kyɛ, ‘Awurade, kyinzu yeɛ yɛnwuni wɔ kyɛ ɛhɔen huni wɔ ná yɛmane wɔ nikyee maa elili ɔ, anaa nzuhɔen huni wɔ ná yɛmane wɔ nzue maa ɛnone ɔ?

³⁸Na kyinzu yeɛ yɛnwuni wɔ kyɛ ayɛ wɔfoɛ ná yɛɛsikyele wɔ wɔ yɛ awuro, anaa wɔ nwo la so ná yɛherale wɔ tena ɔ?

³⁹Kyinzu yeɛ yɛnwuni wɔ kyɛ wɔ nwo yɛ wɔ yea anaa ɛla kuku nu bɔ yɛɛneane wɔ ɔ?’

⁴⁰ Na Ɛhene ne kobua bɛ kyɛ, ‘Amba, mekã mekyire ɛmɔ kyɛ, kyɛ ɛmɔyɔ bɛmane nniɛma hemɔ anu kaaba ko po nen, me yeɛ ɛmɔyɔ bɛmane me ɔ!’

⁴¹ “Na afei okose bɛ bɔ bɛwɔ ye sa bɛen so ne kyɛ, ‘Ɛmɔ bɔ banoma ɛmɔ ɔ! Ɛ́mɔfi me so bɛhɔ see afebɔɔ bɔ basiesie bama abɔnzam ne ye abɔfo mɔ ne anu!

⁴²Ofikyɛ ɛhɔen huni me, nakoso ɛmɔamma me nikyee ma manni; nzuhɔen huni me, nakoso ɛmɔamma me nzue ma manno;

⁴³nyɛle ɛwɔfoɛ, nakoso ɛmɔanzikye me ɛmɔ awuro; me nwo lale so, nakoso ɛmɔangera me tena; me nwo yɛle me yea, yeɛ ngɔnale kuku nu, nakoso ɛmɔammannea me.’

⁴⁴“Na bɛ koso bekobua kyɛ, ‘Awurade, kyinzu yeɛ yɛnwuni wɔ kyɛ ɛhɔen ku wɔ anaakyɛ nzuhɔen ku wɔ, anaa ayɛ wɔfoɛ, anaa wɔ nwo la so, anaa wɔ nwo yɛ wɔ yea, anaa ɛla kuku nu bɔ yammoka wɔ ɔ?’

⁴⁵Na okobua bɛ kyɛ, ‘Amba, mekã mekyire ɛmɔ kyɛ, kyɛ ɛmɔanyɔ bamma ɛhemɔ nu kaaba ko po ne, me yeɛ ɛmɔanyɔ bamma me ɔ.’

⁴⁶ Na ɛhemɔ kofi berɛ kɔhɔ asohwenɛ bɔ olle ayieleɛ nu; nakoso teneneefoɛ nemɔ de, bɛkɔhɔ daa ngoa nu.”