Read Sehwi Mateo 7 Bible Online

Mateo 7 - Sehwi bible

Mateo 7

¹ “Nnɛma ɛmɔbua ndɛen, ná Nyameɛ koso wammua ɛmɔ ndɛen,

²ɔnate kyɛ ndɛen horɛ bɔ ɛmɔkobua ne, ye ala yeɛ bɛkɔfa bekobua ɛmɔ ɔ; na nikye horɛ bɔ ɛmɔkɔfa bekosusu ne, ye ala yeɛ bɛkɔfa bekosusu bɛkɔma ɛmɔ ɔ.

³ Na nzu ati yeɛ enwu baka sii bɔ ɔla eliɛma nye so, nakoso mbuna bɔ ɔla wɔ nye so de ennwu ye ɔ?

⁴Anaakyɛ, ɔkɔyɛ sɛɛ né ahã ahyire eliɛma kyɛ, ‘Maa nye wɔ nye so baka sii mma wɔ,’ wɔ aberɛ bɔ wɔ koso mbuna la wɔ nye so ɔ?

⁵Nyaatwomniɛ! Di moa ye wɔ nye so mbuna ne koraka, na ɔkɔmaa ekonwu nikyee yé, na ahora aye baka sii bɔ ɔla eliɛma nye so ne.

⁶“Nnɛma ɛmɔfa bɔ ɔte krongron ɔ bɛma ngyea, yeɛ nnɛma ɛmɔto ɛmɔ mbembenanneɛ paa begua mbrako nyunu, ná bamva bɛ gya bandiatia so, ná bambɛ bɛ nwo bangeka ɛmɔ.

⁷“Ɛ́mɔbisa, na ɛmɔ sa kɔha ye; ɛmɔpena, na ɛmɔkonwu ye; ɛ́mɔbɔ nu, na bekobukye ɛmɔ.

⁸Ofikyɛ ebiala bɔ obisa ne, ye sa ka ye; na bɔ ɔpena ne, onwu ye; yeɛ bɔ ɔbɔ nu ne, bebukye ye.

⁹Anaakyɛ ɛmɔ nu nwa yeɛ ɔwa bisa ye paanoo a, ɔkɔma ye nyɔboɛ ɔ?

¹⁰Anaakyɛ obisa ye tiré a, ɔkɔma ye ewoo ɔ?

¹¹Na ɛmɔ po bɔ ɛmɔte bɔnefoɛ ɔ, sɛ ɛmɔse kyɛbɔ ɛmɔma ɛmɔ mma mɔ nningyein paa a, nzaade ɛmɔ Baba bɔ ɔwɔ nyameɛso ne, ɔkɔyɛ sɛɛ bɔ ɔngɔfa nningyein paa ngɔma bɛ bɔ bebisa ye ɔ?

¹² Yiti nikyee biala bɔ ɛmɔpena kyɛ mmenia yɔ ma ɛmɔ ne, ɛmɔ koso ɛ́mɔyɔ sɔ ala bɛ́ma bɛ; ofikyɛ porɛ bɔ mmeraa ne ne ngɔmhyɛlɛfoɛ nemɔ gyi so hɔ ɛne.

¹³ “Ɛ́mɔwura anoa bɔtɔfee ne anu; ɔnate kyɛ anoa bɔ ɔte piri ɔne atee bɔ ɔte tɛtrɛtɛɛ ne yeɛ ɔkɔ ewue nu ɔ, na bɛ bɔ bewura nu ne bɛsone pee.

¹⁴Anoa bɔ ɔte bɔtɔfee ne atee bɔ ɔte kyenɔnn ne yeɛ ɔkɔ ngoa nu ɔ, na mmenia kaaba bie yeɛ benwu ye ɔ.

¹⁵ “Ɛ́mɔnea ɛmɔ nwo yé wɔ ngondombo ngɔmhyɛlɛfoɛ nwo; bɛfa boaen nwomaa bedwira bɛ nwo bɛba ɛmɔ berɛ, nakoso bɛ nu de, bɛte pataku adifuufoɛ.

¹⁶ Bɛ yɔleɛ yeɛ ɛmɔkɔfa bekonwu bɛ ɔ. Aso bɛtete bobe wɔ mmowue so, anaakyɛ bɛtete borɔdoma wɔ ɛfone so?

¹⁷Sɔ ala yeɛ bakaa paa biala osu mmaa paa ɔ, nakoso bakaa tɛɛ de osu mmaa tɛɛ.

¹⁸Bakaa paa ngɔhora ngosu mmaa tɛɛ, yeɛ bakaa tɛɛ koso ngɔhora ngosu mmaa paa.

¹⁹Bakaa biala bɔ onzu mmaa paa nen, bɛpɛ bɛto, na begyi bɛto see nu.

²⁰Yiti bɛ yɔleɛ yeɛ ɛmɔkɔfa bekonwu bɛ ɔ.

²¹ “Nna ebiala bɔ ose me kyɛ ‘Awurade, Awurade’ ne, yeɛ ɔkɔhɔ nyameɛso ahennie ne anu ɔ, na mmom sana bɔ ɔyɔ me Baba bɔ ɔwɔ nyameɛso ne ye apɛdeɛ ɔ.

²² Na sɔ kyẽa ne, mmenia pee yeɛ bekose me kyɛ, ‘Awurade, Awurade, aso yamva wɔ dumaa yanhyɛ ngɔm; aso yamva wɔ dumaa yandu sunzummɔne mɔ; aso yamva wɔ dumaa yanyɔ anwanwadeɛ pee?’

²³Na ɛhe yeɛ ngɔpakye nu ngose bɛ kyɛ, ‘Menze ɛmɔ koraa, ɛ́mɔfi me so bɛhɔ, ɛmɔ bɔ ɛmɔyɔ bɔ ɔndengyɛ ɔ!’

²⁴“Yiti ebiala bɔ ɔte me dwirɛ he ná odi so nen, ngɔfa ye ngɔtoto nworɛniɛ bie bɔ osili ye sua wɔ nyɔbotaen so ɔ nwo.

²⁵Esue piri bie tɔle, na nzue yili, mvrama tuli oofini sua ne, nakoso wammu, ɔnate kyɛ bɛtole ye fapem ne wɔ nyɔbotaen so.

²⁶“Na ebiala bɔ ɔte me dwirɛ he na onni so nen, ngɔfa ye ngɔtoto kwaseaa bie bɔ osili ye sua siele anweaa so ɔ nwo.

²⁷Esue piri bie tɔle, na nzue yili, mvrama tuli oofini sua ne, na obuli, na obuli gyirigorɔɔ.”

²⁸ Yesu yiele sɔ dwirɛ nemɔ kã nen, ɛlɔen ne nwo dwirili bɛ wɔ ye ngyerɛkyerɛ ne anwo,

²⁹ofikyɛ ohyirehyirele bɛ kyɛ ebie bɔ ole tumi ɔ, na mmom nna kyɛ b’ahyerɛlɛfoɛ nemɔ.