Read Sehwi Mateo 8 Bible Online

Mateo 8 - Sehwi bible

Mateo 8

¹Yesu fili bokaa ne aso dwuli nen, mmenia pee lili ye si.

² Na yieee, kwataniɛ bie wale ooguale ndwerɛ wɔ ye nyunu berɛ, na osele kyɛ, “Awurade, sɛ ekuro a, ɛkɔhora kɔma me nwo kofi.”

³Na Yesu tengyɛle ye sa fa hane ye, na ɔhane kyɛ, “Mekuro, wɔ nwo fi!” Na berɛ ne ala ye kwata ne hɔle.

⁴ Yeɛ Yesu sele ye kyɛ, “Tie, nnɛbɔ so kyire ebiala, na mmom kɔ, ná fa wɔ nwo kohyire ɔsɔfo, ná fa ayɛyɛdeɛ bɔ Mose hyɛle ne kɔ, ná ɔyɛ adanzeɛ ma bɛ.”

⁵Yesu dwuli Kapanɔm nen, asraafoɛ ɛyaa so panyi bie wale ye berɛ, na ɔsrɛle ye kyɛ,

⁶“Awurade, m’akoaa nde apɔ, wabubu ɔla awuro, na onwu amaneɛ soma.”

⁷Yeɛ Yesu sele ye kyɛ, “Ngɔwa ngɔɔsa ye anwonyerɛ.”

⁸Na asraafoɛ ɛyaa so panyi ne buale ye kyɛ, “Awurade, memvata kyɛ ɛkɔwa m’awuro ɔ; wɔ de kã edwirɛ ne ala, na m’akoaa ne nwo kɔtɔ ye.

⁹Ofikyɛ me koso nde sona bɔ nwura tumi bo, na asraafoɛ wura me bo, na mekã mekyire ɛhe kyɛ, ‘Kɔ!’ a, ɔkɔ; yeɛ mekã mekyire ko koso kyɛ, ‘Bra!’ a, ɔba; na mekã mekyire m’akoaa kyɛ, ‘Yɔ ɛhe!’ a, ɔyɔ.”

¹⁰Na Yesu tele bɔ ɔhane nen, ɔyɛle ye nwanwa, na osele mmenia bɔ beli ye si ne kyɛ, “Nahorɛ nu, mekã mekyire ɛmɔ kyɛ, Yisrael po, nnwuni gyidie piri bɔ ɔte sɔaa ɔ.

¹¹ Na mekã mekyire ɛmɔ kyɛ, mmenia pee kofi eyia afiteleɛ ne eyia atɔleɛ bɛkɔwa, na bɛ ne Abraham ne Yisake ne Yakob bɛkɔtena bekodidi wɔ nyameɛso ahennie ne anu.

¹²Nakoso Ahennie mma nemɔ de, bekogyi bɛ bekogua nziɛ dɔ awosii nu; na berɛ yeɛ esuɛ ne agyeenwosenɛ wɔ ɔ.”

¹³Na Yesu sele asraafoɛ ɛyaa so panyi ne kyɛ, “Kɔ, na kyɛbɔ ale ali ne, ɔ́yɛ sɔ ma wɔ!” Na sɔ mmerɛ ne ala, ye akoaa ne nwo sandene ye.

¹⁴Yesu wale Petro awuro, na onwuni kyɛ ebunu ahye ye sia brasua wato berɛ.

¹⁵Na ɔɔsɔle ye sa, na ebunu ne tu fili ye nwo, na odwɔsole sole ye.

¹⁶Na odwuli nɔsoa nen, bɛfale mmenia pee bɔ sunzummɔne wɔ bɛ so ɔ bɛwale Yesu berɛ. Ɔfale ye noa dwirɛ tutuli sunzummɔne nemɔ, na ɔsale bɛ bɔ bɛnde apɔ ne amukoraa anwonyerɛ.

¹⁷ Na ɛhe mane bɔ ngɔmhyɛlɛniɛ Yesaya hane ne wale nu kyɛ, “Ye yeɛ ɔfale yɛ anwommerɛlɛ, ná ɔsoale yɛ anwonyerɛ mɔ.”

¹⁸Yesu nwuni mmenia pee bɔ bapɛ ye nwo bayia nen, ɔhyɛle kyɛ bɛkɔhɔ asue ne asi dɔ.

¹⁹Na ahyerɛlɛniɛ bie wale oosele Yesu kyɛ, “Kyerɛkyerɛniɛ, nekaa biala bɔ ɛkɔhɔ ne, me ne wɔ yɛkɔhɔ.”

²⁰Na Yesu buale ye kyɛ, “Safuboa mɔ bele bɔen mɔ, yeɛ ewienu nnomaa bele saen mɔ; nakoso Sona Awa ne de, olle nekaa bɔ ɔfa ye ti to ɔ.”

²¹ Na sona foforɛ bɔ né ɔboka asuafoɛ nemɔ so ɔ sele ye kyɛ, “Awurade, ma me ate ma ngonzie me baba koraka.”

²² Nakoso Yesu buale ye kyɛ, “Di me si, ná ma awufoɛ bésie b’awufoɛ!”

²³Yesu tenane ɛlɛen nu nen, ye asuafoɛ nemɔ lili ye si.

²⁴Na yieee, mvrama piri bie hyɛle ye bo tuli ɛpo ne aso, maa ɔnate so asorɔkye bɔ katale ɛlɛen ne aso; nakoso ye de, né walafe.

²⁵Na bɛhɔle ye berɛ beetingyele ye besele kyɛ, “Awurade, de yɛ, na yawu yayie!”

²⁶ Na osele bɛ kyɛ, “O ɛmɔ gyidie te kãa, nzu ati yeɛ ɛserɛ ahã ɛmɔ sɔa e?” Afei odwɔsole, na ɔteateane mvrama ne ne asorɔkye ne, na bɛyɛle dinn.

²⁷Ɔyɛle mmenia nemɔ nwanwa, na bɛhane kyɛ, “Sona beni koraa ɛhe, bɔ mvrama ne ɛpo po betie ye e!”

²⁸Yesu dwuli Gadarafoɛ aseɛ so wɔ asue ne asi dɔ nen, mmenia nyɔ bie bɔ bele sunzummɔne ɔ befili asieleɛ ngumaa nu befitele beeyiale ye. Na ɔnate b’awerɔm ne ati, né ebiala ngora mva atee ne aso.

²⁹ Na yieee, bɛteateane nu kyɛ, “Nzikyɛ yeɛ yɛne wɔ le yɔ ɔ, wɔ, Nyameɛ Awa? Ɛwale wa kyɛ ɛbaateetee yɛ koraka ná mmerɛ ne adwu anaa?”

³⁰Né mbrako kure pee bie bedidi wɔ nziɛ nziɛ dɔ.

³¹Na sunzummɔne nemɔ srɛle ye kyɛ, “Sɛ etu yɛ a, foa yɛ ma yɛɛwura mbrako kure ye anu.”

³²Na osele bɛ kyɛ, “Ɛmɔhɔ!” Yiti befili bɛ nu befitele, na beewurale mbrako nemɔ anu. Na yieee, mbrako kure ne amukoraa bepiane bɛ nwo wii bɛtorotorole bokaa twɔndworɔnn ne beeguale ɛpo ne anu, na bewuwuli wɔ nzue ne anu.

³³Mmenia bɔ bɛnea mbrako nemɔ so ne bɛnwatili, na bɛhɔle kuro ne anu bɛɛhane edwirɛ bɔ wasi ne amukoraa, ɔne bɔ ɔfa bɛ bɔ né sunzummɔne wɔ bɛ so ne anwo.

³⁴Na yieee, kurotue ne amukoraa bɛbɔle twi beeyiale Yesu, na benwuni ye nen, bɛsrɛle ye kyɛ ofi bɛ mbɔtam berɛ hɔ.