Read Sehwi Mateo 9 Bible Online

Mateo 9 - Sehwi bible

Mateo 9

¹Yesu tenane ɛlɛen nu pɛle asue ne, na osa wale ye bɔbɔ ye kuro.

² Eh, bɛfale bubuaniɛ bie bɔ ɔla bɛen so ɔ bɛwale ye berɛ, na Yesu nwuni bɛ gyidie nen, osele bubuaniɛ ne kyɛ, “Mma, ma w’ahone tɔ wɔ kunu! Bafa wɔ bɔne bahyɛ wɔ.”

³Na ahyerɛlɛfoɛ nemɔ bie sisele bɛ nwo kyɛ, “Sɔ biaa he ɔkã musue dwirɛ.”

⁴ Nakoso Yesu nwuni b’adwene, na ɔhane kyɛ, “Nzu ati yeɛ ɛmɔdwene adwene tɛɛ sɔ ɔ?

⁵Na beni yeɛ ɔyɛ mmerɛ ɔ, kyɛ ɛkɔhã kyɛ, ‘Bafa wɔ bɔne bahyɛ wɔ,’ anaa kyɛ ɛkɔhã kyɛ, ‘Dwɔso ná nate’?

⁶Na kyɛbɔ ɔkɔyɛ bɔ ɛmɔkonwu kyɛ Sona Awa ne ole tumi wɔ aseɛ so, kyɛ ɔfa bɔne kyɛ ti ɔ,” na afei osele bubuaniɛ ne kyɛ, “Dwɔso, fa wɔ bɛen ne ná kɔ awuro!”

⁷Na odwɔsole sili nu hɔle ye awuro.

⁸Na ɛlɔen ne nwuni ye sɔ nen, ɔyɛle bɛ nwanwa, na bɛhyɛle Nyameɛ bɔ wafa sɔ tumi ne wama mmenia ne animnyam.

⁹Yesu fili berɛ bɔ ɔpɛ nu kɔ nen, onwuni biaa bie bɔ bɛfrɛ ye Mateo kyɛ ɔte nekaa bɔ bedide ɛtoɔ ɔ, na osele ye kyɛ, “Di me si.” Na odwɔsole lili ye si.

¹⁰Na mmerɛ bɔ ɔtenane ase kyɛ odidi wɔ awuro nen, yieee, ɛtoɔdidelɛfoɛ ne bɔnefoɛ pee bɛwale, na bɛ ne Yesu ne ye asuafoɛ nemɔ bɛtenane ase kyɛ bedidili.

¹¹ Na Farasiifoɛ nemɔ nwuni ye sɔ nen, bebisale ye asuafoɛ nemɔ kyɛ, “Nzu ati yeɛ ɛmɔ kyerɛkyerɛniɛ ne ɔne ɛtoɔdidelɛfoɛ ne bɔnefoɛ bedidi ye?”

¹²Yesu tele sɔ dwirɛ ne nen, osele bɛ kyɛ, “Bɛ bɔ bɛte apɔ ne, benhia safoɛ, na mmom bɛ bɔ bɛnde apɔ yeɛ behia ye ɔ.

¹³ Ɛmɔhɔ beesua kyɛbɔ edwirɛ he ye bo kyire ɔ, ‘Anwumvoinnwunɛ yeɛ mekuro ɔ, na nna afɔleɛbɔlɛ ɔ.’ Ofikyɛ mamma kyɛ mebaafrɛ teneneefoɛ, na mmom bɔnefoɛ.”

¹⁴Yeɛ Yohane asuafoɛ nemɔ wale Yesu berɛ beebisale ye kyɛ, “Nzu ati yeɛ yɛne Farasiifoɛ yɛtaa yɛyɔ akɔngyere, ná w’asuafoɛ nemɔ de bɛnyɔ akɔngyere ɔ?”

¹⁵ Na Yesu buale bɛ kyɛ, “Ɔkɔyɛ sɛɛ né atɔmvorɛ bo ama bɛ wora abɔ, wɔ aberɛ bɔ atɔmvorɛ biaa ne ɔne bɛ wɔ berɛ ɔ? Mmerɛ bie kɔwa bɔ bɛkɔfa atɔmvorɛ biaa ne bekofi bɛ nwo bɛkɔhɔ ɔ, na afei bekoli abuadaa.

¹⁶Na ebiala mva ɛtena monɛ sii nda ataadeɛ daa nu, ofikyɛ ndetamuɛ ne te fi ataadeɛ ne anu, na ye tetelɛ ne yɛ piri.

¹⁷Yeɛ bɛmva nzaa monɛ bengua nwomaa ngotoku daa nu. Sɛ ɔba ye sɔ a, ngotoku nemɔ kote, na nzaa ne kohwie kogua, na ngotoku nemɔ kɔsɛkye. Na mmom bɛfa nzaa monɛ begua nwomaa ngotoku monɛ nu, ná bɛ munyɔ banzɛkye.”

¹⁸Yesu gu so bɔ ɔkã ɛhemɔ kyire bɛ nen, yieee, panyi bie wale ɔɔkotole ye nyunu berɛ, na ɔhane kyɛ, “Mma brasua awu kekesaala ye, nakoso bra baafa wɔ sa gua ye so, na okonya ngoa.”

¹⁹Yiti Yesu dwɔsole ɔne ye asuafoɛ nemɔ belili ye si.

²⁰ Na yieee, braa bie bɔ mogya atu ye afoɛ buru ne nyɔ ɔ fale Yesu si, na ɔfale ye sa hane ye ataadeɛ noa bɔ banwo ne.

²¹Ofikyɛ ɔhane ye ye ti anu kyɛ, “Sɛ mefa me sa mekã ye ataadeɛ ne ngome po a, ngɔte apɔ.”

²² Yeɛ Yesu kakyili ye nwo, na onwuni braa ne nen, osele kyɛ, “Mma brasua, ma w’ahone tɔ wɔ kunu! Wɔ gyidie ale wɔ.” Na berɛ ne ala braa ne tele apɔ.

²³Na Yesu dwuli panyi n’awuro berɛ, ná onwuni awɛenhulɛfoɛ ne mmenia bɔ bɛteatea nu nen,

²⁴osele kyɛ, “Ɛ́mɔma me ate, ofikyɛ abaayaa ne owwuli, na mmom walafe.” Na bɛserele ye.

²⁵Na ɔmaa mmenia ne fitele nen, owurale nu ɔɔsɔle abaayaa ne sa, na odwɔsole.

²⁶Na sɔ dwirɛ ne trɛ hɔle mbɔtam berɛ amukoraa.

²⁷ Yesu fili berɛ kyɛ ɔkɔ nen, anyesiniwaafoɛ nyɔ lili ye si bɛteateane nu kyɛ, “Dawide Awa, nwu yɛ anwumvoin!”

²⁸Odwuli awuro nen, anyesiniwaafoɛ nemɔ wale ye berɛ, na Yesu bisale bɛ kyɛ, “Aso ɛmɔde bedi kyɛ ngɔhora ngɔsa ɛmɔ anwonyerɛ?” Na bebuale kyɛ, “Yoo, Awurade.”

²⁹Yeɛ Yesu fale ye sa hane bɛ nye, na ɔhane kyɛ, “Kyɛbɔ ɛmɔ gyidie te ne, ɔ́yɛ sɔ ala ma ɛmɔ!”

³⁰ Na bɛ nye tetele. Na Yesu bɔle bɛ noa kitii kyɛ, “Ɛ́mɔnea yé ná ebiala ande!”

³¹Nakoso befili berɛ ne, bɛbɔle Yesu nwo dawure wɔ mbɔtam berɛ amukoraa.

³² Mmerɛ bɔ befitele[4] bɔ bɛkɔ ne, ebiemɔ fale emumu bie bɔ sunzummɔne wɔ ye so ɔ bɛbrɛle Yesu.

³³Yesu tuli sunzummɔne ne nen, emumu ne dwudwole; na ɔyɛle ɛlɔen ne nwanwa maa bɛhane kyɛ, “Yɛnnwuni ɛhe bie le wɔ Yisrael!”

³⁴Nakoso Farasiifoɛ nemɔ hane kyɛ, “Sunzummɔne mɔ panyi ye tumi yeɛ ɔfa tutu sunzummɔne mɔ ɔ.”

³⁵ Yesu hɔle nguro ne nguraa ne amukoraa so aporɔ yɛle ngyerɛkyerɛ wɔ bɛ nyianu sua nemɔ anu, ɔhane ahennie ne nwo nzɛmba, na ɔsale anwonyerɛ ne anwommerɛlɛ amukoraa.

³⁶ Na onwuni mmenia pembepembe ne, bɛyɛle ye anwumvo, ofikyɛ né bafɛ, na né bɛsamo berɛ kyɛ mmoaen bɔ belle neafoɛ ɔ.

³⁷ Yeɛ osele ye asuafoɛ nemɔ kyɛ, “Nnɔbaeɛtelɛ adwuma ne sone, nakoso adwumayɔlɛfoɛ nemɔ bɛte kãa.

³⁸Yiti ɛ́mɔsrɛ nnɔbaeɛtelɛ Mene ne, ná ɔma adwumayɔlɛfoɛ bɛbra ye nnɔbaeɛtelɛ adwuma ne anu.”