Read Sehwi Marko 1 Bible Online

Marko 1 - Sehwi bible

Marko 1

¹[Nyameɛ Awa] Yesu Kristo nzɛmba ne, ye ahyɛaseɛ;

² kyɛbɔ bahyerɛ ye wɔ ngɔmhyɛlɛniɛ Yesaya nwomaa ne anu kyɛ, “Tie, mésoma me bɔfoɛ maa odi wɔ nyunu, bɔ okoli wɔ nyunu moa kosiesie w’atee nu ɔ.

³ Ebie tea nu wɔ ɛserɛ so kyɛ, ‘Ɛ́mɔbɔ Awurade atee bɛ́to berɛ, na ɛ́mɔma ye atimbire tengyɛ!’ ”

⁴ Yiti Yohane wale ɔɔbɔle asu wɔ ɛserɛ so, na ɔhane adwenesakyera asubɔlɛ nwo nzɛmba bɔ ɔmaa benya bɔnefakyɛ ɔ.

⁵Na Yudea aseɛ so ama amukoraa ne Yerusalemfoɛ bɛhɔle ye berɛ; na bɛɛhane bɛ bɔne maa ɔbɔle bɛ mukoraa asu wɔ asue Yɔɔdan nu.

⁶Né Yohane wura afupɔngɔ nwiaa ataadeɛ, né nwomaa abɔsoɛ bɔ ye yaase, na mmɛbɛ mbiri ne woɛ yeɛ né odi ɔ.

⁷Na ɔhane ye pefee kyɛ, “Ebie bɔ odi mu tra me ɔ oli me si ɔ́ba, bɔ ye mbaboa nyamaa po memvata kyɛ mekoto mesangye ɔ.

⁸Me de, nzue yeɛ mefa mebɔ ɛmɔ asu ɔ, nakoso ye de, ɔkɔfa Sunzum Krongron yeɛ ɔkɔbɔ ɛmɔ asu ɔ.”

⁹ Na sɔ mmerɛ ne anu, Yesu fili Nasarɛte bɔ ɔwɔ Galilea wale, na Yohane bɔle ye asu wɔ asue Yɔɔdan nu.

¹⁰Na mmerɛ bɔ Yesu fili nzue ne anu fitele pɛ, onwuni kyɛ anwuro abukye, ná Sunzum ne odwu kyɛ abubure ba ye so ɔ.

¹¹ Na komviɛ bie fili nyameɛso sele kyɛ, “Wɔ ole Mma bɔ mekuro wɔ dwirɛ bɔ ɛsɔ me nye paa ɔ.”

¹²Na berɛ ne ala, Sunzum ne fale ye ndɛndɛ so hɔle ɛserɛ so.

¹³Olili ɛserɛ so berɛ eleburanna, na Abɔnzam sole ye neane. Né ɔne eburo ngaka mɔ yeɛ bɛwɔ berɛ ɔ, na abɔfo mɔ bɛɛsole ye.

¹⁴Na bɛhyele Yohane bɛtole kuku nu ne asi ne, Yesu wale Galilea ɔɔhane Nyameɛ ahennie ne nwo nzɛmba.

¹⁵ Na ɔhane kyɛ, “Mmerɛ ne adwu, na Nyameɛ ahennie ne wapingye, yiti ɛ́mɔsakyera ɛmɔ adwene, ná ɛmɔle nzɛmba ne beli.”

¹⁶Né ɔnate Galilea mboanoa, na onwuni Simɔn ne oliɛma Andrea kyɛ begua asawu ɛpo ne anu; ofikyɛ né bɛte mmenia bɔ bɛkɔ po ɔ.

¹⁷ Na Yesu sele bɛ kyɛ, “Ɛ́mɔli me si, na ngɔma ɛmɔkɔhwehwe mmenia bɛkɔbrɛ me.”

¹⁸Na berɛ ne ala, bɛyakyili b’asawu nemɔ berɛ beelili ye si.

¹⁹Na ɔhɔle ye nyunu moa kãa nen, onwuni Yakobo ne oliɛma Yohane bɔ bɛte Sebedeo mma ne, kyɛ bɛtete ɛlɛen nu bɛpomba b’asawu ɔ.

²⁰Na berɛ ne ala ɔfrɛle bɛ, na bɛyakyili bɛ baba Sebedeo ne apaafoɛ nemɔ ɛlɛen ne anu beelili ye si.

²¹Na beedwuli Kapanɔm. Na afofikyẽa ne dwuli pɛ, ɔhɔle nyianu sua nu ɔɔyɛle ngyerɛkyerɛ.

²² Ye ngyerɛkyerɛ ne mane bɛ nwo dwirili bɛ, ofikyɛ ohyirehyirele bɛ kyɛ ebie bɔ ole tumi ɔ, na wanyɔ ye kyɛ ahyerɛlɛfoɛ nemɔ deɛ ne bie.

²³Na sɔ mmerɛ ne ala, né biaa bie bɔ sunzummɔne wɔ ye so ɔ ɔwɔ bɛ nyianu sua ne anu, na ɔteane nu kyɛ,

²⁴“Yesu Nasarɛteniɛ, nzikyɛ yeɛ yɛne wɔ le yɔ ɔ? Awa kyɛ ɛbaasɛkye yɛ hɔ ɔ? Mese wɔ sona sue, Nyameɛ ye Krongronniɛ ne.”

²⁵Nakoso Yesu teateane ye kyɛ, “Mua wɔ noa, ná fi ye nu fite!”

²⁶ Na sunzummɔne ne maa ɔsenzene, ɔteane nu serɛserɛ, na ofili ye nu fitele.

²⁷Na ɛhe mane bɛ mukoraa bɛ nwo dwirili bɛ, maa ɔnate so bebisabisale bɛ nwo kyɛ, “Nzikyɛ dwirɛ ɛhe? Ngyerɛkyerɛ foforɛ beni ɛhe? Ole tumi hyɛ sunzummɔne mɔ po, na betie ye.”

²⁸Na berɛ ne ala, Yesu nwo dwirɛ trɛ hɔle mbɔtam bɔ bapɛ Galilea nwo bayia ne amukoraa nu.

²⁹Befili nyianu sua ne anu befitele pɛ, bɛ ne Yakobo ne Yohane bɛhɔle Simɔn ne Andrea awuro.

³⁰Né ebunu ahye Simɔn sia brasua ato berɛ, na berɛ ne ala bɛfale ye anwonyerɛ ne bɛbɔle Yesu amaneɛ.

³¹Ɔhɔle braa ne nwo berɛ ɔɔsɔle ye sa, ɔmane ye so, na ebunu ne fili ye nwo tuli, na ɔsole bɛ wɔfoɛ.

³²Odwuli nɔsoa bɔ eyia tɔle nen, bɛfale bɛ bɔ bɛnde apɔ ne bɛ bɔ bele sunzummɔne amukoraa bɛwale ye berɛ.

³³Na kurotue ne amukoraa bɛɛhyerele so wɔ anoa nu berɛ.

³⁴ Na ɔsale mmenia wora bɔ b’anwonyerɛ gua ahoroɔ pee ɔ anwonyerɛ. Otutuli sunzummɔne pee, na wamma sunzummɔne nemɔ atee maa bandwudwo, ofikyɛ né bɛse ye.

³⁵Na Yesu dwɔsole ngyerɛmɔ tutuutu ofitele, na oowurale nekaa bie konn ɔbɔle mbaeɛ.

³⁶Na Simɔn ne bɛ bɔ bɛboka ye so ne bɛpole ye so;

³⁷na benwuni ye ne, besele ye kyɛ, “Mmenia amukoraa bɛ́pena wɔ.”

³⁸Na osele bɛ kyɛ, “Ɛ́mɔma yɛhɔ nguro bɔ bɛtoatoa so nemɔ anu, ná ngɔnga nzɛmba ne wɔ berɛ koso, ofikyɛ ɛhe ati yeɛ mmale ɔ.”

³⁹ Na ohyinini Galilea amukoraa hane nzɛmba ne wɔ bɛ nyianu sua nemɔ anu, na otutuli sunzummɔne mɔ.

⁴⁰ Na kwataniɛ bie wale Yesu berɛ ɔɔkotole srɛle ye kyɛ, “Sɛ ekuro a, ɛkɔhora kɔma me nwo kofi.”

⁴¹Na onwuni ye anwumvoin, ɔtengyɛle ye sa hane ye, na osele ye kyɛ, “Mekuro, wɔ nwo fi!”

⁴²Na ɔhane sɔ nen, berɛ ne ala, kwata ne hɔle, na ye nwo fili.

⁴³ Na ɔbɔle ye noa kitii, na ɔmaa ɔhɔle berɛ ne ala;

⁴⁴ na osele ye kyɛ; “Nea, nnɛbɔ so kyire ebiala, na mmom kɔ, ná fa wɔ nwo kohyire ɔsɔfo, ná fa wɔ nwo filɛ ayɛyɛdeɛ bɔ Mose hyɛle ne kɔ, ná ɔyɛ adanzeɛ ma bɛ.”

⁴⁵Nakoso, biaa ne de, ofili berɛ hɔle nen, ɔhyɛle ye bo ɔbɔle edwirɛ ne dawure maa otenele. Na ye sɔ ati, Yesu angora wanye ye nyunu wangɔ kuro biala so ko; na mmom ɔhale ɛserɛ ne aso berɛ, na mmenia fili nekaa biala bɛwale ye berɛ.