Read Sehwi Marko 11 Bible Online

Marko 11 - Sehwi bible

Marko 11

¹Mmerɛ bɔ bepingyele Yerusalem, Betefage ne Betania bɔ ɔwɔ Olive Bokaa ne anwo nen, Yesu somane ye asuafoɛ nemɔ nyɔ,

² na osele bɛ kyɛ, “Ɛmɔhɔ akuraa bɔ ɔwɔ ɛmɔ nyunu dɔ ne anu. Na ɛmɔdwu berɛ pɛ a, ɛmɔkonwu afunum akrɔngrɔma bie bɔ bamenda ye, bɔ sona biala ɔttenane ye so le ɔ. Ɛ́mɔsangye ye, ná ɛ́mɔfa ye bɛbra.

³Na sɛ ebie bisa ɛmɔ kyɛ, ‘Nzu ati yeɛ ɛmɔyɔ sɔ ye?’ a, ɛmɔhã kyɛ, ‘Awurade hia ye, na ɔngɔhyɛ biala okosa kɔfa ye kɔwa.’ ”

⁴ Besili nu bɛhɔle, na benwuni afunum akrɔngrɔma ne kyɛ bamenda ye babɔ anoa wɔ dwaaso, na bɛsangyele ye.

⁵Na mmenia bɔ né begyigyi berɛ ne anu bie bisale bɛ kyɛ, “Nzikyɛ yeɛ ɛmɔyɔ ye, bɔ ɛmɔsangye afunum akrɔngrɔma ne ɔ?”

⁶Na bɛ koso bebuale bɛ kyɛbɔ Yesu ha hyirele bɛ ne ala, na bɛmane bɛ ate maa bɛfale ye bɛhɔle.

⁷Bɛfale afunum akrɔngrɔma ne bɛbrɛle Yesu, bɛfale bɛ ndena beguale ye so, na ɔtenane ye so.

⁸Mmenia pee fale bɛ ndena bɛsesɛle atee ne anu, yeɛ ebiemɔ koso bebubuli nyaa wɔ eburo bɛfa bɛsesɛle atee ne anu.

⁹ Na bɛ bɔ né beli moa, bɛ ne bɛ bɔ beli nziɛ ne, bɛteateane nu kyɛ, “Hosana! Saleɛ ole bɔ ɔnate Awurade dumaa nu ɔ́ba ye!

¹⁰Saleɛ ole yɛ nana Dawide ahennie bɔ ɔ́ba [Awurade dumaa nu] ye! Hosana wɔ anwuro anwuro!”

¹¹ Afei Yesu dwuli Yerusalem, na owurale asɔneyɛɛ sua ne anu; na ɔtotole ye nye neane nikyee biala. Né aleɛ pena sa, na ɔne asuafoɛ buru ne nyɔ ne befili berɛ bɛhɔle Betania.

¹²Na aleɛ hyene ná befi Betania bɛba nen, ɛhɔen huni Yesu.

¹³Na onwuni borɔdoma bakaa bie bɔ nyaa wɔ so ɔ wɔ dedeede, na ɔhɔle kyɛ ɔkwaanea sɛ okonya ye mma ne bie wɔ so a. Nakoso odwuli ye ye nwo berɛ nen, wannwu nikye fee kyɛ nyaa ngome, ofikyɛ né borɔdoma sulɛ onnya oddwuli.

¹⁴Na osele bakaa ne kyɛ, “Sona biala ngoli wɔ so mmaa ko le!” Na ye asuafoɛ nemɔ tele.

¹⁵Na bedwuli Yerusalem. Yesu wurale asɔneyɛɛ sua ne anu, na ɔhyɛle ye bo foane bɛ bɔ bɛtɔne nningyein ne bɛ bɔ bɛtɔ ɔ fili asɔneyɛɛ sua ne anu. Na obutubutuli sikaasesãlɛfoɛ bɛ poen nemɔ, yeɛ bɛ bɔ bɛtɔne mmorɔnoma ɔ bɛ bia mɔ;

¹⁶na wamma ebiala ate ma wamva nningyein wambɛ nu wɔ asɔneyɛɛ sua ne anu berɛ.

¹⁷ Afei ɔyɛle ngyerɛkyerɛ sele bɛ kyɛ, “Aso bɛhhyerɛle kyɛ, ‘Bɛkɔfrɛ m’awuro maen maen amukoraa bɛ mbaeɛbɔlɛ awuro’? Nakoso ɛmɔ de, ɛmɔafa bakakyi awuefoɛ afealeɛ.”

¹⁸Na asɔfo mbanyi ne ahyerɛlɛfoɛ nemɔ bɛtele sɔ dwirɛ ne nen, bɛpenane atee bɔ bɛkɔfa so bekohu ye ɔ; nakoso né besuro ye, ofikyɛ ye ngyerɛkyerɛ ne yɛle ɛlɔen ne amukoraa nwanwa.

¹⁹ Na aleɛ dwole ne, ofili kuro berɛ hɔle.

²⁰ Na aleɛ hyene ngyerɛmɔ ne, bɔ né bɛpɛ nu bɛkɔ nen, benwuni kyɛ borɔdoma bakaa ne wawu maa waahã ye ndii.

²¹Na Petro kayele, na osele Yesu kyɛ, “Rabi, nea! Borɔdoma bakaa bɔ ɛpayele ye ne, wawu.”

²²Na Yesu sele bɛ kyɛ, “Ɛ́mɔnya gyidie wɔ Nyameɛ nu!

²³ Nahorɛ nu, mekã mekyire ɛmɔ kyɛ, ebiala bɔ ɔkɔhã kohyire bokaa he kyɛ, ‘Tutu kɔtɔ ɛpo nu,’ ná wanzu aporowaa wɔ ye ahone nu, ná mmom okole koli kyɛ edwirɛ bɔ ɔkã ne kɔwa nu ne, ɔkɔyɛ berɛ kɔma ye.

²⁴ Yiti, mekã mekyire ɛmɔ kyɛ: Nikyee biala bɔ ɛmɔbisa wɔ mbaeɛbɔlɛ nu ne, ɛmɔle beli kyɛ ɛmɔ sa kɔhã ye, na ɔkɔyɛ berɛ kɔma ɛmɔ.

²⁵ Na sɛ ɛmɔdwɔso begyina kyɛ ɛmɔbɔ mbaeɛ, ná sɛ ebie nwo dwirɛ wɔ ɛmɔ ti anu a, ɛ́mɔfa bɛhyɛ ye; amaa ɔnate so ɛmɔ Baba bɔ ɔwɔ nyameɛso ne koso wafa ɛmɔ mvomsoɛ wahyɛ ɛmɔ. [

²⁶Na sɛ ɛmɔamva bangyɛ a, ɛmɔ Baba bɔ ɔwɔ nyameɛso ne koso ngɔfa ɛmɔ mvomsoɛ ngɔhyɛ ɛmɔ.”][6]

²⁷Na besa bɛwale Yerusalem. Na mmerɛ bɔ ɔnatenate asɔneyɛɛ sua ne anu berɛ nen, asɔfo mbanyi ne ahyerɛlɛfoɛ ne maen mbanyi bɛwale ye berɛ,

²⁸na bebisale ye kyɛ, “Tumi beni yeɛ egyi so bɔ ɛyɔ sɔ nningyein hemɔ ye? Anaakyɛ nwa yeɛ ɔmane wɔ sɔ tumi kyɛ ɛfa yɔ ɛhemɔ ye?”

²⁹Yeɛ Yesu buale bɛ kyɛ, “Me wora ngobisa ɛmɔ dwirɛ ko; ɛ́mɔma me mmuayɛɛ, na ngɔhã tumi horɛ bɔ ngyi so meyɔ sɔ nningyein hemɔ ɔ ngohyire ɛmɔ.

³⁰Yohane asubɔlɛ ne, ofi nyameɛso anaa ofi mmenia berɛ? Ɛ́mɔma me mmuayɛɛ!”

³¹Na bɛdwenedwenene ye nwo besisele bɛ nwo kyɛ, “Sɛ yɛkã kyɛ, ‘Ofi nyameɛso’ a, okobisa kyɛ, ‘Nzu ati yeɛ ɛmɔanne ye banni ɔ?’

³²Yeɛ sɛ yɛkã kyɛ ‘Ofi mmenia berɛ’ a,’ ” — Né besuro mmenia ne, ofikyɛ né bɛ mukoraa bebu Yohane kyɛ ɔte ngɔmhyɛlɛniɛ amba.

³³Yiti bebuale Yesu kyɛ, “Yɛnze.” Yeɛ Yesu koso buale bɛ kyɛ, “Nzaade me koso mengɔhã tumi horɛ bɔ ngyi so meyɔ sɔ nningyein hemɔ ɔ mengohyire ɛmɔ.”