Read Sehwi Marko 16 Bible Online

Marko 16 - Sehwi bible

Marko 16

¹ Na afofikyẽa ne pɛle nu ne, Maria Magdalene, Yakobo maame Maria ne Salome bɛtɔle ayirefona kyɛ bɛkwaafa bɛpopa ye.

²Na dapɛn ne anu kyẽa bɔ oli moa ne, ye ngyerɛmɔ tutututu, bɛhɔle asieleɛ ne aso, bɔ né eyia apukye ɔ.

³Na bebisabisale bɛ nwo kyɛ, “Nwa yeɛ okomunu nyɔboɛ ne kofi asieleɛ ne noa kɔma yɛ ɔ?”

⁴Nakoso bɛmane bɛ ti so nen, benwuni kyɛ nyɔboɛ ne amunu ato ahameɛ; né ɔte piri paa.

⁵Bewurale asieleɛ ne anu ne, benwuni aberandeɛ bie bɔ owura ataadeɛ fufue tendenn kyɛ ɔte asieleɛ ne famaa so berɛ, na bɛ kunu tele bɛ.

⁶Na osele bɛ kyɛ, “Nnɛmɔma ɛmɔ kunu te ɛmɔ. Ɛmɔpena Nasarɛteniɛ Yesu bɔ bɛbɔle ye mmeamudua nu ne. Watingye, ɔnne wa. Ɛ́mɔnea nekaa bɔ bɛfale ye bɛtole ɔ!

⁷ Nakoso ɛmɔɔbɔ ye asuafoɛ nemɔ ne Petro amaneɛ kyɛ ódi ɛmɔ nyunu moa kɔ Galilea; na berɛ yeɛ ɛmɔkonwu ye ɔ, kyɛbɔ ɔhã hyirele ɛmɔ ne.”

⁸Na befili asieleɛ ne anu befitele ndɛndɛ bɛnwati bɛhɔle; ofikyɛ ahunundetelɛ ne ɛserɛ tɔle bɛ so. Na bammɔ so bangyire ebiala, ofikyɛ né besuro.

⁹ [Na kyẽa bɔ oli moa ne ngyerɛmɔ tutututu bɔ odwɔsole nen, olili moa yele ye nwo ali hyirele Maria Magdalene, bɔ otuli sunzummɔne nzoo fili ye nu ne.

¹⁰Na ye koso ɔɔbɔle bɛ bɔ bɛ ne Yesu natele, bɔ né bɛ wora abɔ ná besu ne amaneɛ.

¹¹Nakoso bɛtele kyɛ watingye ná ɔte ase, ná wanwu ye nen, banne banni.

¹²Na ɛhe asi ne, ɔyele ye nwo ali sue foforɛ nu hyirele bɛ nu nyɔ, wɔ mmerɛ bɔ né bɛnate atee so bɛkɔ akuraa nu ɔ.

¹³Na besale bɛ si bɛɛbɔle bɛ ngaa ne amaneɛ, na banne bɛ koso banni.

¹⁴Na ɛhemɔ asi ne, ɔyele ye nwo ali hyirele asuafoɛ buru ne ko ne wɔ mmerɛ bɔ né bedidi ɔ. Na ohwili bɛ nyunu wɔ elelɛ bɔ banne banni, ɔne b’asoserɛ nwo, ofikyɛ banne bɛ bɔ benwuni ye kyɛ watingye ne banni.

¹⁵Na ɔhã hyirele bɛ kyɛ, “Ɛmɔhɔ wiase amukoraa bɛɛhã nzɛmba ne behyire abɔdeɛ amukoraa.

¹⁶Sona bɔ okole koli ná bɛkɔbɔ ye asu nen, bekole ye ngoa; nakoso bɔ onne nni ne de, bekobua ye foɛ.

¹⁷Na bɛ bɔ bede bedi ne, nzɛngyerɛnneɛ hemɔ yeɛ okoli bɛ si ɔ: Me dumaa nu, bekotutu sunzummɔne mɔ; bɛkɔhã edwudwolɛ foforɛ mɔ;

¹⁸bɛkɔma ewoo mɔ so, na sɛ bɛno nikyee biala bɔ ɛborɔ wɔ nu a, ɔngɔyɔ bɛ huu; bɛkɔfa bɛ sa bekogua ayarefoɛ so maa bɛkɔte apɔ.”

¹⁹Na afei, Awurade Yesu dwudwo hyirele bɛ yiele nen, Nyameɛ fale ye hɔle nyameɛso, na ɔɔtenane Nyameɛ sa famaa so.

²⁰Na bɛ de, bɛhɔle bɛɛhane nzɛmba ne nekaa biala, na Awurade fale bɛ yɔle adwuma, na ɔfale nzɛngyerɛnneɛ bɔ ɔboka so ne aso ɔfoale edwirɛ ne aso. Amen.]