Read Sehwi Marko 3 Bible Online

Marko 3 - Sehwi bible

Marko 3

¹Yesu sa hɔle nyianu sua nu, na né biaa bie wɔ berɛ bɔ ye sa ko awu ɔ.

² Na bɛtetɛle ye bɛneane sɛ ebiaa ɔkɔsa biaa ne anwonyerɛ afofikyẽa ne a, ná banya ye babɔ ye kwaadu.

³Yeɛ osele biaa bɔ ye sa ko awu ne kyɛ, “Baagyina anyunu wa.”

⁴Na obisale bɛ kyɛ, “Yiti mmeraa ma ate kyɛ yɛyɔ paa anaakyɛ bɔne afofikyẽa, kyɛ yɛkole ebie ngoa anaakyɛ yɛkohu ye ɔ?” Na bɛyɛle konn.

⁵ Na Yesu le ɛyaa neane bɛ bra yiale, na ɔnate b’asoserɛ ti ɔyɛle ye yea, na osele biaa ne kyɛ, “Tengyɛ wɔ sa ne anu.” Ɔtengyɛle nu, na ye sa ne yɛle paa kyɛ ye daa ne ala.

⁶ Yeɛ Farasiifoɛ nemɔ fili berɛ fitele, na berɛ ne ala, bɛ ne Herodefoɛ bɛɛbɔle ye ti so porɛ bɛpenane atee bɔ bɛkɔpe so bekohu ye ɔ.

⁷ Nakoso Yesu ne ye asuafoɛ nemɔ bɛhwene bɛ nwo bɛhɔle mboanoa, na mmenia pembepembe fili Galilea lili ye si; ebie koso fili Yudea,

⁸ Yerusalem, Yidumea ne Yɔɔdan si, yeɛ Tiro ne Sidon mbɔtam. Na mmenia wora bɔ bɛtele bɔ ɔyɔle ne amukoraa nen, bɛwale ye berɛ.

⁹ Na ɔnate mmenia wora ne ati, osele ye asuafoɛ nemɔ kyɛ bɛpena ɛlɛen ba bie bɛma ye, ná mmenia ne angyere ye so.

¹⁰Né wasa mmenia pee anwonyerɛ, na ɔnate sɔ ati, bɛ bɔ bɛnde apɔ amukoraa piane bɛ nwo wii kyɛ bekonya ye nu bɛkɔsɔ ɔ.

¹¹Na sɛ né sunzummɔne mɔ benwu ye a, befifi ase wɔ ye nyunu, na bɛteatea nu kyɛ, “Wɔ ole Nyameɛ Awa ne.”

¹² Na Yesu kanzole bɛ kitii kyɛ nnɛmaa bɛda ye adi bekyire.

¹³ Yesu hɔle bokaa bie aso, na ɔfrɛfrɛle bɛ bɔ ye bɔbɔ okuro ɔ; na bɛwale ye berɛ.

¹⁴Na ɔyele bɛ nu buru ne nyɔ kyɛ bɛɛboka ye so, ná ɔsoma bɛ nzɛmbahanɛ,

¹⁵ná ɔma bɛ tumi bɔ bɛkɔfa bekotutu sunzummɔne mɔ ɔ.

¹⁶[Ɔyele buru ne nyɔ ne.] Ɔtole Simɔn dumaa Petro,

¹⁷Yakobo ne oliɛma Yohane bɔ bɛte Sebedeo mma ne, ɔtole bɛ dumaa Boanege, bɔ ye bo kyire agralaa mma;

¹⁸yeɛ Andrea, Filipo, Batolomeo, Mateo, Tɔmase, Alfeo awa Yakobo, Tadeo ne Kanaanniɛ Simɔn;

¹⁹yeɛ Yudase Yiskariote bɔ ɔyele ye mane ne.

²⁰ Bɛhɔle awuro nen, mmenia pee beeyiale berɛ bieku, bɔ ɔne ye asuafoɛ nemɔ bannya ate bannidi po ɔ.

²¹Na ye abusuafoɛ tele sɔ nen, bɛhɔle kyɛ bɛkwaafa ye bɛkɔ, ofikyɛ né mmenia kekã kyɛ, “Ye ti asɛkye.”

²² Na ahyerɛlɛfoɛ bɔ befili Yerusalem bɛwale ne sele kyɛ, “Ole Beɛsebul, na sunzummɔne mɔ panyi tumi yeɛ ɔfa tutu sunzummɔne mɔ ɔ.”

²³Yiti Yesu frɛle bɛ wale ye nwo berɛ, na odwudwole wɔ anyandera nu hyirele bɛ kyɛ, “Ɔkɔyɛ sɛɛ né Abɔnzam ahora atu Abɔnzam?

²⁴Na sɛ ahennie bie ne ye nwo ko a, sɔ ahennie ne ngora gyina.

²⁵Yeɛ sɛ awuro bie ne ye nwo ko a, sɔ awuro ne ngora gyina.

²⁶Na sɛ Abɔnzam dwɔso tia ye nwo, ná ɔne ye nwo ko a, ɔngɔhora gyina, na ye ayieleɛ ala ɛne.

²⁷ Ebie ngora ngɔ katakyie bie awuro ngɔmve ye nningyein, sana odi moa fa nyamaa kyekye katakyie ne koraka, ná afei wahora wafẽ ye awuro nningyein ne.”

²⁸Nahorɛ nu, mekã mekyire ɛmɔ kyɛ, “Bɛkɔfa mmenia bɔne, yeɛ musue dwirɛ biala bɔ bɛkɔhã mukoraa bɛkɔhyɛ bɛ,

²⁹nakoso bɔ ɔkɔhã musue dwirɛ kotia Sunzum Krongron ne de, ongonya bɔnefakyɛ le, na bɔne nwo foɛlilɛ mata ye afebɔɔ.”

³⁰Yesu hane sɔ, ofikyɛ né bɛkekã kyɛ, “Ole sunzummɔne.”

³¹Yeɛ oliɛma mɔ ne ye maame bɛwale beegyinane bondua, na bɛsomane maa bɛɛfrɛle ye.

³²Né mmenia pee tete berɛ bapɛ ye nwo kango, na besele ye kyɛ, “Tie, wɔ maame ne eliɛma mɔ begyigyi bondua dɔ bɛpena wɔ.”

³³Na obuale bɛ kyɛ, “Nwa ole me maame, anaa nniɛma mɔ?”

³⁴Ɔpɛle ye nye neane bɛ bɔ bapɛ ye nwo kango ne bra yiale, na osele kyɛ, “Nea, me maame ne nniɛma mɔ ɛhe.

³⁵Ofikyɛ ebiala bɔ ɔyɔ Nyameɛ apɛdeɛ nen, ye yeɛ ɔte nniɛma bienzua ne nniɛma brasua ne me maame ɔ.”