Read Sehwi Marko 4 Bible Online

Marko 4 - Sehwi bible

Marko 4

¹ Yesu sa hyɛle ye bo yɛle ngyerɛkyerɛ wɔ mboanoa. Na mmenia pee bɛpɛle ye nwo beyiale, yiti ɔtenane ɛlɛen nu wɔ ɛpo ne aso, na mmenia wora ne amukoraa begyinagyinane mboanoa berɛ.

²Ohyirehyirele bɛ nningyein pee wɔ anyandera nu, na ye ngyerɛkyerɛ ne anu, osele bɛ kyɛ,

³“Ɛmɔtie, kuaniɛ bie hɔle kyɛ ɔkwaapete ye bakaammaa.

⁴Na ɔpete nen, bakaammaa ne bie ooguale atee noa, na ewienu nnomaa wale beesusole.

⁵Ebie ooguale ayɔboɛ so, nekaa bɔ nnɛterɛ pee nne berɛ ɔ. Wangyɛ yeɛ befifili ɔ, ofikyɛ né nnɛterɛ nzone wɔ bɛ bo;

⁶na eyia pukyele nen, bɛkesene, na ɔnate kyɛ bandira ndii ne ati, bɛyerale.

⁷Bakaammaa ne bie guale mmowue nu; mmowue ne nyini, na bemiamiane bɛ, yiti banzu mmaa.

⁸Bakaammaa ne bie ooguale aseɛ paa so; befifili benyini, bebuale, na besuli, ebie aburasa, ebie aburasia, yeɛ ebie koso ɛyaa.”

⁹Na ɔfa sɔle so kyɛ, “Bɔ ole asoɛ kotie ne, maa otie.”

¹⁰Na ɔhale Yesu ngome wɔ berɛ nen, mmenia bɔ né bɛwɔ ye nwo berɛ ne, bɛ ne asuafoɛ buru ne nyɔ ne bebisale ye anyandera ne abo.

¹¹ Na obuale bɛ kyɛ, “Ɛmɔ de, bafa bama ɛmɔ kyɛ ɛ́mɔnwu Nyameɛ ahennie nu mvealeɛ nu dwirɛ; nakoso mmenia ngaa ne de, bɛkã ye mukoraa wɔ anyandera nu yeɛ bekyire bɛ ɔ.

¹² Na enwunɛ de, bekonwu ye, nakoso bengonwu nu; yeɛ ɛtelɛ de bɛkɔte, nakoso bɛngɔte ye bo, ná kyẽa bie banzakyera maa bamva bɛ bɔne bangyɛ bɛ.”

¹³Afei Yesu bisale bɛ kyɛ, “Aso ɛmɔnde anyandera he bo? Nzaade ɔkɔyɛ sɛɛ né ɛmɔate anyandera ne mukoraa bo?

¹⁴Bɔ kuaniɛ ne pete ne, ɔte Nyameɛ dwirɛ ne.

¹⁵Mmenia biemɔ te kyɛ mmakaammaa bɔ beguale atee noa ne. Sɛ bɛte dwirɛ ne a, berɛ ne ala Abɔnzam ba, na ɔye edwirɛ bɔ balua ye bɛ nu ne kɔ.

¹⁶Mmenia biemɔ koso te kyɛ mmakaammaa bɔ beguale ayɔboɛ so ne. Sɛ bɛte dwirɛ ne a, berɛ ne ala bɛfa anigye bɛsɔ nu,

¹⁷nakoso ondira ndii wɔ bɛ nu, na ɔtena bɛ nu mmerɛ kãa bie; na sɛ ɔnate edwirɛ ne ati amaneɛnwunɛ anaa ndaneanyeɛ ba bɛ so a, berɛ ne ala ɔkakyi sundidua ma bɛ.

¹⁸Ebiemɔ koso te kyɛ mmakaammaa bɔ beguale mmowue nu ne. Bɛ yeɛ bɛte edwirɛ ne,

¹⁹ nakoso sɛ abrabɔ nu dadwene ne anwonyadeɛ nnakannaka ne akɔnnɔdeɛ ahoroɔ ba bɛ so a, bemiamia edwirɛ ne, na onzu mmaa.

²⁰Na ebiemɔ koso te kyɛ mmakaammaa bɔ beguale aseɛ paa so ne. Bɛ yeɛ bɛte edwirɛ ne a, bede bɛto nu, na besu mmaa ɔ. Ebie su aburasa, ebie aburasia, yeɛ ebie koso ɛyaa.”

²¹Na Yesu bisale bɛ kyɛ, “Bɛfa kanea bɛba kyɛ bɛbaafa bewura ɛkorɛ bo, anaakyɛ mba bo anaa? Aso nna kanea bakaa so yeɛ bɛfa besie ɔ?

²² Ofikyɛ, nikyee biala nne mvealeɛ nu bɔ bɛngɔla ye ali ɔ; yeɛ nikyee biala nne berɛ bɔ bafa bafea bɔ ɔngɔla ali ɔ.

²³ Sɛ ebie le asoɛ kotie a, maa otie!”

²⁴ Na osele bɛ kyɛ, “Ɛ́mɔnea yé wɔ bɔ ɛmɔte ɔ nwo. Na asusudeɛ bɔ ɛmɔfa besusu bɛma ne, ye ala yeɛ bɛkɔfa bekosusu bɛkɔma ɛmɔ ɔ, na bɛkɔfa bie bɛkɔboka so bɛkɔma ɛmɔ.

²⁵ Ofikyɛ bɔ ole bie ne, bɛkɔfa pee bɛkɔboka ye so; na bɔ olle bie ne, bɔ ole ye ne po, bekole bekofi ye sa nu.”

²⁶Na Yesu hane kyɛ, “Nyameɛ ahennie ne, ɔte kyɛ kuaniɛ bie bɔ ɔpete mmakaammaa gua aseɛnwo ɔ.

²⁷Ɔda tingye kɔngɔen ne eyia, na mmakaammaa ne fifi, na onyi, na ɔnze kyɛbɔ osi yɛle sɔ ɔ.

²⁸Aseɛ ne bɔbɔ ma nningyein fifi so; odi moa fefɛ nyaa, ɔfa mmaa, na afei wayɛ aburoo, ná wati.

²⁹ Nakoso sɛ mmaa ne ti a, berɛ ne ala kuaniɛ ne fa ye dadeɛ koateɛ kobu, ofikyɛ ye bulɛ mmerɛ adwu.”

³⁰Yesu bisale kyɛ, “Nzikyɛ nwo yeɛ yɛkɔfa Nyameɛ ahennie ne yɛkɔtoto ɔ? Anaakyɛ anyandera beni yeɛ yɛkobu yɛkɔfa ye nwo ɔ?

³¹Ɔte kyɛ sinapi baa ko bɔ bedua ɔ, na ye yeɛ ɔte aseɛ so mmakaammaa mukoraa nu kãa ɔ.

³²Nakoso sɛ bedua a, onyi yɛ piri tra kwaanzusuaa sɛso mmakaa mukoraa. Na ɔyɛ mmaen ngandinga ma ewienu nnomaa bɛkora bɛnwo bɛ saen wɔ ye fɔnwoo ne anu.”

³³Na Yesu fale anyandera sɔaa mɔ nu yeɛ ɔhane edwirɛ ne hyirele bɛ ɔ, kyɛbɔ bɛkɔhora bɛkɔte ye bo ɔ.

³⁴ Anyandera ngome nu yeɛ odwudwo hyirele bɛ ɔ, nakoso sɛ né ɔka ye ne ye asuafoɛ nemɔ ngome de a, okyirekyire bɛ ye mukoraa bo.

³⁵Sɔ kyẽa ne ala, ye nɔsoa ne, Yesu sele ye asuafoɛ nemɔ kyɛ, “Ɛ́mɔma yɛpɛ asue ne yɛhɔ ye si dɔ.”

³⁶Yiti bɛyakyili ɛlɔen ne ate, na bɛɛbokale ye so wɔ ɛlɛen ne anu bɛ ne ye hɔle. Na ɛlɛen biemɔ koso bokale ye so bɛ ne ye hɔle.

³⁷Na mvrama piri bie hyɛle ye bo tuli, na asorɔkye bɔ guale ɛlɛen ne anu bɔ né ɔpena yi ɔ.

³⁸Né ye de ɔwɔ ɛlɛen ne anu wɔ nziɛ dɔ, bɔ ye ti la sumu so walafe ɔ. Yiti betingyele ye besele ye kyɛ, “Kyerɛkyerɛniɛ, aso ɔmva wɔ nwo kyɛ yɛpena yɛmono ɔ?”

³⁹Na odwɔsole teateane mvrama ne, na osele ɛpo ne kyɛ, “Yɛ konn, na da berɛ dinn!” Afei mvrama ne yakyili tulɛ, na ɔyɛle dinn paa.

⁴⁰Na obisale bɛ kyɛ, “Nzu ati yeɛ ɛmɔsuro e? Nzu ati yeɛ ɛmɔlle gyidie ɔ?”

⁴¹Ɛserɛ piri hane bɛ, na besisele bɛ nwo kyɛ, “Nzikyɛ sona ɛhe, bɔ mvrama ne ɛpo po betie ye e?”