Read Sehwi Marko 9 Bible Online

Marko 9 - Sehwi bible

Marko 9

¹ Na Yesu sele bɛ kyɛ, “Nahorɛ nu, mekã mekyire ɛmɔ kyɛ, mmenia biemɔ gyigyi wa bɔ bengonwu ewue, kɔpem kyɛ bekonwu Nyameɛ ahennie ne kyɛ ole tumi wawa ɔ.”

² Na ye elesia asi ne, Yesu fale Petro, Yakobo ne Yohane bokale ye nwo so, na ɔfale bɛ ngome hɔle bokaa tendenn bie aso; na ɔsesane wɔ bɛ nyunu berɛ.

³ Ye ataadeɛ yɛle fufue hyɛnn, bɔ sona biala bɔ ɔpo nningyein wɔ aseɛ ye aso ɔ ɔngɔhora ngɔpo ma ɔngɔyɛ hyɛnn sɔ ɔ.

⁴Na Elia ne Mose bɛyele bɛ nwo ali behyirele bɛ, bɔ né bɛ ne Yesu bedwudwo.

⁵Na Petro sele Yesu kyɛ, “Yɛ mene, ɔte paa kyɛ yɛtena wa ɔ. Maa yɛbɔ asese nza, wɔ deɛ ko, Mose deɛ ko, yeɛ Elia deɛ ko.”

⁶Né Petro nnwu edwirɛ bɔ ɔhã ɔ, ofikyɛ né ɛserɛ piri paa ahã bɛ.

⁷ Yeɛ munungum bie ɔɔkatale bɛ so, na edwudwolɛ bie fili munungum ne anu hane kyɛ, “Mma bɔ ɔla m’ahone nwo ne ɛhe, ɛmɔtie ye!”

⁸Na berɛ ne ala, bɛtotole bɛ nye, na bannwu ebiala ko, sana Yesu ngome bɔ ɔne bɛ wɔ berɛ ne.

⁹Na mmerɛ bɔ bɛtorotoro bokaa ne bɛba nen, ɔberale bɛ kyɛ nnɛmaa bɛbɔ bɔ banwu ye ne aso bekyire ebiala, kodwu kyɛ Sona Awa ne kotingye kofi awufoɛ nu koraka ɔ.

¹⁰Yiti bɛmane edwirɛ ne hale bɛ ti anu, na bebisabisale bɛ nwo kyɛ: “Awufoɛ nu dwɔsolɛ ne, ye bo kyire sɛɛ koraa?”

¹¹ Na bebisale ye kyɛ, “Nzu ati yeɛ ahyerɛlɛfoɛ nemɔ bɛnwa odi kyɛ Elia di moa ba koraka ɔ?”

¹² Na obuale bɛ kyɛ, “Elia kɔwa kɔɔtoto nningyein mukoraa yé amba de; nakoso bɔ bahyerɛ bafa Sona Awa ne nwo, kyɛ odi kyɛ onwu amaneɛ pee ná mmenia bu ye animtia ne koso ɛ?

¹³ Na mekã mekyire ɛmɔ kyɛ, Elia awa dada, na bafa bɔ bekuro amukoraa bali ye, kyɛbɔ bahyerɛ bafa ye nwo ne.”

¹⁴Beedwuli ye asuafoɛ nemɔ nwo berɛ nen, benwuni mmenia pembepembe bɔ bapɛ bɛ nwo bayia ɔ, yeɛ ahyerɛlɛfoɛ mɔ kyɛ bɛne bɛ besu aporowaa ɔ.

¹⁵Na ɛlɔen ne amukoraa nwuni ye nen, berɛ ne ala, bɛ nwo dwirili bɛ paa, na betuli amirika bɛɛyɛle ye akwaaba.

¹⁶Na obisale ahyerɛlɛfoɛ nemɔ kyɛ, “Nzikyɛ yeɛ ɛmɔ ne bɛ besu ye nwo aporowaa ye?”

¹⁷Na ɛlɔen ne anu mmenia ne ko buale kyɛ, “Kyerɛkyerɛniɛ, mvale mma bienzua bɔ emumu sunzum wɔ ye so ɔ mmrɛle wɔ;

¹⁸na nekaa biala bɔ ɔkɔhã ye ne, ɔmaa ɔpɛ fi, ye noa pɛ ahure, ɔkwa ye gye, na ɔsenze. Nzrɛle w’asuafoɛ nemɔ kyɛ betu befi ye nu, nakoso bangora.”

¹⁹Yeɛ Yesu buale bɛ kyɛ, “O ɛnɛmmafoɛ bɔ ɛmɔlle gyidie ɔ! Me ne ɛmɔ yɛtena maa odwu kyinzu? Nya ɛmɔ nwo aboterɛ maa odwu kyinzu? Ɛ́mɔfa ye bɛbrɛ me!”

²⁰Bɛfale akwadaa ne bɛbrɛle ye. Na sunzummɔne ne nwuni Yesu pɛ, berɛ ne ala ɔmane akwadaa ne senzene, ɔpɛ fini, omunumununi ye nwo, na ye noa pɛle ahure.

²¹Na Yesu bisale ye baba kyɛ, “Kyinzu yeɛ anwonyerɛ he hane ye ɔ?” Na obuale kyɛ, “Ofi ye ngwadaa nu.

²²Ɔtaa maa ɔpɛ tɔ see nu, ɔne nzue nu, bɔ ɔpena ye ku ye ɔ. Nakoso sɛ ɛkɔhora kɔyɔ ye nwo bie a, ye de nwu yɛ anwumvoin ná boka yɛ.”

²³ Yeɛ Yesu sele ye kyɛ, “Ɛnwa: ‘Sɛ ɛkɔhora a!’ Nikyee biala kɔhora kɔyɛ berɛ kɔma sona bɔ ode di ɔ.”

²⁴Na berɛ ne ala, akwadaa ne baba teane nu sele kyɛ, “Mede medi, na boka me ma me gyidie nyi.”

²⁵Na mmerɛ bɔ Yesu nwuni kyɛ ɛlɔen ne betutu amirika bɛba nen, ɔteane sunzummɔne ne kyɛ, “Wɔ emumu ne asotiniwaa sunzum, mehyɛ wɔ kyɛ, fi ye nu fite, na nnɛkowura ye nu ko!”

²⁶Na sunzum ne teane nu, ɔmane akwadaa ne senzene kyeinn, na ofili ye nu fitele. Na akwadaa ne dwole dinn kyɛ sona bɔ wawu ɔ, maa mmeni pee hane kyɛ, “Wawu.”

²⁷Nakoso Yesu sɔle ye sa mane ye so, na odwɔsole.

²⁸Na Yesu hɔle awuro nen, ye asuafoɛ nemɔ bisale ye ahameɛ kyɛ, “Nzu ati yeɛ yɛ de yangora yandu ye ɔ?”

²⁹Na obuale bɛ kyɛ, “Sɔ nikyee he de, nikye fee ngora ye tu, sana mbaeɛ [ne ɛhɔenhyelɛ.”]

³⁰Befili berɛ nen, bɛɛpɛle nu Galilea, na Yesu anguro kyɛ ebiala kɔte ye nga ɔ;

³¹ ofikyɛ né okyirekyire ye asuafoɛ nemɔ nikye. Osele bɛ kyɛ, “Bɛkɔye Sona Awa ne bekowura mmenia sa, na bekohu ye; na beku ye a, ye ɛlɛsa so okotingye.”

³² Na bande sɔ dwirɛ ne abo, nakoso né besuro kyɛ bekobisa ye ɔ.

³³Bedwuli Kapanɔm, na ɔwɔ awuro nen, obisale asuafoɛ nemɔ kyɛ, “Nzikyɛ yeɛ né ɛmɔsu ye nwo aporowaa wɔ atunu dɔ ne?”

³⁴ Na bɛyɛle dinn, ofikyɛ atunu dɔ, né besu bɛ nwo aporowaa kyɛ bɛ nu nwa yeɛ ɔte titire paa ɔ.

³⁵ Yeɛ Yesu tenane ase, ɔfrɛle asuafoɛ buru ne nyɔ ne, na osele bɛ kyɛ, “Sɛ ebie pena kyɛ odi moa a, maa oli bɛ mukoraa bɛ si, ná ɔyɛ bɛ mukoraa bɛ somvoɛ.”

³⁶ Afei ɔfale akwadaa bie oogyinane b’afia berɛ, ɔyɛle ye atuu, na osele bɛ kyɛ,

³⁷ “Ebiala bɔ okole ngwadaa sɔa mɔ bɛ nu ko kɔto nu wɔ me dumaa nu nen, né wale me wato nu; yeɛ ebiala bɔ okole me kɔto nu nen, nna me yeɛ wale me wato nu ɔ, na mmom wale bɔ ɔsomane me ne wato nu.”

³⁸ Na Yohane sele ye kyɛ, “Kyerɛkyerɛniɛ, yɛnwuni kyɛ ebie ole wɔ dumaa otu sunzummɔne mɔ, na yɛberale ye, ofikyɛ ye de, ɔne yɛ annate.”

³⁹Yeɛ Yesu buale kyɛ, “Nnɛma ɛmɔbera ye, ofikyɛ ebiala nne berɛ bɔ ɔyɔ nzɛngyerɛnneɛ wɔ me dumaa nu, bɔ ɔkɔhora kɔhã me nwo dwirɛ tɛɛ berɛ ne ala ɔ.

⁴⁰Ɔnate kyɛ, ebiala bɔ ondia yɛ ne, né ɔwɔ yɛ bue nu.

⁴¹ Na ebiala bɔ ɔkɔma ɛmɔ nzue kwangoa ko ma ɛmɔkɔno wɔ me dumaa nu, kyɛ ɛmɔte Kristo deɛ ne ati nen, nahorɛ nu, mekã mekyire ɛmɔ kyɛ, ye akatuaa ngɔbɔ ye.

⁴²“Ebiala bɔ ɔkɔto ngwadaammaa hemɔ bɔ bede me bedi ye anu ko sundidua nen, ahaa ɔte paa ma sɔ sona ne kyɛ bɛkɔfa nyɔboɛ kandinga bɔ bɛfa beti aburoo bekosinze ye kɔme, ná bagyi ye bato ɛpo nu ɔ.

⁴³ Na sɛ wɔ sa to wɔ sundidua a, pɛ to. Ɔte paa ma wɔ kyɛ ɛkɔfa asaa ko kɔhɔ ngoa nu tra kyɛ ɛkɔfa asaa nyɔ kɔhɔ amaneɛnwunɛ see nu, see bɔ onnua le nu ɔ,

⁴⁴[nekaa bɔ bɛ nnɔboakoma benwu, ná berɛ see onnua ɔ.][4]

⁴⁵Na sɛ wɔ gya to wɔ sundidua a, pɛ to. Ɔte paa ma wɔ kyɛ ɛkɔfa agyirɛ ko kɔhɔ ngoa nu tra kyɛ ɛkɔfa agyirɛ nyɔ kɔhɔ amaneɛnwunɛ see bɔ onnua le nu ɔ,

⁴⁶[nekaa bɔ bɛ nnɔboakoma benwu, ná berɛ see onnua ɔ.][5]

⁴⁷ Sɛ wɔ nye to wɔ sundidua a, tu to. Ɔte paa ma wɔ kyɛ ɛkɔfa anyeɛ ko kɔhɔ Nyameɛ ahennie nu tra kyɛ wɔ nye te nyɔ, ná bekogyi wɔ bɛkɔto amaneɛnwunɛ see nu ɔ,

⁴⁸ nekaa bɔ bɛ nnɔboakoma benwu, ná berɛ see onnua ɔ.

⁴⁹ Ofikyɛ bɛkɔfa see bekowura sona biala ngyee. [Yeɛ bɛkɔfa ngyee bekowura afɔleɛ mukoraa.]

⁵⁰Ngyee te paa; nakoso sɛ ngyee nu fɛɛ tu a, ɔkɔyɛ sɛɛ né ɛmɔawura ye ngyee bieku? Ɛ́mɔma ngyee ɔtena ɛmɔ nu, ná ɛmɔ ne ɛmɔ mmango bɛ́tena asomdwee nu.”