Read Sehwi Luka 1 Bible Online

Luka 1 - Sehwi bible

Luka 1

¹Mmenia pee babɔ mmɔden bafa edwirɛ mɔ bɔ bawa nu wɔ yɛ nu ɔ bagua ngrataa so wɔ ye nnidisoɛ nnidisoɛ so,

²kyɛbɔ bɛ bɔ ofi ye bohyɛlɛ ne bɛfale bɛ nye benwuni ye, bɔ bɛte edwirɛ ne nwo asomvoɛ ne bamaa yɛ sa ahã ye ne ala.

³Yiti yɛ mene animnyamniɛ Tiofilo, mato me bo ase maneanea bɔ osisili ne amukoraa nu pɛpɛɛpɛ, ofi ye bohyɛlɛ, na manwu kyɛ ɔte paa kyɛ me koso ngɔhyerɛ ye nnidisoɛ nnidisoɛ ngɔbrɛ wɔ ɔ,

⁴amaa ɔnate so anwu nahorɛ pefee bɔ ɔwɔ ngyerɛkyerɛ bɔ bafa bama wɔ ne anu.

⁵ Yudea hene Herode aberɛ so, né ɔsɔfo bie wɔ berɛ bɔ bɛfrɛ ye Sakaria, bɔ ofi Abiya asɔfo kure nu ɔ. Né ɔye te Aarɔn bosofoɛ nemɔ anu bie, na ye dumaa li Elisabɛte.

⁶Né bɛ munyɔ bɛtengyɛ wɔ Nyameɛ nyunu, na belili Awurade mmeraa dwirɛ ne ye ahyɛdeɛ so pɛpɛɛpɛ.

⁷Nakoso né belle ba, ɔnate kyɛ né Elisabɛte te mmotaen, yeɛ né bɛ munyɔ koso banyi paa.

⁸Na ɔwale kyɛ, odwuli ye asɔfo kure ne aso, bɔ né ɔyɔ ye ɔsɔfo dwuma wɔ Nyameɛ nyunu ɔ.

⁹Na kyɛbɔ né asɔfodwuma nhyehyɛleɛ te nen, ye yeɛ serewagualɛ ne yele ye kyɛ ɔhɔ Awurade asɔneyɛɛ sua ne anu ɔɔyera ɛyɛɛ ɔ.

¹⁰Na mmerɛ bɔ ɔ́yera ɛyɛɛ ne nen, né ɛlɔen ne amukoraa bɛwɔ aluo dɔ bɛbɔ mbaeɛ.

¹¹Na Awurade abɔfo bie ɔɔyele ye nwo ali hyirele ye, na oogyinane ɛyɛɛ afɔleɛ bokyea ne famaa so.

¹²Na Sakaria nwuni ye nen, ye kunu tele ye, na osurole.

¹³Nakoso abɔfo ne sele ye kyɛ, “Sakaria, nnɛsuro, ofikyɛ Nyameɛ ate wɔ mbaeɛ ne, na ɛye Elisabɛte kɔwo baa bienzua kɔma wɔ, na ɛkɔto ye dumaa Yohane.

¹⁴Ɔkɔmaa ekonya anigye ne anwosɛpɛ, na ye aworɛ ne ati mmenia pee koli ahurusi;

¹⁵ ofikyɛ ɔkɔyɛ sona titire wɔ Awurade nyunu, na ɔngɔno bobe nzaa anaa nzaa biala, na Sunzum Krongron koyi ye tɛkyɛ kofi oni akunu.

¹⁶Na ɔkɔma Yisraelfoɛ pee bekosa bɛkɔwa Awurade bɛ Nyameɛ berɛ.

¹⁷ Ɔkɔfa Elia sunzum ne ye tumi koli ye nyunu kɔkakyi seɛ mɔ b’adwene kɔwa mma mɔ so ɔne asoserɛfoɛ kɔhɔ teneneefoɛ nworɛ nwo, na okosiesie maen bɔ waboaboa ye nwo ɔ kɔma Awurade.”

¹⁸Na Sakaria bisale abɔfo ne kyɛ, “Ɔkɔyɛ sɛɛ né manwu kyɛ ɛhe te nahorɛ? Ofikyɛ mayɛ aworowaa, yeɛ me ye koso wayɛ aworowaa.”

¹⁹ Na abɔfo ne buale ye kyɛ, “Me ole Gabriel bɔ ngyi Nyameɛ nyunu; na basoma me kyɛ mmanga ngyire wɔ, ná mva ndɛenvɛen he mmrɛ wɔ.

²⁰Na tie, anne me dwirɛ bɔ ɔkɔwa nu wɔ ye mmerɛ nu ne anni, yiti ɛkɔtɔ mumu, ɛngɔhora dwudwo maa okodwu kyẽa bɔ ɛhemɔ kɔwa nu ɔ.”

²¹Né mmenia nemɔ bɛnwondɛ Sakaria, na ɔyɛle bɛ nwanwa kyɛ wahyɛ asɔneyɛɛ sua ne anu sɔ ɔ.

²²Na mmerɛ bɔ ofite wale ne, wangora dwudwo kyire bɛ, yiti benwuni kyɛ wanwu nikyee bie wɔ asɔneyɛɛ sua ne anu dɔ; wangora dwudwo, na ɔfale ye sa yeɛ ɔyɛle nzɛngyerɛnneɛ hyirele bɛ ɔ.

²³Na ɔwale kyɛ, ye solɛ adwuma mmerɛ wale ayieleɛ ne, ofili berɛ hɔle ye awuro.

²⁴Na ngyẽa biemɔ asi ne, ɔye Elisabɛte nwonzɛle, na ɔfale ye nwo siele ɛsraen nnu, na ɔhane kyɛ,

²⁵“Sɔaa yeɛ Awurade aboka me ɔ, wɔ mmerɛ bɔ walo me wapa ɛfɛrelɛ bɔ mafɛre mmenia nyunu ne wagua ɔ.”

²⁶Na nwonzɛen ne lili bosome nzia ne, Nyameɛ somane abɔfo Gabriel maa ɔhɔle Galilea kuro bie bɔ bɛfrɛ ye Nasarɛte so,

²⁷ maa ɔhɔle ababunu bie berɛ. Né bafa ye babɔ biaa bie bɔ bɛfrɛ ye Yosef, bɔ ofi Dawide abusua nu ɔ asiwa; na ababunu ne dumaa li Maria.

²⁸Na abɔfo ne wale ye berɛ oosele kyɛ, “Asomdwee hã wɔ! Wɔ bɔ balo wɔ ɔ, Awurade gyi wɔ si!”

²⁹Na edwirɛ ne hale ye paa, na ɔdwenene ye nwo kyɛ, “Nzikyɛ ahyebisalɛ ɛhe?”

³⁰Na abɔfo ne sele ye kyɛ, “Maria, nnɛsuro, ofikyɛ Nyameɛ alo wɔ.

³¹ Na tie, ɛkɔnwonzɛ, ná awo baa bienzua, ná ato ye dumaa Yesu.

³² Ɔkɔyɛ sona titire, na bɛkɔfrɛ ye Anwuro Anwuroniɛ n’Awa; na Awurade Nyameɛ kɔfa ye nana Dawide ahennie bia ne kɔma ye,

³³na okoli Yakob awuro so hene afebɔɔ, na ye ahennie ne olle ayieleɛ.”

³⁴Na Maria bisale abɔfo ne kyɛ, “Nnwuni biaa le, na ɔkɔyɛ sɛɛ né ɛhe awa nu?”

³⁵Na abɔfo ne buale ye kyɛ, “Sunzum Krongron ne kɔwa wɔ so, na Anwuro Anwuroniɛ ne, ye tumi komundu wɔ so; yiti baa krongron bɔ ɛkɔwo ye ne, bɛkɔfrɛ ye Nyameɛ Awa.

³⁶Na tie, wɔ busuaniɛ Elisabɛte bɔ bɛnwa ɔte mmotaen ne, ɔnwonzɛ baa bienzua ɛsraen nzia ɛhe; ye bɔ wayɛ aworowaa posoposo ne;

³⁷ ofikyɛ Nyameɛ de, nikyee biala nne berɛ bɔ ɔngora nyɔ ɔ.”

³⁸Yeɛ Maria buale kyɛ, “Yieee, nde Awurade afaneɛ; maa ɔyɛ berɛ ma me kyɛbɔ wɔ dwirɛ ne te ɔ.” Na abɔfo ne yakyili ye berɛ hɔle.

³⁹Na sɔ mmerɛ ne anu, Maria yɛle ndɛndɛ sili nu hɔle mmokaa so Yuda kuro bie anu,

⁴⁰na ɔhɔle Sakaria awuro, na obisale Elisabɛte ahye.

⁴¹Na Elisabɛte tele Maria ahyebisalɛ nen, akwadaa ne huruli wɔ ye kunu; na Sunzum Krongron yili Elisabɛte tɛkyɛ,

⁴²na ɔteane nu serɛserɛ kyɛ, “Wɔ yeɛ anya saleɛ wɔ mmrasua mukoraa nu ɔ, na bayira baa bɔ ɔla wɔ kunu ne!

⁴³Yieee, ɔwale ye sɛ bɔ m’Awurade ani ɔba bapasa me nwo ɔ?

⁴⁴Ɔnate kyɛ, mmerɛ bɔ ndele w’ahyebisalɛ ne pɛ, yeɛ akwadaa ne le anika ohuruli wɔ me kunu ɔ.

⁴⁵Na saleɛ te bɔ wale wali ɔ deɛ, ofikyɛ edwirɛ mɔ bɔ Awurade amaa baahã bahyire ye ne, ɔkɔwa nu.”

⁴⁶ Na Maria hane kyɛ, “Me kra kamvo Awurade,

⁴⁷na me sunzum di ahurusi wɔ me Ngoadefoɛ Nyameɛ nu;

⁴⁸ ofikyɛ wakaye ye afaneɛ awiɛmvoɛ! Yieee, ofikyɛ ofi ɛnɛ bɔ ɔkɔ ɔ, aworɛ ndoatoasoɛ amukoraa bɛkɔfrɛ me bɔ wanya saleɛ ɔ;

⁴⁹ɔnate kyɛ, Tuminiɛ ne ayɔ nikyee piri wama me, na ye dumaa ole krongron.

⁵⁰Na ye anwumvoinnwunɛ ne, ɔwɔ bɛ bɔ besuro ye ɔ so, wɔ aworɛ ndoatoasoɛ amukoraa nu.

⁵¹Wafa ye basa wayɔ nningyein mbiri mbiri, na wapanzam ahandaenfoɛ b’adwene nzusuleɛ nu.

⁵² Watu tumifoɛ mɔ wafi b’ahennie bia so, na wapagya awiɛmvoɛ mɔ so.

⁵³Wama bɛ bɔ ɛhɔen ku bɛ ɔ bali aleɛ paa ma bɛ ko ayi, yeɛ wama esikafoɛ bafa nzanza bahɔ.

⁵⁴Waboka ye akoaa Yisrael, ofikyɛ wakaye ye anwumvoinnwunɛ ne,

⁵⁵ kyɛbɔ ɔhã hyirele yɛ nana mɔ, Abraham ne ye bosofoɛ afebɔɔ ne.”

⁵⁶Na Maria lili Elisabɛte nwo berɛ kɔyɛ ɛsraen nza, na osa hɔle ye kuro.

⁵⁷Elisabɛte aworɛ dwuli ne, ɔwole baa bienzua.

⁵⁸Na ye mandamu berɛ ama ne ye abusuafoɛ bɛtele kyɛbɔ Awurade asi alo ye paa nen, bɛ ne ye bɛ nye gyele.

⁵⁹ Na ɔwale kyɛ, ye ɛlɛbɔtwɛ ne aso, bɛwale kyɛ bɛbaapɛ akwadaa ne bienzua; na ahaa bɛpena kyɛ bɛfa ye bɛto ye baba Sakaria;

⁶⁰nakoso oni hane kyɛ, “Daabi, bɛkɔfrɛ ye Yohane.”

⁶¹Na besele ye kyɛ, “Ebiala nne w’abusua nu bɔ oli sɔ ɔ.”

⁶²Na bele bɛ sa bɛyɛle nzɛngyerɛnneɛ bebisale ye baba, dumaa horɛ bɔ okuro kyɛ bɛfa bɛto ye ɔ.

⁶³Ohyirele kyɛ bɛma ye nikyee bɔ bɛkyerɛ so ɔ, na ɔhyerɛle so kyɛ, “Ye dumaa li Yohane.” Na ɔyɛle bɛ mukoraa nwanwa.

⁶⁴Na berɛ ne ala, ye noa ne tele, na ye temverema nyamaa sangyele maa odwudwole, na ɔyele Nyameɛ ayɛ.

⁶⁵Na ɛserɛ hane mandamu berɛ ama amukoraa. Na sɔ dwirɛ nemɔ trɛ hɔle Yudea mmokaa maen ne anu amukoraa.

⁶⁶Na bɛ bɔ bɛtele ne amukoraa, bɛdwenene ye nwo paa, na bɛhane kyɛ, “Akwadaa he de, ɔkɔyɛ nzikyɛ sona ɛhe?” Ɔnate kyɛ né Awurade tumi wɔ ye so.

⁶⁷Na Sunzum Krongron yili ye baba Sakaria tɛkyɛ, na ɔhyɛle ngɔm kyɛ,

⁶⁸“Animnyam hã Awurade, Yisrael Nyameɛ ne, ɔnate kyɛ waapasa ye maen nwo, na wapɔ ye wale ye,

⁶⁹na wama ngoalelɛ awɛen so wama yɛ wɔ ye akoaa Dawide awuro;

⁷⁰kyɛbɔ ɔnate ye ngɔmhyɛlɛfoɛ krongron so fi tetetete dwudwole,

⁷¹kyɛ okole yɛ kofi yɛ pɔfoɛ mɔ sa nu, ɔne bɛ bɔ bekyi yɛ mukoraa bɛ sa nu,

⁷²kyɛ okonwu yɛ nana mɔ anwumvoin, ná wakaye ye apam krongron ne.

⁷³Ndaen bɔ ɔta hyirele yɛ nana Abraham

⁷⁴kyɛ ɔkɔmaa bekole yɛ bekofi yɛ pɔfoɛ mɔ sa nu, ná yaso ye bɔ esurolɛ nne nu,

⁷⁵wɔ anwotelɛ ne tenenee nu, wɔ ye nyunu yɛ ngoa ngyẽa mukoraa ne.

⁷⁶Na wɔ, akwadaa he, bɛkɔfrɛ wɔ Anwuro Anwuroniɛ ne, ye ngɔmhyɛlɛniɛ; ɔnate kyɛ ekoli Awurade nyunu moa ekosiesie ye atee nu,

⁷⁷ná afa ngoalelɛ nwo nimdeɛ ama ye maen, wɔ bɛ bɔne fakyɛ nu,

⁷⁸ɔnate yɛ Nyameɛ anwumvoinnwunɛ bɔ ɔma ye kunu tete ye ne anu. Na ye sɔ ati yeɛ alehyeleɛ bɔ ofi anwuro ɔ wapukye wɔ yɛ so ye,

⁷⁹kyɛ ɔkɔta kɔma bɛ bɔ bɛtete awosii nu ɔne ewue wawoɛ nu ɔ, ná wayɛ yɛ taataa wahɔ asomdwee atee so.”

⁸⁰Na akwadaa ne nyini, na ɔyɛle se sunzum nu, na ɔtenane ɛserɛ so maa oodwuli kyẽa bɔ ɔyele ye nwo ali hyirele Yisrael ɔ.