Read Sehwi Luka 12 Bible Online

Luka 12 - Sehwi bible

Luka 12

¹ Sɔ mmerɛ ne, né mmenia apee apee bahyere so bɔ betiatia bɛ nwo so ɔ. Na Yesu hyɛle ye bo lili moa sele ye asuafoɛ nemɔ kyɛ, “Ɛ́mɔnea ɛmɔ nwo yé wɔ Farasiifoɛ mɔle harewaa bɔ ye ole nyaatwomyɛlɛ ne anwo.

² Nikyee biala nne berɛ bɔ so akata bɔ ye nwo ngɔla berɛ ɔ, anaa bɔ ɔwɔ mvealeɛ nu bɔ bengonwu ye ɔ.

³Yiti edwirɛ biala bɔ ɛmɔahã ye awosii nu ne, bɛkɔte ye eyia ketee. Na bɔ ɛmɔatu ye nwo asure wɔ sua nu ne, bɛkɔbɔ ye dawure wɔ sua ti afia.

⁴“Me damvo mɔ, mekã mekyire ɛmɔ kyɛ, nnɛma ɛmɔsuro bɛ bɔ beku anwoɔnaen ne, ná ye si ye bɛngora hwee yɔ ko ɔ.

⁵Na mebɔ ɛmɔ kɔkɔ, bɔ ɔsɛ kyɛ ɛmɔsuro ye ɔ: Odi kyɛ ɛmɔsuro bɔ oku yie a, ole tumi kyɛ ogyi to abɔnzam see nu ɔ. Amba, mekã mekyire ɛmɔ kyɛ, ye yeɛ odi kyɛ ɛmɔsuro ye ɔ.

⁶Aso bɛndɔne akatipire nnu mbɛsaa nyɔ? Nakoso Nyameɛ nyunu de, bɛ nu ko po nne berɛ bɔ ɔma ye wora fi ye ɔ.

⁷Ɛmɔ ti nwiaa po baha ye mukoraa. Yiti nnɛma ɛmɔsuro, na ɛmɔ nwo hia tra ngatipire pee!”

⁸“Mekã mekyire ɛmɔ kyɛ, ebiala bɔ ɔkɔbɔ me dumaa mmenia nyunu nen, Sona Awa ne koso ɔkɔbɔ ye dumaa Nyameɛ abɔfo mɔ nyunu.

⁹Nakoso bɔ ɔkɔpo me mmenia nyunu ne de, me koso ngɔpo ye Nyameɛ abɔfo mɔ nyunu.

¹⁰ “Ebiala bɔ okodwudwo kotia Sona Awa ne, bɛkɔfa bɛkɔhyɛ ye; nakoso bɔ ɔkɔhã musue dwirɛ kotia Sunzum Krongron ne de, bɛngɔfa ngɔhyɛ ye.

¹¹ “Sɛ bɛfa ɛmɔ bɛkɔ nyianu sua mɔ nu, ndɛenbualɛfoɛ ne mbanyi nyunu a, nnɛma ɛmɔdwenedwene kyɛbɔ ɛmɔkosi bɛkɔye ɛmɔ noa nwo, anaa bɔ ɛmɔkɔhã ɔ nwo;

¹²ɔnate kyɛ Sunzum Krongron ne kohyirehyire ɛmɔ sɔ mmerɛ ne ala nu bɔ odi kyɛ ɛmɔkã ɔ.”

¹³Na ebie fili ɛlɔen ne anu sele Yesu kyɛ, “Kyerɛkyerɛniɛ, dwudwo kyire nniɛma ná ɔma yɛhyɛ agyapadeɛ bɔ bafa bayakyi yɛ ne.”

¹⁴Na Yesu buale ye kyɛ, “Ngyabiaa, nwa yeɛ ɔfale me sili ndɛenbualɛniɛ anaa kyɛfoɛ wɔ ɛmɔ so ɔ?”

¹⁵Na osele bɛ kyɛ, “Ɛ́mɔnea ɛmɔ nwo yé wɔ anyeboroborolɛ nwo; ofikyɛ nna agyapadeɛ somaa bɔ sona wanya ye ɔ yeɛ otira ye ngoa nyamaa nu ɔ.”

¹⁶Na obuli bɛ anyandera he: “Esikaniɛ bie ye aseɛ hyene aleɛ pee.

¹⁷Na osusuli ye nwo wɔ ye ti anu kyɛ, ‘Ɛhe de, ngɔyɛ ye sɛ koraa, ofikyɛ nnne nekaa bɔ ngɔfa me nnɔbaeɛ ne ngosie ɔ?’

¹⁸Na osele kyɛ: ‘Mese bɔ ngɔyɔ ɔ: Ngobubu me pata nemɔ ngogua, ná masisi bɔ bɛte mbiri ɔ, na berɛ yeɛ ngɔfa me nnɔbaeɛ ne me nningyein amukoraa ngosie ɔ;

¹⁹ná afei mahã mahyire me kra kyɛ: Ɛkra, ele nningyein paa pee bɔ bafa basie berɛ bama wɔ bɔ okoli afoɛ pee ɔ; yiti de wɔ nwome, didi ná no, ná gye wɔ nye.’

²⁰Nakoso Nyameɛ sele ye kyɛ, ‘Kwaseambane! Kɔngɔen ye ala ngole wɔ kra ngofi wɔ sa nu; na nningyein bɔ apena agua berɛ ne, nwa yeɛ bɛkɔyɛ ye deɛ ɔ?’

²¹Na sɔ ala yeɛ sona bɔ ɔboaboa agyapadeɛ noa ma ye nwo, nakoso olle anwonyadeɛ huu wɔ Nyameɛ nu ne ɔte ɔ.”

²²Afei Yesu sele ye asuafoɛ nemɔ kyɛ, “Yiti mekã mekyire ɛmɔ kyɛ, nnɛmɔma ɛmɔ asetena nu adwenedwene tɔ ɛmɔ so, kyɛ nzu yeɛ ɛmɔkoli ɔ; anaa ɛmɔ nipadua nwo, kyɛ nzu yeɛ ɛmɔkɔhera ɔ.

²³Ɔnate kyɛ ngoa nwo hia tra aleɛ, yeɛ nipadua koso nwo hia tra ɛtena.

²⁴Ɛ́mɔnea adene mɔ, bɛnyɔ boo, bɛngɔmva eboo so aleɛ, yeɛ belle aleɛ bɔ bafa basie ɔ anaa pata; nakoso Nyameɛ ma bɛ aleɛ. Aso ɛmɔ nwo nhia ndra nnomaa hɔ ɔ!

²⁵Na ɛmɔ nu beni yeɛ ɔkɔhora kɔdwenedwene kɔfa ɛlɛho kɔtoa ye ngoa so ɔ?

²⁶Na sɛ ɛmɔngɔhora ngɔyɔ bɔ ɔte kaaba he po a, nzu ati yeɛ ɛmɔdwenedwene bɔ ɔboka so nemɔ nwo ɔ?

²⁷ Ɛ́mɔnea kyɛbɔ sukooko mɔ besi benyi ɔ: bɛnyɔ adwuma, bɛnnwo tena, nakoso mekã mekyire ɛmɔ kyɛ, Solomon animnyam amukoraa nu ne po, ye anwosiesie ne ando ɛhemɔ anu ko po.

²⁸Na sɛ Nyameɛ siesie eburo ndire bɔ ogyi berɛ ɛnɛ maa ɔyɛ nyemene, ná ɛhema bapɛ bayera ye foonoo nu po a, ɔkɔyɛ sɛɛ bɔ ongosiesie ɛmɔ ma ɛmɔ nwo ngɔyɛ nyemene ngɔtra so ɔ? Ɛmɔ bɔ ɛmɔ gyidie te kãa ɔ!

²⁹Sɔ ala yeɛ nnɛma ɛmɔpena bɔ ɛmɔkoli ɔ, anaa bɔ ɛmɔkɔno ɔ; yeɛ nnɛmɔmaa ɔyɛ ɛmɔ so adwenedwene.

³⁰Ofikyɛ ewiasefoɛ yeɛ bɛdwenedwene ɛhemɔ amukoraa nwo ɔ. Na ɛmɔ Baba se kyɛ ɛmɔhia sɔ nningyein nemɔ.

³¹Yiti ɛ́mɔpena Nyameɛ ahennie ne mmom, na ɔkɔfa ɛhemɔ amukoraa kɔboka ɛmɔ so.

³²“Fekue kaaba, nnɛma ɛmɔsuro! Ofikyɛ ɔyɛ ɛmɔ Baba ne fɛ kyɛ ɔkɔfa ahennie ne kɔma ɛmɔ ɔ.

³³Ɛ́mɔtɔne bɔ ɛmɔle ye ɔ ná ɛ́mɔfa bɛ́yɛ adɔeɛ; ɛ́mɔyɔ sikaa bɔtɔ mɔ bɔ bɛnyɛ daa ɔ bɛfa, ɔne agyapadeɛ bɔ benyie le ɔ wɔ nyameɛso, nekaa bɔ awuefoɛ bɛmma berɛ, ná mvrɔlɔ koso benni ɔ.

³⁴Ɔnate kyɛ, nekaa bɔ ɛmɔ agyapadeɛ wɔ ne, berɛ yeɛ ɛmɔ ahone koso wɔ ɔ.

³⁵“Ɛ́mɔmia ɛmɔ abɔsoɛ nu ná ɛ́mɔma ɛmɔ kanea ogye,

³⁶ná ɛ́mɔyɛ kyɛ mmenia bɔ bɛnwondɛ kyɛ bɛ mene kofi atɔmvorɛ bo kɔwa ɔ; amaa sɛ ɔba babɔ anoa nu a, babukye ye berɛ ne ala!

³⁷Na ngoaa bɔ bɛ mene ba a, ɔbato bɛ kyɛ bɛwɛne ne, benya saleɛ! Nahorɛ nu, mekã mekyire ɛmɔ kyɛ, ɔkɔbɔ ye abɔsoɛ, ɔkɔmaa bɛkɔtena poen nwo, ná wawa waaso bɛ.

³⁸Sɛ ɔba abunnamu anaa alebahyene, ná ɔbato bɛ sɔ a, sɔ ngoaa nemɔ benya saleɛ.

³⁹ Na ohia kyɛ ɛmɔnwu kyɛ, sɛ awuro mene ne ɔse mmerɛ bɔ awueniɛ ne kɔwa a, [ahaa ɔkɔwɛne], ahaa ɔngɔma ongonya ate ngootu ye anoa bo.

⁴⁰Yiti ɛmɔ koso, ɛ́mɔsiesie ɛmɔ nwo bésie; ɔnate kyɛ Sona Awa ne kɔwa mmerɛ bɔ ɛmɔ nye ɔlla so ɔ nu.”

⁴¹Yeɛ Petro bisale Yesu kyɛ, “Awurade, anyandera he, ebu ma yɛ, anaakyɛ ebu ma mmenia mukoraa?”

⁴²Na Awurade buale kyɛ, “Nwa ole awuro so neafoɛ nahorɛniɛ ne nworɛniɛ ne, bɔ ye mene kɔfa ye awuro berɛ ngoaa mɔ kowura ye sa, kyɛ ɔma bɛ b’aleɛ wɔ mmerɛ bɔ ɔsɛ ɔ nu ɔ?

⁴³Akoaa bɔ ye mene ba banwu ye kyɛ sɔ ala yeɛ ogu so ɔyɔ ne, onya saleɛ.

⁴⁴Nahorɛ nu, mekã mekyire ɛmɔ kyɛ, ɔkɔfa ye nningyein amukoraa kowura ye sa.

⁴⁵Nakoso sɛ sɔ akoaa ne kã ye wɔ ye ti anu kyɛ, ‘Me mene onnya ɔwwale,’ ná ɔhyɛ ye bo ɔbo ngoaa mmienzua ne ngoaa mmrasua nemɔ, ná odidi ná ɔno nzaa bo a,

⁴⁶ye de, sɔ akoaa ne mene kɔwa kyẽa bɔ okoofu ye nu ɔ, ɔne dɔnhwere bɔ ɔnze ɔ nu; na ɔkɔpepɛ akoaa ne nu ahuronzi ahuronzi, ná wamaa wanya asobrakyeɛfoɛ bɛ kyɛfa ne bie.

⁴⁷“Akoaa bɔ ɔse bɔ ye mene kuro, nakoso wammoaboa ye nwo wanzie, anaa wanyɔ ye mene apɛdeɛ nen, ɔkɔbo ye botorɔ.

⁴⁸Nakoso akoaa bɔ ɔnze, ná ɔyɔ bɔ ɔfata ɛborɛ nen, bɛkɔbo ye kãa bie. Na ebiala bɔ bama ye somaa ne, bekobisa somaa bekofi ye berɛ; yeɛ ebiala bɔ mmenia afa somaa bawura ye sa ne, bekobisa somaa bɔ ɔbo so ɔ bekofi ye berɛ.

⁴⁹“Mmale kyɛ mebaafa see meto aseɛ nu, na me kunu a, ahaa see la nu!

⁵⁰ Asubɔlɛ bie wɔ berɛ bɔ bɛbaafa bɛbɔ me ɔ, na sɛ bɛffa bɛbbɔle me beyyiele a, nnyane anwotɔ.

⁵¹Ɛmɔdwene kyɛ asomdwee yeɛ mafa mawa aseɛ so ɔ? Daabi oo, na mekã mekyire ɛmɔ kyɛ, ndetemuɛ ɔ.

⁵²Ofi ɛnɛ bɔ ɔkɔ ɔ, mmenia nnu bɔ bɛwɔ awuro ko anu ɔ, bɛ nu kɔtete. Nza kɔyɛ ko kotia nyɔ, né nyɔ ayɛ ko atia nza.

⁵³ Bɛ nu kɔtete, seɛ kɔho kotia baa bienzua, yeɛ baa bienzua kɔho kotia seɛ; niɛ kɔho kotia baa brasua, yeɛ baa brasua kɔho kotia niɛ; hyireni kɔho kotia sia brasua, né sia brasua aho atia ohyireni.”

⁵⁴Na Yesu sele ɛlɔen ne koso kyɛ, “Sɛ ɛmɔnwu kyɛ esue amuna eyia atɔleɛ a, ndɛndɛ so ɛmɔkã kyɛ, ‘Esue baatɔ’; na ɔtɔ koso amba.

⁵⁵Yeɛ sɛ ɛmɔnwu kyɛ mvrama ɔbɔ fi ngwaen dɔ a, ɛmɔnwa, ‘Ahuhuro baawa’; na ɔba koso amba.

⁵⁶Nyaatwomfoɛ! Ɛmɔkora bekyire aseɛ ne ewienu nzesãleɛ bo, nakoso nzu ati yeɛ ɛmɔngora bengyire mmerɛ ye anu bo ɔ?

⁵⁷“Na nzu ati yeɛ ɛmɔ bɔbɔ ɛmɔmmu bɔ ɔtengyɛ nwo ndɛen ɔ?

⁵⁸Sɛ ɛne ebie bɔ wabɔ wɔ kwaadu begu so bɛ́kɔ tuminiɛ nyunu a, ɛmɔwɔ atunu bɔ ɛ́mɔkɔ ne, bɔ mmɔden ɛne ye besiesie ɛmɔ afia, ná wandwe wɔ wangɔ ndɛenbualɛniɛ ne nyunu, ná ndɛenbualɛniɛ ne wamva wɔ wanwura kuku nu wɛmvoɛ ne sa, ná wɛmvoɛ ne amva wɔ wando kuku nu.

⁵⁹Na mekã mekyire wɔ kyɛ, sɛ andua kerɛ ne amukoraa pɛsɛɛ a, bɛngɔye wɔ ma ɛngɔhɔ.”