Read Sehwi Luka 19 Bible Online

Luka 19 - Sehwi bible

Luka 19

¹Yesu dwuli Yeriko, na né ɔpɛ nu berɛ kɔ.

²Na yieee, né biaa bie bɔ ye dumaa li Sakeo ɔ ɔwɔ berɛ, bɔ ɔte ɛtoɔdidelɛniɛ panyi bɔ ye sa nu le bie ɔ.

³Né ɔpena kyɛ onwu Yesu ná onwu ye sona horɛ, nakoso ɔnate ɛlɔen ne ati wannwu ye, ofikyɛ ɔte sona tikaa.

⁴Yiti otuli amirika lili moa ɔɔfole akyea bie aso kyɛbɔ okonwu ye ɔ, ofikyɛ berɛ yeɛ né ɔkwaafa ɔ.

⁵Na Yesu dwuli berɛ nen, ɔtole ye ti anwuro, onwuni ye, na osele ye kyɛ, “Sakeo, dwu bra ndɛndɛ! Ofikyɛ w’awuro yeɛ ɔsɛ kyɛ mesikye ɛnɛ ɔ.”

⁶Yiti odwuli ase ndɛndɛ, na olele Yesu wɔ anigye nu.

⁷Na ɛlɔen ne nwuni ye sɔ nen, bɛ mukoraa bɛyɛle nwuhunwuhu kyɛ, “Biaa bɔnefoɛ he yeɛ wahɔ waasikye ye awuro ɔ.”

⁸Yeɛ Sakeo dwɔso gyinane, na osele Awurade kyɛ, “Ao, Awurade, mefa m’anwonyadeɛ bue mekyɛ ehiafoɛ; na sɛ mafa aminɛlilɛ so male ebie nikyee a, ngɔbɔ ye nwo pɛen nna ngotua ye kerɛ.”

⁹Na Yesu sele ye kyɛ, “Ɛnɛ kyẽa ye, ngoalelɛ awa awuro he anu, ofikyɛ ye koso ɔte Abraham bosoniɛ.

¹⁰ Na Sona Awa ne wale kyɛ ɔbaapena ná ode bɛ bɔ bamini ɔ.”

¹¹Na mmerɛ bɔ begu so betie sɔ dwirɛ nemɔ nen, ɔtoale so buli bɛ anyandera, ofikyɛ né wapingye Yerusalem, yeɛ afei ɛlɔen ne susuli kyɛ Nyameɛ ahennie ne ɔbaaye ye nwo ali berɛ ne ala.

¹²Yiti osele bɛ, “Dehyeɛ bie tuli atee hɔle dedeede maen bie aso kyɛ ɔkwaamaa bɛfa ye besi hene, ná afei osa ba.

¹³Na ɔfrɛle ye ngoaa nemɔ anu buru, na ɔmane bɛ mina[11] buru, na osele bɛ kyɛ, ‘Ɛ́mɔfa he bɛ́yɔ adwuma kɔpem kyɛ ngɔwa ɔ.’

¹⁴Nakoso ye maen ne anu ama de, né bɛpɔ ye, yiti betuli ɛbɔfoɛ mɔ maa bɛpole ye so bɛɛhane kyɛ, ‘Yɛmbena kyɛ sɔ biaa he odi yɛ so hene.’

¹⁵“Na ɔwale kyɛ bɛfale ye besili hene, ná osa wale nen, ɔhyɛle kyɛ bɛfrɛ ngoaa bɔ ɔfale sikaa ne mane bɛ ne bɛbrɛ ye, ná onwu bɔ ebiala afa ayɔ adwuma wanya ɔ.

¹⁶Bɔ oli moa ne wale, na osele kyɛ, ‘Me mene, wɔ mina ne, mvasoɛ mina buru awa ye nwo.’

¹⁷Yeɛ osele ye kyɛ, ‘Mmo, akoaa paa! Ɔnate kyɛ ali kãa bie nwo nahorɛ ne ati, nea nguro buru so.’

¹⁸Na bɔ ɔtɔ so nyɔ ne wale oosele kyɛ, ‘Me mene, wɔ mina ne, mvasoɛ mina nnu awa ye nwo.’

¹⁹Na osele ye koso kyɛ, ‘Wɔ koso, nea nguro nnu so.’

²⁰“Yeɛ ko bieku koso wale ɔɔhane kyɛ, ‘Me mene, wɔ mina ne ɛhe. Mvale eduku ngyekyele ye nwo.

²¹Né mesuro wɔ, ofikyɛ ɛte sona bɔ wɔ dwirɛ yɛ se ɔ; ɛfa bɔ amva ando berɛ ɔ, yeɛ ebu bɔ elluale ɔ.’

²²Na osele ye kyɛ, ‘Wɔ akoaa atianuserɛniɛ! Wɔ bɔbɔ wɔ noa dwirɛ yeɛ ngogyina so ngobua wɔ foɛ ɔ! Ɛse kyɛ nde sona bɔ me dwirɛ yɛ se ɔ, bɔ mefa bɔ mamva mando berɛ ɔ, yeɛ mebu bɔ nnuale ɔ.

²³Na nzu ati yeɛ amva me sikaa ne ando sikakorabea ɔ, kyɛ meba a, me sa kɔhã me nikyee ne ye nwo nzihoɛ ɔ?’

²⁴“Na osele bɛ bɔ begyigyi berɛ ne kyɛ, ‘Ɛmɔle mina ne befi ye sa nu, ná ɛ́mɔfa bɛ́ma ko bɔ ole mina buru ne.’

²⁵(Na besele ye kyɛ, ‘Yɛ mene, naa ole mina buru dada!’)

²⁶ ‘Na mekã mekyire ɛmɔ kyɛ, ebiala bɔ ole bie ne, bɛkɔfa somaa bɛkɔboka ye so; nakoso bɔ olle bie ne, bɔ ole ye ne po, bekole bekofi ye sa nu.

²⁷Na me pɔfoɛ mɔ bɔ né bɛmbene so kyɛ medi bɛ so hene ne de, ɛ́mɔfa bɛ bɛbra wa beehu bɛ me nyunu wa!’ ”

²⁸Na Yesu hane ɛhe yiele nen, ɔsẽ lili moa kyɛ ɔkɔ Yerusalem.

²⁹Na opingyele Betefage ne Betania, bɔ ɔwɔ bokaa bɔ bɛfrɛ ye Olive Bokaa ne anwo nen, ɔsomane ye asuafoɛ nemɔ nyɔ

³⁰sele bɛ kyɛ, “Ɛmɔhɔ akuraa bɔ ɔwɔ ɛmɔ nyunu dɔ ne anu. Sɛ ɛmɔwura akuraa ne anu a, ɛmɔkonwu afunum akrɔngrɔma bɔ bamenda ye, bɔ sona biala ɔttenane ye so le ɔ. Ɛ́mɔsangye ye bɛ́fa ye bɛbra wa.

³¹Na sɛ ebie bisa ɛmɔ kyɛ, ‘Nzu ati yeɛ ɛmɔsangye ye ɔ?’ a, ɛmɔhã kyɛ, ‘Awurade hia ye.’ ”

³²Yiti bɛ bɔ ɔsomane bɛ ne, besili nu hɔle, na benwuni nikyee biala pɛpɛɛpɛ kyɛbɔ ɔhã hyirele bɛ ne ala.

³³Na begu so bɔ bɛsangye afunum akrɔngrɔma ne nen, ye mene mɔ bisale bɛ kyɛ, “Nzu ati yeɛ ɛmɔsangye afunum akrɔngrɔma ne ɔ?”

³⁴Na bebuale kyɛ, “Awurade hia ye!”

³⁵Na bɛfale ye bɛbrɛle Yesu; bɛfale bɛ ndaadeɛ aguasoɛ beguale afunum akrɔngrɔma ne aso, na bɛfale Yesu bɛtenane so.

³⁶Ɔte so ná ɔ́kɔ nen, bɛfale bɛ ndena bɛsesɛle atee ne anu.

³⁷Na opingyele berɛ, nekaa bɔ atee ne torotoro kɔ Olive Bokaa ne anwo nen, asuafoɛ ɛlɔen ne amukoraa bɛhyɛle ye bo belili ahurusi, na bɛbɔle ese bɛyele Nyameɛ ayɛ wɔ anwanwadeɛ mbiri mbiri amukoraa bɔ banwu ye ne anwo,

³⁸ kyɛ, “Saleɛ ole Ɛhene bɔ ɔnate Awurade dumaa nu ɔba ye! Asomdwee wɔ nyameɛso, na animnyam wɔ anwuro anwuro!”

³⁹Na Farasiifoɛ bɔ né bɛwɔ ɛlɔen ne anu ne, bɛ nu biemɔ sele ye kyɛ, “Kyerɛkyerɛniɛ, dwudwo w’asuafoɛ nemɔ!”

⁴⁰Na obuale bɛ kyɛ, “Mekã mekyire ɛmɔ kyɛ, sɛ bemua bɛ noa a, nyɔboɛ mɔ po bɛkɔteatea nu.”

⁴¹Na opingyele kuro ne, ná ɔtole ye nye neane ye nen, osũ mane ye kyɛ,

⁴²“Wɔ, sɛ ɛnɛ ye po yeɛ wɔ bɔbɔ ala ɛse bɔ ɔfa asomdwee ba a, ahaa ɔte paa! Nakoso kekesaala ye de, bafa bafea wɔ.

⁴³Ofikyɛ mmerɛ bie baawa wɔ so, bɔ wɔ pɔfoɛ mɔ bɛkɔyɔ nyinasoɛ bɛkɔfo so bɛkɔwa wɔ nu, bɔ bɛkɔpɛ bɛkɔbra wɔ nwo bekoyia, ná batua wɔ bahã wɔ bamia;

⁴⁴bekodwiri wɔ bekogua ase, ɛne wɔ mma bɔ bɛwɔ wɔ nu ne, na bɛngɔyakyi nyɔboɛ bɔ ogyi nyɔboɛ so ɔ wɔ wɔ nu; ɔnate kyɛ annwu mmerɛ bɔ ɔlole wɔ ɔɔneane wɔ ne.”

⁴⁵Yesu wurale asɔneyɛɛ sua ne anu, na ɔhyɛle ye bo foane bɛ bɔ bɛyɛ nningyein atɔen ne fili berɛ;

⁴⁶ na osele bɛ kyɛ, “Bahyerɛ kyɛ, ‘M’awuro te mbaeɛbɔlɛ awuro’; nakoso ɛmɔ de, ɛmɔafa bakakyi awuefoɛ afealeɛ.”

⁴⁷ Na daa biala ɔyɛle ngyerɛkyerɛ wɔ asɔneyɛɛ sua ne anu. Né asɔfo mbanyi, ahyerɛlɛfoɛ ne maen mbanyi bɛpena kyɛ ahaa beku ye ɔ,

⁴⁸nakoso bannya ye nwo ate, ofikyɛ né mmenia ne amukoraa bayɛ asoɛ betie edwirɛ bɔ ɔkã ne.