Read Sehwi Luka 2 Bible Online

Luka 2 - Sehwi bible

Luka 2

¹Mmerɛ sɔ ne anu, Kaesare Augusto hyɛle mmeraa kyɛ bɛha ewiase mmenia amukoraa, ná bɛhyerɛ bɛ dumaa.

²Ɛhe yeɛ ɔte mmeniahalɛ bɔ oli moa ɔ, mmerɛ bɔ né Kirineo ɔte amrado wɔ Siria ne.

³Na mmenia mukoraa bɛhɔle bɛ kuro bɛɛhyerɛle bɛ dumaa.

⁴Na Yosef koso, ofili Nasarɛte bɔ ɔwɔ Galilea sili nu hɔle Dawide kuro Betlehem bɔ ɔwɔ Yudea, ɔnate kyɛ né ofi Dawide awuro ne ye abusua nu.

⁵Ɔɔhyerɛle ye ne ye asiwa Maria bɔ né y’aworɛ apingye ne dumaa.

⁶Na mmerɛ bɔ né bɛwɔ berɛ nen, Maria aworɛ dwuli so.

⁷Ɔwole ye bamuɛbaa bienzua, na ɔfale ɛtena kyekyele ye nwo, na ɔfale ye tole alaka bɔ nyɛmmoa didi nu ɔ nu, ɔnate kyɛ bannya ɛwɔfoɛ sua banzikye nu.

⁸Né mmoaenneafoɛ biemɔ bɛwɔ porɛ ne anu berɛ ɛserɛ so, bɔ bɛ́nea bɛ mmoaen kure so kɔngɔen ne ɔ.

⁹Na Awurade abɔfo yele ye nwo ali hyirele bɛ, na Awurade animnyam tale bɛ nwo bra yiale, na ɛserɛ hane bɛ paa.

¹⁰Na abɔfo ne sele bɛ kyɛ, “Nnɛma ɛmɔsuro, na ɛ́mɔtie, ndɛenvɛen bɔ ɔte anigye piri paa bɔ ɔkɔyɛ maen maen amukoraa bɛ deɛ yeɛ mefa mebrɛ ɛmɔ ɔ;

¹¹ofikyɛ ɛnɛ kyẽa ye, bawo Ngoadefoɛ bɔ ye ole Kristo, Awurade ne, bama ɛmɔ wɔ Dawide kuro.

¹²Na ɛhe yeɛ ɔkɔyɛ sɛngyerɛnneɛ kɔma ɛmɔ ɔ: Ɛmɔkonwu adɔma bɔ bafa ɛtena bakyekye ye nwo bɔ ɔla alaka bɔ nyɛmmoa didi nu ɔ nu.”

¹³Na berɛ ne ala, nyameɛso asafo kure pembepembe bɛɛbokale abɔfo ne so bɛyele Nyameɛ ayɛ kyɛ,

¹⁴“Animnyam hã Nyameɛ wɔ anwuro anwuro, na asomdwee hã mmenia bɔ bɛsɔ ye nye ɔ wɔ aseɛ aso!”

¹⁵Na abɔfo nemɔ fili bɛ nwo berɛ bɛhɔle nyameɛso ne, mmoaenneafoɛ nemɔ sisele bɛ nwo kyɛ, “Ɛ́mɔma yɛhɔ Betlehem yɛɛnea edwirɛ he bɔ wasi, bɔ Awurade aye ahyire yɛ ye.”

¹⁶Yiti bɛhane bɛ nwo bɛhɔle, na beenwuni Maria ne Yosef, ɔne adɔma ne kyɛ ɔla alaka bɔ nyɛmmoa didi nu ɔ nu.

¹⁷Na benwuni ye nen, bɛhane akwadaa ne nwo dwirɛ bɔ bɛhã behyirele bɛ ne behyirele bɛ.

¹⁸Na edwirɛ bɔ mmoaenneafoɛ nemɔ hane ne, ɔyɛle ebiala bɔ ɔtele ne nwanwa.

¹⁹Na Maria de, ɔfale edwirɛ hemɔ amukoraa siele, na ɔdwenene ye nwo wɔ ye ti anu.

²⁰Na mmoaenneafoɛ nemɔ besa bɛhɔle, na bɛhyɛle Nyameɛ animnyam bɛyele ye ayɛ wɔ bɔ benwuni ye ɔne bɔ bate ne amukoraa nwo, bɔ ɔte kyɛbɔ bɛhã behyirele bɛ ne pɛpɛɛpɛ ɔ.

²¹ Na odwuli ɛlɛbɔtwɛ bɔ né bɛbaapɛ ye bienzua ne, bɛtole ye dumaa Yesu, dumaa bɔ abɔfo ne fa tole ye koraka yeɛ bɛnwonzɛ ye ne.

²² Na bɛ nwo petenɛ mmerɛ dwuli, kyɛbɔ Mose mmeraa ne kyire ne, bɛfale ye bɛhɔle Yerusalem kyɛ bɛkwaafa ye bɛma Awurade;

²³ (kyɛbɔ bahyerɛ ye Awurade mmeraa ne anu kyɛ, “Bamuɛbaa bienzua biala bɔ okoli moa kofi koɛ ne anu kɔwa ne, bɛkɔfrɛ ye krongron bɛkɔma Awurade”)

²⁴na bɛɛbɔle afɔleɛ kyɛbɔ bahã ye wɔ Awurade mmeraa ne anu ne, bɔ ɔte mmorɔma nyɔ anaa mmorɔnoma mmaa nyɔ.

²⁵Na sɔ mmerɛ ne, né biaa bie bɔ bɛfrɛ ye Simeon ɔ ɔwɔ Yerusalem. Né ɔtengyɛ, yeɛ osuro Nyameɛ, na né ɔ́nwondɛ Yisrael aworakyekyerɛ ne, yeɛ afei né Sunzum Krongron wɔ ye so.

²⁶Né Sunzum Krongron aye ahyire ye kyɛ, ongonwu ewue, sana wafa ye nye wanwu Kristo bɔ ɔte Awurade deɛ ne koraka.

²⁷Na Sunzum ne kanyane ye maa ɔhɔle asɔneyɛɛ sua ne anu berɛ. Na mmerɛ bɔ awofoɛ ne fale akwadaa Yesu bɛwale kyɛ bɛbaayɔ kyɛbɔ mmeraa ne ahyehyɛ bɛma ye ne,

²⁸Simeon lele akwadaa ne tole ye sa so, na ɔyele Nyameɛ ayɛ kyɛ,

²⁹“Awurade, afei de yakyi w’akoaa ate asomdwee nu, kyɛbɔ wɔ dwirɛ ne ɔte ne;

³⁰ɔnate kyɛ me nye anwu wɔ ngoalelɛ

³¹bɔ asiesie wɔ maen maen amukoraa bɛ nyunu ne,

³² kanea bɔ ɔkɔla wɔ ali kohyire Amaenmaensofoɛ ɔ bɔ ɔte wɔ maen Yisrael animnyam ne.”

³³Na bɔ ɔhã fale akwadaa ne nwo ne yɛle ye baba ne ye maame nwanwa.

³⁴Na Simeon yirayirale bɛ, na osele oni Maria kyɛ, “Nea, akwadaa he yeɛ bafa ye basie berɛ bama mmenia pee b’asefinɛ ne bɛ dwɔsolɛ wɔ Yisrael ɔ, ɔne sɛngyerɛnneɛ bɔ mmenia bekodwudwo bekotia

³⁵bɔ ɔkɔma mmenia pee bɛ ti anu nzusuleɛ kɔla ali ɔ, (na amba, sɛpɔ kosina wɔ bɔbɔ wɔ kra nu).”

³⁶Né ngɔmhyɛlɛniɛ braa bie bɔ bɛfrɛ ye Ana ɔ ɔwɔ berɛ bie. Ɔte Fanuel bɔ ofi Asɛ abusua nu ɔ ɔwa. Né wanyi paa, na ogyale biaa wɔ ye ababunu nu ɔne ohu bɛtenane afoɛ nzoo.

³⁷Né ɔte kunaniɛ bɔ wali afoɛ kɔyɛ aburawɔtwɛ ne nna; na daa biala né ɔwɔ asɔneyɛɛ sua nu berɛ, bɔ eyia ne kɔngɔen ole akɔngyere ne mbaeɛbɔlɛ ɔsɔne Nyameɛ ɔ.

³⁸Na sɔ mmerɛ ne anu ala, ye koso oogyinane berɛ bie yele Nyameɛ ayɛ sɔ ala, na ɔhane akwadaa ne nwo dwirɛ hyirele bɛ bɔ né bɛ́nwondɛ elelɛ bɔ bɛkɔɔpɔ Yerusalem bekole ye ne.

³⁹ Na beyiele nikyee biala kyɛbɔ Awurade mmeraa ne ɔte ne, besa bɛhɔle bɛ kuro Nasarɛte bɔ ɔwɔ Galilea.

⁴⁰Na akwadaa ne nyini, na ɔyɛle se sunzum nu, na onwuni nworɛ paa, na né Nyameɛ adom wɔ ye so.

⁴¹ Afoɛnoa biala, né ye awofoɛ bɛkɔ Abɔtra aluolue ne abo wɔ Yerusalem.

⁴²Na Yesu lili afoɛ buru ne nyɔ ne, bɛhɔle, kyɛbɔ aluolue ne nwo amanneɛ ɔte ne ala.

⁴³Na beyiele aluolue ne di ne, bɔ besili nu besa bɛkɔ ne, akwadaa Yesu de, ɔhale nziɛ wɔ Yerusalem; nakoso né ye awofoɛ bɛnze.

⁴⁴Na besusuli kyɛ wafra akwandufoɛ ngaa nemɔ anu, yiti bɛhɔle ɛlɛho atee. Na afei bɛhyɛle ye bo bɛpena ye wɔ b’abusuafoɛ ne bɛ mmango nemɔ anu.

⁴⁵Bannwu ye. Yiti besa bɛwale Yerusalem bɛɛpenane ye.

⁴⁶Na ɔwale kyɛ, ye ɛlɛsa ne aso, beenwuni ye wɔ asɔneyɛɛ sua ne anu kyɛ ɔte akyerɛkyerɛfoɛ mɔ b’afia, bɔ ótie bɛ ná óbisabisa bɛ dwirɛ ɔ.

⁴⁷Na bɛ bɔ betiele ye ne amukoraa, ye nworɛ ne ye mmuayɛɛ ne yɛle bɛ nwanwa.

⁴⁸Na benwuni ye nen, bɛ nwo dwirili bɛ, na ye maame sele ye kyɛ, “Mma, nzikyɛ dwirɛ yeɛ afa ali yɛ sɔa ye? Tie, me ne wɔ baba yɛle ahunundetelɛ yeɛ yapena wɔ ɔ.”

⁴⁹Na obuale bɛ kyɛ, “Nzu ati yeɛ ɛmɔpena me ɔ? Aso ɛmɔnze kyɛ ɔsɛ kyɛ metena me Baba awuro anaa?”

⁵⁰Nakoso bɛ de, bande edwirɛ bɔ ɔhã hyirele bɛ ne abo.

⁵¹Na ɔne bɛ besa bɛhɔle Nasarɛte, na ɔbrɛle ye nwo ase mane bɛ. Na ye maame fale edwirɛ hemɔ amukoraa siele ye ti anu.

⁵² Na Yesu nyini nworɛ ne nipadua nu, yeɛ onyane adom wɔ Nyameɛ ne sona nyunu.