Read Sehwi Luka 21 Bible Online

Luka 21 - Sehwi bible

Luka 21

¹Yesu mane ye ti so, na onwuni esikafoɛ bɔ bɛ́fa b’ayɛyɛdeɛ begua fotoɛ alaka ne anu ɔ.

²Na onwuni braa kunaniɛ ehianiɛ bie koso bɔ ɔfale mbɛsaa nyɔ oogua nu ɔ.

³Na Yesu hane kyɛ, “Nahorɛ nu, mekã mekyire ɛmɔ kyɛ, braa kunaniɛ ehianiɛ he, wafa somaa waagua nu watra bɛ mukoraa.

⁴Ofikyɛ bɛ mukoraa, bɔ bele ye maa wabu bɛ so ne bie yeɛ bafa baagua nu ɔ; nakoso ye de, ofili ye hiaa nu fale bɔ wanya ye wɔ ye asetena nu amukoraa yeɛ ooguale nu ɔ.”

⁵Né ebiemɔ begu so bedi asɔneyɛɛ sua ne nwo ngɔmɔ bɛfa kyɛbɔ bafa nyɔboɛ nyemenenyemene ne ayɛyɛdeɛ bahyehyɛ ye ɔ, na Yesu hane kyɛ,

⁶“Ɛhemɔ bɔ ɛmɔnwu ye e, mmerɛ bie kɔwa bɔ bɛngɔyakyi nyɔboɛ bɔ ogyi nyɔboɛ so ɔ wɔ wa bɔ bengodwiri bengogua ase ɔ.”

⁷Na bebisale Yesu kyɛ, “Kyerɛkyerɛniɛ, kyinzu yeɛ ɛhemɔ kosi ɔ? Na sɛ ɛhemɔ bɛbaasi a, sɛɛ yeɛ ye nwo sɛngyerɛnneɛ kɔyɛ ɔ?”

⁸Yeɛ Yesu buale kyɛ, “Ɛ́mɔla ɛmɔ nwo so ná bannakalaka ɛmɔ; ofikyɛ mmenia pee bele me dumaa bɛkɔwa bɛkɔɔhã kyɛ, ‘Me ole ye,’ ɔne kyɛ ‘Mmerɛ ne adwu!’ Yiti nnɛma ɛmɔdi bɛ si.

⁹Na sɛ ɛmɔte koɛ mɔ ne basabasayɔlɛ nwo dwirɛ a, nnɛma ɛmɔsuro; ofikyɛ, odi kyɛ ɛhemɔ bedi moa besisi, nakoso ayieleɛ ne ngɔwa berɛ ne ala.”

¹⁰Yeɛ osele bɛ kyɛ, “Maen kodwɔso kotia maen, yeɛ ahennie kodwɔso kotia ahennie;

¹¹aseɛwosolɛ serɛserɛ kɔwa nekaa ahoroɔ, ɛhɔen ne anwonyerɛ ahoroɔ kɔwa; na nningyein suronyisuronyi ne nzɛngyerɛnneɛ mbiri mbiri kofi nyameɛso kɔwa.

¹²Nakoso anzana ɛhemɔ amukoraa bekosisi ne, bekoli moa bɛkɔhye ɛmɔ, ná batane ɛmɔ nye, bɛkɔhye ɛmɔ bɛkɔhɔ nyianu sua mɔ nu ne kuku nu, na ɔnate me dumaa ti bɛkɔfa ɛmɔ bekogyina ahemvo ne amrado mɔ nyunu.

¹³Na ɛhe kɔma ɛmɔkoli me nwo adanzeɛ!

¹⁴ Yiti odi kyɛ ɛmɔfa he bɛto ɛmɔ ti anu, ná ɛmɔandwenedwene bɔ ɛmɔkɔfa bɛkɔye ɛmɔ noa ɔ nwo koraka;

¹⁵ofikyɛ me yeɛ ngɔma ɛmɔ noa ne nworɛ, bɔ ɛmɔ pɔfoɛ amukoraa bɛngɔhora ngotu ngogua anaa bɛngɔhora ngogyina ye noa ɔ.

¹⁶Ɛmɔ awofoɛ ne aliɛmaa mɔ ne abusuafoɛ ne damvo mɔ koso bɛkɔye ɛmɔ bɛkɔma, na bɛkɔmaa bekohu ɛmɔ nu biemɔ.

¹⁷Na ɔnate me dumaa ti, mmenia mukoraa bɛkɔpɔ ɛmɔ;

¹⁸nakoso ɛmɔ ti nwiaa nu ko po ongomini.

¹⁹Na ɛmɔ pindinn gyinalɛ nu yeɛ ɛmɔkonya ɛmɔ kra ɔ.

²⁰“Na sɛ ɛmɔnwu kyɛ koɛhonɛfoɛ bapɛ Yerusalem nwo bayia a, ye de ɛ́mɔnwu ye kyɛ ye bɔlɛ apingye.

²¹Ye de, bɛ bɔ bɛwɔ Yudea ne, odi kyɛ bɛnwati bɛkɔ mmokaa nemɔ aso; yeɛ bɛ bɔ bɛwɔ Yerusalem ne, odi kyɛ befi nu bɛkɔ; na bɛ bɔ bɛwɔ nguraa nemɔ anu ne, onni kyɛ bekoowura kuro ne anu ɔ,

²² ofikyɛ sɔ ngyẽa ne te wereɛtɔlɛ ngyẽa, bɔ ɔma bɔ bahyerɛ ne amukoraa ba nu ɔ.

²³Na pemvoɛ mɔ ne bɛ bɔ bɛma mmaa nyɔfone wɔ sɔ mmerɛ ne anu de, bɛ yaakɔ! Ofikyɛ amaneɛnwunɛ piri kɔwa aseɛ ne aso, na ahonehulɛ kɔwa maen he aso.

²⁴ Bɛkɔtotɔ ngrandɛ noa, bɛkɔhye bɛ nnure bɛkɔhɔ maen maen mukoraa so; na Amaenmaensofoɛ kotiatia Yerusalem so koodwu kyɛ Amaenmaensofoɛ nemɔ bɛ mmerɛ ne kɔwa nu ɔ[13].

²⁵ “Na nzɛngyerɛnneɛ kɔwa eyia ne ɛsraen ne nzramaa mɔ nu; na kyɛbɔ ɛpo ne asorɔkye bekosi bekobu bɛkɔfa so ne, ɔkɔfa aworabɔlɛ ne ahunundetelɛ kɔto maen maen mɔ so wɔ aseɛ so.

²⁶Na ahunundetelɛ, ɔne nningyein bɔ bɛnea a ɔbaasisi wiase ne, ɔkɔma mmenia nye so koburu bɛ; ofikyɛ bɛkɔwoso anwuro tumi mɔ.

²⁷ Na afei mmenia konwu Sona Awa ne kyɛ ole tumi ne animnyam piri ɔ́ba wɔ munungum nu ɔ.

²⁸Na sɛ sɔ nningyein nemɔ bɛhyɛ ye bo kyɛ besisi a, ɛ́mɔma ɛmɔ ti so bɛ́nea anwuro, ofikyɛ ɛmɔ lelɛ ne, né wapingye.”

²⁹Na Yesu buli bɛ anyandera kyɛ, “Ɛ́mɔnea borɔdoma bakaa, ɔne mmakaa mukoraa!

³⁰Sɛ onya fefɛ ná ɛmɔnea a, ɛmɔ bɔbɔ ɛmɔnwu kyɛ ahuhuro mmerɛ ne anya apingye.

³¹Sɔ ala yeɛ ɛmɔ koso, sɛ ɛmɔnwu kyɛ sɔ nningyein hemɔ besisi a, odi kyɛ ɛmɔnwu kyɛ Nyameɛ ahennie ne apingye.

³²“Nahorɛ nu, mekã mekyire ɛmɔ kyɛ, aworɛ ndoatoasoɛ he ngɔpɛ nu, sana ye mukoraa awa nu koraka.

³³Anwuro ne aseɛ kɔpɛ nu kɔhɔ, nakoso me dwirɛ de, ɔngɔpɛ nu le.

³⁴“Ɛ́mɔnea ɛmɔ nwo yé, ná poentolɛ ndrasoɛ ne nzaabolɛ ne asetena nu dadwene wanni ɛmɔ ti, ná sɔ kyẽa ne ammamvu ɛmɔ nu kyɛ ngaen;

³⁵ofikyɛ ɔkɔwa bɛ bɔ bɛte aseɛ ye aso amukoraa so.

³⁶Yiti ɛmɔwɛne ná ɛ́mɔbɔ mbaeɛ daa, amaa ɛmɔanya anwoserɛ bafa banwati bafi bɔ ɔbaasisi ne amukoraati nu, ná ɛmɔahora bagyina Sona Awa ne nyunu.”

³⁷Ɔyɛle ngyerɛkyerɛ daa biala wɔ asɔneyɛɛ sua ne anu, na aleɛ dwo a, né ofi berɛ kɔtena bokaa bɔ bɛfrɛ ye Olive Bokaa ne aso.

³⁸Na né ɛlɔen ne amukoraa bɛpɛ aleɛ bɛba ye berɛ wɔ asɔneyɛɛ sua ne anu bɛbatie ye.