Read Sehwi Luka 4 Bible Online

Luka 4 - Sehwi bible

Luka 4

¹Na Yesu, bɔ Sunzum Krongron ayi ye nu tɛkyɛ ne, ofili Yɔɔdan nwo dɔ wale, na Sunzum ne fale ye hɔle ɛserɛ so,

²na abɔnzam sole ye neane eleburanna. Na sɔ mmerɛ ne, wanni hwee; na oyiele nen, ɛhɔen huni ye.

³Na abɔnzam sele ye kyɛ, “Sɛ wɔ ole Nyameɛ Awa ne a, hyɛ nyɔboɛ he ma ɔkakyi paanoo.”

⁴ Na Yesu buale ye kyɛ, “Bahyerɛ kyɛ, ‘Nna paanoo ngome so yeɛ sona nate nya ngoa ɔ.’ ”

⁵Afei abɔnzam fale ye hɔle bokaa bie aso anwuro anwuro, na ohyirele ye ewiase ahennie amukoraa maa ɔpɛle ye nye so frɛ,

⁶na osele ye kyɛ, “Ngɔfa tumi he amukoraa ne nu animnyam ngɔma wɔ, ofikyɛ bafa bawura me sa, na mefa mema ebiala bɔ mekuro ɔ.

⁷Sɛ ɛkɔsɔne me a, ye de, ye mukoraa kɔyɛ wɔ deɛ.”

⁸ Na Yesu buale ye kyɛ, “[Dwɔso berɛ kɔ dɔ, Satan!] ofikyɛ bahyerɛ kyɛ, Sɔne Awurade wɔ Nyameɛ, na ye ngome twe yeɛ so ye ɔ!’ ”

⁹Na abɔnzam fale ye hɔle Yerusalem, na ɔfale ye oosiele asɔneyɛɛ sua ne ti afia, na osele ye kyɛ, “Sɛ wɔ ole Nyameɛ Awa ne a, to wɔ nwo fi wa tɔ aseɛnwo dɔ!

¹⁰ Ofikyɛ Bahyerɛ kyɛ, ‘Wɔ ti, ɔkɔfa ahyɛdeɛ kɔma ye abɔfo mɔ maa bɛkɔbɔ wɔ nwo waen,’

¹¹ na ‘bɛkɔsoa wɔ wɔ bɛ sa so, amaa ɔnate so wɔ gya ambura nyɔboɛ.’ ”

¹²Na Yesu buale ye kyɛ, “Bahã kyɛ, ‘Nneso Awurade wɔ Nyameɛ nea.’ ”

¹³ Na abɔnzam yiele nzɔhwɛ ne amukoraa nen, ɔyakyili Yesu berɛ hɔle mmerɛ kãa.

¹⁴Yesu nate Sunzum tumi so sa wale Galilea, na ye nwo dwirɛ trɛ hɔle mbɔtam berɛ amukoraa bra yiale.

¹⁵Ɔyɛle ngyerɛkyerɛ wɔ bɛ nyianu sua nemɔ anu, na bɛ mukoraa bɛhyɛle ye animnyam.

¹⁶Yesu hɔle Nasarɛte, nekaa bɔ bɛtetele ye ne; na afofikyẽa ne, kyɛbɔ ɔyɔ ye daa ne, ɔhɔle nyianu sua nu. Na odwɔso gyinane berɛ kyɛ ɔbaakenga.

¹⁷Bɛfale ngɔmhyɛlɛniɛ Yesaya nwomaa ne bɛmane ye; na obukyele nwomaa ne anu nwuni nekaa bɔ bahyerɛ ye kyɛ,

¹⁸ “Awurade Sunzum wɔ me so, ɔnate kyɛ wapopa me ngoo kyɛ nga nzɛmba ne ngyire ehiafoɛ. Wasoma me kyɛ mmɔ fawɔnwodi nwo dawure ngyire bɛ bɔ bahye bɛ nnure ɔ, ɔne nikyee nwunɛ nwo dawure ngyire anyesiniwaafoɛ, kyɛ mma bɛ bɔ bɛwɔ nhyɛsoɛ nu ɔ bɛfa bɛ nwo beli,

¹⁹kyɛ mmɔ Awurade anwumvoinnwunɛ afoɛ ne nwo dawure.”

²⁰Yesu bobɔle nwomaa ne, ɔfa mane somvoɛ ne, na ɔtenane ase; na bɛ bɔ bɛwɔ nyianu sua nu berɛ amukoraa betuli bɛ nye beguale ye so.

²¹Na ɔhyɛle ye bo sele bɛ kyɛ, “Ɛnɛ kyẽa ye, Ahyerɛlɛ he awa nu maa ɛmɔate.”

²²Na bɛ mukoraa bɛhane edwirɛ paa bɛfale Yesu nwo, na ye noa dwirɛ bɔ ɔte adom dwirɛ ne ɔyɛle bɛ nwanwa; nakoso bebisale kyɛ, “Aso nna Yosef awa ne ɛhe anaa?”

²³Na Yesu sele bɛ kyɛ, “Ɔnyɛ nwanwa kyɛ ɛmɔkobu anyandera he bekohyire me kyɛ, ‘Safoɛ, sa wɔ nwo anwonyerɛ e! Bɔ yate kyɛ ɛyɔle ye wɔ Kapanɔm nen, yɔ bie wɔ wɔ bɔbɔ wɔ kuro wa e!’ ”

²⁴Na ɔhane kyɛ, “Amba, mekã mekyire ɛmɔ kyɛ, benne ngɔmhyɛlɛniɛ biala bɛndo nu wɔ ye bɔbɔ ye kuro.

²⁵Nahorɛ nu, mekã mekyire ɛmɔ kyɛ, Elia aberɛ so bɔ anwuro nu tole afoɛ nza ne bue, bɔ ɛhɔen piri bie wale aseɛ ne aso amukoraa nen, né akunafoɛ mmrasua pee wɔ Yisrael,

²⁶ nakoso banzoma Elia maa wangɔ bɛ nu biala berɛ, sana braa kunaniɛ bie bɔ ɔwɔ Sidon kuro Sarefate ɔ ngome berɛ.

²⁷ Asa koso, né kwatafoɛ pee bɛwɔ Yisrael wɔ ngɔmhyɛlɛniɛ Elisa aberɛ so; nakoso wamma ebiala nwo amvi, sana Sirianiɛ Naaman ngome.”

²⁸Na mmenia mukoraa bɔ né bɛwɔ nyianu sua ne anu berɛ ne, bɛtele sɔ dwirɛ nen, bɛfɛle yaa hahii.

²⁹Bedwɔsole besumusumuni Yesu befili kuro berɛ, na bɛfale ye bɛhɔle bokaa bɔ bɛkyekyele kuro ne wɔ so ne aso, kyɛ bɛkwaasumu ye ma ye kɔme kɔwɔ berɛ.

³⁰Nakoso ɔfale b’afia hɔle.

³¹Yesu hɔle Galilea kuro bie bɔ oli Kapanɔm so, na afofingyẽa nemɔ, ɔyɛle ngyerɛkyerɛ hyirele bɛ.

³² Ye ngyerɛkyerɛ ne yɛle bɛ nwanwa, ofikyɛ né tumi wɔ ye dwirɛ ne anu.

³³Né biaa bie wɔ nyianu sua nu berɛ bɔ ole sunzummɔne bɔ ɔte sunzum fiɛ ɔ; na ɔteane nu serɛserɛ kyɛ,

³⁴“Yesu bɔ efi Nasarɛte, nnɛba teetee yɛ! Nzikyɛ yeɛ yɛ ne wɔ le yɔ ɔ? Awa kyɛ ɛbaasɛkye yɛ hɔ ɔ? Mese wɔ sona sue, wɔ ole Nyameɛ ye Krongronniɛ ne!”

³⁵Nakoso teateane ye kyɛ, “Mua wɔ noa, ná fi ye nu fite!” Na sunzummɔne ne tele ye fini bɛ nu berɛ, na otu fili ye nu, bɔ wanyɔ ye hwee ɔ.

³⁶Na ɔyɛle bɛ mukoraa nwanwa, na besisele bɛ nwo kyɛ, “Edwirɛ beni yeɛ ɔte sɔaa ye? Ofikyɛ tumi nu ne anwoserɛ nu yeɛ ɔhyɛ sunzummɔne mɔ maa betutu befi nu ɔ!”

³⁷Na ye nwo dwirɛ trɛ hɔle mbɔtam berɛ amukoraa bra yiale.

³⁸Yesu dwɔsole fili nyianu sua ne anu, na ɔhɔle Simɔn awuro. Né Simɔn sia brasua afokyɛ paa, na bɛsrɛle ye kyɛ ɔboka ye.

³⁹Oogyinane ye nwo berɛ, na ɔteateane ɛfokyɛlɛ ne, na otu fili ye nwo; na berɛ ne ala, odwɔsole sole bɛ.

⁴⁰Na eyia kwaatɔ ne, bɛ bɔ bele ayarefoɛ bɔ anwonyerɛ ahoroɔ abɔ bɛ amukoraa, bɛfale bɛ brɛle ye; na ɔfale ye sa guale ebiala so sale bɛ anwonyerɛ.

⁴¹Na sunzummɔne mɔ koso betutu befili mmeni pee nu, na bɛteateane nu kyɛ, “Wɔ ole Nyameɛ Awa ne!” Nakoso Yesu teateane bɛ, na wamma bɛ ate ma bandwudwo, ɔnate kyɛ né bɛse kyɛ ye ole Kristo ne.

⁴²Na aleɛ hyene ne, ofili berɛ hɔle ɛserɛ so nekaa bie. Na ɛlɔen ne penane ye si atee, na beedwuli ye nwo berɛ nen, né bɛmbena kyɛ bɛyakyi ye maa ɔkɔ.

⁴³Nakoso osele bɛ kyɛ, “Ɔsɛ kyɛ mekã Nyameɛ ahennie ne nwo nzɛmba ne mekyire nguro foforɛ koso; ɔnate kyɛ ɛhe ati yeɛ bɛsomane me ɔ.”

⁴⁴Na ɔhane nzɛmba ne wɔ nyianu sua mɔ nu wɔ Yudea.[1]