Read Sehwi Luka 5 Bible Online

Luka 5 - Sehwi bible

Luka 5

¹ Na ɔwale kyɛ, né mmenia ahyere ye so kyɛ bɛbaatie Nyameɛ dwirɛ ne. Né ogyi Gɛnesarɛte mboanoa.

²Onwuni ɛlɛen nyɔ bie kyɛ begyigyi nzue ne noa berɛ; nakoso bɛ bɔ bɛkye naen ne, né bafi nu badwudwu benwunzi b’asawu nemɔ.

³Na Yesu fole ɛlɛen ne ko bɔ ɔte Simɔn deɛ ɔ anu, na ɔsrɛle Simɔn kyɛ ɔhwe ɛlɛen ne fi etii so berɛ ɔhɔ moa kãa. Na ɔtenane ase yɛle ngyerɛkyerɛ hyirele mmenia ne fili ɛlɛen ne anu.

⁴Na odwudwo yiele nen, osele Simɔn kyɛ, “Fa ɛlɛen ne kɔ buma ne anu dɔ, ná ɛmɔgua asawu ne bɛhye naen.”

⁵ Na Simɔn buale kyɛ, “Yɛ mene, yayɔ adwuma dee kɔngɔen amukoraa, na yangye huu! Nakoso bɔ ahã ne ati, ngogua asawu ne.”

⁶ Na bɛyɔle sɔ nen, bɛhyele naen pee bɔ né b’asawu nemɔ nu pena sunzua ɔ.

⁷Yiti bɛbɔle bɛ mmango bɔ bɛwɔ ɛlɛen ko ne anu nemɔ ba bɛfrɛle bɛ kyɛ bɛɛboka bɛ. Na bɛwale bɛɛyele naen ne beguale ɛlɛen nyɔ nemɔ anu maa beyili fokyefokyee, bɔ ahaa bɛpena bɛmono ɔ.

⁸Na Simɔn nwuni ye sɔ nen, obuli ndwerɛ Yesu nyunu berɛ hane kyɛ, “O Awurade, fi me nwo wa kɔ, ofikyɛ nde sona bɔnefoɛ.”

⁹Ofikyɛ ye nwo dwirili ye, ɔne ye mmango bɔ baha ne amukoraa, ɔnate naen worawora bɔ bɛhyele ye ne ati;

¹⁰na sɔ ala yeɛ Sebedeo mma Yakobo ne Yohane bɔ bɛ ne Simɔn bɛyɔ adwuma bɛbɔ nu ne koso bɛ nwo yɛle bɛ ɔ. Na Yesu sele Simɔn kyɛ, “Nnɛsuro; ofi ɛnɛ bɔ ɔkɔ ɔ, mmenia yeɛ ɛkɔhwehwe bɛ kɔbrɛ me ɔ.”

¹¹Na bɛhwene b’ɛlɛen nemɔ bɛwale etii so ne, bɛyakyili nikyee biala berɛ beelili Yesu si.

¹²Na ɔwale kyɛ, né Yesu wɔ nguro nemɔ ko aso, na biaa bie bɔ kwata ayɛ ye nwo amukoraa ɔ ɔwale berɛ. Onwuni Yesu nen, ɔfale ye nyunu butuli aseɛnwo berɛ srɛle ye kyɛ, “Awurade, sɛ ekuro a, ɛkɔhora kɔma me nwo kofi.”

¹³Na Yesu tengyɛle ye sa hane ye, na ɔhane kyɛ, “Mekuro, wɔ nwo fi!” Na berɛ ne ala, kwata ne fili ye nwo.

¹⁴Na ɔberale ye kyɛ nnɛmaa ɔbɔ so kyire ebiala; na osele kyɛ, “Kɔfa wɔ nwo kyire ɔsɔfo, ná tua wɔ nwo bɔ wafi ne nwo ayɛyɛdeɛ, kyɛbɔ Mose hyɛle ne, ná ɔyɛ adanzeɛ ma bɛ.”

¹⁵Nakoso Yesu nwo dwirɛ trɛ hɔle dede, na ɛlɔen kandinga beeyiale berɛ kyɛ bɛbaatie ye dwirɛ, ná bɛmaa ɔsa bɛ anwonyerɛ.

¹⁶Nakoso ɔhwene ye nwo hɔle ɛserɛ so ɔɔbɔle mbaeɛ.

¹⁷Na ɔwale kyɛ, ɛlɛho bie, né ɔyɛ ngyerɛkyerɛ. Né Farasiifoɛ ne mmeraa akyerɛkyerɛfoɛ bɛtete berɛ bie. Befili Galilea ne Yudea nguraa mukoraa nu ne Yerusalem yeɛ bɛwale ɔ; na né Awurade tumi wɔ ye so bɔ ɔfa sa anwonyerɛ ɔ.

¹⁸Na yieee, mmenia biemɔ fale biaa bubuaniɛ bie bɔ ɔla bɛen so ɔ bɛwale, na né bɛpena atee bɛfa ye bɛkɔ nu bɛkɔto ye nyunu berɛ.

¹⁹Nakoso mmenia worawora ne ati, bannya atee bamva ye bamma nu. Yiti bɛfole sua ne ti afia, na bedwurale ye ne ye bɛen ne bɛfale abuu ne anu bɛɛtole mmenia ne anu wɔ Yesu nyunu berɛ.

²⁰Na onwuni bɛ gyidie nen, osele ye kyɛ, “Ngyabiaa, bafa wɔ bɔne bahyɛ wɔ.”

²¹Na ahyerɛlɛfoɛ ne Farasiifoɛ nemɔ bɛhyɛle ye bo bɛdwenedwenene kyɛ, “Sona beni de ɛhe, bɔ ɔkã musue dwirɛ sɔaa ye? Nwa yeɛ ɔkora fa bɔne kyɛ ɔ, sana Nyameɛ ngome!”

²²Na Yesu nwuni b’adwene nen, obuale bɛ kyɛ, “Nzu ati yeɛ ɛmɔdwene adwene sɔ ye?

²³Nu beni yeɛ ɔyɛ mmerɛ ɔ, kyɛ ɛkɔhã kyɛ, ‘Bafa wɔ bɔne bahyɛ wɔ,’ anaakyɛ ɛkɔhã kyɛ, ‘Dwɔso ná nate’?

²⁴Na kyɛbɔ ɔkɔyɛ bɔ ɛmɔkonwu kyɛ Sona Awa ne ole tumi wɔ aseɛ so, kyɛ ɔfa bɔne kyɛ ti ɔ,” na osele bubuaniɛ ne kyɛ, “Mekã mekyire wɔ kyɛ, dwɔso, fa wɔ bɛen ne ná kɔ w’awuro!”

²⁵Na berɛ ne ala, odwɔsole wɔ bɛ nyunu berɛ, na ɔfale bɔ né ɔla so ne, na ɔhɔle ye awuro bɔ né ɔye Nyameɛ ayɛ ɔ.

²⁶Na ɔyɛle bɛ mukoraa nwanwa, na bɛyele Nyameɛ ayɛ; ɛserɛ hane bɛ, na bɛhane kyɛ, “Ɛnɛ de, yanwu edwirɛ bɔ ɔyɛ nwanwa ɔ!”

²⁷Na ɛhe asi ne, ofitele, na onwuni ɛtoɔdidelɛniɛ bie bɔ ye dumaa li Lewi kyɛ ɔte nekaa bɔ bedide ɛtoɔ ɔ, na osele ye kyɛ, “Di me si!”

²⁸Na ɔyakyili nikyee biala berɛ, odwɔsole, na oolili ye si.

²⁹Afei Lewi tole poen pirikua wɔ ye awuro mane ye; na ɛtoɔdidelɛfoɛ ne mmenia biemɔ pee bɛ ne bɛ bɛɛtena berɛ.

³⁰ Na Farasiifoɛ ne b’ahyerɛlɛfoɛ nemɔ bɛpenepene bɛ komvi behyirele ye asuafoɛ nemɔ kyɛ, “Nzu ati yeɛ ɛmɔ ne ɛtoɔdidelɛfoɛ ne bɔnefoɛ bedidi ná bɛno ɔ?”

³¹Yeɛ Yesu buale bɛ kyɛ, “Bɛ bɔ bɛte apɔ ne, benhia safoɛ, na mmom bɛ bɔ bɛnde apɔ yeɛ behia ye ɔ.

³²Mamma kyɛ mebaafrɛ teneneefoɛ, na mmom mmavrɛle bɔnefoɛ kyɛ bɛsakyera b’adwene.”

³³Na besele Yesu kyɛ, “Yohane asuafoɛ nemɔ bɛtaa bɛyɔ akɔngyere ná bɛbɔ mbaeɛ, yeɛ Farasiifoɛ b’asuafoɛ koso bɛyɔ sɔ ala; nakoso w’asuafoɛ nemɔ de, bedidi ná bɛno.”

³⁴Yeɛ Yesu buale bɛ kyɛ, “Aso ɛmɔkɔhora bɛkɔma atɔmvorɛ bo ama bekoli abuadaa, wɔ mmerɛ bɔ atɔmvorɛ biaa ne ɔne bɛ wɔ berɛ ɔ?

³⁵Mmerɛ bie kɔwa, bɔ bɛkɔfa atɔmvorɛ biaa ne bekofi bɛ nwo bɛkɔhɔ ɔ; na sɔ mmerɛ ne yeɛ bekoli abuadaa ɔ.”

³⁶Na obuli bɛ anyandera he koso kyɛ, “Ebiala mbɛ ɛtena monɛ sii mva nda ataadeɛ daa nu. Sɛ ɔyɔ sɔ a, né watete ɛtena monɛ ne, na sii bɔ wapɛ wafi ɛtena monɛ ne anu ne, ɔne daa ne ngɔsɛ.

³⁷Yeɛ ebie mva nzaa monɛ ngua nwomaa ngotoku daa nu; ɔba ye sɔ a, nzaa monɛ ne kɔma ngotoku nemɔ kote, na nzaa ne kohwie kogua, yeɛ ngotoku nemɔ kɔsɛkye.

³⁸Na mmom odi kyɛ bɛfa nzaa monɛ begua nwomaa ngotoku monɛ nu.

³⁹Yeɛ sɛ ebie no nzaa daa a, ɔmbena nzaa monɛ ko, ofikyɛ ɔkã kyɛ, ‘Nzaa daa ne yeɛ ɔte paa ɔ!’ ”