Read Sehwi Luka 7 Bible Online

Luka 7 - Sehwi bible

Luka 7

¹Yesu hane ye dwirɛ ne amukoraa yiele mane mmenia ne tele nen, ɔhɔle Kapanɔm.

²Né asraafoɛ ɛyaa so panyi bie ye akoaa bɔ okuro ye dwirɛ paa ɔ ɔnde apɔ, bɔ ɔpena wu ɔ.

³Na ɔtele Yesu nga nen, ɔsomane Yudafoɛ mbanyi maa bɛhɔle ye berɛ, kyɛ bɛɛsrɛ ye ma ɔbra ɔɔsa ye akoaa ne anwonyerɛ.

⁴Na bɛwale Yesu berɛ nen, bɛɛsrɛle ye serɛserɛ so kyɛ, “Ɔfata kyɛ ɛbaboka ye ɔ,

⁵ofikyɛ okuro yɛ maen ne dwirɛ, na wasi nyianu sua wama yɛ.”

⁶Na Yesu ne bɛ hɔle. Na ɔhale kãa maa opingye awuro ne anwo berɛ nen, asraafoɛ ɛyaa so panyi ne somane ye damvo mɔ maa beesele ye kyɛ, “Awurade, nnɛha wɔ nwo, ofikyɛ memvata kyɛ ɛkɔwa m’awuro ɔ;

⁷na ye sɔ ati yeɛ ɔmaa mammu me nwo kyɛ mefata kyɛ ngɔwa wɔ berɛ ɔ. Nakoso wɔ de, kã edwirɛ ne, na m’akoaa ne nwo kɔsa.

⁸Ofikyɛ me koso nde sona bɔ nwura tumi bo, bɔ asraafoɛ bewura me bo ɔ. Mekã mekyire ɛhe kyɛ, ‘Kɔ’ a, ɔkɔ; mekã mekyire ko koso kyɛ, ‘Bra’ a, ɔba; yeɛ mekã mekyire m’akoaa kyɛ, ‘Yɔ ɛhe’ a, ɔyɔ.”

⁹Na Yesu tele ɛhe nen, ye nwo yɛle ye nwanwa; na ɔkakyili ye nwo sele ɛlɔen bɔ beli ye si ne kyɛ, “Mekã mekyire ɛmɔ kyɛ, Yisrael po, nnwuni gyidie piri bɔ ɔte sɔaa ɔ.”

¹⁰Na ɛbɔfoɛ nemɔ sa hɔle awuro dɔ nen, bɛɛtole akoaa bɔ né ɔnde apɔ ne kyɛ ye nwo asa.

¹¹Na ɔwale kyɛ, aleɛ hyene ne, Yesu hɔle kuro bie bɔ bɛfrɛ ye Neen so; na ye asuafoɛ nemɔ ne mmenia pee bɛ ne ye hɔle.

¹²Na opingyele kuro berɛ pambim ne anwo nen, yieee, né bɛsõ biaa bie bɔ wawu ɔ, bɔ ɔte oni bahorɛ ɔ bɔ bɛfa ye befite ɔ. Né braa ne te kunaniɛ, na né kuro berɛ ama pee bɛboka ye so yeɛ bɛ́kɔ ɔ.

¹³Na Awurade nwuni braa ne nen, ɔyɛle ye anwumvo, na osele ye kyɛ, “Nnɛsũ!”

¹⁴Na ɔɔfale ye sa hane efui alaka ne, na bɛ bɔ bɛsõ alaka ne begyinane. Na ɔhane kyɛ, “Aberandeɛ, mekã mekyire wɔ kyɛ, dwɔso!”

¹⁵Na bɔ wawu ne tenane berɛ, na ɔhyɛle ye bo dwudwole, na Yesu fale ye mane oni.

¹⁶Na ɛserɛ tɔle bɛ mukoraa bɛ so, na bɛyele Nyameɛ ayɛ kyɛ, “Ngɔmhyɛlɛniɛ piri adwɔso wɔ yɛ nu, na Nyameɛ waanea ye maen!”

¹⁷Na ye nwo dwirɛ trɛ hɔle Yudea amukoraa ne aseɛ mɔ bɔ bapɛ ye nwo bayia ne amukoraa so.

¹⁸Na Yohane asuafoɛ nemɔ hane ɛhemɔ amukoraa nwo dwirɛ behyirele ye.

¹⁹Na Yohane frɛle ye asuafoɛ nemɔ anu nyɔ somane bɛ wɔ Awurade berɛ, kyɛ beebisa ye kyɛ, “Aso wɔ ole bɔ ɔ́ba ne, anaa odi kyɛ yɛnea foforɛ ate?”

²⁰Na mmenia nemɔ wale ye berɛ nen, besele kyɛ, “Asubɔlɛniɛ Yohane asoma yɛ wɔ berɛ, kyɛ yɛɛbisa wɔ kyɛ, ‘Aso wɔ ole bɔ ɔ́ba ne, anaa odi kyɛ yɛnea foforɛ ate?’ ”

²¹Na sɔ mmerɛ ne anu ala, Yesu sale mmenia pee anwonyerɛ ne ɛhawo, na otutuli bɛ sunzummɔne mɔ, na mmenia pee bɔ bɛ nye asi koso, ɔmaa benwuni nikye.

²² Yeɛ Yesu buale ɛbɔfoɛ nemɔ kyɛ, “Ɛmɔhɔ bɛɛhã bɔ ɛmɔanwu ye, ɔne bɔ ɛmɔate ɔ behyire Yohane, kyɛ anyesiniwaafoɛ benwu nikye, mmubuafoɛ bɛnate, kwatafoɛ nwo fi, asotiniwaafoɛ bɛte dwudwolɛ, awufoɛ betingye, na nzɛmba ne, bɛkã bekyire ehiafoɛ.

²³Na sona bɔ nnde sundidua memma ye ne, wanya saleɛ.”

²⁴Na Yohane bɔfoɛ nemɔ hɔle ne, ɔhyɛle ye bo hane edwirɛ bɔ ɔfa Yohane nwo ɔ hyirele ɛlɔen ne kyɛ, “Nzikyɛ yeɛ ɛmɔsili nu bɛhɔle ɛserɛ so dɔ bɛɛneane ɔ? Elemmire bɔ mvrama wosowoso ye anaa?

²⁵Anaakyɛ nzikyɛ yeɛ ɛmɔsili nu bɛhɔ bɛɛneane ɔ? Sona bɔ owura ndaadeɛ nyemenenyemene anaa? Ɛ́mɔtie, bɛ bɔ bewura ndaadeɛ paa ná banya asetena nu anigye ne de, ahemvie yeɛ bɛwɔ ɔ!

²⁶Anaakyɛ nzikyɛ yeɛ ɛmɔsili nu bɛhɔ bɛɛneane ɔ? Ngɔmhyɛlɛniɛ anaa? Yoo, mekã mekyire ɛmɔ kyɛ, ɔtra ngɔmhyɛlɛniɛ po.

²⁷ Ye ole bɔ bahyerɛ ye nwo dwirɛ kyɛ, ‘Tie, mésoma me bɔfoɛ maa odi wɔ nyunu, bɔ okoli wɔ nyunu moa kosiesie w’atee nu ɔ.’

²⁸Na mekã mekyire ɛmɔ kyɛ, bɛ bɔ mmrasua awo bɛ amukoraa, bɛ nu biala nne berɛ bɔ odi mu tra Yohane ɔ; nakoso bɔ ɔte kãa koraa wɔ Nyameɛ ahennie ne anu ne, odi mu tra ye.”

²⁹ (Na mmenia amukoraa bɔ bɛtele sɔ dwirɛ nen, bɛ ne ɛtoɔdidelɛfoɛ belele Nyameɛ bɛtole nu kyɛ ye dwirɛ te nahorɛ, na bɛmaa bɛbɔle bɛ Yohane asubɔlɛ ne bie.

³⁰Nakoso Farasiifoɛ ne mmeraa nwo nimdeɛfoɛ nemɔ de, bɛpole Nyameɛ botaeɛ bɔ ɔwɔ berɛ ma bɛ ne, na bamma bammɔ bɛ asu.)

³¹Na Awurade sele kyɛ, “Nwa mɔ nwo yeɛ ngɔfa ɛnɛmmafoɛ ngɔtoto ɔ? Na bɛte kyɛ nwa mɔ koraa?

³²Bɛte kyɛ ngwadaa bɔ bɛtete dwaaso, bɔ bɛ́frɛfrɛ bɛ nwo bɛ nwo kyɛ, ‘Yɛhuli awɛen yɛhyirele ɛmɔ, na ɛmɔango; yɛbɔle awuye yɛhyire ɛmɔ, na ɛmɔanzu.’

³³Asubɔlɛniɛ Yohane awa, bɔ onnidi ná ɔnno nzaa ɔ, na ɛmɔnwa: ‘Ole sunzummɔne.’

³⁴Sona Awa ne awa, bɔ odidi ná ɔno ɔ, na ɛmɔnwa: ‘Ɛ́mɔnea, adifuu ne akɔnomnzaniɛ, ɛtoɔdidelɛfoɛ ne bɔnefoɛ adamvo!’

³⁵Nakoso nworɛ ye mma mukoraa bebua ye be.”

³⁶Farasiifoɛ nemɔ anu ko tole ye sa frɛle Yesu kyɛ ɔbra ma bedidi; na ɔhɔle Farasiifoɛ n’awuro ɔɔtenane ase kyɛ odidi.

³⁷ Na yieee, braa bɔnefoɛ bie bɔ né ɔwɔ kuro berɛ ɔ, ɔtele kyɛ ɔwɔ Farasiiniɛ n’awuro berɛ odidi nen, ɔfale sakyeɛfona towaa ko bɔ wayi ɔ wale,

³⁸na oogyinane Yesu si wɔ ye gya nwo berɛ, osuni, na ɔhyɛle ye bo porole moen guale ye gya so, ɔfale ye ti nwiaa nununi, ɔfele ye gya bo, na ɔfale sakyeɛfona ne popale ye gya bo.

³⁹Na Farasiiniɛ bɔ ɔtole ye sa frɛle ye ne, onwuni ye sɔ nen, ɔhane ye wɔ ye ti anu kyɛ, “Sɛ biaa he ɔte ngɔmhyɛlɛniɛ a, braa bɔ ɔsosɔ ye nu ye, ahaa okonwu ye suban ne brasua horɛ, ofikyɛ ɔte bɔnefoɛ.”

⁴⁰Yeɛ Yesu buale sele ye kyɛ, “Simɔn, maa nga edwirɛ kãa bie ngyire wɔ.” Na obisale kyɛ “Kyerɛkyerɛniɛ, nzikyɛ dwirɛ ɔ?”

⁴¹Na osele kyɛ, “Né mmenia nyɔ bie bɛma ebie bɔ ɔbɔ bosea ɔ kerɛ. Ko ma ye kerɛ denare ɛyaa nnu, yeɛ ko koso ma ye kerɛ aburannu.

⁴²Bangora kerɛ ne tua, yiti ɔfa hyɛle bɛ munyɔ. Yiti kyire me bɛ nu horɛ bɔ okohuro biaa ne dwirɛ paa ɔ?”

⁴³Na Simɔn buale kyɛ, “Mesusu kyɛ ko bɔ ɔfale somaa hyɛle ye ne ɔ.” Na Yesu sele ye kyɛ, “Abua ye turoloo.”

⁴⁴Na ɔkakyili ye nye hyirele braa ne dɔ nen, osele Simɔn kyɛ, “Anwu braa he? Mmale w’awuro nen, amma me nzue ma mannwunzi me gya bo, nakoso ye de, ole ye nye moen wanwunzi me gya bo, na wafa ye ti nwiaa wanunu.

⁴⁵Amve me noa, nakoso ye de, ofi mmerɛ bɔ mmale wa ye, ɔyyakyili me gya nwo felɛ.

⁴⁶Amva olive ngoo ambopa me ti so, nakoso ye de, wafa sakyeɛfona wapopa me gya bo.

⁴⁷Yiti mekã mekyire wɔ, ye bɔne worawora ne, bafa bahyɛ ye, ofikyɛ wala ɔdɔ piri paa ali. Nakoso sona bɔ bafa bɔne kãa bie bahyɛ ye ne, ɔdɔ kãa bie yeɛ ɔye ye ali ɔ.”

⁴⁸Na osele braa ne kyɛ, “Bafa wɔ bɔne bahyɛ wɔ.”

⁴⁹Na mmenia bɔ né bɛne ye te poen nwo ne, bɛhyɛle ye bo besisele bɛ nwo kyɛ, “Nwa ɛhe, bɔ ɔfa bɔne po kyɛ ye?”

⁵⁰Na osele braa ne kyɛ, “Wɔ gyidie ale wɔ, kɔ asomdwee nu!”