Read Sehwi Luka 8 Bible Online

Luka 8 - Sehwi bible

Luka 8

¹ Na ɔwale kyɛ, ɛhe asi ne, ohyinini nguro ne nguraa biala nu hane Nyameɛ ahennie ne nwo nzɛmba hyirele, na né asuafoɛ buru ne nyɔ ne bɛboka ye so,

² yeɛ mmrasua biemɔ bɔ otuli sunzummɔne fili bɛ nu ná ɔsale bɛ anwonyerɛ ɔ koso, yeɛ Maria bɔ oli Magdalene, bɔ otuli sunzummɔne nzoo fili ye nu ne,

³yeɛ Yoana bɔ ohu Kusa te Herode awuro somvoɛ panyi ne, yeɛ Susana ne mmrasua pee bɔ bɛfale bɔ bele ye ɔ bɛsole ye ne.

⁴Mmenia pee boaboale bɛ noa bɛwale, ná mmenia fili nguro nemɔ amukoraa so bɛwale Yesu berɛ nen, obuli bɛ anyandera kyɛ:

⁵“Kuaniɛ bie hɔle kyɛ ɔkwaapete ye bakaammaa. Na ɔpete nen, ebie ooguale atee noa, na betiatiale so, na ewienu nnomaa beesusole.

⁶Na ebie ooguale nyɔbotaen so, na befifili nen, bɛkesene, ɔnate kyɛ bannya nzue.

⁷Na ebie ooguale mmowue nu, mmowue nemɔ ne bɛ bɛbɔle nu befifili, na bemiamiane bɛ.

⁸ Na ebie ooguale aseɛ paa so, befifili, na besuli mmɔhoɛ ɛyaa.” Na ɔhane sɔ dwirɛ ne nen, ɔteane nu sele kyɛ, “Bɔ ole asoɛ kotie ne, maa otie!”

⁹Yeɛ ye asuafoɛ nemɔ bebisale ye kyɛ, “Anyandera he, ye bo kyire sɛɛ?”

¹⁰ Na obuale kyɛ, “Ɛmɔ de, bafa bama ɛmɔ kyɛ ɛ́mɔnwu Nyameɛ ahennie nu mvealeɛ nu dwirɛ, nakoso mmenia ngaa ne de, bafa bama bɛ anyandera nu, amaa ɔnate so banwu ye, nakoso bannwu nu, ná bate, nakoso bande ye bo.”

¹¹ Afei, anyandera ne bo ɛhe: Mmakaammaa ne ole Nyameɛ dwirɛ ne.

¹²Atee noa deɛ ne ole mmenia bɔ bɛte dwirɛ ne, na afei abɔnzam ba ɔbaye dwirɛ ne fi b’ahone nu kɔ, ná banne banni ma banne bɛ ngoa.

¹³ Nyɔbotaen so deɛ ne ole mmenia bɔ bɛte dwirɛ ne a, bede bɛto nu anigye so; nakoso bendira ndii, bede bedi mmerɛ kãa bie, na sɛ nzɔhwɛ mmerɛ ba a, bɛyakyi bɛ gyidie nu.

¹⁴ Bɔ beguale mmowue nu ne, bɛ ole mmenia bɔ bɛte dwirɛ ne, nakoso befi berɛ bɛ́kɔ a, asetena nu dadwene ne anwonyadeɛ ne anigye miamia bɛ, na bɛ mma nemɔ bendi.

¹⁵Na bɔ beguale aseɛ paa so ne, bɛ ole mmenia bɔ bɛte dwirɛ ne a, bɛfa ahone paa ɔne bɔ nu te ɔ bɛsɔ nu bum, na begyina pindinn besu mmaa.

¹⁶“Bɛnzɔ kanea bɛmva nikyee bemmutu so, anaakyɛ bɛmva benzie mba bo. Na mmom bɛfa besie kanea bakaa so, kyɛbɔ ɔkɔyɛ bɔ mmenia bɔ bɛba nu ne bekonwu kanea ne ɔ.

¹⁷ “Ofikyɛ, nikyee biala nne mvealeɛ nu bɔ bɛngɔla ye ali ɔ; anaakyɛ nikyee biala nne berɛ bɔ wafea bɔ bengonwu ye, bɔ ye nwo ngɔla so ɔ.

¹⁸ Yiti kyɛbɔ ɛmɔtie edwirɛ ne, ɛ́mɔdwene ye nwo yé. Ofikyɛ, ebiala bɔ ole bie ne, bɛkɔfa bieku bɛkɔboka ye so; na bɔ olle bie ne, bɔ osusu kyɛ ole ye ne po, bekole bekofi ye sa nu.”

¹⁹Yeɛ Yesu maame ne oliɛma mɔ wale ye berɛ. Nakoso ɔnate ɛlɔen birikabirika ne ati, bangora ye nwo berɛ kɔ.

²⁰ Na ebie sele ye kyɛ, “Wɔ maame ne eliɛma mɔ begyigyi bondua dɔ, na bɛpena kyɛ benwu wɔ.”

²¹ Yeɛ obuale bɛ kyɛ, “Me maame ne nniɛma mɔ ole bɛ bɔ bɛte Nyameɛ dwirɛ ne ná bedi so ɔ.”

²²Ɛlɛho bie, Yesu ne ye asuafoɛ bɛfole ɛlɛen nu, na osele bɛ kyɛ, “Ɛ́mɔma yɛpɛ asue ne yɛhɔ ye si dɔ.” Yiti besili nu.

²³Na bɛ́pɛ asue ne nen, ɔlafele. Mvrama piri bie tu fale asue ne aso, na nzue bu fale bɛ so, bɔ né amaneɛ paa yeɛ wato bɛ ɔ.

²⁴ Na bɛhɔle ye nwo berɛ beetingyele ye, na besele kyɛ, “Yɛ mene, Yɛ mene, yawu yayie!” Odwɔsole, na ɔteateane mvrama ne ne asorɔkye wuruwuru ne, na bɛyakyili bɛyɛle dinn.

²⁵Na osele bɛ kyɛ, “Ɛmɔ gyidie ne, ɔwɔ ni?” Na besurole, bɛ nwo dwirili bɛ, na besisele bɛ nwo kyɛ, “Nzikyɛ sona ɛhe, bɔ ɔhyɛ mvrama ne nzue po a betie ye e!”

²⁶Na beedwuli Gerasafoɛ aseɛ bɔ ɔwɔ Galilea ndendeneɛ so ne aso.

²⁷Na ofili ɛlɛen ne anu dwuli ase nen, biaa bie bɔ ofi kuro berɛ ɔ, bɔ sunzummɔne mɔ bɛte ye nu dadadada ɔ, ooyiale ye. Né waye ye nwo wato so, né ɔtte awuro biala nu, na mmom asieleɛ so ngumaa nu yeɛ ɔte ɔ.

²⁸ Na mmerɛ bɔ onwuni Yesu nen, ɔteane nu serɛserɛ tole ye nwo yele ye gya bo, na ɔteane nu hane kyɛ, “Yesu, Anwuro Anwuro Nyameɛ n’Awa, nzikyɛ yeɛ me ne wɔ le yɔ ɔ? Mesrɛ wɔ, nnɛteetee me!”

²⁹Ofikyɛ né wahyɛ sunzummɔne ne kyɛ ofi biaa ne anu fite. (Mmerɛ pee né ɔte pe ye so a, begua ye ngɔnzɔngɔnzɔ bɛbɔ ye panwu bɛwɛne ye, nakoso ɔtetele bɔ bafa bakyekye ye ne anu, na sunzummɔne ne foa ye kɔ ɛserɛ so.)

³⁰Na Yesu bisale ye kyɛ, “Wɔ dumaa li sɛɛ?” Na obuale kyɛ, ‘Ɛlɔen’; ofikyɛ né sunzummɔne pee bɛwɔ ye nu.

³¹ Na bɛsrɛle ye kyɛ nnɛmaa ɔhyɛ bɛ maa bekogua kumaa kuronguronn ne anu.

³²Né mbrako kure pirikua bie wɔ berɛ bɔ bedidi wɔ bokaa ne ngyɛnu ɔ; na bɛsrɛle Yesu kyɛ ɔma bɛ ate ma beewura bɛ nu. Na ɔmane bɛ ate.

³³Na sunzummɔne nemɔ fili biaa ne anu fitele beewurale mbrako nemɔ anu; na mbrako kure ne piane bɛ nwo wii bɛtorotorole bokaa twɔndworɔnn ne beeguale nzue ne anu, na bɛmonone.

³⁴Na Bɛ bɔ bɛnea mbrako nemɔ aso ne, benwuni bɔ wasi nen, bɛnwatili, na beetenele edwirɛ ne wɔ kuro ne anu ɔne namue nemɔ anu.

³⁵Yeɛ mmenia fite wale kyɛ bɛbaanea edwirɛ bɔ wasi ne; na bedwuli Yesu nwo berɛ nen, benwuni biaa bɔ sunzummɔne mɔ batu bafi ye nu ne, kyɛ ɔte Yesu gya bo berɛ, owura ataadeɛ, ná ye adwene wɔ berɛ ɔ, na besurole.

³⁶ Na bɛ bɔ benwuni bɔ osili ne, kyɛbɔ osi yɛle bɔ biaa bɔ ole sunzummɔne mɔ ne ye nwo sale ne, bɛhã behyirele bɛ.

³⁷ Na mmenia amukoraa bɔ bɛwɔ Gerasafoɛ mbɔtam berɛ ne, bɛsrɛle Yesu kyɛ ofi bɛ berɛ hɔ; ofikyɛ né ɛserɛ piri atɔ bɛ so. Yiti ɔfole ɛlɛen ne anu osa hɔle.

³⁸Na biaa bɔ sunzummɔne mɔ tu fili ye nu ne, ɔsrɛle Yesu kyɛ ɔne ye bɛkɔhɔ; nakoso Yesu guale ye ate, na osele kyɛ,

³⁹“Sa kɔ w’awuro, ná kɔhã nikyee piri bɔ Nyameɛ ayɔ ama wɔ ɔ.” Na osili nu hɔle ɔɔbɔle nikyee piri bɔ Yesu ayɔ ama ye ɔ nwo dawure wɔ kuro ne anu amukoraa.

⁴⁰Yesu sa wale nen, ɛlɔen ne lele ye nyemene so, ofikyɛ né bɛ mukoraa bɛnwondɛ ye.

⁴¹ Na biaa bie bɔ bɛfrɛ ye Yairo ɔ wale, ɔte nyianu sua nu panyi. Ɔtole ye nwo yele Yesu gya bo, na ɔsrɛle ye kyɛ ɔbra ye awuro;

⁴²ofikyɛ né ɔwa brasua komapɛ bɔ wali afoɛ kɔyɛ buru ne nyɔ ɔ ɔla wusu. Na Yesu ɔkɔ nen, ɛlɔen ne hyerele ye so.

⁴³ Né braa bie bɔ mogya atu ye afoɛ buru ne nyɔ ɔ ɔfora bɛ nu. [Né bɔ ole ye amukoraa wafi ye sa wɔ safoɛ mɔ sa nu], nakoso ebiala angora wanza ye anwonyerɛ.

⁴⁴ Opingyele Yesu si berɛ, na ɔfale ye sa hane ye ataadeɛ noa bɔ banwo ne, na berɛ ne ala ye mogya bɔ otu ye ne pɛle.

⁴⁵Na Yesu bisale kyɛ, “Nwa yeɛ ɔfale ye sa hane me ne?” Ebiala nwa nna ye ɔ, na Petro[3] hane kyɛ, “Yɛ mene, mmenia wora apɛ wɔ nwo ayia bɔ bahyere wɔ so ɔ!”

⁴⁶ Na Yesu hane kyɛ, “Ebie afa ye sa wahã me, ofikyɛ manwu kyɛ tumi bie afi me nu wahɔ.”

⁴⁷Braa ne nwuni kyɛ ye nwo ala so, yiti ɔfale anwopopolɛ oofini Yesu gya bo. Na mmenia ne amukoraa bɛ nyunu berɛ, ɔhane bɔ yiti yeɛ ɔmaa ɔfale ye sa hane ye ɔ, ɔne kyɛbɔ ye nwo asa berɛ ne ala ɔ ohyirele ye.

⁴⁸ Na Yesu sele ye kyɛ, “Mma brasua, wɔ gyidie ale wɔ, kɔ asomdwee nu!”

⁴⁹Yesu noa wɔ so odwudwo nen, ɛbɔfoɛ bie fili nyianu sua nu panyi n’awuro wale oosele [ye] kyɛ, “Ɛwa brasua ne awu, nnɛha Kyerɛkyerɛniɛ ne ko.”

⁵⁰Nakoso Yesu tele ɛhe nen, obuale ye kyɛ, “Nnɛsuro, wɔ de dedi, na okonya ngoa.”

⁵¹ Na oodwuli awuro berɛ nen, wamma ebiala ate ma wangɔ berɛ bie, sana Petro, Yohane ne Yakobo, yeɛ akwadaa ne baba ne ye maame.

⁵² Né mmenia ne amukoraa bɛbɔ awuye besu ye. Nakoso Yesu hane kyɛ, “Nnɛma ɛmɔsu, ofikyɛ owwuli, na mmom walafe!”

⁵³Na bɛserele ye, ofikyɛ né bɛse kyɛ wawu.

⁵⁴ Nakoso Yesu sɔle ye sa, na ɔfrɛle ye kyɛ, “Akwadaa, dwɔso!”

⁵⁵Ye sunzum sa wale, na berɛ ne ala odwɔsole. Na Yesu fale ahyɛdeɛ mane bɛ kyɛ bɛma ye nikyee ma oli.

⁵⁶ Ye awofoɛ nwo dwirili bɛ; nakoso Yesu brale bɛ kyɛ nnɛmaa bɛbɔ bɔ wasi ne aso bekyire ebiala.