Read Sehwi Luka 9 Bible Online

Luka 9 - Sehwi bible

Luka 9

¹Yesu frɛle asuafoɛ buru ne nyɔ ne maa beeyiale, na ɔmane bɛ sunzummɔne amukoraa ne anwonyerɛsalɛ so tumi ne anwoserɛ.

²Afei ɔsomane bɛ kyɛ bɛɛbɔ Nyameɛ ahennie ne nwo dawure, ná bɛsa anwonyerɛ.

³ Na osele bɛ kyɛ, “Nnɛma ɛmɔfa nikye fee betu ɛmɔ atee ne, nnɛma ɛmɔfa pɔmaa, anaa bɔtɔ, anaa aleɛ, anaa sikaa, anaa ndaadeɛ nyɔ nyɔ.

⁴Na awuro biala bɔ ɛmɔkosikye nu ne, ɛ́mɔtena berɛ maa oodwu kyɛ ɛmɔkofi berɛ ɔ.

⁵Na nekaa bɔ berɛ ama bengole ɛmɔ ne, sɛ ɛmɔfi kuro berɛ bɛ́kɔ a, ɛ́mɔporoporo ɛmɔ gya bo mvuture bégua berɛ ma ɔyɛ adanzeɛ hyire bɛ.”

⁶Na besili nu bɛhɔle nguraa nemɔ anu bɛɛhane nzɛmba ne, na bɛsale anwonyerɛ nekaa biala.

⁷ Manzini hene Herode tele bɔ Yesu ayɔ ne amukoraa nen, ɔhale ye paa, ɔnate kyɛ né ebiemɔ kekã kyɛ: Batingye Yohane bafi awufoɛ nu;

⁸na ebiemɔ koso bɛnwa: Elia yeɛ waye ye nwo ali wahyire ɔ; yeɛ ebie koso bɛnwa: tete ngɔmhyɛlɛfoɛ nemɔ anu ko yeɛ watingye wafi ewue nu ɔ.

⁹Na Herode hane kyɛ, “Yohane de, mapɛ ye ti, na sona beni koraa yeɛ mete ye nga kyɛ ɔyɔ sɔ nningyein hemɔ ye?” Ye sɔ ati, né ɔpena kyɛ onwu Yesu.

¹⁰Na asomafoɛ nemɔ sa wale nen, bɛfale bɔ baayɔ amukoraa nwo amaneɛ bɛbɔle Yesu. Na Yesu fale bɛ ɔne bɛ beewurale nekaa bie dinn wɔ kuro bɔ oli Betesaeda nwo berɛ.

¹¹Na ɛlɔen ne tele nen, bɛpole ye; ye koso olele bɛ nyemene so, ɔhane Nyameɛ ahennie ne nwo dwirɛ hyirele bɛ, na ɔsale bɛ bɔ né behia anwonyerɛsalɛ ne anwonyerɛ.

¹²Na mmerɛ bɔ aleɛ yɛle kyɛ ɔsa nen, asuafoɛ buru ne nyɔ ne wale beesele Yesu kyɛ, “Ma ɛlɔen ye bɛhɔ nguraa ne namue bɔ bɛwɔ mbɔtam wa ye anu bɛɛpena nekaa bɔ bɛkɔla ɔ, ɔne nikyee bɔ bekoli ɔ, ofikyɛ nekaa bɔ yɛwɔ ye ɔte ɛserɛ so.”

¹³Nakoso Yesu sele bɛ kyɛ, “Ɛ́mɔma bɛ nikyee ma beli.” Na bebuale kyɛ, “Bɔ yɛle ye amukoraa ole paanoo nnu ne tiré nyɔ ala, sana yɛkɔɔtɔ aleɛ yɛma mmenia ne amukoraa?”

¹⁴Né mmienzua kɔyɛ apee nnu yeɛ bayia berɛ ɔ. Na osele ye asuafoɛ nemɔ kyɛ, “Ɛ́mɔma bɛ́tenatena ase fekue fekue kɔyɛ aburannu aburannu.”

¹⁵Bɛyɔle sɔ, na bɛmane bɛ mukoraa bɛtenatenane ase.

¹⁶Yeɛ Yesu fale paanoo nnu ne tiré nyɔ ne, ɔtole ye nye neane nyameɛso, oyirale so, obubuli nu, na ɔfa mane asuafoɛ nemɔ kyɛ bɛhyɛ bɛma ɛlɔen ne.

¹⁷Bɛ mukoraa bedidili bɛmane bɛ ko yili, na ye bo mboporoka ne, bɛsesale ngɛndɛen buru ne nyɔ.

¹⁸Ɛlɛho bie, né Yesu wɔ nekaa bie ye ngome ɔbɔ mbaeɛ; né ye asuafoɛ nemɔ bɛboka ye so, na obisale bɛ kyɛ, “Mmenia kekã kyɛ nwa ole me?”

¹⁹ Na bebuale kyɛ, “Asubɔlɛniɛ Yohane; nakoso ebiemɔ bɛnwa Elia; yeɛ ebiemɔ koso bɛnwa daa tete ngɔmhyɛlɛfoɛ nemɔ nu ko yeɛ wadwɔso ɔ.”

²⁰ Na obisale bɛ kyɛ, “Na ɛmɔ koso de, ɛmɔnwa nwa ole me?” Yeɛ Petro buale kyɛ, “Nyameɛ Kristo ne.”

²¹Yesu berale bɛ kitii kyɛ nnɛmaa bɛbɔ ɛhe aso bekyire ebiala.

²²Na osele kyɛ, “Odi kyɛ Sona Awa ne nwu amaneɛ pee, ná maen mbanyi, asɔfo mbanyi ne ahyerɛlɛfoɛ bɛpo ye, ná beku ye, ná ye ɛlɛsa ne aso otingye.”

²³ Na osele bɛ mukoraa kyɛ, “Sɛ ebie kuro kyɛ odi me si a, maa ɔpa ye nwo si, ná ɔfa ye mmeamudua daa biala, ná oli me si.

²⁴ Ofikyɛ ebiala bɔ okuro kyɛ ode ye kra ngoa ne, ɔkɔhwere ye; nakoso ebiala bɔ ɔnate me ti ɔkɔhwere ye ngoa ne, okonya daa ngoa.

²⁵Na sɛ sona nya ewiase amukoraa, ná ɔfa ye nwo kowura ɛsɛkyelɛ ne ewue nu a, nzikyɛ mvasoɛ yeɛ okonya ɔ?

²⁶Na sona biala bɔ me ne me dwirɛ nwo kɔyɛ ye nya ne, ye koso ye nwo kɔyɛ Sona Awa ne nya, wɔ kyẽa bɔ ɔkɔwa ye animnyam nu, ye Baba animnyam nu, ɔne ye abɔfo krongron mɔ b’animnyam nu ne.

²⁷Nahorɛ nu, mekã mekyire ɛmɔ kyɛ, mmenia biemɔ gyigyi wa bɔ bengonwu ewue, kɔpem kyɛ bekonwu Nyameɛ ahennie ne koraka ɔ.”

²⁸Yesu hane sɔ dwirɛ nemɔ ne, ye si ye kɔyɛ ɛlɛbɔtwɛ, ɔfale Petro, Yohane ne Yakobo bokale ye nwo so, na ɔne bɛ hɔle bokaa bie aso kyɛ ɔkwaabɔ mbaeɛ.

²⁹Na ogu so ɔbɔ mbaeɛ nen, ye nyunu sue ne sesane, ye ataadeɛ yɛle hyɛnn, na ɔtale.

³⁰Na yieee, mmienzua nyɔ bɔ bɛ ole Mose ne Elia, bɛ ne ye beedwudwole.

³¹Bɛyele bɛ nwo ali animnyam nu, na bɛhane ye wue bɔ okowu wɔ Yerusalem ne nwo dwirɛ.

³²Na nnaa fale Petro ne bɛ bɔ bɛboka ye so ne, na betingyele ne, benwuni Yesu animnyam ne, ɔne mmienzua nyɔ bɔ bɛ ne ye gyi berɛ ne.

³³Na mmerɛ bɔ mmienzua nyɔ nemɔ befi Yesu nwo berɛ bɛkɔ ne, Petro sele Yesu kyɛ, “Yɛ mene, ɔte paa kyɛ yɛtena wa ɔ. Maa yɛbɔ asese nza, wɔ deɛ ko, Mose deɛ ko, yeɛ Elia deɛ ko.” Ofikyɛ né ɔnze bɔ ɔkã ɔ.

³⁴Na ogu so odwudwo ne, munungum bie wale ɔɔkatale bɛ so, na mmerɛ bɔ bɛ́mono munungum ne anu nen, besurole.

³⁵ Afei edwudwolɛ bie fili munungum ne anu hane kyɛ, “Ɛhe ole Mma bɔ maneanea nu maye ye ne; ɛ́mɔtie ye!”

³⁶Edwudwolɛ ne pɛle ne, benwuni kyɛ waha Yesu ngome berɛ. Yeɛ bemuane bɛ noa, na sɔ mmerɛ ne anu, bammɔ bɔ benwuni ye ne aso bangyire ebiala.

³⁷Aleɛ hyene ne, bɔ befili bokaa ne aso bedwu bɛwale ase ne, mmenia pembepembe beeyiale ye.

³⁸Na yieee, biaa bie fili ɛlɔen ne anu teane nu kyɛ, “Kyerɛkyerɛniɛ, mesrɛ wɔ, nwu mma bienzua ye anwumvoin, na ɔte mma komapɛ.

³⁹Na hmmm, sunzummɔne bie ba ye so, na ɔtea nu mvum nu, ɔmaa ɔsenze ma ye noa pɛ ahure, ɔha ye paa, na ɔkyɛ koraa né wayakyi ye.

⁴⁰Na nzrɛle w’asuafoɛ nemɔ kyɛ betu ye befi ye nu, nakoso bangora.”

⁴¹Yeɛ Yesu buale kyɛ, “O ɛnɛmmafoɛ asoserɛfoɛ bɔ ɛmɔlle gyidie ɔ! Me ne ɛmɔ yɛtena ma oodwu kyinzu, yeɛ nya ɛmɔ nwo aboterɛ ma oodwu kyinzu? Fa ɛwa ne bra wa!”

⁴²Na ɔ́ba nen, sunzummɔne ne tele ye fini, na ɔmaa ɔsenzene. Nakoso Yesu teateane sunzummɔne ne, na ɔsale akwadaa ne anwonyerɛ, na ɔfale ye mane ye baba.

⁴³Nyameɛ tumi piri ne yɛle mmenia ne amukoraa nwanwa. Na nningyein amukoraa bɔ Yesu yɔle ne yɛle ebiala nwanwa nen, osele ye asuafoɛ nemɔ kyɛ,

⁴⁴“Ɛ́mɔma edwirɛ bɔ mebaahã ye ɔhɔ ɛmɔ so anu; ofikyɛ bɛbaaye Sona Awa ne bewura mmenia sa.”

⁴⁵Nakoso bande sɔ dwirɛ ne abo. Né bafa ye ndeaseɛ ne bafea bɛ kyɛbɔ bengonwu ye ɔ; na né besuro kyɛ bekobisa ye sɔ dwirɛ ne ɔ.

⁴⁶ Asuafoɛ nemɔ suli bɛ nwo aporowaa kyɛ bɛ nu nwa yeɛ ɔte titire paa ɔ.

⁴⁷Na Yesu nwuni bɛ ti anu adwene nen, ɔfale akwadaa bie oogyinane ye nwo berɛ,

⁴⁸ na osele bɛ kyɛ, “Ebiala bɔ okole akwadaa he kɔto nu me dumaa nu nen, né wale me wato nu; yeɛ ebiala bɔ okole me kɔto nu nen, né wale bɔ ɔsomane me ne wato nu. Ofikyɛ, bɔ ɔte kãa paa wɔ ɛmɔ amukoraa bɛ nu ne, ye yeɛ ɔte titire paa ɔ.”

⁴⁹Na Yohane buale kyɛ, “Yɛ mene, yɛnwuni kyɛ ebie ole wɔ dumaa otu sunzummɔne mɔ, na yɛberale ye, ofikyɛ nna ɔne yɛ ɛɛnate ɔ.”

⁵⁰Na Yesu sele ye kyɛ, “Nnɛma ɛmɔbera ye; ɔnate kyɛ bɔ ondia ɛmɔ ne, né ɔwɔ ɛmɔ bue nu.”

⁵¹ Na ɔwale kyɛ, mmerɛ bɔ ɔsɛ kyɛ bɛfa ye bɛkɔ nyameɛso ɔ ɔpena pingye nen, ɔfa siele ye nye so kyɛ ɔkɔhɔ Yerusalem.

⁵²Na ɔsomane ɛbɔfoɛ mɔ maa belili ye nyunu moa, na bɛhɔle Samaria akuraa bie anu kyɛ bɛkwaasiesie berɛ bɛma ye.

⁵³Nakoso kuro berɛ ama banne ye, ɔnate kyɛ né ye nye kyire Yerusalem.

⁵⁴ Na mmerɛ bɔ ye asuafoɛ Yakobo ne Yohane benwuni ye sɔ nen, besele kyɛ, “Awurade, ekuro kyɛ yɛma see fi nyameɛso bayera bɛ [kyɛbɔ Elia yɔle ne][4] anaa?”

⁵⁵Na ɔkakyili ye nwo hwili bɛ nyunu. [Ɔhane kyɛ: Ɛmɔnze Sunzum horɛ bɔ ɛmɔte ye deɛ ɔ, ɔnate kyɛ Sona Awa ne wamma kyɛ ɔbaasɛkye mmenia kra, na mmom kyɛ ɔbaale bɛ ngoa][5]

⁵⁶Na bɛhɔle akuraa foforɛ so.

⁵⁷Bɛnate atee so bɛkɔ nen, biaa bie sele Yesu kyɛ, “Awurade, nekaa biala bɔ ɛkɔhɔ ne, me ne wɔ yɛkɔhɔ.”

⁵⁸Na Yesu sele ye kyɛ, Safuboa mɔ bele bɔen mɔ, yeɛ ewienu nnomaa bele saen mɔ; nakoso Sona Awa ne de, olle nekaa bɔ ɔfa ye ti to ɔ.”

⁵⁹Na osele sona foforɛ kyɛ, “Di me si!” Na ye de obuale kyɛ, “Awurade, ma me ate ma ngonzie me baba koraka.”

⁶⁰Na Yesu sele ye kyɛ, “Ma awufoɛ besie b’awufoɛ. Nakoso wɔ de, kɔ ná kɔbɔ Nyameɛ ahennie ne nwo dawure.”

⁶¹ Yeɛ sona foforɛ koso hane kyɛ, “Awurade, ngoli wɔ si, nakoso maa nni moa ngɔngra m’awuro ama koraka.”

⁶²Na Yesu sele ye kyɛ, “Ebiala bɔ ɔkɔsɔ buralɛ bɔ bɛfa befundam aseɛ nu ná ɔkɔnea ye si nen, ɔmvata Nyameɛ ahennie ne anu.”