Read Sehwi Deuteronomi 1 Bible Online

Deuteronomi 1 - Sehwi bible

Deuteronomi 1

¹Edwirɛ bɔ Mose hã hyirele Yisraelfoɛ amukoraati wɔ asue Yɔɔdan si, wɔ ɛserɛ ne aso ɛhe. Né bɛ nye kyire Sufe aseɛ frɛtɛɛ, bɔ ɔwɔ Paran, Tofel, Laban, Haserote ne Disahabo b’afia ne.

²(Sɛ ɛfa Sɛre bokaa atee ne aso dɔ a, ngyẽa buru ne ko yeɛ ɛkɔfa kofi Horebo kɔhɔ Kadese Banea ɔ.)

³Kyẽa bɔ oli moa wɔ bosome buru ne ko ne anu, wɔ afoɛ aburanna ne anu ne, Mose hane edwirɛ amukoraa bɔ AWURADE ahyɛ ye kyɛ ɔha hyire Yisraelfoɛ mɔ ne hyirele bɛ.

⁴ Na sɔ mmerɛ ne, Amorifoɛ hene Sihon bɔ né odi hene Hesebon ne, ɔne Basan hene Ogo bɔ né odi hene Astarote ne Yedrei ne, né wali moa wali bɛ so ngonim.

⁵Na bedwuli asue Yɔɔdan si, wɔ Moabo aseɛ so ne, Mose fa siele ye nye so kyɛ okyirekyire mmeraa hemɔ:

⁶“AWURADE yɛ Nyameɛ ha hyirele yɛ wɔ Horebo kyɛ, ‘Ɛmɔatena bokaa he anwo wa bahyɛ.

⁷Ɛ́mɔtu ɛmɔ bo bɛ́toa ɛmɔ ateetulɛ ne aso, ná ɛmɔhɔ Amorifoɛ mmokaa aseɛ ne aso dɔ, ɔne mbɔtam berɛ mɔ: mekyire Araba[1] ne anu, mmokaa aseɛ ne aso, ɔne kongonyi nemɔ anu, ngwaen dɔ aseɛ ne aso, mboanoa, Kanaanfoɛ aseɛ so ne Lebanon alaa bɔ ɔkwaadwu asue piri Yufreti noa ne.

⁸Tie! Aseɛ bɔ maye masie berɛ mama ɛmɔ ne yeɛ ɔla ɛmɔ nyunu dɔ ne. Yiti ɛmɔhɔ bɛɛfa aseɛ bɔ me bɔbɔ AWURADE ndale ndaen ngyirele ɛmɔ nana mɔ Abraham, Yisake ne Yakob kyɛ ngɔfa ngɔma bɛ ne bɛ bosofoɛ bɔ bɛkɔwa nziɛ ye ne.’

⁹“Sɔ mmerɛ ne, nga ngyirele ɛmɔ kyɛ, ‘Me ngome twe de, mengɔhora ɛmɔ so nea.

¹⁰AWURADE ɛmɔ Nyameɛ ne amaa ɛmɔata pee, na kekesaala ye de, ɛmɔ somaa te kyɛ ewienu nzramaa.

¹¹Mesrɛ kyɛ AWURADE ɛmɔ nana mɔ Nyameɛ ne, ɔ́ma ɛmɔ boso trɛ mmɔhoɛ apee apee, ná óyira ɛmɔ, kyɛbɔ wahyɛ ɛmɔ bɔ ne!

¹²Nakoso ɔkɔyɛ sɛɛ né me ngome mahora manea ɛmɔ so, ná masa masiesie ɛmɔ afia dwirɛ?

¹³Ɛ́mɔneanea ɛmɔ abusua kure nemɔ anu bɛ́yeye mmenia bɔ bɛse nworɛ, bɔ bele ndeaseɛ, bɔ mmenia bu bɛ ɔ, na ngɔmaa bɛkɔlela ɛmɔ noa.’

¹⁴Na ɛmɔbuale me kyɛ, ‘Nikyee bɔ aha kyɛ yɛyɔ ne, ɔte nzusuleɛ paa.’

¹⁵Yiti mvale ɛmɔ mmusua kure nemɔ anu atitirefoɛ nworɛfoɛ bɔ mmenia bu bɛ ɔ, na mmɔle bɛ panyi wɔ ɛmɔ koɛhonɛfoɛ nu mmenia apee apee, ɛyaa ɛyaa, aburannu aburannu ne buru buru so, na mmane ebiemɔ koso lelale ɛmɔ mmusua ne amukoraati noa.

¹⁶Na sɔ mmerɛ ne, nhyɛle ɛmɔ ndɛenbualɛfoɛ nemɔ kyɛ, “Ɔsɛ kyɛ ɛmɔtie edwirɛ bɔ ɔkɔwa ɛmɔ aliɛma mɔ afia ɔ, ná ɛmɔbua ndɛen turoloo, ɔmva ye nwo kyɛ sona ne te ɛmɔ aliɛma Yisraelniɛ, anaakyɛ ɛwɔfoɛ bɔ waatena ɛmɔ nu ɔ.

¹⁷Nnɛma ɛmɔbua ndɛengyea, na mmom ɛ́mɔyɛ asoɛ bétie kwahweabaa mɔ dwirɛ kyɛbɔ ɛmɔtie atitirefoɛ ne ala. Nnɛma ɛmɔsuro sona nyunu, ofikyɛ ndɛenbualɛ ne te Nyameɛ deɛ. Na edwirɛ biala bɔ ɔbo ɛmɔ so ne, ɛ́mɔfa bɛbra me gya so, na ngoli.’

¹⁸Na nikyee biala bɔ né ɔsɛ kyɛ ɛmɔyɔ ye sɔ mmerɛ nen, nhyɛle ye nwo mmeraa mane ɛmɔ.

¹⁹Na yɛtuli yɛ bo yɛfili Horebo yɛɛfale sɔ ɛserɛ pirikua suronyisuronyi bɔ ɛmɔnwuni ye ne amukoraa aso, wɔ atee bɔ ɔkɔ Amorifoɛ mmokaa aseɛ ne aso ne, kyɛbɔ AWURADE yɛ Nyameɛ hyɛle yɛ nen, kɔpem kyɛ yɛɛdwuli Kadese Banea ɔ.

²⁰Na nzele ɛmɔ kyɛ, “Ɛmɔadwu Amorifoɛ mmokaa aseɛ bɔ AWURADE yɛ Nyameɛ ɔ́fa ma yɛ ne aso.

²¹Tie, AWURADE wɔ Nyameɛ afa aseɛ ne wama wɔ. Kɔ ná kɔfa tena so, kyɛbɔ AWURADE wɔ nana mɔ Nyameɛ wahyɛ wɔ bɔ ne. Nnɛsuro, yeɛ nnɛma wɔ kunu tete wɔ.

²² Na ɛmɔ amukoraa bɛwale me berɛ beesele kyɛ, ‘Maa yɛsoma mmenia ma beli moa bɛɛneanea aseɛ ne aso besie bɛma yɛ, ná bɛɛfa atee bɔ yɛkɔfa yɛkɔhɔ so, ɔne nguro bɔ yɛkɔhɔ so nemɔ nwo amaneɛ bɛbɔ yɛ.’

²³Sɔ nzusuleɛ ne yɛle me fɛ, yiti nyeyele ɛmɔ anu mmenia buru ne nyɔ, abusua kure biala nu sona ko.

²⁴Besili nu, na bɛfo bɛhɔle mmokaa aseɛ ne aso dɔ; beedwuli bɔnza bɔ bɛfrɛ ye Ɛseko ne anu, na bɛneaneane berɛ besiele.

²⁵Bɛtetele aseɛ ne aso mmakaammaa ne bie, na bɛfa bɛbrɛle yɛ. Bɛfale berɛ amaneɛ bɛɛbɔle yɛ kyɛ, ‘Aseɛ bɔ AWURADE yɛ Nyameɛ ɔ́fa ma yɛ ne, ɔte aseɛ paa.’

²⁶ Nakoso né ɛmɔnguro kyɛ ɛmɔkɔfo bɛkɔhɔ so ɔ, na mmom ɛmɔhwi bɛfale AWURADE ɛmɔ Nyameɛ ye mmeraa dwirɛ so.

²⁷Ɛmɔyɛle nwuhunwuhu wɔ ɛmɔ tena sua nemɔ anu kyɛ, “Ɛpɔlɛ bɔ AWURADE pɔ yɛ ne ati yeɛ ɔmaa ɔɔyele yɛ fili Misraim aseɛ so ɔ, kyɛ ɔbaafa yɛ wura Amorifoɛ sa maa bekuku yɛ.

²⁸Nisua paa yeɛ yɛkɔ ye? Y’eliɛma mɔ amaneɛ bɔ bɛɛbɔle ne ama y’ahone atu. Bɛnwa: ‘Mmenia nemɔ mbiri ne bɛ ndendenn tra yɛ; nguro nemɔ te mbiri, na bale bɛ nwo waen bahɔ anwuro anwuro paa. Yɛnwuni Anake[2] ye bosofoɛ po wɔ berɛ!’ ”

²⁹Nakoso nzele ɛmɔ kyɛ, “Nnɛma ɛmɔ kunu tete ɛmɔ, yeɛ nnɛma ɛmɔsuro bɛ.

³⁰Na AWURADE ɛmɔ Nyameɛ bɔ oli ɛmɔ nyunu ne, ye bɔbɔ ɔkɔho kɔma ɛmɔ, kyɛbɔ ɔho mane ɛmɔ wɔ Misraim bɔ ɛmɔ nye tua ne.

³¹ Ɛserɛ ne aso koso ɛmɔnwuni kyɛbɔ AWURADE ɛmɔ Nyameɛ dodole ɛmɔ, kyɛbɔ sona dodo ɔwa ɔ, wɔ atee biala bɔ ɛmɔfale so kɔpem kyɛ ɛmɔɔdwuli wa ɔ.

³² Nakoso ɛhemɔ amukoraa asi ne po, ɛmɔnne AWURADE ɛmɔ Nyameɛ benni.

³³Ye bɔ olili ɛmɔ nyunu wɔ atunu penane nekaa bɔ ɛmɔsi ɛmɔ asikyeleɛ ɔ, wɔ see nu kɔngɔen fa hyirele ɛmɔ atee bɔ ɛmɔfa so ɔ, ɔne munungum nu koso eyia.

³⁴ Na mmerɛ bɔ AWURADE tele ɛmɔ somoɛbɔlɛ nen, ye ahone huli, na ɔtale ndaen kyɛ,

³⁵‘Sɔ bɔne aworɛ ndoatoasoɛ he, nu sona ko po ngonwu aseɛ paa bɔ ndale ndaen kyɛ ngɔfa ngɔma ɛmɔ nana mɔ ne,

³⁶sana Yefune awa Kalebo ngome. Ye yeɛ okonwu ye ɔ, na ɔne ye bosofoɛ yeɛ ngɔfa aseɛ bɔ ye gya atia so ne ngɔma bɛ ɔ, ofikyɛ wanya gyidie wɔ AWURADE nu.’

³⁷Ɔnate ɛmɔ ti, me koso AWURADE ahone huli me so, na osele kyɛ, ‘Wɔ koso, wɔ gya baa ngotia berɛ.

³⁸Nakoso Nun awa Yosua bɔ ɔte wɔ bokafoɛ ne de, ɔkɔhɔ berɛ. Hyɛ ye nguraen, ofikyɛ ye yeɛ okoli Yisrael nyunu maa ye sa kɔha aseɛ ne ɔ.

³⁹Afei koso, ɛmɔ mma ndɔtɔfee nemɔ bɔ ɛmɔdwenene kyɛ bɛkɔhye bɛ nnure ne, ɔne ɛmɔ mma mɔ bɔ kekesaala ye bɛnze paa anaa bɔne ne, bɛ yeɛ bɛkɔhɔ aseɛ ne aso ɔ. Bɛ yeɛ ngɔfa ngɔma bɛ ɔ, na bɛkɔfa kɔyɛ bɛ deɛ.

⁴⁰Nakoso ɛmɔ de, ɛ́mɔsa ɛmɔ si bɛɛfa ɛserɛ ne aso, wɔ Ɛpo Kɔkorɛ atee ne aso dɔ.’

⁴¹“Na ɛmɔbuale me kyɛ, ‘Yayɔ bɔne yatia AWURADE. Yɛ bɔbɔ yɛkɔfo yɛkɔɔho, kyɛbɔ AWURADE yɛ Nyameɛ hyɛle yɛ ne.’ Yiti ɛmɔ amukoraa ɛmɔfale ɛmɔ akodeɛ besini, na ɛmɔsusuli kyɛ mmokaa aseɛ bɔ ɛmɔfo bɛkɔɔfa ne, ɛmɔkɔfa ye fo.

⁴²Na AWURADE sele me kyɛ, ‘Ka kyire bɛ kyɛ, Nnɛma ɛmɔfo bɛkɔ aseɛ ne aso bɛkɔko, ofikyɛ me de, mmmoka ɛmɔ so. Sɛ ɛmɔkɔ a, ɛmɔ pɔfoɛ mɔ koli ɛmɔ so ngonim.’

⁴³Ɔwɔ nu kyɛ nga ngyirele ɛmɔ de, nakoso ɛmɔandie, na ɛmɔhwi bɛfale AWURADE noa dwirɛ so. Ɛmɔlili bɛ ti piri, na ɛmɔfo bɛhɔle mmokaa aseɛ ne aso dɔ.

⁴⁴Na Amorifoɛ bɔ bɛte sɔ mmokaa aseɛ ne aso nen, bɛwale ɛmɔ so, na bɛfoane ɛmɔ kyɛbɔ ɛwommaa foa mmenia ɔ, na bɛbole ɛmɔ wɔ Sɛre toonn beedwuli Hɔma.

⁴⁵Na ɛmɔsa bɛwale beesu behyirele AWURADE, nakoso AWURADE andie ɛmɔ dwirɛ, yeɛ wandɛ ɛmɔ so.

⁴⁶Ye sɔ ne ati, ngyẽa pee bɔ ɛmɔlili ye berɛ nen, Kadese yeɛ ɛmɔtenane ɔ.