Read Sehwi Deuteronomi 10 Bible Online

Deuteronomi 10 - Sehwi bible

Deuteronomi 10

¹“Sɔ mmerɛ ne, AWURADE sele me kyɛ, ‘Se nyɔboɛ taataa nyɔ bɔ bɛte kyɛ daa deɛ ne ala ɔ, ná fo bra me nwo wa wɔ bokaa ne aso. Fa bakaa koso bobɔ alaka.

²Na edwirɛ bɔ ɔwɔ daa deɛ bɔ ebubuli ye ne aso ne, ngɔhyerɛ ngogua so, né afa agua alaka ne anu.’

³Yiti mvale bɔsema mobɔle alaka, na nzele nyɔboɛ taataa nyɔ kyɛ daa deɛ ne ala, na mvale nyɔboɛ taataa nyɔ ne ndirale me sa nu mvo ngɔle bokaa ne aso.

⁴Na AWURADE hyerɛle edwirɛ daa ne ala guale nyɔboɛ taataa nemɔ aso: mekyire mmeraa dwirɛ buru bɔ ɔha hyirele ɛmɔ wɔ bokaa ne aso fili see ne anu, wɔ nyianu kyẽa nen; na AWURADE fa mane me.

⁵Afei ngakyili me nwo mvili bokaa ne aso ndwu male ase, mvale nyɔboɛ taataa nemɔ nguale alaka bɔ mobɔle ne anu, na begua nu, kyɛbɔ AWURADE hyɛle me ne.

⁶ (Yisraelfoɛ tuli bɛ bo befili Beerote Bene Yaakan bɛhɔle Mosera. Berɛ yeɛ Aarɔn wuli ɔ, besiele ye berɛ, na ɔwa bienzua Eleasa sili ye gya nu lili sɔfo.

⁷Befili berɛ betu bɛhɔle Gudegoda, na befili Gudegoda bɛhɔle Yotebata, aseɛ bɔ asue mmaa mmaa wɔ so ne.

⁸ Sɔ mmerɛ ne, AWURADE tuli Lewifoɛ siele berɛ, kyɛ bɛ́soa AWURADE apam alaka ne, ná bégyina AWURADE nyunu bɛ́so ye, ná bɛ́fa ye dumaa béyira mmenia, kyɛbɔ bayɔ toonn maa waadwu ɛnɛ ye.

⁹Na ɔnate ɛhe ati, abusua agyapadeɛ bɔ Lewi aliɛma nemɔ nyane ye nen, ye de wannya nu kyɛfa biala; AWURADE yeɛ ɔte ye agyapadeɛ ɔ, kyɛbɔ AWURADE wɔ Nyameɛ ha hyirele ye ne.)

¹⁰ “Nnili bokaa ne aso eleburanna, eyia ne kɔngɔen, kyɛbɔ nyɔle ye daa ne ala, na AWURADE tiele me bieku sɔ mmerɛ ne koso; na wanguro kyɛ okohu wɔ ɔ.

¹¹Na AWURADE sele me kyɛ, ‘Aseɛ bɔ nhyɛle bɛ nana mɔ bɔ kyɛ ngɔfa ngɔma bɛ ne, dwɔso koli mmenia nemɔ nyunu maa bɛɛfa.’

¹²“Yiti afei, Yisrael, nzikyɛ yeɛ AWURADE wɔ Nyameɛ pena fi wɔ berɛ ɔ? Bɔ ɔpena ole kyɛ ekosuro AWURADE wɔ Nyameɛ, ná ɛkɔfa ye atee mukoraa so, ná ekohuro ye dwirɛ, ná ɛkɔfa w’ahone mukoraati ne wɔ kra mukoraati ɛkɔso AWURADE wɔ Nyameɛ ɔ,

¹³ɔne kyɛ ekoli AWURADE mmeraa dwirɛ ne ye ahyɛdeɛ bɔ ɔnate wɔ yeeyɛlɛ ti méfa méma wɔ ɛnɛ ye aso ɔ.

¹⁴Ɔwɔ nu kyɛ anwuro ne nyameɛso anwuro anwuro, yeɛ aseɛ ne nu nningyein amukoraati te AWURADE wɔ Nyameɛ deɛ de,

¹⁵nakoso AWURADE fale wɔ nana mɔ ngome wurale ye kunu, na ɔneaneane nu yele ɛmɔ bɔ bɛte bɛ bosofoɛ ne fili mmenia mukoraati nu, kyɛbɔ kekesaala ye ɔte ye.

¹⁶Yiti odi kyɛ ɛmɔye ɛmɔ ahone nwo bɔne ndwirahoɛ ne, na nnɛma ɛmɔyɛ asoserɛ ko.

¹⁷ Ofikyɛ AWURADE ɛmɔ Nyameɛ ne, ɔte nyameɛ mɔ nu Nyameɛ ɔne meneɛ mɔ nu Meneɛ, Nyameɛ piri bɔ ye nwo yɛ suro, bɔ ɔnyɛ nyeyemuɛ, bɔ onne fea-ase-ma ɔ.

¹⁸Ye bɔ odi nyisiaafoɛ ne akunafoɛ dwirɛ ma bɛ ɔ, ye bɔ okuro ɛwɔfoɛ dwirɛ, ná ɔma ye aleɛ ne ɛtena ɔ.

¹⁹ Yiti ɔsɛ kyɛ ɛmɔkuro ɛwɔfoɛ dwirɛ, ofikyɛ né ɛmɔ koso ɛmɔte wɔfoɛ wɔ Misraim aseɛ so.

²⁰AWURADE wɔ Nyameɛ yeɛ ɔsɛ kyɛ esuro ye ɔ; ye ngome twe yeɛ sɔne ye ɔ; ye yeɛ fa wɔ nwo bɔ ye ɔ, na ye dumaa yeɛ fa ta ndaen ɔ.

²¹Ye yeɛ ɔfata w’ayɛyelɛ ɔ; ye yeɛ ɔte wɔ Nyameɛ bɔ wayɔ nningyein mbiri mbiri ne anwanwadeɛ nningyein hemɔ wama wɔ ɔ, nningyein bɔ wɔ nye tua ye.

²² Wɔ nana mɔ tu hɔle Misraim nen, né bɛte mmenia aburasoo. Nakoso kekesaala ye de, AWURADE wɔ Nyameɛ amaa ayɛ pembepembe kyɛ ewienu nzramaa.