Read Sehwi Deuteronomi 15 Bible Online

Deuteronomi 15 - Sehwi bible

Deuteronomi 15

¹“Afoɛ nzoo biala ayieleɛ, odi kyɛ ɛfa ebiala ye kerɛ bɔ ɔma wɔ ɔ kyɛ ye.

²Kyɛbɔ ɛkɔmaa ɔkɔfa ye nwo koli ɛhe: ebiala bɔ wafa nikyee wafɛmo oliɛngo Yisraelniɛ nen, odi kyɛ ɔfa kyɛ ye. Nnɛmaa ɔhyɛ oliɛngo Yisraelniɛ anaa oliɛma kyɛ otua, ofikyɛ batu basie berɛ bama AWURADE kyɛ ɔte kerɛ-fahyɛlɛ afoɛ.

³Amanvoraniɛ de, ɛkɔhora kɔhyɛ ye maa okotua; nakoso sɛ afa nikyee afɛmo eliɛma Yisraelniɛ a, ye de fa kyɛ ye.

⁴Ɛmɔ nu biala ngɔyɛ ehianiɛ, ofikyɛ aseɛ bɔ AWURADE wɔ Nyameɛ ɔ́fa ma wɔ maa ɔyɛ w’agyapadeɛ ne, AWURADE koyira wɔ wɔ so.

⁵Nakoso, sana etie AWURADE wɔ Nyameɛ dwirɛ, ná edi mmeraa dwirɛ he amukoraa bɔ méhyehyɛ méma wɔ ɛnɛ kyẽa ye aso nahorɛ nu.

⁶AWURADE wɔ Nyameɛ koyira wɔ, kyɛbɔ wahyɛ wɔ bɔ ne. Ɛkɔfa kɔfɛmo maen maen pee, nakoso wɔ de, ɛngɔfɛmo bie. Ekoli maen maen pee so, nakoso wɔ de, bengoli wɔ so.

⁷ “Sɛ eliɛma bie te ehianiɛ wɔ kuro bie anu, wɔ w’aseɛ bɔ AWURADE wɔ Nyameɛ ɔ́fa ma wɔ ne aso a, nnɛbɔ eliɛma ne atianuserɛ, yeɛ nnɛma wɔ sa bo yɛ se ma eliɛma bɔ ye nwo ahyere ye ɔ.

⁸Na mmom ma wɔ sa so ye so, na nikyee biala bɔ ohia ne, fa bɔ ɔkɔso ye ɔ fɛmo ye.

⁹Nea yé né annya adwene tɛɛ bie kyɛ, ‘Afoɛ bɔ ɔtɔ so nzoo, bɔ ɔte kerɛ-fahyɛlɛ afoɛ ne apingye,’ ná amva eliɛma hianiɛ nwo dwirɛ tɛɛ anzie wɔ ti anu, kyɛ ɛngɔma ye hwee. Eliɛma ne kosũ kogua wɔ so kohyire AWURADE, na ɔkɔkakyi bɔne kotia wɔ.

¹⁰Fia wɔ kunu ma ye nikye, na sɛ ɛma ye nikyee a, ɔyɛ a nnɛsũ gua wɔ kunu; na ɔnate ɛhe aso AWURADE wɔ Nyameɛ koyira wɔ wɔ w’adwuma mukoraati nu, ɔne wɔ sa noa adwuma mukoraati nu.

¹¹ Ɔyɛ sɛɛ ala a, mmenia bɔ bɛyɛ anwumvo ɔ ngɔpa aseɛ ne aso. Yiti méhyɛ wɔ kyɛ, eliɛngo bɔ ɔte ehianiɛ, bɔ ɔyɛ anwumvo wɔ w’aseɛ ne aso ne, ma wɔ sa so ye so.

¹² “Sɛ bɛyɛ eliɛma Hebriniɛ bienzua anaa brasua atɔen bɛma wɔ[5] a, ɔsɛ kyɛ ɔso wɔ afoɛ nzia, na ye afoɛ nzoo ne aso, ɔsɛ kyɛ ɛmaa ɔfa ye nwo di tɔtorɔtɔɔ.

¹³Na sɛ ɛ́maa ɔfa ye nwo di tɔtorɔtɔɔ fi wɔ berɛ kɔ a, nnɛmaa ɔfa nzanza kɔ.

¹⁴Fia wɔ kunu ma ye wɔ mmoaen ne w’aburoo ne wɔ nzaa ne bie; na kyɛbɔ AWURADE wɔ Nyameɛ ayira wɔ ne, sɔ ala yeɛ ma ye bie ɔ.

¹⁵Kaye kyɛ né ɛte kanga wɔ Misraim aseɛ so, na AWURADE wɔ Nyameɛ lele wɔ. Na ɛhe ati yeɛ ɔmaa ɛnɛ kyẽa ye méhyɛ mmeraa he méma wɔ ɔ.

¹⁶Nakoso sɛ ɔka kyire wɔ kyɛ, ‘Menguro kyɛ ngofi wɔ nwo wa ngɔhɔ ɔ, ofikyɛ mekuro wɔ dwirɛ, ɛne w’awuro ama,’ ɔnate kyɛ ye nwo tɔ ye wɔ wɔ berɛ a,

¹⁷ye de fa ye so bata aponnwaa nwo, ná fa tulie tofi ye so anu, na ɔkɔyɛ wɔ kanganiɛ afebɔɔ. Wɔ kanganiɛ brasua koso, sɔ ala yeɛ yɔ ye ɔ.

¹⁸Nnɛmaa ɔyɛ wɔ yea kyɛ ɛ́yakyi ye maa ɔfa ye nwo di tɔtorɔtɔɔ ofi wɔ nwo kɔ ɔ, ofikyɛ waso wɔ afoɛ nzia wayɔ paaniɛ akatuaa mmɔhoɛ nyɔ adwuma; na AWURADE wɔ Nyameɛ koyira wɔ wɔ nikyee biala bɔ ɛkɔyɔ ɔ nu.

¹⁹ “Wɔ nandwie ne mmoaen mɔ bɛ bamuɛbaa bienzua biala, tu bɛ sie berɛ ma AWURADE wɔ Nyameɛ. Nnɛfa wɔ nandwie bamuɛbaa yɔ adwuma, yeɛ nnɛpepɛ wɔ boaen bamuɛbaa nwiaa.

²⁰Afoɛ biala, ɔsɛ kyɛ ɛne w’awuro ama beku bɛ bedi wɔ AWURADE wɔ Nyameɛ nyunu, nekaa bɔ AWURADE kɔneanea nu kɔye kosie berɛ ne.

²¹Nakoso sɛ kaka ne ali nnɛen, ɔtɔ gua so anaa ye nye asi, anaakyɛ watɔ bue a, ye de nnɛfa bɔ afɔleɛ ma AWURADE wɔ Nyameɛ.

²²Di naen ne wɔ wɔ kuro. Sona bɔ ye nwo nde oo, bɔ ye nwo te oo, ɔkora di bie, kyɛbɔ ɛmɔdi ɛwanzane ne dabɔɔ nen.

²³ Ye mogya ne angome yeɛ nnɛdi ɔ; hwie gua aseɛnwo kyɛ nzue.