Read Sehwi Deuteronomi 19 Bible Online

Deuteronomi 19 - Sehwi bible

Deuteronomi 19

¹“Sɛ AWURADE wɔ Nyameɛ ɔsɛkye maen maen bɔ AWURADE wɔ Nyameɛ ɔ́fa b’aseɛ ma wɔ ne, ná etu bɛ fi berɛ, ná ɛtena bɛ nguro ne b’awuro nemɔ nu a,

²aseɛ bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne, ɔsɛ kyɛ ɛye nu nguro nza sie berɛ.

³Na aseɛ bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne, kyɛ nu nza. Ye atee bɔ ɔkɔ nguro nemɔ aso ɔ, amaa sɛ ebie ku sona a wanwati wahɔ nguro nemɔ ko aso.

⁴“Sona bɔ wanhyɛ da yeɛ wahũ obiɛngo ɔ, obiɛngo bɔ né edwirɛ tɛɛ biala nne b’afia ɔ, ná wanwati waatena dɔ ne, ye nwo dwirɛ ɛhe:

⁵Sɛ ebie ne obiɛngo bɛkɔ eburo kyɛ bɛkwaabubu eyein, ná sɛ bɛ nu ko fa akumaa ne bɔ eyein ne anu, ma akumaa buralɛ ne tu fi ye bakaa ne anu kɔbɔ obiɛngo ne maa owu a, ye de sona bɔ wahũ obiɛngo ne ɔkora nwati kɔ nguro nemɔ ko aso kɔbɔ ye nwo adwaa.

⁶Sɛ atee ne wale a, wereɛtɔlɛniɛ ne kɔfɛ ɛyaa piri paa kɔpo sona bɔ wahũ obiɛngo ne so koohu ye. Ahaa ɔnzɛ kyɛ beku sona bɔ wahũ obiɛngo ne ɔ, ofikyɛ né edwirɛ tɛɛ biala nne bɛ munyɔ b’afia.

⁷Yiti méhyɛ wɔ kyɛ, ye nguro nza sie berɛ.

⁸“Sɛ AWURADE wɔ Nyameɛ ma wɔ maen ne trɛ, kyɛbɔ ɔtale ndaen hyirele wɔ nana mɔ ne a, ɔkɔfa aseɛ amukoraati bɔ ɔfa hyɛle wɔ nana mɔ bɔ ne kɔma wɔ,

⁹nakoso sana edi mmeraa dwirɛ he amukoraati bɔ méhyehyɛ méma wɔ ɛnɛ kyẽa ye aso nahorɛ nu, bɔ ekuro AWURADE wɔ Nyameɛ dwirɛ, ná ɛnate ye atee mukoraati so mmerɛ biala ɔ. Sɛ AWURADE yɔ sɔ ma wɔ a, ye nguro nza sie berɛ fa boka nguro nza nemɔ so.

¹⁰Na ɛhe ngɔma bɛngɔhã mogya bɔ odi be bengogua aseɛ bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne aso, ná anni mogya nwo fɔ.

¹¹“Nakoso sɛ ebie pɔ obiɛngo, ná ɔtɛ ye atunu bobɔ ye ku ye, ná ɔnwati kɔ sɔ nguro nemɔ ko aso a,

¹²ye de wudiniɛ ne, ɔsɛ kyɛ ye kuro mbanyi soma maa bɛkɔfa ye befi dɔ bɛba, ná bɛfa ye bewura wereɛtɔlɛniɛ ne sa maa oku ye.

¹³Nnɛnwu ye anwumvoin; tu mogya bɔ odi be nwo foɛlilɛ bo fi Yisrael, ná wayie wɔ yé.

¹⁴“Aseɛ bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne, agyapadeɛ bɔ ekonya ye wɔ so ne, ɔyɛ a nnɛpimbi ebiɛngo wɛen bɔ daa ama mɔ bali moa bato ne.

¹⁵ “Sɛ bɛbɔ ebie kwaadu kyɛ wayɔ amumuyɛɛ, anaa wayɔ bɔne bie, ná sɛ edwirɛ ne nwo danzeniɛ te komapɛ twe a, ye de bɛngora mmua sona bɔ babɔ ye kwaadu ne foɛ. Sana mmenia nyɔ anaa nza adanzeɛ yeɛ ɔsɛ kyɛ begyina so bebua edwirɛ ɔ.

¹⁶Sɛ adanzewianiɛ bie di adanzeɛ fa tia ebie kyɛ wayɔ yɔleɛ tɛɛ bie a,

¹⁷ye de mmenia nyɔ bɔ edwirɛ awa b’afia ne, ɔsɛ kyɛ bɛbagyina AWURADE nyunu, wɔ asɔfo ne ndɛenbualɛfoɛ bɔ dibea wura bɛ sa sɔ mmerɛ ne nyunu.

¹⁸Ɔsɛ kyɛ ndɛenbualɛfoɛ ne neanea edwirɛ ne anu yé. Na sɛ danzeniɛ ne ali adanzewia, bɔ wapɛ edwirɛ wato oliɛngo so a,

¹⁹ye de bɔ ahaa adanzewianiɛ ne pena kyɛ ɔfa di oliɛngo ne, ɔsɛ kyɛ ɛmɔfa sɔ ala bedi adanzewianiɛ ne. Yiti ɔsɛ kyɛ etu bɔne ne bo fi wɔ nu.

²⁰Mmenia bɔ baha ne kɔte ná basuro, na ɔngɔma bɛngɔyɔ amumuyɛɛ bɔ ɔte sɔaa ɔ wɔ wɔ nu ko.

²¹ Nnɛnwu ye anwumvoin: bɛkɔfa ngoa bekotua ngoa kerɛ; bɔ ɛkɔfa kɔyɛ ebie nye ne, sɔ ala yeɛ bɛkɔyɛ wɔ bie bekotua kerɛ ɔ; bɔ ɛkɔfa kɔyɛ ebie gye ne, sɔ ala yeɛ bɛkɔyɛ wɔ bie bekotua kerɛ ɔ; bɔ ɛkɔfa kɔyɛ ebie sa ne, sɔ ala yeɛ bɛkɔyɛ wɔ bie bekotua kerɛ ɔ; bɔ ɛkɔfa kɔyɛ ebie gya ne, sɔ ala yeɛ bɛkɔyɛ wɔ bie bekotua kerɛ ɔ.