Read Sehwi Deuteronomi 20 Bible Online

Deuteronomi 20 - Sehwi bible

Deuteronomi 20

¹“Sɛ ɛne wɔ pɔfoɛ mɔ bɛkwaaho koɛ, ná sɛ enwu mbɔngɔ mɔ ne teaseɛnam mɔ, ɔne ɛlɔen bɔ bɛsone bɛtra wɔ a, nnɛsuro bɛ; ofikyɛ AWURADE wɔ Nyameɛ bɔ ɔyele wɔ fili Misraim aseɛ so wale ne, ogyi wɔ si.

²Sɛ ɛmɔbaagyina koɛ noa a, odi kyɛ ɔsɔfo ne bagyina ɛlɔen ne nyunu dwudwo kyire bɛ.

³Ɔ́ha hyire bɛ kyɛ, ‘Yisrael, tie, ɛnɛ kyẽa ye, ɛne wɔ pɔfoɛ mɔ bɛkwaaho koɛ. Nnɛma wɔ kunu tete wɔ, nnɛsuro, nnɛma wɔ nwo wosowoso wɔ, yeɛ nnɛma bɛ nwo suronyi tɔ wɔ so.

⁴Ofikyɛ AWURADE ɛmɔ Nyameɛ yeɛ ɔne ɛmɔ nate ɔ, kyɛ ɔne ɛmɔ pɔfoɛ mɔ kwaaho ma ɛmɔ, ná odi ngonim ma ɛmɔ.’

⁵“Afei ɔsɛ kyɛ mbanyi nemɔ dwudwo kyire ɛlɔen ne kyɛ, ‘Aso ebie wɔ yɛ nu bɔ wasi sua bɔ onnya ɔffa owwurale Nyameɛ sa ɔ? Osa hɔ ye awuro; anyɔ a né wawu koɛ nu amaa sona foforɛ afa sua ne wawura Nyameɛ sa.

⁶Aso ebie alua bobe boo bɔ onnya ollili ye mma ne bie ɔ? Osa hɔ ye awuro; anyɔ a né wawu koɛ nu amaa sona foforɛ ali moa wali ye mma ne bie.

⁷Aso ebie abɔ brasua bie asiwa bɔ onnya oggyale ye ɔ? Osa hɔ ye awuro; anyɔ a né wawu koɛ nu amaa sona foforɛ agya braa ne.’

⁸Mbanyi nemɔ kɔhɔ so kodwudwo kohyire ɛlɔen ne kyɛ, ‘Aso ebie wɔ yɛ nu bɔ osuro anaa ye kunu tete ye ɔ? Osa hɔ ye awuro; anyɔ a né wama ye mmango kunu atete bɛ kyɛbɔ ye deɛ tete ye ne.’

⁹Na sɛ mbanyi nemɔ dwudwo kyire mmenia ne yie a, ɔsɛ kyɛ bɛyeye safohene mɔ bɔ bɛkɔlela mmenia ne noa ɔ.

¹⁰“Sɛ epingye kuro bie kyɛ ɛne so ama bɛkwaaho a, di moa ka asomdwee dwirɛ kyire bɛ.

¹¹Sɛ bede w’asomdwee dwirɛ ne bɛto nu, ná bebukye bɛ pambim ne a, ye de hyɛ kuro berɛ ama mukoraati maa bɛyɔ adwuma serɛ bɛso wɔ.

¹²Nakoso sɛ banne w’asomdwee dwirɛ ne bando nu, na mmom bɛfa koɛ bɛtetale wɔ a, ye de tua kuro ne.

¹³Na sɛ AWURADE wɔ Nyameɛ fa kuro ne wura wɔ sa a, fa ngrandɛ kuku nu mmienzua mukoraati.

¹⁴Nakoso mmrasua, ngwadaa, nyɛmmoa, kuro ne anu nningyein mukoraa, ɔne nu nzesadeɛ mukoraa de, fa yɛ wɔ koɛ nu nzesadeɛ. Wɔ pɔfoɛ mɔ nzesadeɛ bɔ AWURADE wɔ Nyameɛ afa ama wɔ ne, fa.

¹⁵Nguro bɔ bembingye wɔ, bɔ nna maen maen hemɔ bɛ nguro nemɔ bie ahɔ ne, sɔ ala yeɛ fa yɔ bɛ mukoraa ɔ.

¹⁶Nakoso maen maen hemɔ bɛ nguro bɔ AWURADE wɔ Nyameɛ ɔ́fa ma wɔ maa ɔyɛ w’agyapadeɛ nen, nnɛma nu nikyee biala bɔ nwomeɛ wɔ ye nu onya ngoa.

¹⁷Odi kyɛ enua bɛ boso bɔkɔɔ: Hitifoɛ ne Amorifoɛ, Kanaanfoɛ ne Perisifoɛ, Hiwifoɛ ne Yebusifoɛ, kyɛbɔ AWURADE wɔ Nyameɛ hyɛle wɔ ne;

¹⁸ná bangyirekyire ɛmɔ ma ɛmɔanyɔ akyiwadeɛ mukoraati bɔ bɛyɔ bɛma bɛ mmosoen nemɔ bie, amaa ɔnate so ɛmɔanyɔ bɔne bandia AWURADE ɛmɔ Nyameɛ ne.

¹⁹“Sɛ etua kuro bie maa ɔkyɛ, bɔ ɛne ye bɛko koɛ, kyɛbɔ ɔkɔyɛ né afa kuro nen, nnɛfa akumaa sɛkye ye nwo mmakaa ne. Ɛkɔhora koli mmakaammaa ne bie, nakoso nnɛbubu bɛ gua. Aso eburo mmakaa bɛte mmenia bɔ ɔsɛ kyɛ ɛfa koɛ tetale bɛ ɔ?

²⁰Nakoso ɔba kyɛ ɛ́pepɛ mmakaa a, mmakaa bɔ ɛse kyɛ benzu mmaa bɔ bedi ne yeɛ ɛkɔhora kɔpepɛ ɔ. Bubu bɛ, fa yɛ nyinasoɛ, ná fo kɔ kuro bɔ ɔne wɔ bɛko koɛ ne anu, kɔpem kyɛ kuro berɛ ama kɔma bɛ sa so ɔ.