Read Sehwi Deuteronomi 21 Bible Online

Deuteronomi 21 - Sehwi bible

Deuteronomi 21

¹“Aseɛ bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne, sɛ benwu kyɛ bahu ebie bato buro wɔ so, bɔ bannwu sona bɔ ohuni ye ne a,

²ye de ɔsɛ kyɛ wɔ mbanyi mɔ ne wɔ ndɛenbualɛfoɛ bekoosusu kyɛbɔ atee ne si wale, fite efuin ne anwo, bɔ ɔkwaadwu nguro bɔ bepingyepingye berɛ nemɔ aso.

³Na kuro bɔ opingye efuin ne paa ne, ɔsɛ kyɛ nu mbanyi fa nandwie beleɛ akrɔngrɔma bɔ bɛffale ye bɛyyɔle adwuma le, bɔ bɛffale kɔnnua bɛttole ye kɔme le ɔ;

⁴na ɔsɛ kyɛ kuro ne anu mbanyi fa nandwie beleɛ akrɔngrɔma ne bɛkɔ bɔnza bɔ asue la nu ɔ, bɔ bɛssone ye le, anaa bɔ bɛyyɔle nu boo le ɔ nu; na ɔsɛ kyɛ bebu nandwie beleɛ akrɔngrɔma ne kɔme anu wɔ bɔnza ne anu berɛ.

⁵Afei Lewi bosofoɛ bɔ bɛte asɔfo ne, ɔsɛ kyɛ bɛkɔ berɛ, ofikyɛ AWURADE wɔ Nyameɛ waneanea nu waye bɛ kyɛ bégyina ye nyunu bɛ́so ye, ná bɛ́fa AWURADE dumaa béyirayira mmenia. Na bɛ noa dwirɛ yeɛ bekogyina so bekobua aporowaa ne ngondii mukoraa nwo ndɛen ɔ.

⁶Nandwie akrɔngrɔma bɔ bebuli ye kɔme anu wɔ bɔnza ne anu ne, ɔsɛ kyɛ kuro bɔ opingye efuin ne, nu mbanyi mukoraa benwunzi bɛ sa begua ye so;

⁷ná afei bɛpakye nu bɛka kyɛ, ‘Nna yɛ yeɛ yɛhane sɔ mogya he yɛguale ɔ, yeɛ yɛ nye ambɛ so kyɛ bɛ́kã bégua ɔ.

⁸AWURADE, yɛsrɛ wɔ ala, wɔ mmenia Yisraelfoɛ bɔ elele bɛ ne, kyikyi bɛ bɔne ne. Mogya bɔ odi be ne, nnɛprapra ye nwo foɛlilɛ gua wɔ mmenia Yisraelfoɛ so; na mmom fa mogya he nwo foɛlilɛ kyɛ bɛ.’

⁹Yiti mogya bɔ odi be ne, tu ye nwo foɛlilɛ bo fi wɔ nu, ofikyɛ odi kyɛ ɛyɔ bɔ ɔtengyɛ wɔ AWURADE nyunu ɔ.

¹⁰“Sɛ ɛne wɔ pɔfoɛ mɔ bɛko koɛ, ná AWURADE wɔ Nyameɛ fa bɛ wura wɔ sa, ná ɛkye bɛ nnure,

¹¹ná enwu brasua anwo nyemene bie kyɛ ɔboka mmenia bɔ bahye bɛ nnure ne aso, ná ekuro ye bɔ ɛpena ye gya ye ne,

¹²ye de fa ye bra w’awuro, ná maa ɔpoa ye ti, ná obubu ye sa ne ye gya boen.

¹³Afei maa ogyi ye nnure tena ne gua, ná maa ɔtena w’awuro berɛ osũ ɔse ne oni bosome ko mumua. Na ɛhe asi ne, ɛkora ne ye bɛda, ná ayɛ ohu amaa ye koso wayɛ ɛye.

¹⁴Na nziɛ ye, sɛ wɔ nye ngye ye nwo ko a, maa ɔfa ye nwo li tɔtorɔtɔɔ ɔhɔ nekaa biala bɔ okuro ɔ. Nakoso nnɛyɛ ye atɔen de sikaa, yeɛ nnɛyɛ ye kyɛ ɔte afaneɛ, ofikyɛ afa wɔ nwo aha ye.

¹⁵“Sɛ bienzua bie gya mmraa nyɔ, bɔ ko te ye yɛyerɛ braa, ná ko ne de onguro ye ne; sɛ mmrasua nyɔ ne bɛ ne ye bɛwo mmaa mmienzua, ná sɛ braa bɔ onguro ye ne ɔwa yeɛ ɔte bamuɛbaa a,

¹⁶ye de kyẽa bɔ biaa ne ɔ́kyɛ ye agyapadeɛ ma ye mma ne, ɔnzɛ kyɛ obu ye yɛyerɛ braa n’awa ne kyɛ ɔte panyi wɔ braa bɔ onguro ye n’awa ne aso, ofikyɛ ye yeɛ ɔte bamuɛbaa ɔ.

¹⁷Ɔsɛ kyɛ biaa ne fa braa bɔ onguro ye n’awa bamuɛbaa dibea ma ye, ná ɔma ye bɔ ole ye amukoraa nza nu ngyɛmuɛ nyɔ, ofikyɛ ye yeɛ ɔte ye bienzua nu anwoserɛ bɔ oli moa ɔ, na bamuɛbaa dibea ne te ye deɛ.

¹⁸ “Sɛ ebie le baa bienzua asoserɛniɛ bɔ ommu hwee, bɔ ondie ɔse ne oni dwirɛ, bɔ bɛtea ye de, nakoso ondie bɛ dwirɛ a,

¹⁹ye de ɔsɛ kyɛ ɔse ne oni bɛkye ye bɛba ye kuro berɛ mbanyi nyunu, wɔ kuro berɛ pambim ne anyunu,

²⁰ná bɛka bekyire ye kuro berɛ mbanyi kyɛ, ‘Yɛ wa he te asoserɛniɛ bɔ ommu hwee; yɛkã dwirɛ a ɔmva, ɔte sɛkyefoɛ ne akɔnomnzaniɛ.’

²¹Na afei ɔsɛ kyɛ kuro berɛ ama mukoraati boro ye nyɔboɛ beku ye. Yiti ɔsɛ kyɛ etu bɔne ne bo fi wɔ nu; na Yisrael mukoraati kɔte ná basuro.

²² “Sɛ ebie di bɔne bie bɔ ɔfata ewue, ná beku ye bɛfa ye besinze bakaa so a,

²³ nnɛyakyi ye fuin ne bakaa ne aso kɔngɔen ne amu. Sie ye sɔ kyẽa ne ala, ofikyɛ sona bɔ basinze ye bakaa so ne, Nyameɛ anoma ye. Yiti aseɛ bɔ AWURADE wɔ Nyameɛ ɔ́fa ma wɔ maa ɔyɛ w’agyapadeɛ ne, nnɛfa efiɛ ka ye.