Read Sehwi Deuteronomi 24 Bible Online

Deuteronomi 24 - Sehwi bible

Deuteronomi 24

¹ “Sɛ bienzua gya braa, ná ɔba kyɛ ye nye ngye braa ne nwo, ofikyɛ wanwu nikyee tɛɛ bie wɔ braa ne anwo a, ye de odi kyɛ ɔkyerɛ agyaayiralɛ krataa wura ye sa nu, ná ogua ye wure maa ofi ye awuro berɛ kɔ.

²Na sɛ ofi ye awuro berɛ kogya biaa foforɛ,

³ná sɛ biaa foforɛ ne koso nye ngye ye nwo, ná ɔkyerɛ agyaayiralɛ krataa wura ye sa nu, ná ogua ye wure maa ofi ye awuro berɛ kɔ a, anaakyɛ sɛ ohu foforɛ bɔ ogyale ye ne wu de a,

⁴ye de ohu bɔ oli moa, bɔ oguale ye wure maa ɔhɔle ne, atee nne berɛ kyɛ sɛ braa ne nwo agua efiɛ ayie a, osa kogya braa ne bieku ɔ, ofikyɛ ɛhe te akyiwadeɛ wɔ AWURADE nyunu. Na ɔnzɛ kyɛ ɛma bɔne ba aseɛ bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne aso.

⁵“Sɛ bienzua gya braa, ná ɔhhyɛle a, ɔnzɛ kyɛ ɔkɔ koɛ, yeɛ ɔnzɛ kyɛ bɛfa maen adwuma biala begua ye so. Ole atee kyɛ ɔtena awuro afoɛ ko, ná ɔne ɔye bɔ wagya ye ne bɛgye bɛ nye.

⁶“Nyɔboɛ ne ye nyɔkoa[8] bɔ bɛfa beti aburoo ne, nnɛma ebiala de fa si ye berɛ awowaa, ofikyɛ ɛyɔ sɔ a, ye mene ngoa yeɛ afa asi awowaa ɔ.

⁷ “Sɛ bɛkye ebie kyɛ ɔ́kye oliɛma Yisraelniɛ nnure, anaa ɔ́hyɛ ye so kyɛ kanganiɛ, anaa ɔ́yɛ ye atɔen a, ye de ɔsɛ kyɛ beku sɔ sona ne. Yiti ɔsɛ kyɛ etu bɔne ne bo fi wɔ nu.

⁸ “Sɛ kwata anwonyerɛ yɛ wɔ a, nikyee biala bɔ Lewifoɛ bɔ bɛte asɔfo ne kohyire wɔ kyɛ ɛyɔ ne, nea kyɛ ɛkɔyɔ ye pɛpɛɛpɛ ɔ; na kyɛbɔ mahyɛ bɛ nen, sɔ ala yeɛ yɔ ɔ.

⁹ Kaye nikyee bɔ AWURADE wɔ Nyameɛ fa yɔle Miriam wɔ atunu, mmerɛ bɔ né ɛmɔfi Misraim bɛ́ba ne.

¹⁰ “Sɛ ɛfa nikyee bie fɛmo ebiɛngo a, nnɛkɔ ye awuro kode nikyee bɔ wafa wasi awowaa ne.

¹¹Gyina aluo berɛ, ná ma sona bɔ afa nikyee afɛmo ye ne ɔfa awowaa nikyee ne ɔbrɛ wɔ.

¹²Sɛ sona ne te ehianiɛ a, nnɛfa ye tena bɔ wafa wasi awowaa ne sie ma aleɛ kye.

¹³Sɛ eyia kwaatɔ a, fa awowaa nikyee ne sá kɔma ye maa onya ye tena ogurɔ ye nwo, ná óyira wɔ. Na ɔkɔyɛ yɔleɛ bɔ ɔtengyɛ wɔ AWURADE wɔ Nyameɛ nyunu kɔma wɔ.

¹⁴ “Paaniɛ ehianiɛ bɔ ye nwo aworabɔlɛ ne, nnɛsisi ye. Kyɛ ɔte Yisraelniɛ oo, anaa ɛwɔfoɛ bɔ ɔte wɔ kuro ne bie aso, wɔ w’aseɛ ne aso oo.

¹⁵Kyẽa biala bɔ ɔkɔyɔ adwuma ne, tua ye kerɛ koraka né eyia atɔ, ofikyɛ ɔte ehianiɛ, na ye nyunu ne ye si ɛne. Anyɔ a, okosũ kohyire AWURADE kogua wɔ so, na ɔkɔkakyi bɔne kɔma wɔ.

¹⁶ “Nnɛmaa begyina mmaa mɔ bɛ bɔne so beku awofoɛ, yeɛ nnɛmaa begyina awofoɛ bɛ bɔne so beku mmaa; na mmom ebiala ye bɔne so yeɛ ɔsɛ kyɛ begyina beku ye ɔ.

¹⁷ “Nnɛbua ɛwɔfoɛ anaa awisianiɛ ndɛengyea; yeɛ nnɛde kunaniɛ tena fa si wɔ berɛ awowaa.

¹⁸Kaye kyɛ né ɛte kanga wɔ Misraim, na AWURADE wɔ Nyameɛ lele wɔ fili berɛ; yiti méhyɛ wɔ kyɛ di sɔ dwirɛ he aso.

¹⁹ “Sɛ ebu wɔ boo nu aburoo, ná wɔ wora fi aburoo bɔ akyekye ye tire tire ne bie wɔ fie ne aso a, nnesa kɔfa. Yakyi ye berɛ ma ɛwɔfoɛ, ayisiaa ne kunafoɛ, na ɔnate so AWURADE wɔ Nyameɛ koyira wɔ wɔ wɔ sa noa adwuma mukoraati nu.

²⁰Sɛ ɛte wɔ olive mmaa a, nnesa kɔtweetwee bɔ waha so ne. Yakyi ye so ma ɛwɔfoɛ, ayisiaa ne kunafoɛ.

²¹Sɛ ɛte wɔ bobe boo nu mmaa a, nnesa kɔtete ngoko ngoko bɔ waha so ne. Yakyi ye so ma ɛwɔfoɛ, ayisiaa ne kunafoɛ.

²²Kaye kyɛ né ɛte kanga wɔ Misraim aseɛ so; yiti méhyɛ wɔ kyɛ di sɔ dwirɛ he aso.