Read Sehwi Deuteronomi 25 Bible Online

Deuteronomi 25 - Sehwi bible

Deuteronomi 25

¹“Sɛ mmenia nyɔ nya edwudwolɛ a, ɔsɛ kyɛ bɛfa bɛkɔ mbanyi nyunu ma ndɛenbualɛfoɛ bua ndɛen. Bekobua bɔ ye dwirɛ yɛ fɛ ne be, ná babua bɔ ye dwirɛ nyɛ fɛ ne foɛ.

²Sɛ ɔsɛ kyɛ bɛbo sona bɔ odi fɔ ne a, ndɛenbualɛniɛ ne kɔmaa ɔkɔla berɛ, ná wamaa bafi ye mbire wɔ ye nyunu berɛ, somaa biala bɔ ɔfata ye bɔne ɔ.

³ Nnɛmaa befi ye mbire bɔ ɔbo aburanna ɔ. Sɛ befi ye mbire maa ɔtra sɔ a, né ama eliɛma ne akakyi sona mbaen bie wɔ wɔ nye so.

⁴ “Sɛ nandwie boro aburoo[9] a, nnɛkyekye ye noa.

⁵ “Sɛ aliɛmaa mmienzua nyɔ bɛte neka horɛ, ná bɛ nu ko wu bɔ wannwo ba ne, ɔnzɛ kyɛ bɔ wawu n’aye kogya ɛwɔfoɛ bɔ ɔnne abusua ne anu ɔ. Ɔsɛ kyɛ ohu n’aliɛma fa ye gya, ná ɔyɔ huɛ aliɛmaa asɛdeɛ ma braa ne.

⁶Na bamuɛbaa bienzua bɔ braa ne kɔwo ye ne, ɔsɛ kyɛ biaa ne fa ye to oliɛma bɔ wawu ne, amaa ɔnate so oliɛma bɔ wawu ne dumaa boso ammini amvi Yisrael.

⁷ Nakoso sɛ biaa ne nguro kyɛ okogya oliɛma n’aye ne a, ye de ɔsɛ kyɛ kunaniɛ ne kɔ mbanyi mɔ nyunu wɔ nekaa bɔ bedi dwirɛ ɔ, ná ɔka kyɛ, ‘Me hu aliɛma ne nguro kyɛ ɔkɔma oliɛma ne dumaa kɔha Yisrael ɔ, onguro kyɛ ɔkɔyɔ huɛ aliɛmaa asɛdeɛ kɔma me ɔ.’

⁸Afei ɔsɛ kyɛ kuro berɛ mbanyi to bɛ sa bɛfrɛ biaa ne ná bebisa ye. Na sɛ ɔkɔ so ka kyɛ, ‘Menguro kyɛ ngogya ye’ a,

⁹ye de ɔsɛ kyɛ oliɛma n’aye ne kogyina ye nwo berɛ wɔ mbanyi nemɔ nyunu berɛ, ná opuro biaa ne gya nu mbaboa, ná ɔ́fe nwɔserɛ gua ye nyunu, ná ɔka kyɛ, ‘Sona bɔ onguro kyɛ ɔboka ma oliɛma bɔ wawu nya bosofoɛ ne, bɔ bɛfa bɛyɔ ye hɔ ɛne.’

¹⁰Na bɛkɔfrɛ ye awuro wɔ Yisrael amukoraa kyɛ, ‘Biaa bɔ bɛyele ye gya nu mbaboa n’awuro.’

¹¹“Sɛ mmienzua bɛ́ko, ná ko aye ba kyɛ ɔbaale ohu fi ko ne bɔ ɔ́bo ohu ne sa nu, ná braa ne buma ko ne bienzua a,

¹²ye de pɛ braa ne sa fi berɛ, nnɛnwu ye anwumvoin.

¹³ “Nnɛfa asusudeɛ nyɔboɛ ahoroɔ nyɔ bɔ ko te piri tra ko wura wɔ kotoku nu.

¹⁴Nnɛfa asusudeɛ ahoroɔ nyɔ bɔ ko te piri tra ko sie w’awuro.

¹⁵Asusudeɛ nyɔboɛ bɔ ɔte pɛpɛɛpɛ yeɛ ɔsɛ kyɛ enya ɔ; asusudeɛ bɔ ɔte pɛpɛɛpɛ yeɛ ɔsɛ kyɛ enya ɔ, amaa ɔnate so anya ngoa tendenn wɔ aseɛ bɔ AWURADE wɔ Nyameɛ ɔ́fa ma wɔ ne aso.

¹⁶Ofikyɛ ebiala bɔ ɔyɔ sɔ nningyein nemɔ ne, ebiala bɔ odi aminɛ nen, wayɛ ye nwo akyiwadeɛ wama AWURADE wɔ Nyameɛ.

¹⁷ “Kaye nikyee bɔ Amalɛkefoɛ fa yɔle wɔ wɔ atunu, mmerɛ bɔ né ɛmɔfi Misraim bɛ́ba ne;

¹⁸kyɛbɔ bɛwale wɔ so wɔ atunu, mmerɛ bɔ né afɛ, ná ayɛ berebrɛɛ ne. Amalɛkefoɛ huhuni Yisraelfoɛ bɔ bɛhale nziɛ ne amukoraati, ofikyɛ Amalɛkefoɛ anzuro Nyameɛ.

¹⁹Yiti sɛ AWURADE wɔ Nyameɛ ma wɔ nwo tɔ wɔ fi wɔ pɔfoɛ amukoraati bɔ bapɛ wɔ nwo bayia ne sa nu, wɔ aseɛ bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne aso a, kyikyi Amalɛkefoɛ bɛ boso bɔkɔɔ fi ewiase. Nnɛma wɔ wora fi!