Read Sehwi Deuteronomi 26 Bible Online

Deuteronomi 26 - Sehwi bible

Deuteronomi 26

¹ “Aseɛ bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne, sɛ edwu so, wɔ sa ka ye, ná ɛtena so a,

² so mmakaammaa mukoraa bɔ ekoli moa kɔte ne, bɔ ekonya kofi aseɛ bɔ AWURADE wɔ Nyameɛ ɔ́fa ma wɔ ne aso ne, fa bie gua kɛndɛen nu, ná fa kɔ nekaa bɔ AWURADE wɔ Nyameɛ kɔneanea nu kɔye kosie berɛ kyɛ ɔ́ma ye dumaa da so ne.

³Ɔsɔfo bɔ dibea wura ye sa sɔ mmerɛ nen, kɔ ye berɛ kɔha kyire ye kyɛ, ‘Ɛnɛ kyẽa ye, méto me noa nu tui mekã mekyire AWURADE wɔ Nyameɛ kyɛ, mawa aseɛ bɔ AWURADE fa hyɛle yɛ nana mɔ bɔ kyɛ ɔkɔfa kɔma yɛ ne aso.’

⁴Odi kyɛ ɔsɔfo ne de kɛndɛen ne fi wɔ sa nu, ná ɔfa sie AWURADE wɔ Nyameɛ afɔleɛ bokyea ne nyunu.

⁵Na wɔ koso odi kyɛ ɛkã edwirɛ he wɔ AWURADE wɔ Nyameɛ nyunu kyɛ, ‘Né me nana te Aramniɛ bɔ olle amandena ɔ, na otu ɔɔtenane Misraim yɛle berɛ wɔfoɛ. Né ɔne ye nwo ama bɛte mmenia kãa bie, nakoso me nana yɛle maen pirikua bɔ ole tumi, bɔ nu mmenia sone pee ɔ.

⁶Misraimfoɛ hyɛle yɛ so, bɛteetee yɛ, na bɛmaa yɛyɔle adwuma bɔ ɔbo yɛ so ɔ.

⁷Yɛsu yɛfrɛle AWURADE yɛ nana mɔ Nyameɛ ne; AWURADE tele yɛ suɛ ne, onwuni kyɛ yɛyɛ anwumvo, na onwuni yɛ hawo ne y’amaneɛ ne.

⁸Yiti AWURADE nate tumi piri ne tumi asaa so, tumi nnwumaa, nzɛngyerɛnneɛ ne anwanwadeɛ so yele yɛ fili Misraim.

⁹Wafa yɛ wawa wa, na wafa aseɛ he bɔ nyɔfonesue ne woɛ tengyɛ wɔ so ne wama yɛ.

¹⁰Ye sɔ ne ati, aseɛ bɔ wɔ, AWURADE, afa ama me ne, kekesaala ye mafa so aleɛ bɔ oli moa ne mawa.’ Afei fa sie AWURADE wɔ Nyameɛ nyunu, ná koto AWURADE wɔ Nyameɛ.

¹¹Na ɔnate nningyein paa mukoraati bɔ AWURADE wɔ Nyameɛ wafa wama wɔ ne w’awuro ama ne ati, ɔsɛ kyɛ ɛne Lewifoɛ ne ɛwɔfoɛ bɔ bɛwɔ wɔ berɛ ne bedi ahurusi.

¹² “Afoɛ bɔ ɔtɔ so nza ne anu, bɔ ɔte buru nu ngyɛmuɛ ko afoɛ ne, sɛ ɛye wɔ boo nu aleɛ buru nu ngyɛmuɛ ko mukoraati yie, ná ɛfa ma Lewifoɛ, ɛwɔfoɛ, ayisiaa ne akunafoɛ, maa bedi ma bɛ ko yi wɔ wɔ kuro berɛ a,

¹³ye de, ka ye wɔ AWURADE wɔ Nyameɛ nyunu kyɛ, ‘Ngyɛmuɛ bɔ ɔte krongron ne, maye mafi m’awuro, na mafa mama Lewifoɛ, ɛwɔfoɛ, awisiafoɛ ne akunafoɛ, kyɛbɔ wɔ mmeraa dwirɛ mukoraati bɔ ahyɛ ama me ne te ɔ. Mammu wɔ mmeraa dwirɛ ne anu biala so, yeɛ me wora amvi bɛ nu biala koso.

¹⁴Mmerɛ bɔ né médi aworabɔlɛ ne, manni bie; mmerɛ bɔ né me nwo nde ne, manye so; yeɛ mamva bie mammɔ afɔleɛ mamma awufoɛ. Matie AWURADE me Nyameɛ dwirɛ, na mayɔ bɔ ahyɛ me ne amukoraati.

¹⁵To wɔ nye fi nyameɛso, w’atenaleɛ krongron ne, ná nea aseɛnwo, ná yira wɔ mmenia ne aseɛ bɔ nyɔfonesue ne woɛ tengyɛ wɔ so, bɔ afa ama yɛ ne, kyɛbɔ ɛtale ndaen hyirele yɛ nana mɔ ne.’

¹⁶“Ɛnɛ kyẽa ye, AWURADE wɔ Nyameɛ ɔhyɛ wɔ kyɛ, di ahyɛdeɛ ne nhyehyɛleɛ hemɔ so; fa w’ahone mukoraati ne wɔ kra mukoraati di so nahorɛ nu.

¹⁷Ɛnɛ kyẽa ye, ale ato nu kyɛ AWURADE te wɔ Nyameɛ, yiti ɛkɔnate ye atee so, ekoli ye ahyɛdeɛ ne ye mmeraa dwirɛ ne ye nhyehyɛleɛ so, na ekotie ye dwirɛ.

¹⁸Ɛnɛ kyẽa ye, AWURADE aha afa wɔ nwo kyɛ, ɛkɔyɛ ye bɔbɔ ye maen, kyɛbɔ ɔhyɛle wɔ bɔ ne, yiti ɔsɛ kyɛ edi ye mmeraa dwirɛ mukoraati so.

¹⁹Na ɔnate so ɔkɔpagya wɔ wɔ anidie nu, dumaa nu ne animnyam nu kɔtra maen maen bɔ wakyekye amukoraati; na ɛkɔyɛ maen krongron kɔma AWURADE wɔ Nyameɛ, kyɛbɔ wahyɛ bɔ ne.”