Read Sehwi Deuteronomi 27 Bible Online

Deuteronomi 27 - Sehwi bible

Deuteronomi 27

¹Afei Mose ne Yisrael mbanyi yɔle nhyehyɛleɛ he mane mmenia ne amukoraa kyɛ, “Mmeraa dwirɛ mukoraa bɔ ɛnɛ méhyɛ méma ɛmɔ ne, ɛ́mɔli so.

² Kyẽa bɔ ɛmɔkɔpɛ asue Yɔɔdan bɛkɔhɔ aseɛ bɔ AWURADE wɔ Nyameɛ ɔ́fa ma wɔ ne aso ne, fa nyɔboɛ mbirikua penapena berɛ, ná fa ɛfaa ka bɛ nwo amu.

³Mmerɛ bɔ ɛkɔpɛ asue ne kɔhɔ aseɛ bɔ AWURADE wɔ Nyameɛ ɔ́fa ma wɔ ne aso ne, aseɛ bɔ nyɔfonesue ne woɛ tengyɛ wɔ so ne, bɔ AWURADE wɔ nana mɔ Nyameɛ fa hyɛle wɔ bɔ ne, kyerɛ mmeraa he anu dwirɛ amukoraa gua nyɔboɛ ne aso.

⁴Yiti sɛ ɛmɔpɛ asue Yɔɔdan bɛkɔ ye si a, nyɔboɛ hemɔ bɔ ɛnɛ kyẽa ye méka ye nwo dwirɛ mekyire ɛmɔ ye, odi kyɛ ɛmɔfa bɛpenapena Ebal bokaa ne aso, ná ɛmɔfa ɛfaa bɛfa ye nwo amu.

⁵ Fa nyɔboɛ si afɔleɛ bokyea berɛ ma AWURADE wɔ Nyameɛ, nyɔboɛ bɔ nna buralɛ yeɛ bɛfa besele ɔ.

⁶Nyɔboɛ mumua mumua yeɛ fa si AWURADE wɔ Nyameɛ afɔleɛ bokyea ne ɔ, ná bɔ naen yeralɛ afɔleɛ wɔ so ma AWURADE wɔ Nyameɛ;

⁷bɔ asomdwee afɔleɛ, ná di ye berɛ, ná gye wɔ nye wɔ AWURADE wɔ Nyameɛ nyunu.

⁸Kyerɛ mmeraa he anu dwirɛ amukoraati nyemenenyemene gua nyɔboɛ nemɔ aso.”

⁹Afei Mose ne Lewifoɛ bɔ bɛte asɔfo ne sele Yisraelfoɛ amukoraati kyɛ, “O Yisrael, ma wɔ so bra wa ná tie! Ɛnɛ kyẽa ye, ayɛ AWURADE wɔ Nyameɛ maen.

¹⁰Yiti tie AWURADE wɔ Nyameɛ dwirɛ, ná di ye mmeraa dwirɛ ne ye ahyɛdeɛ bɔ mehyehyɛ mema wɔ ɛnɛ ye aso.

¹¹Sɔ kyẽa ne ala, Mose yɛle sɔ nhyehyɛleɛ he mane maen ne:

¹² “Ɛmɔpɛ asue Yɔɔdan bɛkɔ ye si dɔ a, Simeon, Lewi, Yuda, Yisaka, Yosef ne Benyamin abusua kure nemɔ kogyina Gerisim bokaa ne aso bekoyirayira mmenia ne.

¹³Yeɛ abusua kure hemɔ wora bekogyina Ebal bokaa ne aso bɛkɔboro amoen: Ruben, Gade, Asɛ, Sebulɔn, Dan ne Nafetali.

¹⁴Na Lewifoɛ nemɔ kɔtea nu koti edwirɛ ne anu kohyire Yisraelfoɛ amukoraa kyɛ,

¹⁵ “ ‘Musue to sona biala bɔ ɔkɔyɔ amoen anaa okohuro nikyee kɔyɔ amoen ɔ: AWURADE akyiwadeɛ biala, bɔ ɔte dwumvoɛ sa noa adwuma, bɔ ɔkɔfa kosie mvealeɛ nu kɔsɔne ye ɔ’. Na mmenia ne amukoraa kosuro so kyɛ, ‘Amen!’

¹⁶ “ ‘Musue tó sona biala bɔ onni ɔse ne oni ni ɔ.’ Na mmenia ne amukoraa kosuro so kyɛ, ‘Amen!’

¹⁷ “ ‘Musue tó sona biala bɔ opimbi obiɛngo wɛen ɔ.’ Na mmenia ne amukoraa kosuro so kyɛ, ‘Amen!’

¹⁸ “ ‘Musue tó sona biala bɔ okohyire anyesiniwaaniɛ atee maa okomini ɔ.’ Na mmenia ne amukoraa kosuro so kyɛ, ‘Amen!’

¹⁹ “ ‘Musue tó sona biala bɔ okobua ɛwɔfoɛ, awisianiɛ anaa kunaniɛ ndɛengyea ɔ.’ Na mmenia ne amukoraa kosuro so kyɛ, ‘Amen!’

²⁰ “ ‘Musue tó sona biala bɔ ɔne ɔse aye bɛkɔla ɔ, ofikyɛ onwu ɔse mvealeɛ nu nningyein nwo.’ Na mmenia ne amukoraa kosuro so kyɛ, ‘Amen!’

²¹ “ ‘Musue tó sona biala bɔ ɔne kaka biala bɛkɔla ɔ.’ Na mmenia ne amukoraa kosuro so kyɛ, ‘Amen!’

²² “ ‘Musue tó sona biala bɔ ɔne oliɛma brasua bɛkɔla ɔ; kyɛ ɔse awa brasua oo, anaa oni awa brasua oo.’ Na mmenia ne amukoraa kosuro so kyɛ, ‘Amen!’

²³ “ ‘Musue tó sona biala bɔ ɔne ye sia brasua bɛkɔla ɔ.’ Na mmenia ne amukoraa kosuro so kyɛ, ‘Amen!’

²⁴“ ‘Musue tó sona biala bɔ ɔkɔfea ye nwo kohũ obiɛngo ɔ.’ Na mmenia ne amukoraa kosuro so kyɛ, ‘Amen!’

²⁵“ ‘Musue tó sona bɔ okole fea-ase-ma ná okohu obiɛngo bɔ odi be ɔ.’ Na mmenia ne amukoraa kosuro so kyɛ, ‘Amen!’

²⁶ “ ‘Musue tó sona biala bɔ onne mmeraa he anu dwirɛ ndo nu kyɛ okoli so ɔ.’ Na mmenia ne amukoraa kosuro so kyɛ, ‘Amen!’