Read Sehwi Deuteronomi 28 Bible Online

Deuteronomi 28 - Sehwi bible

Deuteronomi 28

¹ “Sɛ etie AWURADE wɔ Nyameɛ dwirɛ, ná edi ye mmeraa dwirɛ mukoraati bɔ ɛnɛ kyẽa ye méhyɛ méma wɔ ne aso nahorɛ nu a, AWURADE wɔ Nyameɛ kɔpagya wɔ kɔtra ewiase maen maen mukoraati.

²Sɛ etie AWURADE wɔ Nyameɛ dwirɛ a, ekonya saleɛ hemɔ amukoraati maa ɔkɔbo wɔ so:

³“Ɛwɔ kuro a, Nyameɛ koyira wɔ, yeɛ ɛwɔ buro koso a, okoyira wɔ.

⁴“Nyameɛ koyira wɔ maa ekonya mmaa pee, w’aseɛ so aleɛ pee, nyɛmmoa pee, nandwie mmaa pee ne mmoaen mmaa pee.

⁵“Nyameɛ koyira wɔ bɔ aleɛ ngɔpa wɔ kɛndɛen nu ne wɔ kukue nu ɔ.

⁶“Ɛba awuro a, Nyameɛ koyira wɔ; yeɛ efite a, Nyameɛ koyira wɔ.

⁷“Wɔ pɔfoɛ mɔ bɔ bedwɔso betia wɔ ne, Nyameɛ kɔmaa bekoli ngoguo wɔ wɔ nyunu. Bɛkɔfa atee ko aso bɛkɔwa wɔ so, nakoso bɛkɔfa atee ahoroɔ nzoo so bɛkɔnwati bekofi wɔ nyunu.

⁸“AWURADE saleɛ kɔma aleɛ koyi wɔ pata so tɛkyɛɛ, na wɔ sa noa adwuma mukoraati kɔyɛ saleɛ. Okoyira wɔ wɔ aseɛ bɔ AWURADE wɔ Nyameɛ ɔ́fa ma wɔ ne aso.

⁹“Sɛ edi AWURADE wɔ Nyameɛ mmeraa dwirɛ so, ná ɛnate ye atee so a, AWURADE kɔfa wɔ kɔyɛ ye maen krongron, kyɛbɔ wata ye nwo ndaen wahyire wɔ ne.

¹⁰Na aseɛ so mmenia mukoraati konwu ye kyɛ AWURADE dumaa la wɔ so, na bekosuro wɔ.

¹¹AWURADE kɔma wɔ nningyein paa maa ɔkɔbo so: wɔ kunu mmaa kɔyɛ pee, wɔ nyɛmmoa kɔyɛ pee, na w’aseɛ so aleɛ kɔyɛ pee, wɔ aseɛ bɔ AWURADE tale ndaen hyirele wɔ nana mɔ kyɛ ɔkɔfa kɔma wɔ ne aso.

¹²AWURADE kobukye anwuro, nekaa bɔ osie ye nningyein paa ne kɔma wɔ; ɔkɔtɔ nzue kogua w’aseɛ so mmerɛ bɔ ɔsɛ ɔ nu, na okoyira wɔ sa noa adwuma mukoraati. Ɛkɔfa nningyein kɔfɛmo maen maen pee, nakoso wɔ de, ɛngɔfɛmo nikye fee ngofi ebiala berɛ.

¹³Sɛ ɛyɛ sotie ma AWURADE wɔ Nyameɛ mmeraa dwirɛ bɔ méhyɛ méma wɔ ɛnɛ ye, ná edi so nahorɛ nu a, ye de AWURADE kɔma wɔ so, na ɔngɔma ɛngɔhɔ ase; ekoli bɛ so, na engowura bɛ bo.

¹⁴Yiti, ahyɛdeɛ bɔ méhyɛ méma ɛmɔ ɛnɛ ye, nnɛmakye fi bɛ nu biala nwo kɔ famaa anaa bɛen so kodi nyameɛ foforɛ biemɔ si ɛkɔso bɛ.

¹⁵“Nakoso sɛ andie AWURADE wɔ Nyameɛ dwirɛ, ná anni ye mmeraa dwirɛ ne ye ahyɛdeɛ bɔ mehyɛ mema wɔ ɛnɛ ye aso nahorɛ nu a, ye de sɔ musue ye amukoraa kɔto wɔ, na okobu kɔfa wɔ so:

¹⁶Musue kɔto wɔ wɔ kuro, na musue kɔto wɔ wɔ buro.

¹⁷Musue kɔto wɔ kɛndɛen ne wɔ kukue.

¹⁸Musue kɔto wɔ kunu mmaa, w’aseɛ ngɔhye aleɛ, musue kɔto wɔ nandwie mmaa ne wɔ mmoaen mmaa.

¹⁹Ɛba awuro a, musue kɔto wɔ; yeɛ efite a, musue kɔto wɔ.

²⁰“AWURADE kɔprapra musue, amaneɛ ne anyesotanɛ kogua wɔ so wɔ nikyee biala bɔ ɛkɔyɔ ɔ nu, kɔpem kyɛ w’amumuyɛɛ ti ɔkɔsɛkye wɔ ɔ, na okohu wɔ ndɛndɛ, ofikyɛ apo me.

²¹AWURADE kɔfa ewue anwonyerɛ kɔto wɔ so, kɔpem kyɛ ɔkɔpra wɔ boso kofi aseɛ bɔ ɛkwaafa tena so ne aso ɔ.

²²AWURADE kɔma ɛfɔen, ebunu ne ɛfokyɛlɛ kɔwa wɔ so; wawa kɔpe serɛserɛ, ewienu kɔyɛ hye, anwonyerɛ kɔha wɔ fieso nningyein, na amaneɛ hemɔ koli wɔ si toonn kɔpem kyɛ ekowu ɔ.

²³Ewienu bɔ ɔkata wɔ so ne kɔyɛ kyɛ kɔɔbere,[10] na aseɛ bɔ egyi so ne kɔyɛ kyɛ buralɛ.

²⁴Nzoen ne mvuture yeɛ AWURADE kɔtɔ kogua w’aseɛ so kyɛ nzue ɔ, na ɔkɔtɔ kofi anwuro kogua wɔ so toonn kɔpem kyɛ ekowu ɔ.

²⁵“AWURADE kɔmaa ekoli ngoguo wɔ wɔ pɔfoɛ mɔ nyunu. Ɛkɔfa atee ko aso kɔhɔ bɛ so, nakoso ɛkɔfa atee ahoroɔ nzoo so ɛkɔnwati kofi bɛ nyunu. Na edwirɛ bɔ ɔkɔto wɔ ne kɔyɛ aseɛ so ahennie mukoraati nwanwa.

²⁶Wɔ fuin kɔyɛ ewienu nnomaa mukoraati ne aseɛ so ngaka aleɛ, na bengonya sona biala ma ɔngɔfoa bɛ.

²⁷AWURADE kɔte anwonyerɛ koangɔ hemɔ kogua wɔ so: Misraim mbɔmbɔ, ngena, nyaen ne asee.

²⁸AWURADE kɔfa ɛlaenbɔlɛ, anyesiniwaa ne anyesotanɛ kɔto wɔ so.

²⁹Ekofuafua eyia ketee kyɛbɔ anyesiniwaaniɛ fuafua kɔngɔen ɔ, nakoso engonwu atee. Bekoli wɔ aminɛ, ná bafe wɔ nningyein bafa daa, nakoso ebiala ngoole wɔ.

³⁰Ɛkɔbɔ brasua asiwa, nakoso bienzua foforɛ ne ye bɛkɔla. Ekosi sua, nakoso ɛngɔtena nu. Ɛkɔyɔ bobe boo, nakoso engoli ye mma ne bie.

³¹Bekohu wɔ nandwie bɔ wɔ nye tua ɔ, nakoso engonya bie ngoli. Bɛkɔhye w’afunum bɔ wɔ nye tua ɔ, nakoso bɛngɔfa ngɔma wɔ. Bɛkɔfa wɔ boaen bɛkɔma wɔ pɔfoɛ mɔ, nakoso engonya sona maa ɔngɔhã bie ngɔma wɔ.

³²Bɛkɔsesa wɔ mma mmienzua ne mmrasua bɛkɔɔma maen foforɛ wɔ aberɛ bɔ wɔ nye tua ɔ, ɛkɔhenahena wɔ nye kɔpena bɛ alehyeleɛ biala, nakoso ɛngɔhora ngosi ye nwo ate.

³³W’aseɛ so aleɛ, yeɛ wɔ sa noa adwuma so mvasoɛ ne, maen bɔ ɛnze ye ne, nu ama yeɛ bekoli ɔ. Bekoli wɔ aminɛ, ná basisi wɔ daa;

³⁴na nningyein bɔ ekonwu ye wɔ nye so ne, ɔkɔbɔ kɔfa wɔ ti anu.

³⁵AWURADE kɔma mbɔmbɔ yeayea koangɔ kɔbobɔ wɔ nangoroma ne wɔ gya, fite wɔ gya kunu kodwu wɔ ti so.

³⁶“Wɔ, ɛne sona bɔ ɛkɔfa ye koli wɔ so hene ne, AWURADE kɔsesa ɛmɔ kɔhɔ maen bɔ ɛne wɔ nana mɔ bɛnze so ɔ so, na berɛ yeɛ ɛkɔso nyameɛ foforɛ biemɔ bɔ bafa mmakaa ne nyɔboɛ bayɔ ɔ.

³⁷Maen maen mukoraati bɔ AWURADE kɔfa wɔ kɔhɔ so ne, bɔ ɔkɔto wɔ ne kɔyɛ bɛ nwanwa, na ɛmɔkɔkakyi berɛ ama mɔ bɛ noa nu anyandera ne ngorohoɛ dwirɛ.

³⁸“Ekolua nningyein pee fieso, nakoso kãa bie yeɛ ekobu ɔ, ofikyɛ mmɛbɛ koli.

³⁹Ɛkɔyɔ bobe boo, ɛkɔbɔ ye nwo, nakoso ye nzaa ne de, ɛngɔno bie, yeɛ ye mma wora ɛngɔte bie, ofikyɛ alɔponɛ koli.

⁴⁰Ekonya olive mmakaa wɔ w’aseɛ so amukoraati, nakoso engonya ye ngoo ne bie ngɔfa ngɔpopa, ofikyɛ wɔ olive mma ne kɔporo kogua.

⁴¹Ɛkɔwo mmaa mmienzua ne mmrasua, nakoso bɛngɔyɛ wɔ deɛ, ofikyɛ ebiemɔ kɔhye bɛ nnure.

⁴²Ɛsaa koli wɔ mmakaa ne w’aseɛ so mmakaammaa mukoraati.

⁴³Ɛwɔfoɛ mɔ bɔ bɛwɔ wɔ maen nu kɔhɔ so koli mu kɔtra wɔ, nakoso wɔ de, ɛkɔhɔ so kɔbɔ ase.

⁴⁴Bɛkɔfa nningyein bɛkɔfɛmo wɔ, nakoso wɔ de, engonya bie ngɔfa ngɔfɛmo bɛ. Bekonya ngɔsoɛ, nakoso wɔ de, ɛkɔbɔ ase.

⁴⁵“Musue hemɔ amukoraati kɔto wɔ, okoli wɔ si, na okobu kɔfa wɔ so, kɔpem kyɛ ekowu ɔ, ofikyɛ andie AWURADE wɔ Nyameɛ dwirɛ, na anni ye mmeraa dwirɛ ne ye ahyɛdeɛ bɔ ɔhyɛ mane wɔ ne aso.

⁴⁶Na musue ne kɔkakyi nzɛngyerɛnneɛ ne anwanwadeɛ kotia wɔ ne wɔ bosofoɛ afebɔɔ.

⁴⁷“Mmerɛ bɔ enyane wɔ nwo wɔ nikyee biala nu ne, amva anigye ne adwene paa anzo AWURADE wɔ Nyameɛ,

⁴⁸yiti wɔ pɔfoɛ mɔ bɔ AWURADE kɔsoma bɛ maa bɛkɔwa wɔ so ne, ɛkɔfa ɛhɔen ne nzuhɔen nu, wɔ nwo bɔ ɔla so nu, ɔne nningyein mukoraa bɔ okohia wɔ ɔ nu yeɛ ɛkɔso bɛ ɔ. Na AWURADE kɔfa buralɛ kɔnnua kɔto wɔ kɔme kɔpem kyɛ okohu wɔ ɔ.

⁴⁹ AWURADE kɔma maen bie bɔ ɔwɔ dedeede, bɔ ofi aseɛ noa dɔ ɔ, ɔkɔɔto kɔhye wɔ kyɛ kɔleɛ. Ɔkɔyɛ maen bɔ ɛnde ye dwudwolɛ ɔ,

⁵⁰maen bɔ ye ti anu yɛ se, ye nye nzɔ aworowaa, ná onnwu ababunu koso anwumvoin ɔ.

⁵¹Okohu wɔ nyɛmmoa mɔ koli ná wasa wali w’aseɛ so aleɛ kɔpem kyɛ ekowu ɔ. Ɔngɔma w’aburoo, nzaa, ngoo, anaa wɔ nandwie mmaa ne wɔ mmoaen mmaa ko po ngɔha, kɔpem kyɛ ɔkɔmaa ekowu ɔ.

⁵²Ɔkɔha wɔ komia wɔ wɔ nguro ne amukoraati nu, kɔpem kyɛ wɔ fasue pindinn ndendenn ndendenn, bɔ afa wɔ nye ato so ne kodwiri kogua wɔ w’aseɛ ne amukoraati so ɔ. Ɔkɔha wɔ komia wɔ wɔ nguro ne amukoraati nu, wɔ w’aseɛ amukoraati bɔ AWURADE wɔ Nyameɛ wafa wama wɔ ne aso.

⁵³“Sɛ wɔ pɔfoɛ ne tua nguro nemɔ a, ɔnate ateetee ne amaneɛ bɔ ɔkɔmaa ɔkɔto wɔ ne ati, ekohu wɔ kunu mmaa koli, wɔ mma mmienzua ne mmrasua bɔ AWURADE wɔ Nyameɛ wafa wama wɔ ne, ekoli bɛ naen.

⁵⁴Wɔ nu bienzua bɔ odwo paa ná ɔkorɔkorɔ sona paa ne po, ɔkɔfa aleɛ kɔbɔ oliɛma aheɛ, ye ahone nu braa aheɛ, ɔne ye mma bɔ baha ne aheɛ.

⁵⁵Na sɛ ódi ye mma nemɔ naen a, ɔngɔma bɛ nu biala bie, ofikyɛ ye aleɛ bɔ waha ala ɛne: ɔnate ateetee ne amaneɛ bɔ wɔ pɔfoɛ tua wɔ nguro nemɔ amukoraati a, ɔkɔmaa ɔkɔto wɔ ne ati.

⁵⁶Wɔ nu brasua bɔ odwo paa ná ɔkorɔkorɔ sona paa ne: bɔ odwo ná ɔkorɔkorɔ ne ati, bɔ onguro kyɛ ɔkɔye ye gya kogua ase ɔ, ye koso ɔkɔfa aleɛ kɔbɔ ye ahone nu biaa aheɛ, yeɛ ɔwa bienzua ne ɔwa brasua koso aheɛ.

⁵⁷Ɔwo mmaa a, okoli ye si bɔ ɔkɔwa ne, ɔne mmaa nemɔ. Ɔkɔfea ye nwo koli, ofikyɛ ongonya aleɛ biala, wɔ mmerɛ bɔ wɔ pɔfoɛ kotua wɔ nguro nemɔ maa ɛkɔhɔ ateetee ne amaneɛ nu ne.

⁵⁸“Mmeraa he anu dwirɛ mukoraati bɔ bahyerɛ ye sɔ nwomaa he anu ne, sɛ anni so nahorɛ nu, ná anzuro sɔ animnyam dumaa suronyisuronyi, bɔ ye ole AWURADE wɔ Nyameɛ ne a,

⁵⁹ye de AWURADE kɔprapra amaneɛ bɔ ye noa yɛ hye kogua wɔ ne wɔ bosofoɛ so: amaneɛ pirikua bɔ ɔkɔhyɛ ɔ, ɔne anwonyerɛ tɛɛ koangɔ.

⁶⁰Misraim anwonyerɛ amukoraati bɔ né esuro ne, ɔkɔmaa okosa kɔbɔ wɔ, na bɛkɔyɛ koangɔ.

⁶¹Asa koso, anwonyerɛ biala ne amaneɛ biala bɔ bangyerɛ ye wɔ sɔ mmeraa nwomaa he anu ne, AWURADE kɔprapra kogua wɔ so kɔpem kyɛ ekowu ɔ.

⁶²Daa ne de, né ɛmɔsone pee kyɛ ewienu nzramaa, nakoso ɛmɔkɔha kãa bie, ofikyɛ andie AWURADE wɔ Nyameɛ dwirɛ.

⁶³Na kyɛbɔ AWURADE nye gyele kyɛ ɔkɔmaa okosi ɛmɔ yé, ná ɛmɔata pee nen, sɔ ala yeɛ ɔkɔyɛ AWURADE fɛ kyɛ okohũhũ ɛmɔ, ná wama ɛmɔ boso anua ɔ. Na okotu ɛmɔ kofi aseɛ bɔ ɛkwaafa tena so ne aso.

⁶⁴“AWURADE kɔmaa ɛkɔbɔ aya wɔ maen maen mukoraati so, fite aseɛ ti kɔka ye ti; na berɛ yeɛ ɛkɔso nyameɛ foforɛ biemɔ bɔ bafa mmakaa ne nyɔboɛ bayɔ ɔ, bɔ wɔ anaa wɔ nana mɔ bɛnze bɛ ɔ.

⁶⁵Wɔ nwo ngɔtɔ wɔ le wɔ sɔ maen nemɔ aso, yeɛ engonya amandena wɔ berɛ. AWURADE kɔfa ahunundetelɛ kɔto wɔ so wɔ berɛ; wɔ nye kɔyɛ wusiwusi, na wɔ wora kɔbɔ.

⁶⁶W’asetena nu kɔyɛ ahunundetelɛ ngome, ɛserɛ kɔha wɔ alesaleɛ ne alehyeleɛ, bɔ engonya wɔ ngoa nwo anyelasoɛ biala ɔ.

⁶⁷Aleɛ kye ngyerɛmɔ a, ɛkɔha kyɛ, ‘Me kunu a ahaa aleɛ adwo!’ yeɛ aleɛ dwo koso a, ɛkɔha kyɛ, ‘Me kunu a ahaa aleɛ ahye!’ ɔnate wɔ kunu bɔ ɔkɔtete wɔ, ɔne nningyein bɔ wɔ nye konwu ye ne ati.

⁶⁸AWURADE kɔsesa ɛmɔ kogua ɛlɛen mɔ nu kosa kɔfa ɛmɔ kɔhɔ Misraim. Ɔkɔfa ɛmɔ kɔfa atee bɔ ɔhyɛle ɛmɔ bɔ kyɛ ɛmɔ nye ngonwu ye ko ne aso; na berɛ yeɛ ɛmɔkɔyɛ bɛ nwo atɔen bɛkɔma ɛmɔ pɔfoɛ mɔ, kyɛ bɛ́fa ɛmɔ bɛ́yɛ nganga mmienzua ne mmrasua ɔ, nakoso ebiala ngɔtɔ ɛmɔ po.”