Read Sehwi Deuteronomi 29 Bible Online

Deuteronomi 29 - Sehwi bible

Deuteronomi 29

¹Apam bɔ AWURADE hyɛle Mose kyɛ ɔne Yisraelfoɛ bɛ́yɛ wɔ Moabo aseɛ so, ná ɔ́fa boka apam bɔ ɔne bɛ yɛle wɔ Horebo ne, nu dwirɛ ɛhe:

²Mose mane Yisraelfoɛ amukoraati beyiale, na osele bɛ kyɛ, “Nikyee biala bɔ AWURADE fa yɔle Faro, ye mbanyi mukoraati, ɔne ye aseɛ amukoraati wɔ Misraim aseɛ so ne, ɛmɔ nye tua;

³nzɔhwɛ mbiri bɔ wɔ nye nwuni ye, bɔ ɔte nzɛngyerɛnneɛ ne anwanwadeɛ mbiri ne.

⁴ Nakoso ɛnɛ ne ɛnɛ ye po, AWURADE nnya mmane ɛmɔ adwene bɔ ɔte edwirɛ (hemɔ) bo ɔ, anaa anyeɛ bɔ onwu nikye ɔ, anaa asoɛ bɔ ɔte dwirɛ ɔ.

⁵Afoɛ aburanna bɔ mamaa ɛmɔanate ɛserɛ so ne, ɛmɔ ndena andete wanga ɛmɔ nwo, yeɛ wɔ mbaboa koso wandete;

⁶ɛmɔanni paanoo, yeɛ ɛmɔanno bobe nzaa anaa nzaa serɛ biala, amaa ɔnate so ɛmɔanwu kyɛ me ole AWURADE ɛmɔ Nyameɛ ne.

⁷Mmerɛ bɔ ɛmɔdwuli wa nen, Hesebon hene Sihon ne Basan hene Ogo fale koɛ bɛɛtetale yɛ, nakoso yɛlili bɛ so ngonim.

⁸ Yɛfale b’aseɛ ne, na yɛfa yɛmane Rubenfoɛ, Gadefoɛ ne Manase abusua kure ne bue maa ɔyɛle b’agyapadeɛ.

⁹Yiti ɛ́mɔli apam he anu dwirɛ so nahorɛ nu, amaa ɔnate so bɔ ɛmɔkɔyɔ biala wasi ɛmɔ yé.

¹⁰“Ɛnɛ kyẽa ye, ɛmɔ amukoraa begyi AWURADE ɛmɔ Nyameɛ nyunu: ɛmɔ abusua kure mbanyi, ɛmɔ maen mbanyi, ɛmɔ atitirefoɛ, Yisrael mmienzua mukoraati,

¹¹ɛmɔ mma, ɛmɔ aye mɔ, ɔne ɛwɔfoɛ mɔ bɔ bɛwɔ w’asikyeleɛ ne anu, bɔ bɛ yeɛ bebubu eyein bɛma wɔ ná bɛsa nzue bɛma wɔ ɔ;

¹²kyɛ ɛ́fa wɔ nwo wura AWURADE wɔ Nyameɛ apam ne anu, apam bɔ ndaen foa so, bɔ AWURADE wɔ Nyameɛ ɔne wɔ bɛ́yɛ ye ɛnɛ kyẽa ye;

¹³amaa ɔnate so ɛnɛ kyẽa ye wafa wɔ wayɛ ye maen, bɔ ye koso ɔte wɔ Nyameɛ ɔ, kyɛbɔ ɔhyɛle wɔ bɔ, ɔne kyɛ ɔtale ye nwo ndaen hyirele wɔ nana mɔ Abraham, Yisake ne Yakob nen.

¹⁴Apam he bɔ ndaen foa so ye, ɛmɔ bɔ ɛnɛ kyẽa ye ɛmɔ ne yɛ gyi AWURADE yɛ Nyameɛ nyunu wa ye, nna me ne ɛmɔ ngome yeɛ yɛyɛ ɔ,

¹⁵na mmom bɛ bɔ ɛnɛ kyẽa ye bɛnne yɛ nwo wa ne koso bɛboka so.

¹⁶“Ɛmɔ bɔbɔ bɛse kyɛbɔ yɛtenane Misraim aseɛ so ɔ, ɔne kyɛbɔ yɛɛpɛle nu wɔ maen maen bɔ ɛmɔfale so bɛwale ne aso ɔ.

¹⁷Ɛmɔnwuni bɛ nningyein mɔ bɔ ɔwɔ bɛ berɛ bɔ bɛte Nyameɛ akyiwadeɛ ne: mmosoen fiɛ bɔ bafa mmakaa ne nyɔboɛ bayɔ ɔ, ɔne mmosoen bɔ bafa ɛdwetɛ ne sikaa kɔkorɛ bayɔ ɔ.

¹⁸ Ɛ́mɔnea yé ná ɛmɔ nu biala, bienzua oo, brasua oo, abusua oo, anaa abusua kure oo, wandwe ye nwo ɛnɛ kyẽa ye wamvi AWURADE yɛ Nyameɛ nwo, kyɛ ɔkwaaso sɔ maen maen nemɔ bɛ mmosoen nemɔ. Nnɛma ɛmɔ nu bie yɛ ye nwo bakaa weewee bɔ ye noa le ɛborɔ ɔ.

¹⁹Na ebiala bɔ ɔkɔte apam ndaen he anu dwirɛ, ná ɔkɔdwene saleɛ kɔma ye nwo kyɛ, ‘Ɔwɔ nu kyɛ meyɛ asoserɛ de, nakoso ngonya asomdwee’ nen, (sɔ nikyee ne ma sona bɔ ɔtengyɛ ne bɔnefoɛ bewu bɛbɔ nu),

²⁰ye de AWURADE ngɔfa sɔ sona ne nwo ngɔhyɛ ye, ofikyɛ AWURADE ɛyaafɛlɛ ne nungunɛ kɔyera ye kyɛ see. Musue mukoraati bɔ bahyerɛ ye nwomaa he anu ne kɔto ye, na AWURADE kokyikyi ye dumaa kofi aseɛ ye aso.

²¹AWURADE kɔye ye ngome twe kofi Yisrael abusua kure mukoraa nu, ná wama musue ato ye, kyɛbɔ apam ne anu musue amukoraa bɔ bahyerɛ ye mmeraa nwomaa he anu te ɔ.

²²Na kyẽa bie aworɛ ndoatoasoɛ, bɔ bɛte ɛmɔ boso ama ne, ɔne ɛwɔfoɛ mɔ bɔ bekofi dedeede maen so bɛkɔwa ne, sɛ benwu amaneɛ ne anwonyerɛ worawora bɔ AWURADE ate agua aseɛ ne aso a,

²³ aseɛ bɔ sɔfe ne ngyee ayera ye mukoraati ɔ, bɔ bennua hwee so ɔ, bɔ nikye fee mvifi so ɔ, bɔ bakaa anaa aleɛ biala nyɛ yee wɔ so ɔ, kyɛbɔ AWURADE fɛle ɛyaa piri sɛkyele Sodom, Gomora, Adema ne Seboyim a,

²⁴bɛ ne maen maen mukoraati kɔha kyɛ, ‘Nzu ati yeɛ AWURADE ayɛ aseɛ ye sɔa ye? Nzikyɛ yeɛ ɔmane sɔ ɛyaa piri he wale ye?’

²⁵Na bɛkɔhã kyɛ, ‘AWURADE, bɛ nana mɔ Nyameɛ apam bɔ ɔne bɛ yɛle, wɔ mmerɛ bɔ ɔɔyele bɛ fili Misraim aseɛ so wale ne, banni so ti ɔ.

²⁶Beelili nyameɛ foforɛ biemɔ asi bɛsɔnene bɛ, nyameɛ foforɛ biemɔ bɔ bɛnze bɛ ɔ, bɔ nna Nyameɛ yeɛ ɔfa mane bɛ ɔ.

²⁷Ɛhe ati yeɛ ɔmane AWURADE fɛle aseɛ he aso yaa piri paa ɔ, bɔ wamaa musue mukoraati bɔ bahyerɛ ye nwomaa he anu ato ye ɔ.

²⁸AWURADE fɛle yaa. Ole ɛyaa piri ne ɛyaa hahii yeɛ otuli bɛ fili b’aseɛ so ɔ, na waagyi bɛ wagua aseɛ foforɛ so, kyɛbɔ kekesaala ye ɔte ye.’

²⁹“Mvealeɛ nu dwirɛ te AWURADE yɛ Nyameɛ deɛ, nakoso edwirɛ bɔ wala ye ali ne de, ɔte yɛ ne yɛ mma mɔ deɛ afebɔɔ, amaa ɔnate so yali mmeraa he anu dwirɛ amukoraati so.