Read Sehwi Deuteronomi 32 Bible Online

Deuteronomi 32 - Sehwi bible

Deuteronomi 32

¹“O anwuro, yɛ asoɛ tie, na mebaadwudwo; Aseɛ, tie me noa dwirɛ ye.

²Me ngyerɛkyerɛ ne ɔ́tɔ kyɛ esue, me dwudwolɛ ne ógua kyɛ bosue, ɔ́yɛ kyɛ nyenyenzue bɔ ogua ndire so ɔ, ɔne nyaanyaa so nyasue.

³Ofikyɛ ngɔbɔ AWURADE dumaa dawure. Ɛ́mɔhã kyɛ yɛ Nyameɛ te piri!

⁴Nyɔbotaen ne, ye adwuma te pɛpɛɛpɛ, na ye atee mukoraa tengyɛ. Ɔte nahorɛ Nyameɛ, bɔ nnakannaka nne ye nu ɔ, ɔte pɛpɛɛpɛ, na ɔtengyɛ.

⁵ Nakoso ye mma ayɔ bɔne batia ye, na ɔnate bɛ nwo ngekalewa ne ati, nna ye mma ole bɛ ko, bɛte amumuyɛɛ ne nnakannaka aworɛ ndoatoasoɛ.

⁶Yiti akatuaa bɔ ɛfa ma AWURADE hɔ ɛne? Ngwaseafoɛ bɔ nworɛ nne bɛ ti anu ɔ! Aso nna wɔ baba bɔ ɔbɔle wɔ hɔ ɛne? Ye bɔ ɔyɔle wɔ, bɔ ɔmaa enyane nyinasoɛ ne!

⁷Kaye daa tete ne, ná nea afoɛ bɔ wapɛ nu wahɔ ɔ; bisa wɔ baba, na okohyire wɔ; bisa wɔ mbanyi mɔ, na bɛkɔhã bekohyire wɔ.

⁸ Anwuro Anwuro Nyameɛ hyɛle aseɛ mane maen maen mɔ nen, ohyirele nekaa bɔ ebiala ɔtena nen, ɔtotole maen maen nemɔ wɛen, kyɛbɔ Nyameɛ mma[11] nemɔ bɛ somaa te ɔ.

⁹Na AWURADE de, ye kyɛfa ole ye mmenia, Ye agyapadeɛ ole Yakob.

¹⁰“Onwuni ye wɔ ɛserɛ so, ɛserɛ pralaa suronyisuronyi so; ɔfale ye wurale ye kunu, ɔneane ye so, na ɔbɔle ye nwo waen kyɛ ye nye kyiremvua.

¹¹Kyɛbɔ kɔleɛ si bɔ ye saen nwo waen, ná otu faafaa wɔ ye mma so, ná ɔtrɛtrɛ ye ndaa nu sesa bɛ, ná ɔsoa bɛ wɔ ye ndaa so ne,

¹²AWURADE ngome twe yeɛ ohyirele ye atee ɔ; na nyameɛ foforɛ biala wammoka ye so.

¹³Ɔbɔle ye atenaseɛ wɔ aseɛ ne aso mmokaa so, na ɔmane ye aseɛ ne aso aleɛ maa olili; ɔmane ye nyɔbotaen nu woɛ maa olili, ɔne nyɔboɛ aseɛ so olive ngoo,

¹⁴ɔmane ye nandwie nyɔfonesue nye loe, ɔne boaen nyɔfonesue, mmoaen bɔ balɔ ɔ, Basan mmoaen nyii ne mbɔngye; ɔne atokoɔ paa, na ɛnone bobe mmaa nzaa bɔ bahwi ye gyengɔgyengɔ ɔ.

¹⁵“Yakob didili mane ye ko yili, Yesurun[12] yɛle branoa, na ɔyɛle lɔen. Ɛyɛle twɔtwɔfee, ɛyɛle piri bɔ ɛpakye ɔ. Afei ɔyakyili Nyameɛ bɔ ɔbɔle ye ne si lilɛ, na ɔpole Nyɔbotaen bɔ ɔte ye ngoalelɛ ne.

¹⁶Bɛsole nyameɛ foforɛ biemɔ mane Nyameɛ hwene ye nwo nungunɛ, na bɛfale akyiwadeɛ behuli ye ahone.

¹⁷ Bɛbɔle afɔleɛ bɛmane mmosoen, bɔ nna Nyameɛ ahɔ ɔ, nyameɛ foforɛ biemɔ bɔ bɛnze bɛ ɔ, ɔne nyameɛ foforɛ biemɔ bɔ anomasi wa ala yeɛ bɛwale ɔ, bɔ ɛmɔ nana mɔ anzuro bɛ ɔ.

¹⁸Nyɔbotaen bɔ ɔfale wɔ wale wiase ne de, andwene ye nwo, na wɔ wora fili Nyameɛ bɔ ɔwole wɔ ne.

¹⁹“Na AWURADE nwuni ye sɔ nen, ɔnate ye mma mmienzua ne mmrasua mɔ bɛ nwo ahi ti, ɔpole bɛ.

²⁰Na osele kyɛ, ‘Ngɔye me nye ngofi bɛ so, ná manea kyɛbɔ b’ayieleɛ kosi koyie bɛ ɔ, ofikyɛ bɛte amumuyɛɛ aworɛ ndoatoasoɛ, mmaa bɔ nahorɛ nne bɛ nu ɔ.

²¹ Bɛsole bɔ nna Nyameɛ ahɔ ɔ maa ndwene ye nwo nungunɛ, na bɛfale bɛ mmosoen fiɛ nemɔ bɛhane me anyinga. Yiti me koso, ngɔfa mmenia mbaen bie bɔ nna maen ahɔ ɔ maa bɛkɔhwe ye nwo nungunɛ, na ngɔfa ngwaseafoɛ maen ngɔhã bɛ anyinga.

²²Ofikyɛ m’ahone bɔ wahu ne asɔ see, na ogye toonn kodwu ɛborɔ ye bo dɔ, ɔyera aseɛ ne so aleɛ, na ɔfa see to mmokaa mɔ bɛ nyinasoɛ nu.

²³“ ‘Ngɔprapra musue ngogua bɛ so, ngɔto m’agyaen maa ɔkɔhɔ bɛ so.

²⁴Ɛhɔen kɔmaa bɛkɔfɔ, bɛ nwo kɔyerayera bɛ, na ewue anwonyerɛ kɔbɔ bɛ. Ngɔma ngaka aboyaa kɔɔhye bɛ koli, na ngɔma mvuture nu ewoo bɔ ye noa le borɔ kɔkeka bɛ.

²⁵Bɛ mma kɔtotɔ ngrandɛ noa wɔ dwaaso, na ɛserɛ kɔha bɛ wɔ sua nu. Mmerandeɛ ne ndaluwa kowuwu, nnɔma ne mbanyi bɔ bafu gyein koso sɔ ala.

²⁶Ngane kyɛ, “Ngɔmaa bɛkɔbɔ aya bɛkɔhɔ dedeede, ná mama bɛ nwo ngayeɛ afi mmenia ti anu koraa.”

²⁷Nakoso né mesuro kyɛ pɔfoɛ ne kɔfa kɔhoahoa ye nwo, ofikyɛ ebiaa né bɛ pɔfoɛ mɔ ande bɔ meyɔ ne abo, na bɛkɔhã kyɛ, ‘Yali ngonim; nna AWURADE yeɛ ɔyɔle sɔ nningyein he amukoraati ɔ.’

²⁸“Bɛte maen bɔ adwene nne bɛ ti anu ɔ, belle ndeaseɛ.

²⁹Sɛ bɛse nworɛ a, ahaa bɛkɔte ɛhe abo, ná banwu kyɛbɔ b’ayieleɛ kosi koyie bɛ ɔ!

³⁰Ahaa ɔkɔyɛ sɛɛ né sona horɛ wahora wafoa mmenia apee, ná mmenia nyɔ ama mmenia apee buru banwati ɔ? Sana bɛ Nyɔbotaen ne waye ye sa wafi bɛ bo, sana AWURADE aye bɛ wama koraka.

³¹Ofikyɛ bɛ nyɔbotaen ne, ɔtte kyɛ yɛ Nyɔbotaen ne, na yɛ pɔfoɛ mɔ bɔbɔ po bɛse.

³²Ofikyɛ Sodom bobe nu yeɛ bɛ bobe fi ɔ, ofi Gomora bobe boo nu; bɛ bobe mmaa nemɔ noa te ɛborɔ, bɛ mma bɔ wasu biribiraa ne yɛ wee;

³³ewoo noa borɔ yeɛ ɔte bɛ nzaa ɔ, nzaa ne te kyɛ ɛkyenebene bɔ ye noa borɔ yɛ hye ɔ.

³⁴“Aso mmvale ɛhemɔ amukoraa nnziele, bɔ makata so wɔ nekaa bɔ mesie nningyein ɔ?

³⁵ Wereɛtɔlɛ ne akatuaa te me deɛ, ɔngɔhyɛ biala, bekosoti; ofikyɛ b’amaneɛnwunɛ kyẽa ne apingye, na b’ayieleɛ ɔ́ba ndɛndɛ.

³⁶Amba, AWURADE kobua ye mmenia be, okonwu ye ngoaa anwumvoin, mmerɛ bɔ okonwu kyɛ b’anwoserɛ ayie, bɔ ebiala nne berɛ bɔ waha, bɔ ɔte akoaa anaa dehyeɛ ɔ.

³⁷Afei AWURADE kɔha kyɛ, ‘Bɛ nyameɛ nemɔ wɔ nisua, nyɔbotaen bɔ bɛfale bɛ wora bewurale nu ne,

³⁸nyameɛ mɔ bɔ belili b’afɔleɛ so loe, ná bɛnone b’anonneɛ afɔleɛ nzaa nen? Ɛ́mɔma bedwɔso bɛɛboka ɛmɔ e! Ɛ́mɔma bɛ́bɔ ɛmɔ nwo waen e!

³⁹“Afei de, ɛ́mɔnwu ye kyɛ ME OLE YE, na nyameɛ biala nne berɛ bɔ ɔboka me so ɔ. Me yeɛ meku, ná mesa mema ngoa ɔ; me yeɛ mepura, ná mesa mesa anwonyerɛ ɔ; na sɛ me sa sɔ ebie nu a, ebiala nne berɛ bɔ ɔkɔhora kole ye ɔ.

⁴⁰Ofikyɛ mema me sa so mekyire nyameɛso, ná meta ndaen kyɛ, Kyɛ nde ase afebɔɔ ye de,

⁴¹sɛ mesi me ngrandɛ nahanaha ne, ná me sa sɔ nu wɔ ndɛenbualɛ nu a, ngɔtɔ me pɔfoɛ mɔ so wereɛ, na bɛ bɔ bekyi me koso, ngotua bɛ so kerɛ.

⁴²Ngɔma m’agyaen kɔno mogya kɔbo, na me ngrandɛ koli naen: bɛ bɔ bawuwu ne bɛ bɔ bahye bɛ nnure mogya, ɔne pɔfoɛ mɔ bɔ bɛ ti nwiaa afu agua bɛ nwo[13] ɔ.’

⁴³ “O, maen maen, ɛmɔ ne ye mmenia beli ahurusi, [mmosoen amukoraa, ɛ́mɔkoto AWURADE] ofikyɛ ɔkɔtɔ ye ngoaa mɔ mogya so wereɛ, ɔkɔtɔ ye pɔfoɛ mɔ so wereɛ, [okotua bɛ bɔ bekyi ye kerɛ], ná wate aseɛ ne anwo wama ye mmenia.”

⁴⁴Mose ne Nun awa Yosua wale, na ɔkengale edwein he anu dwirɛ mukoraati mane maen ne tele.

⁴⁵Mose kengale edwirɛ he amukoraa hyirele Yisraelfoɛ amukoraa yiele nen,

⁴⁶osele bɛ kyɛ, “Edwirɛ bɔ ɛnɛ kyẽa ye meka mefa medi adanzeɛ metia ɛmɔ ye, odi kyɛ ɛmɔfa besie ɛmɔ ti anu. Ɛ́mɔfa bɛ́tete ɛmɔ mma, amaa ɔnate so bɛ wora bali mmeraa he anu dwirɛ amukoraa so nahorɛ nu.

⁴⁷Ofikyɛ ɔtte edwirɛ mbaen biala, na mmom ɔte ɛmɔ ngoa nyamaa. Na aseɛ bɔ ɛmɔkwaapɛ asue Yɔɔdan bɛfa bɛtena so ne, sɔ edwirɛ he yeɛ ɔkɔmaa ɛmɔkɔtena so bɛkɔhyɛ ɔ.”

⁴⁸ Sɔ kyẽa ne ala, AWURADE sele Mose kyɛ,

⁴⁹“Fo kɔ Abarim mmokaa nemɔ aso, bɔ ɔwɔ Moabo aseɛ so ne, ná fo kɔ Nebo bokaa bɔ ɔwɔ Yeriko ndendeneɛ so ne aso, ná to wɔ nye nea Kanaan aseɛ bɔ méfa méma Yisraelfoɛ maa ɔyɛ bɛ deɛ ne.

⁵⁰Ekowu wɔ bokaa bɔ ɛbaafo ne aso, na ɛkɔɔtoa wɔ mbanyi mɔ, kyɛbɔ eliɛma Aarɔn wuli Hɔre bokaa ne aso, ná ɔɔtoale ye mbanyi mɔ nen.

⁵¹Ofikyɛ ɛmɔ amunyɔ banni nahorɛ bamma me wɔ Yisraelfoɛ nyunu wɔ Meribate Kadese nzue nwo, wɔ Sen ɛserɛ ne aso; ɔnate kyɛ ɛmɔammu me kyɛ nde krongron wɔ Yisraelfoɛ nu.

⁵²Ekonwu aseɛ bɔ méfa méma Yisraelfoɛ ne kyɛ ɔla wɔ nyunu dɔ de, nakoso wɔ gya baa ngotia so.”