Read Sehwi Deuteronomi 34 Bible Online

Deuteronomi 34 - Sehwi bible

Deuteronomi 34

¹Afei Mose fili Moabo aseɛ frɛtɛɛ ne aso, na ɔfo hɔle Nebo bokaa ne aso, wɔ Pisiga ti afia, wɔ Yeriko ndendeneɛ so. Na AWURADE hyirele ye aseɛ ne amukoraati, fite Gileade bɔ ɔkwaadwu Dan,

²Nafetali amukoraati, Efraim ne Manase aseɛ, Yuda aseɛ amukoraati bɔ ɔkwaadwu eyia atɔleɛ ɛpo ne noa ne,

³ngwaen dɔ aseɛ ne, ɔne aseɛ frɛtɛɛ ne, bɔ ɔte ayee ayee kuro Yeriko ye bɔnza ne, bɔ ɔkwaadwu Soa.

⁴Na AWURADE sele ye kyɛ, “Aseɛ he yeɛ ndale ye nwo ndaen ngyirele Abraham, Yisake ne Yakob kyɛ, ‘Wɔ bosofoɛ yeɛ ngɔfa ngɔma bɛ ɔ.’ Mama wɔ nye anwu ye, nakoso dɔ de, wɔ gya baa ngotia dɔ.”

⁵Afei AWURADE somvoɛ Mose wuli dɔ wɔ Moabo aseɛ so, kyɛbɔ AWURADE noa dwirɛ te ne.

⁶Osiele ye wɔ bɔnza nu, wɔ Moabo aseɛ so, wɔ Bete Peɔ ndendeneɛ so; nakoso ɔbaadwu ɛnɛ ye, ebiala nze nekaa bɔ ye asieleɛ wɔ ɔ.

⁷Mose lili afoɛ ɛyaa ko ne aburanyɔ yeɛ owuli ɔ. Ye nye anyɛ ye wusiwusi, yeɛ ye anwoserɛ so ande.

⁸Na Yisraelfoɛ suni Mose wɔ Moabo aseɛ frɛtɛɛ ne aso eleburasa, na ngyẽa bɔ bɛfa besuni ye ɔ, ɔne ye sɛenyɛlɛ ne wale ayieleɛ.

⁹Na nworɛ sunzum yili Nun awa Yosua ti anu tɛkyɛɛ, ofikyɛ né Mose afa ye sa wagua ye so; Yisraelfoɛ tiele Yosua dwirɛ, na belili nhyehyɛleɛ bɔ AWURADE fa mane Mose ne aso.

¹⁰ Ngɔmhyɛlɛniɛ foforɛ biala nne berɛ bɔ wadwɔso wɔ Yisrael bɔ ɔte kyɛ Mose ɔ. Ye yeɛ AWURADE maa ogyinane ye nyunu ɔne ye bedwudwole ɔ;

¹¹na sɔ Mose ne yeɛ AWURADE somane ye maa ɔɔyɔle nzɛngyerɛnneɛ ne anwanwadeɛ mukoraa wɔ Misraim aseɛ so ne. Na ɔyɔ tiale Faro ne ye mbanyi mukoraa ne ye aseɛ mukoraa.

¹²Ebiala nne berɛ bɔ AWURADE afa ye so wayɔ anwanwadeɛ mbiri mbiri ne suronyisuronyi hemɔ amukoraa, kyɛbɔ Mose yɔle ye wɔ Yisraelfoɛ mukoraa nyunu ne.