Read Sehwi Deuteronomi 4 Bible Online

Deuteronomi 4 - Sehwi bible

Deuteronomi 4

¹“Afei Yisrael, tie ahyɛdeɛ ne nhyehyɛleɛ bɔ mekyirekyire ɛmɔ kyɛ ɛmɔli so ne, amaa ɔnate so ɛmɔanya ngoa, ná ɛmɔahɔ baafa aseɛ bɔ AWURADE ɛmɔ nana mɔ Nyameɛ ɔ́fa ma ɛmɔ ne.

² Mmeraa bɔ méfa méma ɛmɔ ne, nnɛma ɛmɔfa bie bɛboka so, yeɛ nnɛma ɛmɔye bie befi nu, na mmom ɛ́mɔli AWURADE ɛmɔ Nyameɛ mmeraa dwirɛ bɔ méhyehyɛ méma ɛmɔ ne aso.

³ Ɛmɔ bɔbɔ bɛ nye tua bɔ AWURADE yɔle ye wɔ Baal Peɔ ɔ, ofikyɛ ɛmɔ nu mmenia bɔ belili Baal bɔ ɔwɔ Peɔ si ne, AWURADE ɛmɔ Nyameɛ huhuni bɛ fili ɛmɔ nu.

⁴Nakoso ɛmɔ bɔ ɛmɔfale bɛ nwo bɛbɔle AWURADE ɛmɔ Nyameɛ ne de, ɛmɔ amukoraa bɛtɛ te ase.

⁵Ɛ́mɔtie, kyɛbɔ AWURADE me Nyameɛ hyɛle me ne, sɔ ala yeɛ mahyirehyire ɛmɔ ahyɛdeɛ ne nhyehyɛleɛ ne ɔ, kyɛbɔ ɔkɔyɛ bɔ ɛmɔkoli so wɔ aseɛ bɔ ɛmɔkwaafa bɛtena so ne aso ɔ.

⁶Ɛ́mɔli so ná ɛ́mɔfa bɛyɔ adwuma, ofikyɛ ɛhe kɔma ɛmɔ nworɛ ne ndeaseɛ kɔla ali wɔ maen maen mukoraa nyunu, amaa sɛ bɛte sɔ ahyɛdeɛ ne a, baha kyɛ, ‘Amba, maen titire he anu mmenia se nworɛ na bele ndeaseɛ!’

⁷Aso maen titire foforɛ bie wɔ berɛ, bɔ ole nyameɛ bie bɔ opingye ye mmenia te kyɛ AWURADE yɛ Nyameɛ si pingye yɛ ɔ, bɔ otie yɛ mmerɛ biala bɔ yɛkosu yɛkɔfrɛ ye ɔ?

⁸Aso maen titire foforɛ bie wɔ berɛ, bɔ ole ahyɛdeɛ ne nhyehyɛleɛ bɔ ɔtengyɛ kyɛ sɔ mmeraa he amukoraa bɔ méfa méma ɛmɔ ɛnɛ ye ɔ?

⁹ “Nakoso ɛ́mɔnea yé, ɛ́mɔnea ɛmɔ nwo yé, ná ɛmɔ wora amvi nningyein bɔ ɛmɔ nye anwu ye ne, yeɛ nnɛmɔma ofi ɛmɔ ti anu le wɔ mmerɛ biala bɔ ɛmɔte ngoa nu ɔ. Ɛ́mɔfa béhyirehyire ɛmɔ mma ne ɛmɔ nnomaa;

¹⁰kyɛbɔ daa bie ɛmɔgyinane AWURADE ɛmɔ Nyameɛ nyunu wɔ Horebo, bɔ AWURADE sele me kyɛ, ‘Boaboa mmenia ne noa ma me, ná nga me noa nu dwirɛ ngyire bɛ, amaa ɔnate so basua kyɛ bekosuro me wɔ mmerɛ biala bɔ bɛte ase ɔ, ná bafa bahyirehyire bɛ mma mɔ.’

¹¹ Ɛmɔpingyele berɛ, na ɛmɔgyinane bokaa ne nye abo, wɔ aberɛ bɔ né bokaa ne gye wuronyiwuronyi kɔ anwuro anwuro wɔ munungum kabii ne awosii tunn nu ɔ.

¹²Afei AWURADE dwudwo hyirele ɛmɔ fili see ne anu. Ɛmɔtele edwudwolɛ de, nakoso ɛmɔannwu AWURADE, komviɛ ne ala yeɛ ɛmɔtele ɔ.

¹³ Na ye apam, bɔ ye ole mmeraa dwirɛ buru ne, ɔha hyirele ɛmɔ. Ɔhyɛle ɛmɔ kyɛ ɛmɔli so, na ɔhyerɛle bɛ guale nyɔboɛ taataa nyɔ so.

¹⁴ Na sɔ mmerɛ ne, AWURADE hyɛle me kyɛ ngyirekyire ɛmɔ ahyɛdeɛ ne nhyehyɛleɛ bɔ ɔsɛ kyɛ ɛmɔdi so wɔ aseɛ bɔ ɛ́mɔpɛ asue Yɔɔdan bɛkɔɔfa ne aso ɔ.

¹⁵“Kyẽa bɔ AWURADE dwudwo hyirele ɛmɔ fili see ne anu wɔ Horebo nen, ɛmɔannwu AWURADE, yiti ɛmɔnea ɛmɔ nwo yé paa,

¹⁶ ná ɛmɔangua ɛmɔ nwo fiɛ banyɔ amoen bamma bɛ nwo: mekyire nikyee bɔ ye sue te kyɛ bienzua anaa brasua,

¹⁷ anaa nikyee bɔ ye sue soma aseɛ ye aso kaka bie ɔ, anaa nikyee bɔ ye sue soma anomaa bɔ otu fa ewienu ɔ,

¹⁸anaa nikyee bɔ ye sue soma kaka bɔ ɔtwe ye nwo ase ɔ, anaa nikyee bɔ ye sue soma aseɛ bo dɔ nzue nu naen ɔ.

¹⁹Na sɛ ɛto wɔ nye anwuro ná enwu eyia, ɛsraen, nzramaa ne anwuro abɔdeɛ pembepembe mukoraati a, nnɛmaa ɔtwetwe wɔ maa egua ndwerɛ wɔ bɛ nyunu, ná anzɔne bɛ, ofikyɛ bɛte nningyein bɔ AWURADE wɔ Nyameɛ afa ama mmenia mukoraati bɔ bɛwɔ wiase nekaa biala ɔ.

²⁰ Nakoso ɛmɔ de, AWURADE afa ɛmɔ, na waye ɛmɔ wafi buralɛ afaa hyerɛhyerɛ nu, mekyire Misraim, kyɛ ɛmɔɔyɛ ye bɔbɔ deinn ye deɛ, kyɛbɔ kekesaala ye ɛmɔte ye.

²¹ “Ɔnate ɛmɔ ti AWURADE fɛle me so yaa, na ɔtale ndaen kyɛ mengɔpɛ asue Yɔɔdan, yeɛ me gya baa koso ngotia aseɛ paa bɔ AWURADE wɔ Nyameɛ ɔ́fa ma wɔ maa ɔyɛ wɔ deɛ ne aso.

²²Me de, sɔ aseɛ he aso ala yeɛ ngowu ɔ, na mengɔpɛ asue Yɔɔdan; nakoso ɛmɔ de, ɛmɔkɔpɛ ye bɛkɔhɔ ye si bɛkɔɔfa sɔ aseɛ paa ne bɛkɔyɛ ɛmɔ deɛ.

²³Yiti ɛ́mɔnea yé ná ɛmɔ wora amvi apam bɔ AWURADE ɛmɔ Nyameɛ ɔne ɛmɔ yɛle ne, ná ɛmɔanyɔ amoen biala sɛso, kyɛbɔ AWURADE wɔ Nyameɛ abera wɔ ne.

²⁴ Ofikyɛ AWURADE wɔ Nyameɛ ne, ɔte see bɔ ɔyera motoo ɔ, Nyameɛ bɔ ɔtwe nungunɛ ɔ.

²⁵“Sɛ ɛwo mmaa ná enya nnomaa, ná ɛhyɛ ye bo edi wɔ ti piri wɔ aseɛ ne aso, ná sɛ ɛyɔ amoen biala sɛso ɛfa gua wɔ nwo fiɛ, maa ɔnate so ɛyɔ bɔne wɔ AWURADE wɔ Nyameɛ nyunu ma ye ahone hu a,

²⁶ye de méfrɛ anwuro ne aseɛ maa bedi adanzeɛ betia ɛmɔ ɛnɛ kyẽa ye, kyɛ ɔngɔhyɛ biala ɛmɔ boso konua bɔkɔɔ wɔ aseɛ bɔ ɛmɔkwaapɛ asue Yɔɔdan bɛkɔfa ne aso. Ɛmɔngɔtena so bɛngɔhyɛ, na ɛmɔ boso konua bɔkɔɔ.

²⁷ AWURADE kɔbɔ ɛmɔ kɔsande kɔhɔ maen maen nemɔ aso, na ɛmɔ nu kãa bie yeɛ bekonya ngoa wɔ maen maen bɔ AWURADE kɔhwe ɛmɔ kɔhɔ so ne aso ɔ.

²⁸Na dɔ yeɛ ɛmɔkɔso nyameɛ foforɛ mɔ bɔ kuro sona afa ye sa ayɔ ɔ, nikyee bɔ bɛte mmakaa ne nyɔboɛ, bɔ bennwu nikye, bɛnde dwirɛ, bennidi, anaa bɛmvofa nikye ɔ.

²⁹ Na dɔ yeɛ ɛmɔkɔpena AWURADE ɛmɔ Nyameɛ si atee ɔ. Na sɛ ɛmɔfa ɛmɔ ahone amukoraati ne ɛmɔ kra amukoraati bɛpena ye si atee a, ɛmɔkonwu ye.

³⁰Na sɛ ɛkɔ anwokyere nu, ná kyẽa bie sɔ nningyein hemɔ amukoraa toto wɔ a, ekosa kɔwa AWURADE wɔ Nyameɛ berɛ, ná atie ye dwirɛ.

³¹Na ɔnate kyɛ AWURADE wɔ Nyameɛ te anwumvoinnwunɛ Nyameɛ ne ati, ɔngɔyakyi wɔ nu, yeɛ ongohu wɔ; na ɔne wɔ nana mɔ apam bɔ bɛyɛle, bɔ ɔfale ndaen foale so ne, ye wora ngofi.

³²“Wɔ de, kaye daa tete mmerɛ bɔ wapɛ nu wahɔ ne, fite mmerɛ bɔ Nyameɛ bɔle kuro sona tole aseɛ so ɔ, ná bisa fite ewiase ye ti kɔha ye ti nea, sɛ edwirɛ pirikua sɔaa bie asi le, anaakyɛ bate ebie nwo mbopoleɛ po le a?

³³Aso mmenia bie wɔ berɛ bɔ bate Nyameɛ[4] komvi kyɛ odwudwo fi see nu, kyɛbɔ ate ye, ná banya ngoa ɔ?

³⁴Anaakyɛ nyameɛ bie wɔ berɛ bɔ wasi ye ahone le kyɛ ɔkwaaye maen bie fi maen foforɛ so ɔfa yɛ ye deɛ, bɔ nzɔhwɛ, nzɛngyerɛnneɛ ne anwanwadeɛ, koɛ, tumi nnwumaa, ɔne tumi asaa, yeɛ ɔfa yɔle sɔ ɔ, kyɛbɔ AWURADE ɛmɔ Nyameɛ yɔ mane ɛmɔ wɔ Misraim maa enwuni ye ne?

³⁵ Wɔ de, ɔmaa enwuni sɔ nningyein ne, amaa ɔnate so ale ato nu kyɛ AWURADE te Nyameɛ, na nyameɛ foforɛ biala nne berɛ bɔ ɔboka ye so ɔ.

³⁶Ɔmaa ɛtele ye komvi fili nyameɛso, kyɛ ɔ́fa tengyɛtengyɛ wɔ. Na aseɛ ye aso koso, ɔmaa enwuni ye see pirikua ne, na ɛtele ye dwudwolɛ fili see ne anu.

³⁷Na ɔnate kyɛ ohurole wɔ nana mɔ dwirɛ ne ati, ɔpale nu yele bɛ bosofoɛ. Na ye bɔbɔ deinn ɔnate ye tumi piri so yeɛ ɔyele wɔ fili Misraim ɔ.

³⁸Na ɔfoane maen maen bɔ bɛ mbiri ne b’anwoserɛ tra wɔ ɔ fili wɔ nyunu, kyɛ ɔ́fa wɔ batena b’aseɛ so, ná ɔfa ma wɔ maa ɔyɛ wɔ deɛ, kyɛbɔ kekesaala ye ɔte ye.

³⁹Yiti, te ye bo ɛnɛ, ná fa sie wɔ ti anu, kyɛ AWURADE te Nyameɛ bɔ ɔwɔ nyameɛso anwuro anwuro ne aseɛ so ɔ, na nyameɛ foforɛ biala nne berɛ ko.

⁴⁰Ye sɔ ne ati, di ye ahyɛdeɛ ne ye mmeraa dwirɛ bɔ méhyehyɛ méma wɔ ɛnɛ kyẽa ye aso, amaa ɔnate so wayie wɔ ne wɔ bosofoɛ yé, ná atena aseɛ bɔ AWURADE wɔ Nyameɛ ɔ́fa ma wɔ afebɔɔ ne aso ahyɛ.”

⁴¹ Afei Mose yele nguro nza siele berɛ wɔ asue Yɔɔdan eyia afiteleɛ,

⁴²nekaa bɔ sona bɔ wahũ obiɛngo kora nwati kɔ ɔ, mekyire sona bɔ wanhyɛ da yeɛ ohuni obiɛngo ɔ, obiɛngo bɔ né edwirɛ tɛɛ biala nne b’afia ɔ. Na sɔ nguro ne, sɛ ɔnwati kɔ nu ko aso a, onya ye ti didi nu.

⁴³Nguro nemɔ, ɔyele Besɛre bɔ ɔwɔ bokaa frɛtɛɛ so wɔ ɛserɛ so ne siele berɛ mane Rubenfoɛ, Ramote bɔ ɔwɔ Gileade mane Gadefoɛ, yeɛ Golan bɔ ɔwɔ Basa mane Manasefoɛ.

⁴⁴Mmeraa bɔ Mose fa tole Yisraelfoɛ nyunu ne ɛhe.

⁴⁵Ɛhemɔ te edwirɛ, ahyɛdeɛ ne nhyehyɛleɛ bɔ Mose fa mane Yisraelfoɛ wɔ mmerɛ bɔ befili Misraim bɛwale ne,

⁴⁶wɔ asue Yɔɔdan si, bɔnza ne anu, wɔ Bete Peɔ ndendeneɛ so, wɔ Amorifoɛ hene Sihon bɔ né odi hene wɔ Hesebon n’aseɛ so. Ye yeɛ Mose ne Yisraelfoɛ lili ye so ngonim wɔ mmerɛ bɔ befili Misraim bɛwale ne ɔ.

⁴⁷Bɛfale ye aseɛ ne, ɔne Basan hene Ogo aseɛ ne. Sɔ Amorifoɛ hene nyɔ ne, né bedi hene wɔ asue Yɔɔdan eyia afiteleɛ;

⁴⁸fite Aroye bɔ ɔwɔ Anɔn bɔnza ne noa kodwu Sion bokaa (bɔ besa bɛfrɛ ye Hɛmɔn) ne nwo;

⁴⁹ɔne Araba mukoraati bɔ ɔla asue Yɔɔdan eyia afiteleɛ ne, bɔ ɔkwaadwu Araba ɛpo ne noa wɔ Pisiga bokaa ne aseɛnwo dɔ ne.